ULK yahaye impamyabumenyi abagera ku 1275 bayirangijemo amasomo (Amafoto)

Yanditswe na Thamimu Hakizimana
Kuya 13 Ukuboza 2019 saa 07:44
Yasuwe :
0 0

Kaminuza yigenga ya Kigali (ULK) yahaye impamyabumenyi abanyeshuri 1275 bayirangijemo amasomo mu cyiciro cya mbere n’icya kabiri, basabwa kwihangira imirimo bakabyaza umusaruro amasomo bahawe mu gihe cyose bahamaze.

Izi mpamyabumeyi zatanzwe kuri uyu wa Gatanu tariki 13 Ukuboza 2019 kuri Stade yo muri iyi Kaminuza ya ULK iherereye ku Gisozi mu Karere ka Gasabo. Ni ku nshuro ya 16 ULK itanze impamyabumenyi.

Mu banyeshuri barangije amasomo abo mu cyiciro cya mbere cya kaminuza ni 1099. Abarangije icyiciro cya kabiri ni 176 muri bo 60% ni abagabo, mu gihe 40% ari abagore.

Umuyobozi Mukuru wa ULK, Dr. Sekibibi Ezechiel, yasabye abarangije kwihangira imirimo kugira ngo babyaze umusaruro amasomo bahawe.

Yagize ati “Ubutumwa nabaha ni ubwo kubashishikariza abashaka gukomeza mu cyiciro cya Kabiri ko bakomeza ariko na b’abandi barangije bashaka kwihangira imirimo bakayihangira kuko twabahaye ubwenge n’ubushobozi buhagije bw’uko bakwihangira imirimo kuko barabishoboye”.

Yakomeje avuga yizeye ko aba banyeshuri bazahanganira n’abandi ku isoko ry’umurimo kubera ubumenyi butandukanye kandi buhagije bahawe kuko abarangije bose bemewe n’inama nkuru y’amashuri yisumbuye na Kaminuza.

Uwashinze Kaminuza ya ULK Prof. Dr Rwigamba Balinda, yasabye abarangije guhuza ubumenyi bwabo, ubumenyingiro n’amahame y’Indangagaciro.

Ati “Inama ya mbere mpaye izi ndatwa dushimira cyane ibyo bakoze, ni iyo guhuza ubumenyi bwabo n’ubumenyingiro bakabuhuza n’amahame y’indangagaciro n’imico myiza. Aya mahame ni ayo kumenya ko ikintu cyose umuntu akora agishingira ku kwizera noneho wakwizera Imana nzima ukagira imbaraga nyinshi ziva kuri iyo Mana zikakuzamo yaba imbaraga z’inyuma n’iz’imbere ukagira icyerekezo cyiza cy’ubuzima ugatuza kuko uba uzi ko uri kumwe na yo.”

Dukuzimana Laetitia wasoje mu ishami ry’Ikoranabuhanga, yabwiye IGIHE ko yishimye cyane ndetse afite icyizere cy’uko agiye kwihangira imirimo abikesha ubumenyi butandukanye yahawe.

Ati “Ni ibyishimo bikomeye ubu mfite nk’umuntu warangije kuko gusoza amasomo si urugendo rworoshye kubera imbaraga umuntu aba yarakoresheje kugira ngo arangize, rero bitewe n’ubumenyi nahawe ubu ngiye nanjye kwihangira imirimo ku buryo nizeye ko mu minsi iri imbere nzaba ndi rwiyemezamirimo ukomeye.”

Kuva iyi Kaminuza yigenga ya Kigali (ULK) yatangira abanyeshuri 34 234 nibo bayiragirijemo mu mashami atandukanye.

Abasoje amasomo muri ULK bishimiye ko bahawe umusingi w'ubuzima
Bamwe mu basoje amasomo muri ULK
Umuyobozi w'Icyubahiro wa ULK, Prof. Kalisa Mbanda (ubanza), Prof Dr Rwigamba Barinda (hagati) na Dr. Sekibibi Ezechiel uyobora ULK
Byari ibyishimo ku banyeshuri basoje amasomo yabo muri ULK
Bafashe amafoto y'urwibutso bishimira ko barangije amasomo
Ibyishimo ku barangije byari byinshi cyane
Kaminuza Yigenga ya Kigali (ULK) yahaye impamyabumenyi abanyeshuri 1275 bayirangijemo amasomo mu cyiciro cya mbere n’icya kabiri
Abarenga 1200 nibo basoje amasomo muri ULK
Uwashinze ULK Prof Dr Rwigamba Balinda yasabye abanyeshuri gushyira imbere guhanga imirimo
Ubwo Umuyobozi w'icyubahiro wa ULK Prof. Mbanda yemezaga ko bahawe impamyabumenyi
Umwe mu banyeshuri barushije abandi bashimiwe
Uwashinze ULK Prof.Dr Rwigamba ashimira umwe mu banyeshuri wahize abandi
Abanyeshuri barushije abandi bashimiwe

Amafoto: Muhizi Serge


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza