00:00:00 IGIHE NETWORK KN KINYARWANDA EN ENGLISH FR FRANCAIS

Uko umuntu asaza niko inda ibyiruka- Guverineri Habitegeko kuri ‘Ejo Heza’

Yanditswe na Akayezu Jean de Dieu
Kuya 3 August 2022 saa 08:59
Yasuwe :

Urwego rw’Igihugu rushinzwe Ubwiteganyirize, RSSB, rwagaragaje ko Uturere dutatu two mu Ntara y’Uburengerazuba ndetse na tubiri two mu Majyaruguru tuza mu myanya itanu ya mbere mu gutanga ubwizigame muri gahunda ya ‘Ejo Heza’.

Ni imibare yashyizwe ahagaragara na RSSB kuri uyu wa 2 Kanama 2022, igaragaza uko uturere twesheje umuhigo wa Ejo Heza mu mwaka w’Ingengo y’imari 2021/2022.

Muri rusange Akarere ka Gakenke kaje ku mwanya wa Mbere n’umusanzu ungana na miliyoni 642.3 Frw ku ntego ya miliyoni 375 Frw. Ni mu gihe Akarere ka Nyamasheke kari ku mwanya wa Kabiri n’umusanzu ungana na miliyoni 630.9 Frw ku ntego ya miliyoni 375 Frw.

Umwanya wa Gatatu uriho Akarere ka Gicumbi n’umusanzu ungana na miliyoni 529.4 Frw ku ntego ya miliyoni 375 Frw. Akarere ka Rusizi kaje ku mwanya wa kane n’umusanzu ungana na miliyoni 520.1 Frw ku ntego ya miliyoni 375 Frw naho Rubavu iza ku mwanya wa Gatanu n’umusanzu ungana na miliyoni 498.2 Frw ku ntego ya miliyoni 375.

Ubuyobozi bw’Intara y’Iburengerazuba bugaragaza ko abaturage bamaze gusobanukirwa n’impamvu bagomba kwitabira iyi gahunda ari nayo mpamvu uturere twaho dukomeje kuza imbere mu kwesa umuhigo.

Mu kiganiro na IGIHE, Guverineri w’Intara y’Iburengerazuba, Habitegeko François yagize ati “Ugomba kumenya ko uko umuntu asaza, inda yo niko ibyiruka. Ngo uyihima arayirariza.”

Yakomeje agira ati “EjoHeza si ikibazo cy’ubukire n’ubukene, ni ikibazo cy’ubukangurambaga no kumvisha abaturage wa muco wo kwigira no kwiteganiriza. Aribyo uturere dukize nitwo twajya tuza mu myanya y’imbere.”

Gahunda ya Ejo Heza yashyizweho na Leta y’u Rwanda binyuze muri Minisiteri y’Imari n’Igenamigambi, igenwa n’itegeko N° 29/2017 ryo kuwa 29 Kamena 2017.

Ni ubwizigame bw’Igihe kirekire bukorwa ku bushake hafungurwa konti yo kuba umunyamuryango. Ifasha Abanyamushara n’abandi bose babarizwa mu byiciro birimo abikorera cyangwa abakorera abandi mu byiciro by’imirimo itandukanye batagengwa n’amategeko y’umurimo cyangwa amategeko yihariye.

Ireba kandi umukozi ukorera umushahara hatitawe ku bundi bwiteganyirize yaba arimo, wifuza kwizigamira by’igihe kirekire, umunyamuryango utakitabira ubwiteganyirize yari arimo ariko akaba ashobora kububonamo amafaranga hakurikijwe amategeko abugenga, akayimurira kuri konti ya EjoHeza yo kwizigamira by’igihe kirekire.

Abandi ifasha ni umwana uri munsi y’imyaka 16, uteganyirizwa kuri konti y’ubwizigame bw’igihe kirekire yashyizweho n’umubyeyi cyangwa umwishingizi we, undi muntu uwo ari we wese utavuzwe mu byiciro byavuzwe haruguru.

Kwizigamira muri iyi gahunda, Umunyarwanda uri mu cyiciro cya mbere n’icya kabiri by’Ubudehe asabwa kwizigamira nibura 15 000 Frw ku mwaka, leta ikamwongereraho 18 000 Frw.

Uwo mu cyiciro cya gatatu asabwa kwizigamira nibura 18 000 Frw ku mwaka, leta ikamwongereraho 9 000 Frw, naho abo mu cyiciro cya kane basabwa kwizigamira nibura 72 000 Frw ku mwaka, ariko bo ntacyo bongererwaho.

Ayo mafaranga ashobora gutangwa buri kwezi, buri gihembwe, buri mezi atandatu cyangwa agatangirwa rimwe.

Umuntu witeganyirije muri Ejo Heza atangira guhabwa pansiyo yujuje imyaka 55, akayifata mu gihe cy’imyaka 20.

Guverineri w’Intara y’Iburengerazuba, Habitegeko François yasabye abaturage gukomeza kuyoboka Ejo Heza

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .