Uko umunyarwandakazi yishyize mu mazi abira akiyita intasi y’u Rwanda muri Canada

Yanditswe na IGIHE
Kuya 2 Ugushyingo 2019 saa 02:50
Yasuwe :
0 0

Mu minsi ibiri ishize nibwo abanyamakurukazi babiri bo muri Canada, Chantal Lavigne na Judi Rever bafatanyije na maneko w’umubiligi, Guy Rapaille, bacura inkuru y’umunyarwandakazi urimo gusaba ubuhungiro muri Canada, yitwaje ko yanze gukomeza ubutasi yasabwe na Guverinoma y’u Rwanda.

Radio Canada ivuga ko uwo mukobwa wahawe izina rya Nadege, mu 2008 yiga muri Kaminuza mu Rwanda yamenye ko harimo gutangwa buruse zo kujya kwiga i Québec, ngo akeka ko ari ukubera ubuhanga afite ariko aza gusanga hari ubutumwa agomba gusohoza nk’inyiturano: Kuneka umunya-Canada ukomoka mu Rwanda.

Uwo mugore yakomeje abwira abanyamakuru ko umuntu bamutumye kuneka yakoze « ibikorwa by’iterabwoba mu Rwanda, mbere yo guhungira hanze y’igihugu. »

Ageze muri icyo gihugu, kuva mu 2010 ngo yamukirikiranye ahantu hatandukanye ariko ntiyahirwa. Ngo yaje kugera ku muryango avuga ko yatumwe, ariko aza guhindura ibitekerezo nk’uko abivuga, ntiyatanga amakuru ahubwo mu 2013 ahitamo gusaba ubuhungiro bwa politiki.

Gusa mu Ukwakira 2014, urukiko rushinzwe ibibazo by’abimukira rwanze kumuha ubuhungiro, kuko kuba yemera ko yakoze ubutasi ku butaka bwa Canada, binyuranye n’amahanme y’igihugu kigendera kuri demokarasi.

Ubu igisigaye ngo ni ukumvisha inzego zishinzwe imipaka ko umutekano we ageze mu Rwanda waba mubi cyane kurusha ikibazo yaba ateje agumye muri Canada, ari nacyo kikirebwaho mbere y’uko yurizwa indege.

Na nyuma y’imyaka itanu, uyu mugore nta gisubizo arahabwa cya nyuma.

Ni amatakirangoyi kuko yizize

Umwanditsi Gatete Nyiringabo avuga ko bimaze kuba akamenyero ko umuntu wese usaba ubuhungiro mu bihugu byo mu Burengerazuba bw’Isi, bitwaza ngo “turi abanyapolitiki cyangwa bahunze kubera ibitekerezo byabo, hitwajwe ko guverinoma y’u Rwanda itorohera abatavuga rumwe nayo, cyangwa bakavuga ngo ubuzima bwacu buri mu kaga.’

Gusa aba banyamakuru begereye Nadege baramushuka ngo akoreshe iturufu yo kuba maneko wa Guverinoma y’u Rwanda ku baregwa iterabwoba bihishahisha.

Ati “Ibi byatumye nshaka kumenya neza uwo muntu uregwa iterabwoba uwo ariwe. Nashakaga kumenya amakuru ye. Numvaga ko umunyamakuru Lavigne agomba kuba yarashakishije uwo uregwa iterabwoba. Ariko ibyo ntacyo byari bimumariye.”

“Ni ikihe cyaha kiruta iki? Narabyibajije… Ni nde ubangamiye abaturage kurusha undi? Ni uwo mukobwa muto ugiye kuva mu bumaneko imburagihe cyangwa ushinjwa iterabwoba wihishahisha?”

Kuri we, ngo inkuru nyayo yagombaga kuba ko “Canada icumbikiye abanyarwanda bazwi bakora iterabwoba ndetse n’abajenosideri bahamijwe ibyaha kandi bagakingirwa ikibaba no kwita ku banyeshuri biyita ko ari ba maneko b’u Rwanda.”

Gusa ngo yanatunguwe no kuba umuntu byavuzwe ko yanekwaga n’uwo mugore batatangaje ko ari umunyapolitiki utavuga rumwe na Perezida Paul Kagame nk’uko bakunze kubyitwaza, nubwo muri iyo nkuru abayanditse batabuze kuvuga ko abanyapolitiki batavuga rumwe n’ubutegetsi babaho mu bwoba.

Muri iyo nkuru bavuga ko ubuyobozi bw’u Rwanda butihanganira ababunenga, kugeza n’aho bubakurikirana no hanze y’igihugu, batanga urugero ku baba muri Canada.

Yakomeje ati “Ibi bituma umuntu yibaza, iterabwoba ryaba ringana no kutavuga rumwe n’ubutegetsi? Abakora iterabwoba bakwiye kureberwa n’igihe bahungira muri Canada? ”

Kuvuga ko abanyarwanda bari muri Diaspora, Nyiringabo avuga ko nta shingiro bifite nk’umuntu ukubutse muri Rwanda Day iheruka kubera i Bonn mu Budage, akabona uko abanyarwanda baturutse mu mpande zose z’u Burayi bakajya kwakira perezida wabo.

Yanagarutse ku mvugo ya Guy Rapaille ko “Abanyarwanda bazwiho kuba ba maneko bakomeye’, avuga ko kuba byaravuzwe n’umubiligi, avuga ko abanyarwanda bakwiye kuzirikana imvugo zakoreshejwe kenshi mu gucengeza ingengabitekerezo ya Jenoside, ko abatutsi ari abantu badakwiye kwizerwa n’ibindi.

Hanazamo Judi Rever umaze kumenyekana kubera imvugo ze zihakana Jenoside yakorewe abatutsi no kuvuga ko mu Rwanda habaye jenoside ebyiri, ibintu bihabanye n’ibyemejwe n’abashakashatsi, abarimu muri za kaminuza n’inzego zemewe z’Umuryango w’Abibumbye, agasoza ashinja Guverinoma y’u Rwanda kwica inshuti ye, Karegeya muri Afurika y’Epfo, ibirego bikiri mu nkiko.

Hejuru y’ibyo byose, iyo nkuru ijya kurangira ibya wa muntu uregwa iterabwoba urimo kunekerwa muri Canada bitakivugwa, ahubwo hazamuwe ibirego bishinjwa Guverinoma y’u Rwanda. Banakoresha amagambo ya Perezida Kagame yigeze kuvuga aburira abashaka guhungabanya umutekano, abibutsa ko hari ingaruka zibategereje.

Umwanditsi Nyiringabo avuga ko nta n’ubundi butumwa yari gutanga, akibaza niba umuntu ushaka guhungabanya abaturage akwiye gushimirwa ku buryo yanitirirwa umuhanda runaka. Yahise anabihuza n’uburyo Perezida Trump yishimiye urupfu rwa Al Bagdadi wayoboraga Islamic State.

Ku bw’abo banyamakuru ahubwo ngo inkuru yabaye Nadege ukeneye ubuhungiro, na nyuma y’uko ashutswe n’abanyamakuru ngo akunde yemere ko avuga ko ari umunyapolitiki ushaka ubuhungiro, hagamijwe ko yemeza ibibazo by’ubutasi ku butaka bw’igihugu cy’amahanga.

Avuga ko nk’iyo Nadege yitwaza ko ari umunyapolitiki utavuga rumwe n’ubutegetsi urimo gukurikiranwa na ba maneko b’u Rwanda muri Canada, akaba atinya kwicirwa mu Rwanda, ubusabe bwe bwari kumvikana mu bijyanye n’amategeko adashutswe n’abanyamakuru bibwira ko bashobora kubangamira ingendo za Perezida Kagame cyangwa bagasiga icyasha izina rye ku rwego mpuzamahanga.

Yakomeje ati “Ubu abo banyamakuru babiri bakomeje kubona abantu bakunda (likes) banasangiza abandi (retweets) inkuru yabo kuri internet, mu gihe inkiko zo muri Canada zategetse ko Nadege ahita yirukanwa ku butaka bw’icyo gihugu.”

“Njye nk’umuvandimwe kandi udakeneye kumenyekanira ku buzima bwa bagenzi banjye, nashishikariza Nadege cyangwa se irindi zina yaba afite, kuza mu rugo akatubwira uko byagenze neza n’uburyo yakoreshejwe n’aba banyamakuru babiri b’abanya-Canada batagira umutima.”

Abanyarwanda muri Canada baratunguwe

Umuyobozi wa Diaspora y’Abanyarwanda i Montréal, Alain Patrick Ndengera, yasohoye itangazo avuga ko Abanyarwanda bakubiswe n’inkuba bakimenya ayo makuru yatangajwe na Radio Canada.

Ni inkuru yavuze ko ari igihuha, aho bikekwa ko yahimbye inkuru agamije kwibonera ibyangombwa byatuma abasha kuba muri Canada, ariko ku bw’amahirwe make akabyimwa n’urwego rushinzwe abinjira n’abasohoka muri Canada.

Ku nshuro ya nyuma, umunyamategeko we yahinduye amayeri ashaka kuba umuhuza muri icyo kibazo. Ngo ni naho umunyamakuru Judi Rever azira muri iyi nkuru, anabona umwanya wo kwamamaza igitabo cye gipfobya Jenoside yakorewe Abatutsi.

Yakomeje ati "Yuririye ku mwana muto w’umukobwa wishakira ibyangombwa byo kuba muri Canada, Judi yahise abona icyuho afatanyije n’abantu baziranye bo muri Radio Canada".

“Ariko nk’uko inkuru ubwayo irimo ubusa, Judi Rever yasabye umugore wa Seth Sendashonga (wabaye Minisitiri mu Rwanda mu 1994) ngo agarure inkuru zo mu 1996 zivuga urupfu rw’umugabo we wiciwe muri Kenya.”

Yavuze ko bigayitse kuba Radio Canada itangaza inkuru y’ubutasi itarabayeho, ibyo yagereranyije na ruswa.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .