00:00:00 IGIHE NETWORK KN KINYARWANDA EN ENGLISH FR FRANCAIS

Ukuvuguruzanya kw’abayobozi ba Congo ku myanzuro ya Luanda

Yanditswe na IGIHE
Kuya 20 Mutarama 2023 saa 12:04
Yasuwe :

Umuvugizi wungirije wa Guverinoma y’u Rwanda, Alain Mukuralinda, yagaragaje ko guverinoma ya Congo ikomeje kwanga gushyira mu bikorwa amasezerano atandukanye by’umwihariko aya Luanda.

Guverinoma ya RDC ishinjwa ko imyanzuro y’inama ya Luanda yahaye agaciro ingingo zimwe, izindi ikazirengagiza nkana. Muri iyo myanzuro harimo ibijyanye n’impunzi z’abanye-Congo, imikoranire ya FARDC na FDLR, imvugo z’urwango n’ibindi yasabwe kubahiriza.

Kuwa 23 Ugushyingo 2022 nibwo i Luanda muri Angola habereye inama y’Abakuru b’Ibihugu yigaga ku bibazo by’umutekano muke mu Burasirazuba bwa RDC. Yafashe imyanzuro ko inyeshyamba za M23 zigomba gushyira intwaro hasi mu maguru mashya.

Abitabiriye iyi nama bategetse ko ibitero byose bihagarikwa by’umwihariko ibyo M23 igaba ku ngabo za RDC na MONUSCO uhereye ku wa 25 Ugushyingo 2022 saa kumi n’ebyiri.

Iyi nama kandi yemeje ko abasirikare bo mu mutwe w’ingabo uhuriweho na EAC bakomeza koherezwa muri RDC naho inyeshyamba za M23 zikava mu duce zafashe zigasubira mu birindiro byazo bya mbere mu gace ka Sabyinyo ku ruhande rwa RDC maze hagashyirwaho agace zitagomba kurenga bigizwemo uruhare n’ingabo za EAC, iza MONUSCO n’iza leta.

Inkunga mu bya politiki n’ibya gisirikare yahabwaga M23 ngo igomba guhagarara ndetse indi mitwe yitwaje intwaro yaba iy’imbere mu gihugu no hanze yacyo yakoreraga mu Burasirazuba bwa Repubulika Iharanira Demokarasi ya Congo na yo igahagarika ibikorwa.

Imitwe y’iterabwoba nka FDLR-FOCA, inyeshyamba za Red-Tabara, ADF n’indi yose ikorera ku butaka bwa RDC yasabwe gushyira intwaro hasi igatangira gusubira iwabo nk’uko byafashweho umwanzuro mu biganiro bya Nairobi.

Mu kiganiro yagiranye na Televiziyo y’Igihugu, Mukuralinda yavuze ko biteye impungenge kubona igihugu gishyira umukono ku masezerano binyuze ku mukuru w’igihugu ariko igihe cyo kuyashyira mu bikorwa ugasanga icyo gihugu kiri gufata iya mbere mu gutega abashyira mu bikorwa ayo masezerano.

Asanga hari ukwivuguruza kw’abayobozi ba Congo kuko usanga ibyasinywe na Perezida wa Repubulika hari abandi bayobozi baca ku ruhande bakabivuguruza. Yatanze urugero rwa Perezida w’inteko ishinga amategeko wagiye i Burayi akavuga ko ‘batazigera bavanga ingabo zabo n’indi mitwe yose kandi bazaganira n’iyo bashatse.

Ati “Ibyongibyo bivuguruza ibyo Perezida wa Repubulika yashyizeho umukono kuko hari ahavuga ko ‘bagomba kongera kuganira, kongera kwicarana n’iyo mitwe bakavugana’.

“Niba umuntu w’umuyobozi mukuru avuguruza Perezida wa Repubulika na we ntagire icyo abivugaho, ni uko nawe ari muri iyo nzira yo kutayashyira mu bikorwa. Ntabwo aba yabyibagiwe ntabwo aba atabyumvise”.

Guverinoma ya Congo kandi yemeye ko ikibazo cy’impunzi kigomba kwigwaho n’ibihugu byose, impunzi zose zikabasha gusubira iwabo. Icyakora, Guverinoma ya Congo yumvikanye ivuga ko ‘nta munye-Congo nyawe wahungira mu Rwanda. Ni ukuvuga ngo abahungiye mu Rwanda si abanye-Congo, cyangwa se nta mpunzi z’abanye-Congo ziba mu Rwanda’.

Ibi ni ukwirengagiza ukuri kuko mu Rwanda hari abantu barenze ibihumbi 70 cyangwa 80 bavuga ko atari abanyarwanda, bahari kubera amaburakindi bityo bifuza kuzasubira iwabo.

Mukuralinda ati “Birababaje kubona Congo igeza n’aho ivuga ngo u Rwanda ni rwo rujya gushuka abaturage ba Congo guhungira mu Rwanda, ibyongibyo nk’umunyarwanda ni agashinyaguro kuba ushobora kuvuga ko umuturage wawe ikindi gihugu gishobora kuza kikamushuka gusa, akava mu bye akajya kuba mu nkambi yari afite isambu, yari iwe, yororaga, yahingaga, ntawe yasabaga”.

Mu gihe EAC ikomeje gufasha mu gushakira amahoro Uburasirazuba bwa RDC, bamwe mu baturage b’icyo gihugu baheruka gutegura inyigaragambyo yo kwamagana ingabo z’uyu muryango zirimo gucunga umutekano mu bice bya Goma.

Guverinoma y’u Rwanda yavuze ko ari amayeri y’Igisirikare cya Congo na Guverinoma yaho, yo kwivana mu bikorwa bya Nairobi na Luanda bigamije amahoro.

Mukuralinda ati “Hari amakuru afatika, anagenzuwe agaragaza ko aba bayobozi babonanye n’abayobozi b’imiryango itegamiye kuri leta ndetse n’iyo mitwe ya gisirikare, babashishikariza kwigaragambya bamagana umutwe w’ingabo za EAC n’ibiri gukorwa”.

Abayobozi ba Congo kandi bakomeje kubura ayo bacira n’ayo bamira kuko babwira abaturage ko M23 ari ibyihebe batazavugana na bo ariko bwacya bakabona EAC yo iravugana nabo. Ibi bituma biyemeza gukomeza kuvuga ko u Rwanda ari rwo nyirabayazana w’ibibazo byose.

Igisirikare cya RDC gikomeje kwifatanya n'imitwe irimo FDLR

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .