Umucamanza yahinduye icyemezo cye, yemerera Kabuga guhura n’abamwunganira

Yanditswe na IGIHE
Kuya 2 Ukuboza 2020 saa 01:11
Yasuwe :
0 0

Umucamanza lain Bonomy w’Urwego Mpuzamahanga Rwashyiriweho Gukora Imirimo y’Insigarira y’Inkiko Mpanabyaha, IRMCT, yemereye Kabuga Félicien ufunzwe akekwaho ibyaha bya Jenoside guhura n’abamwunganira, ingingo yaherukaga gutera utwatsi.

Ku wa 4 Ugushyingo 2020 nibwo uyu mucamanza yanze ubusabe bwa Me Emmanuel Altit wunganira Kabuga, wasabaga ko bakwemererwa guhura bakitegura urubanza, mu gihe bitemewe ko abantu basanzwe binjira muri gereza kubera icyorezo cya COVID-19, hagakoreshwa gusa uburyo bw’ikoranabuhanga.

Bemerewe guhura imbonankubone ku wa 11 Ugushyingo 2020, ubwo Kabuga yagezwaga imbere y’urukiko ku nshuro ya mbere, nyuma yo koherezwa gufungirwa mu Buholandi, nabwo bikorwa hagendewe ku mabwiriza y’inzego z’ubuzima yo kwirinda iki cyorezo.

Gusa ku wa 17 Ugushyingo 2020, umwavoka wa Kabuga yongeye kwandikira umucamanza, basaba ko bakwemererwa kujya bakorana inama bari kumwe mu buryo buhoraho, haba kuri gereza cyangwa mu nyubako z’Urwego. Icyo gihe bavuze ko mu nama bagiranye na Kabuga ku munsi wo kugezwa mu rukiko, ari nk’aho aribwo baganiriye neza gusa, kuko Kabuga yakomeje kugira ibibazo byo gutumanaho hakoreshejwe ikoranabuhanga ry’amashusho ndetse abamwunganira bavuga ko kuvugana muri ubwo buryo bitajyanye n’uburenganzira bw’uregwa, bwo kujya inama n’abamwunganira.

Abamwunganira bavugaga ko ubwanditsi bw’urukiko bwashyiraho uburyo bahuramo bubahirije amabwiriza yo kwirinda COVID-19, kuko bakeneye kumumenyesha mu buryo buhoraho aho dosiye igeze, kimwe n’ibishobora kuyihindurwamo, bavuga ko byagenda neza nk’uko byagenze ku wa 11 Ugushyingo 2020.

Ni ubusabe ariko ubwanditsi bw’urukiko butemeraga kuko bwagaragaje ko Kabuga n’abo bafunganywe bakeneye kubungabungirwa ubuzima, cyane ko bari mu byago by’abashobora kuzahazwa cyane na COVID-19 bitewe ahanini n’imyaka bagezemo.

Bwavugaga ko hakomeza gukoreshwa itumanaho ry’amashusho kuko nta cyo bisaba Kabuga ubwe, ahubwo bifashwa ngo iryo tumanaho rishoboke. Ubushinjacyaha bwo bwanze kugaragaza aho buhagaze kuri iki cyifuzo.

Mu nyandiko y’icarubanza yo ku wa 30 Ugushyingo, Umucamanza Ian Bonomy yavuze ko Kabuga yoherejwe mu Buholandi kubera impungenge z’ubuzima, n’ubu ibizamini by’ubushobozi bw’umubiri we birakomeje, ku buryo hakenewe ingamba zo gusigasira amabwiriza yo gukumira COVID-19 yubahirizwa guhera muri Werurwe 2020.

Yakomeje ati “Nubwo telefoni n’itumanaho ry’amashusho bikoreshejwe mu buryo bw’umwihariko buhoraho byubahiriza uburenganzira bwa Kabuga mu rubanza muri rusange mu buryo bw’igihe gito bijyanye n’aho urubanza rugeze, kutabasha guhura abantu bari kumwe bishobora kudindiza imyiteguro y’urubanza mu buryo bw’igihe kirekire.”

Yavuze ko ubwanditsi bw’urukiko bukwiye kwemerera Kabuga guhura n’umwavoka we bubahiriza amabwiriza y’inzego z’ubuzima, mu byumweru bibiri bya mbere by’Ukuboza 2020, ngo bungurane ibitekerezo ku ngingo zavuzweho agezwa bwa mbere imbere y’umucamanza, n’ibishobora kuza mu gihe cya mbere cya 2021.

Umucamanza yavuze ko Ubwanditsi bukwiye gukomeza gukurikirana aho icyorezo kigana no gushaka ibisubizo byatuma Kabuga abonana n’umwavoka we, kuri gereza cyangwa mu nyubako z’Urwego, mu buryo ngarukagihe hitawe ku mabwiriza y’inzego z’ubuzima.

Yategetse ko Kabuga n’umwunganizi we bemererwa kubonana mu byumweru bibiri bya mbere byo mu Ukuboza 2020, ni ukuvuga bitarenze ku wa Kabiri tariki 15 Ukuboza 2020.

Kuva ahagana ku wa 25 Mata 1994 kugera muri Nyakanga 1994, Félicien Kabuga yari Perezida wa Komite y’Agateganyo y’Ikigega cyo kurengera igihugu, mu gihe ibyaha aregwa byakorwaga, akaba yari na Perezida wa Komite yatangije Radiyo RTLM.

Ibyaha aregwa ni Jenoside, kuba icyitso cy’abakoze Jenoside, guhamagarira abantu mu buryo butaziguye kandi mu ruhame gukora Jenoside, ubwinjiracyaha bwa Jenoside, ubwumvikane bugamije gukora Jenoside, n’itsembatsemba n’itoteza nk’ibyaha byibasiye inyokomuntu, byakozwe mu rwego rwa Jenoside yakorewe Abatutsi, mu Rwanda, mu mwaka wa 1994.

Kabuga yemerewe kubonana n'abamwunganira mu mategeko

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .