Umuburo ku bibasira abiganjemo igitsina gore bifashishije imbuga nkoranyambaga

Yanditswe na Evariste Nsengimana
Kuya 23 Kanama 2019 saa 08:31
Yasuwe :
0 0

Abakoresha imbuga nkoranyambaga baburiwe ku bihano bikarishye bashobora guhabwa mu gihe bishoye mu bikorwa byo kubuza amahoro bagenzi babo, cyane cyane ab’igitsina gore, birimo kubinjirira mu buzima bwite, kubatesha agaciro no kubabuza gutanga ibitekerezo.

Imbuga nkoranyambaga zirimo Facebook, WhatsApp, Twitter, YouTube, Instagram n’izindi ni umwe mu miyoboro yifashisha ikoranabuhanga mu gutanga ibitekerezo no guhanahana amakuru ku ngingo zitandukanye.

Gusa ukunze gusanga hari abazikoresha mu buryo bunyuranyije n’amategeko, bakibasira abandi bifashishije inyandiko, amafoto cyangwa amashusho bagatukana, bagasebanya n’ibindi bibangamira uburenganzira bw’ikiremwamuntu.

Mu biganiro byahuje inzego zirimo itangazamakuru, iz’umutekano, izihagarariye abagore n’izindi kuri uyu wa 22 Kanama 2019, hagaragajwe ko igitsina gore aribo bibasirwa cyane ku mbuga nkoranyambaga.

Ibi biganiro bigamije kureba uruhare rw’itangazamakuru mu kuzamura umubare w’abagore bakoresha ikoranabuhanga, byateguwe n’Urwego rw’Abanyamakuru bigenzura (RMC) rufatanyije n’ishyirahamwe ry’abagore bakora umwuga w’itangazamakuru (ARFEM) na [email protected]

Umuyobozi wa ARFEM, Ingabire Egidie, yavuze ko umubare w’abakobwa n’abagore bifashisha ikoranabuhanga mu gutanga ibitekerezo ukiri hasi nyamara byaragaragaye ko iyo ryifashishijwe bigera kuri benshi kandi vuba.

Umunyamabanga Nshingabikorwa wa RMC, Mugisha Emmanuel, yavuze ko mu bibuza abagore n’abakobwa gukoresha ikoranabuhanga mu gutanga ibitekerezo harimo ubumenyi buke barifiteho, ubushobozi buke bwo kugura ibikoresho byaryo no kuba hari abaryifashisha mu kubahohotera buririye ku bitekerezo batanze.

Mu ngero zatanzwe kuri iyi ngingo harimo hari aho usanga abakoresha imbuga nkoranyambaga bibasira igitsina gore babahora imyambarire yabo, ibitekerezo batanga n’ibindi, bavuga ko ibyo bishobora gutuma bahitamo kutongera kuzifashisha batinya kwibasirwa.

Batanze urugero rw’umuhanzi uheruka kwifotoza agaragaza inda y’imvutsi, abantu bakamwibasira barimo uwanditse ku mbuga nkoranyambaga ko akunda indirimbo ze ariko akanga amafoto ye n’ibindi asangiza abamukurikira n’ibindi.

Hanavuzwe ihohotera rikorerwa ku mboga nkoranyambaga aho usanga abantu basebya bagenzi babo, cyane ab’igitsina gore mu buryo bwo gukwirakwiza amafoto n’amashusho y’ubwambure bwabo, yaba umwimerere cyangwa atariwo.

Umugenzuzi Mukuru w’iyubahirizwa ry’ihame ry’uburinganire n’ubwuzuzanye, Rose Rwabuhihi, yasabye abantu kudacika intege, bagakomeza guharanira ko uburenganzira bwa buri wese bwubahirizwa no gusigasira icyiza cyose gishobora kuva mu ikoreshwa ry’imbuga nkoranyambaga.

Umuyobozi w’ishami rishinzwe kurwanya ibyaha byifashisha ikoranabuhanga mu rwego rw’igihugu rw’ubugenzacyaha(RIB), Akilimali Shema, yavuze ko ‘abakobwa n’abagore nibo bibasirwa cyane kurusha abandi ku mbuga nkoranyambaga’.

Shema yaburiye abantu bibasira bagenzi babo ku mbuga nkoranyambaga, bandika cyangwa bavuga amagambo mabi ku mafoto cyangwa amashusho, ko hari ibihano bikarishye bibategeje, biteganywa n’igitabo cy’amategeko ahana ibyaha byifashisha ikoranabuhanga

Ingingo ya 35 y’iryo tegeko igena ko umuntu usebya mugenzi we yifashishije ikoranabuhanga ashobora gufungwa kuva ku mezi atandatu kugera ku myaka ibiri.

Ati “Urumva ko twashyizeho ibihano kugira ngo bariya bantu bibasira abandi bakurikiranwe kandi uko igihugu kigenda gitera imbere, abantu benshi bakora ibyo byaha.”

Uyu muyobozi yavuze ko no gutangaza ibihuha ku mbuga nkoranyambaga n’ahandi ari icyaha gihanwa n’amategeko kuva ku myaka ibiri kugera kuri itanu y’igifungo.

Ati “Abantu bafite ikibazo cyo kutegera RIB n’izindi nzego, ukabona baragusebeje ugaceceka, hari n’abo turinda gushaka tubonye babasebeje ku mbuga nkoranyambaga.”

Shema yasobanuye ko abantu bakwiye kumemya uburenganzira bwabo igihe basebejwe bakihutira kumenyesha RIB kugira ngo ababigizemo uruhare babiryozwe.

Abasebereza abanyarwanda mu mahanga bashobora kugarurwa mu Rwanda

Uyu muyobozi yasobanuye ko hari n’abantu bakora ibi byaha byo kwibasira abandi bari mu mahanga ariko ko nubwo bigoye ko bakurikiranwa hari icyizere ko bazafatwa.

Ati “Ibyaha by’ikoranabuhanga nta mipaka bigira. Dufite abantu bari hanze birirwa bibasira abanyarwanda, bibasira abakobwa n’abagabo ariko dukorana n’izindi nzego z’ibindi bihugu, turimo kureba uko bagarurwa bakabazwa ibyaha bakorera ku mbuga nkoranyambaga.”

Yavuze ko akenshi bakoresha amazina bihimbye bikagora kubakurikirana ariko amaherezo bafatwa. Yatanze urugero rw’uwiyita ‘Kasuku’, uwiyita ‘The Cat’ n’abandi ko uyu munsi bazi aho batuye bari gukorana n’ibihugu babamo kugira ngo babiryozwe.

RIB igaragaza ko umwaka ushize yakiriye ibirego by’abantu batanu bakekwaho kwibasira abandi ku mbuga nkoranyambaga barimo batatu bashyikirijwe ubutabera mu gihe kugera muri Kanama 2019 imaze kwakira dosiye umunani zirimo eshanu zamaze gushyikirizwa ubutabera izindi abaziregwamo bari hanze hagishakishwa uko bagarurwa mu Rwanda.

Umuyobozi wa ARFEM, Ingabire Egidie, yavuze ko umubare w’abakobwa n’abagore bifashisha ikoranabuhanga mu gutanga ibitekerezo ukiri hasi
Rose Rwabuhihi yasabye abantu kudacika intege, bagakomeza guharanira ko uburenganzira bwa buri wese bwubahirizwa no gusigasira icyiza cyose gishobora kuva mu ikoreshwa ry’imbuga nkoranyambaga
Akilimali Shema yavuze ko abakobwa bibasirwa cyane kurusha abandi ku mbuga nkoranyambaga

[email protected]he.rw


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza