Uko Umunyarwanda azaba abayeho mu 2050

Yanditswe na Philbert Girinema
Kuya 16 Ukuboza 2016 saa 02:06
Yasuwe :
0 0

Minisitiri w’Imari n’Igenamigambi, Amb. Gatete Claver, yavuze ko u Rwanda rufite intego yo kugira ubukungu buciriritse mu 2035 kandi rukaba rwateye imbere mu 2050 mu gihe ubukungu bwaba bwihuta ku 10%, ku buryo umunyarwanda yazaba yinjiza $12 476 ku mwaka, ni ukuvuga asaga miliyoni 10 Frw ku mwaka.

-  Icyerekezo 2050 cyagennye ko Umunyarwanda azaba yinjiza asaga miliyoni 10 Frw ku mwaka

Mu Nama y’Igihugu y’Umushyikirano iri kuba ku nshuro ya 14 muri Kigali Convention Centre, Minisitiri Gatete yagarutse kuri gahunda y’Icyerekezo 2050, inama y’Umushyikirano ya 13 ikaba yari yasabye ko hategurwa imirongo minini y’icyo cyerekezo kigamije kongera ubukungu kugira ngo Abanyarwanda barusheho kwigira no kwigenera ejo bashaka.

Mu kiganiro “U Rwanda twifuza”, yatanze hamwe na Minisitiri w’Ububanyi n’Amahanga, Louise Mushikiwabo na rwiyemezamirimo washinze ikigo MERGIMS, Muhire Louis-Antoine, Gatete yibukije ko hasigaye imyaka ine ngo icyerekezo cya 2020 igihugu cyihaye kigere, ubu hakenewe gukora ibyiyemejwe ngo rugere ku ntego rwihaye no gusigasira ibyagezweho.

Nibwo hazahita hakurikiraho icyerekezo 2050, kizanagendera ku masezerano mpuzamahanga u Rwanda rwashyizeho umukono yaba ay’Umuryango w’Abibumbye ajyanye n’ihindagurika ry’ibihe, icyerekezo 2063 cy’Umuryango wa Afurika Yunze Ubumwe, icya Afurika y’Iburasirazuba, Intego zigamije iterambere rirambye n’ibindi.

Gatete yavuze ko u Rwanda abanyarwanda bifuza mu 2050 buri wese agomba kuzaba afite ubuzima bwiza, agerwaho n’amazi meza, amashyanarazi ahagije kandi ahendutse, ubuzima bwiza aho serivisi zose z’ubuvuzi zizaba zaranogejwe “n’uburezi bufite ireme ryo hejuru cyane rijyanye n’igihe tuzaba tugezemo.”

Ati “Buri munyarwanda wese azaba yariteganyirije mu za bukuru, yarizigamiye ibijyanye n’ubuvuzi no kwizigamira by’igihe kirekire, ibingibi bikazaba byarabaye ihame.”

Gatete yavuze ko muri icyo gihe hifuzwa ko ibikorwa remezo bizaba biteye imbere, imijyi itameze nk’uko iri uyu munsi, imyubakire, ibikorwa remezo, ibidukikije byose biteye imbere.

Ikindi ni uko ubwikorezi mu Rwanda buzaba bumeze nk’ubwo mu bihugu byateye imbere, ndetse na serivisi zijyana nabyo, ubukerarugendo bukazamuka cyane kandi ikoranabuhanga n’indangagaciro bikazagira uruhare rugaragara.

Hatekerezwa ko gukorera byinshi mu Rwanda bizaba bikataje, u Rwanda rugafatanya n’ibihugu bituranye n’ubufatanye n’imiryango mpuzamahanga irenze iyo rurimo uyu munsi, byose bikazafasha u Rwanda kurushaho kwigira.

Ati “Ubwo twatangazaga ingengo y’imari muri uyu mwaka, byagaragaye ko amafaranga yavaga mu gihugu yanganaga na 62.4%, hanyuma inguzanyo twishyura ziva hanze y’igihugu zari zigeze kuri 18.9%, hanyuma amafaranga yazaga nk’impano ava mu misoro y’abandi yari 18.7%. Ahangaha aya mafaranga ava ku mpano z’abandi muri iyi minsi ya vuba cyane tuzaba twaganiriye twemeje igihe agomba guhagararira.”

Minisitiri Gatete yavuze ko kugira ngo Abanyarwanda bazagere ku buzima bwiza bizakenera ko ubukungu buzamuka cyane kandi bakubakira ku bindi bagezeho birimo ikoranabuhanga no korohereza abashoramari aho u Rwanda rumaze imyaka ibiri ruba urwa kabiri muri Afurika.

Ati “Nk’Abanyarwanda nk’uko bigaragara, umwaka ushize twari turi ku mafaranga agera kuri $720 ku munyarwanda, mu mwaka wa 2020 mu myaka ine iri imbere turateganya nk’Abanyarwanda nk’uko twabyiyemeje mu cyerekezo cyacu cya 2020 ko tuzaba tugeze ku $1240. Akaba ari umuhigo twahize.”

“Aho dushaka guhiga uyu munsi ni ukugira ngo Abanyarwanda ibyo tubifuriza babigereho, ni uko twagera ku madolari y’amanyamerika kuri buri munyarwanda arenga ku $4000 mu 2035, ubwo ni ukuvuga imyaka 15 dutangiye cya cyerekezo cyacu cya 2050, noneho kikazajya kugera tumaze kurenza ibihumbi $12 476 by’amadolari ku munyarwanda mu 2050.”

Minisitiri Gatete yavuze ko kugira ngo byose bizagerweho birasaba kwitanga kandi ubukungu bukajya buzamuka hejuru ya 10%, kandi amateka y’ibindi bihugu agaragaza ko ari ibintu bishoboka.

Yavuze ko buri wese yubahirije inshingano ze byatuma hakemurwa ibibazo bihari, noneho inzego z’ubuyobozi zigasigara zihanganye n’ibibazo bikeneye ubushobozi buhambaye.

Minisitiri w’Imari n’Igenamigambi, Amb. Gatete Claver

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza