Umubare munini w’abakozi ba leta birukanwe mu 2019 bazize guta akazi

Yanditswe na Nkurunziza Ferdinand
Kuya 14 Mutarama 2020 saa 03:43
Yasuwe :
0 0

Umwaka wa 2019 wasize abakozi ba leta 100 birukanwe mu mirimo bari bashinzwe, biturutse ku makosa atandukanye bagiye bakora yiganjemo guta akazi bikabaviramo gutakarizwa icyizere.

Impamvu zo kwirukana aba bahoze bakorera leta ziratandukanye ariko iyahuriweho na benshi ni uguta akazi nta mpamvu izwi.

Nk’uko bigaragara ku rubuga rwa internet rwa Minisiteri y’Abakozi ba leta n’Umurimo, mu birukanwe burundu abarenga 30% bari barataye imirimo yabo nta mpamvu izwi.

Bivugwa ko umukozi yataye akazi nta mpamvu izwi cyangwa nta ruhushya mu gihe yagasibye nibura iminsi 15 ikurikirana.

Uwo mukozi ahanishwa igihano kiruta ibindi mu rwego rw’akazi aricyo kwirukanwa burundu.

Mu nzego zishamikiye ku turere nk’ibigo by’amashuri, ibigo nderabuzima, amavuriro n’inzego z’ibanze ni ho hagize umubare munini w’abasezerewe burundu ku mirimo yabo, hagakurikiraho Ikigo cy’Igihugu cy’Ubwiteganyirize (RSSB), ahirukanwe abakozi 26 mu 2019.

Usibye guta akazi nta ruhushya, andi makosa yabaye intandaro yo kwirukana burundu abakozi bakoreraga leta arimo gukatirwa n’urukiko igihano kirengeje amezi atandatu, ruswa, ubusinzi, ubujura, gusiba akazi uko umukozi yishakiye nta mpamvu izwi no kunyereza umutungo wa leta mu buryo butandukanye.

Harimo kandi gusuzugura no gutuka abayobozi, gukoresha ibikoresho bya leta mu nyungu z’umuntu ku giti cye, amakosa akomeye y’imyitwarire, ihohotera rishingiye ku gitsina n’ibindi.

Umwaka wa 2019 warangiye leta ifite abakozi basaga 108 000, muri bo umubare munini ni abakora mu rwego rw’uburezi. Abakozi ba leta bangana na 3% by’abafite akazi mu gihugu.

Ingingo ya 27 y’iteka rya Perezida wa Repubulika riteganya ibihano ku bakozi ba leta bakoze amakosa mu mirimo bashinzwe, rigena ko umukozi wese wa leta ashyirwa ku rutonde rw’abirukanwe mu mirimo yabo kubera amakosa yabagaragayeho.

Umukozi wirukanywe burundu ku kazi ahita ashyirwa ku rutonde rw’abatemerewe gushaka akazi cyangwa gushyirwa mu mwanya w’akazi mu butegetsi bwite bwa leta.

Umukozi wirukanwe ashobora kugaruka mu mirimo ya leta nyuma y’imyaka irindwi, bigakorwa amaze gusaba umukoresha we guhanagurwaho ubusembwa.

Mu 2019, abakozi 55 bahanaguweho ubusembwa basubizwa mu mirimo.

Mu bakozi ba leta birukanwe mu mwaka ushize, 30% bazize guta akazi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza