00:00:00 IGIHE NETWORK KN KINYARWANDA EN ENGLISH FR FRANCAIS

Uko yanditse amateka muri RDC, ubuhanga mu buhinzi n’ibindi: Ibigwi Prof Mbanda asize (Amafoto na Video)

Yanditswe na Akayezu Jean de Dieu
Kuya 23 Mutarama 2023 saa 11:14
Yasuwe :

Ni urugendo twese tunyuramo, ntirumenyerwa, ariko ni inzira ya twese. Niko byagenze ubwo Abanyarwanda bakiraga inkuru y’incamugongo y’uko Prof Kalisa Mbanda atakiri mu mwuka w’abazima.

Umugoroba wo ku Cyumweru tariki 22 Mutarama 2023, wari wahariwe igitaramo cyo kwizihiza ubuzima bwa Prof Kalisa Mbanda, aho abo mu muryango we, inshuti, abakoranye na we mu bihe bitandukanye n’abandi bagarutse ku byamuranze.

Ni umuhango witabiriwe n’abo mu muryango we, inshuti, abayobozi mu nzego zitandukanye barimo abo yigishije, abo yabereye umuyobozi ndetse n’abo bakoranye.

Prof Kalisa Mbanda yatabarutse ku wa 13 Mutarama 2023 azize urupfu rutunguranye kuko yari amaze iminsi afite imbaraga nk’uko bisanzwe, yewe nta n’uburwayi yari afite.

Mu mugoroba wo kwizihiza ubuzima bwe, hagarutswe ku mateka ye, aho yavutse ari imfura mu muryango w’abana umunani babyawe na Gatete André na Mukanyonga Josephine, i Murambi mu Karere ka Rulindo.

Mu mabyiruka ye, yari afite ubuhanga buhambaye ndetse ubwo yajyaga kwiga mu mashuri abaza ahitwa i Mugambazi mu myaka ya 1955, yayarangije afite amanota menshi ku buryo yabonye ishuri muri Collège Saint André i Nyamirambo.

Arangije kwiga icyiciro rusange, kuko nabwo yari yatsinze neza, bamwohereje kwiga muri École des Sciences de Musanze, aho yize mu mwaka wa kane n’uwa gatanu, ariko kubw’amahirwe make ntiyabasha kurangiza uwa gatandatu kubera ibibazo bya politiki byari mu Rwanda.

Yafuzwe ageze mu gihembwe cya nyuma, ajyanwa mu yari Gereza Nkuru ya Ruhengeri amaramo amezi ane, yimurirwa i Kigali gufungirwa muri 1930 yamazemo amezi atatu, aza gufungurwa.

Kubw’ubuhanga, ikinyabupfura n’umurava wamurangaga akiri muto, nyuma yo gufungurwa yahise abona akazi muri sosiyete y’Ababiligi yakoraga ubucukuzi bw’amabuye y’agaciro, SOMUKI (Société Belge d’Exploitation des Mines).

Icyo gihe nubwo yari yarize ibijyanye na siyansi, yahawe akazi k’ubucungamutungo.

Icyo gihe ngo yababazwaga cyane n’uko adafite diplôme ari nabwo yaje kugirwa inama z’uko ashobora gutoroka akajya kwiga mu kindi gihugu kuko mu Rwanda bitashobokaga.

Kalisa wari ingimbi icyo gihe, yashatse inzira zimuvana mu gihugu, Imana iza kubimufashamo agera muri Zaire, ashakisha ishuri araribona, arangiza kwiga.

Yanditse amateka muri RDC

Murumuna wa Prof Kalisa Mbanda yavuze ko ubwo yageraga muri Congo yabashije kubona ishuri yigamo ndetse akomeza kugira bwa buhanga bwamuranze kuva mu buto.

Ati "Murumva ukuntu yavuye mu Rwanda akagera hanze, bwari uburyo budasanzwe. Imana iramurinda agera i Goma agezeyo ashakisha ishuri araribona, arangiza amashuri yisumbuye."

Yavuze ko Prof Kalisa arangije amashuri yisumbuye yatsinze ku kigero cyo hejuru ku buryo hari n’igishushanyo bamukoreye.

Ati "Mu mateka batubwiye ko Abanye-Congo banze kwandikaho izina kugira ngo batavuga ko ari umunyamahanga watsinze cyane."

Icyo gihe yigaga imibare n’ubugenge [Math-Physic] mu ishuri rya Athénée Royale de Goma.

Nubwo byari bimeze gutyo ariko, yakomeje gushakisha uburyo yakwiga kaminuza aho yagiye i Bujumbura yiga muri Kaminuza imyaka ibiri nyuma aza kujya i Kinshasa aho yize ibijyanye n’ibinyabuzima n’ubuhinzi [Biology and Agriculture].

Icyo gihe nabwo yarangije kaminuza ari mu cyiciro cya mbere, ari nabyo byatumye ahabwa akazi ko kuba umwungiriza w’umwarimu kuri Université de Kinshasa.

Nyuma Kalisa yaje kubona amahirwe yo kujya gukomeza kaminuza mu Bubiligi, agezeyo akora andi mateka yo kwiga ‘Masters’ ebyiri icyarimwe. Ni ibintu byatumye ahabwa akazi ko kwigisha muri Kaminuza ya Louvain-la-Neuve yigagamo.

Yaje gusubira i Kinshasa kongera kwigisha muri kaminuza yaho, ari naho yakomeje kuba kugeza agarutse mu Rwanda ubwo Jenoside yakorewe Abatutsi yari irangiye.

Umugore we yagarutse ku nkuru y’uko bamenyanye

Mbere yo guhungira muri RDC, ababyeyi be bari baramwise Kalisa Jean Pierre gusa ageze mu buhungiro ahindura izina yitwa Kalisa Mbanda.

Umugore we, Iribagiza Rose kuri ubu ufite imyaka 73, avuga ko yamenyanye na Kalisa ubwo bari abanyeshuri muri Kaminuza ya Kinshasa mu 1974.

Icyo gihe umwe yigaga ibijyanye n’ubukungu, undi ari kuminuza mu by’ibinyabuzima n’ubuhinzi.

Ati "Buriya abakobwa baricara bakavuga abahungu, dutangira kuvuga abahungu beza muri kaminuza, njyewe ndavuga nti reka nanjye nshyiremo akantu [...] ndavuga nti Kalisa Mbanda, baratangara bati karabaye. Bati ni ‘umuhanga, ni mwiza [...]."

Iribagiza avuga ko icyo gihe ngo yari afite musaza we wiga muri iyo kaminuza ku buryo yajyaga kureba aho abahungu barara agiye kureba musaza we ariko akaza kuboneraho umwanya wo kuvugana na Mbanda nk’umuntu yari afitiye agatima.

Iribagiza avuga ko ibyo yabonye ku mugabo we mu myaka yose bamaranye harimo kuba yari umuntu nyawe kandi urangwa n’ukuri.

Ati "Yari umuntu nyawe w’umunyakuri, uko ari yaba ariwe, umugore we, ku bana be, abaturanyi, inshuti n’abo bakora. Umuntu nyawe ahora ari nyawe."

Kuri ubu bafitanye abana barimo Nshuti Kalisa, Tanga Kalisa, Ingabe Kalisa na Nicole Kalisa Umutoni.

Tunga Kalisa yavuze ko umubyeyi we bamwigiyeho indangagaciro nyinshi zirimo guca bugufi, gukunda umuryango, ubuhanga, gukunda igihugu, kugira impuhwe, kugira ubuntu, imbaraga n’ibindi.

Ingabe ati "Papa biragoye kandi ntibigoye kumuvuga, ndashaka kuvuga guca bugufi kwa Papa. Yari umuntu uciye bugufi cyane nk’uko Tunga yabivuze, ntabwo Papa yajyaga yivuga ngo njyewe nageze kuri ibi, nakoze ibi nagize nte [...]."

Yakomeje agira ati "Yari umuntu ukunda kwitanga kugira ngo afashe abandi. Ndibuka rimwe hari imodoka yari ihari igomba kubatwara, noneho hari umushoferi, papa, undi muntu noneho haza n’umu-Mama ushaka kujyana nabo [...] Papa aramwimukira agenda yicaye inyuma rwose bagera iyo bagiye nta kibazo."

Abamuzi bamuvuze ibigwi

Mutangana Jean Bosco wabaye umushinjacyaha mukuru, wari umuturanyi wa Prof Kalisa mu Isibo y’Inyamibwa, yavuze ko uretse kuba bari baturanye bari inshuti kandi yari umuntu wabaniye neza abaturanyi be.

Ati "Ni umuntu twabanaga umunsi ku munsi [...] Twabuze umubyeyi wadukundaga cyane, watubaniraga cyane ku buryo buri muturanyi wa hano cyangwa mu zindi Isibo zegeranye [...] yatubaniye neza cyane kandi mu bihe bitandukanye yaradusuraga, tukagenderana."

Mutangana avuga ko Prof Kalisa ari umuntu wakundaga igihugu, akabitoza abaturanyi be by’umwihariko urubyiruko aho yakundaga kurwibutsa ko rugomba gusigasira ibyiza u Rwanda rwagezeho.

Ati "Kuri uyu musozi abantu baho barakundana cyane, ndibuka Madamu we ampamagara ambwira ko umugabo we yitabye Imana, yarambwiye ati ’andi makuru mabi’, ndikanga mubaza nti bigenze bite? ambwira ko Prof Mbanda yitabye Imana."

Mutangana yavuze ko mu bo Prof Kalisa yahaye inka na we arimo, ibintu bigaragaza urukundo kandi yizeza umuryango we ko azawitura.

Ati "Umubyeyi ungana gutya iyo akugabiye aba aguhaye umwanya wo kumwirahira, kujya uvuga uti Kalisa yampaye inka. N’ibindi byinshi, yigeze kunzanira inzoga arambwira ati ’iyi ni inzoga y’urukundo, nje kuguhemba. Ni ikintu cyankozeho cyane, muzehe mu nshingano ze nyinshi kumpamagara ati nkuzaniye inzoga, nje kukureba, ni ikintu gukomeye cyane."

Gakuba Shyaka wakoranye na Prof Kalisa Mbanda ubwo bari muri ISAE Busogo (Institut Superieur d’Agriculture et d’Elevage) yagarutse ku buryo bamaranye imyaka 16 bakorana.

Avuga ko Prof Kalisa yayoboye ISAE mu bihe bikomeye aho abanyeshuri bayigagamo bari baranze gahunda y’Ubumwe n’Ubwiyunge,ariko aza kubahindura.

"Abanyeshuri bamaze kugera ku rwego rwiza, aravuga ati tujye mu cyiciro cya kabiri [...] atangira kongerera abarimu ubushobozi, bakajya bajya kwiga mu mahanga, bakongera bakagaruka."

Shyaka yavuze ko Prof Kalisa yaje kugera ku cyiciro cya Gatatu cyo guteza imbere abaturage, aho yabigishaga guhinga mu buryo bugezweho. Icyo gihe ngo niwe wambaraga bote akajya mu murima kwigisha abo baturage uko bahinga.

Ngo abaturage baramukundaga cyane.

Ati "Reka mbabwire rero ukuntu yabaniraga abaturage. Yari afite imodoka ya leta ariko yahorahamo imyanda kubera abo baturage yatwaragamo, bavuye no guhinga."

Minisitiri w’Ubutegetsi bw’Igihugu, Musabyimana Jean Claude nawe wakoranye na Prof Kalisa yavuze ko bamenyanye mu 1995 [Nibwo yari agiye kwiga mu mwaka wa Mbere wa Kaminuza], ubwo bari babuye ari umwarimu we, nyuma yaje kuba umuyobozi, inshuti ndetse n’umubyeyi.

Umuhango wo kwishimira ubuzima bwa Prof Mbanda wabaye kuri iki Cyumweru
Minisitiri Musabyimana (hagati) yari kumwe na Depite Barikana Eugene
Uyu mugoroba witabiriwe n'umuryango wa Prof Mbanda, inshuti n'abaturanyi
Mutangana Jean Bosco yahamije ko Prof Mbanda yari umuntu w'inyangamugayo, akaba n'umuturanyi mwiza
Minisitiri Musabyimana (hagati) yari kumwe na Depite Barikana Eugene
Uyu mugoroba wahariwe kwizihiza ubuzima bwa Prof Kalisa Mbanda
Minisitiri Musabyimana yashimye ubuhanga bwa Prof Kalisa Mbanda wamwigishije

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .