Uko umunsi wa kabiri w’Inama y’Umushyikirano ya 16 wagenze (Amafoto)

Yanditswe na Philbert Girinema
Kuya 14 Ukuboza 2018 saa 11:05
Yasuwe :
0 0

Abanyarwanda b’ingeri zitandukanye bongeye guteranira mu cyumba cya Kigali Convention Centre ahabereye umunsi wa kabiri ari nawo wa nyuma w’Inama y’Igihugu y’Umushyikirano ku nshuro ya 16.

Uyu munsi hatangijwe gahunda ihamye y’ubwizigame bw’igihe kirekire (Ejo Heza).

Minisitiri w’Intebe, Dr Edouard Ngirente, yatangaje ko abantu bagera ku 30.660 bamaze kwiyandikisha kandi bamaze no kwizigamira amafaranga agera kuri miliyoni 17.347.575 Frw.

Iki kigega kizajya cyakira ubwizigame bw’abantu hashingiwe ku byiciro by’ubudehe barimo, Leta na yo igire icyo ibongereraho ku buryo ku myaka 55 umuntu wizigamiye azatangira gufata amafaranga nka pansiyo imenyerewe.

Ubwizigame fatizo ku bari mu cyiciro cya mbere n’icya kabiri ni ibihumbi 15 Frw ku mwaka, abo mu cya gatatu ni ibihumbi 18 ku mwaka ariko n’utayagezeho ntabuzwa kuzigama, na ho abo mu cya kane ni ibihumbi 72 Frw, kandi umuntu yihitiramo uko azajya ayatanga bitewe n’aho ayakura.

Amafaranga abantu bizigamiye azajya ashorwa mu bikorwa bibyara inyungu bityo buri mwaka ikigega cyungukire abanyamuryango bitewe n’ayo bizigamiye, icyakora ngo biba byiza iyo uzigamiye umwana muto kuko azayafata nyuma y’igihe kirekire yaragwiriye.

KURIKIRA UKO INAMA YAGENZE

Perezida Kagame asoje inama y’igihugu y’umushyikirano ku nshuro yayo ya 16 ashimira abayitabiriye ndetse anifuriza abanyarwanda bose muri rusange impera nziza z’umwaka no gutangira uwa 2019 mu mahoro.

Amikoro ntakwiriye gushirira mu ngendo

Ntabwo amikoro aba akwiriye gushirira mu mishahara, mu ngendo, ugasanga abantu babanje barireba, icyo gikwiye guhagarara.

Ubuzima

Ikintu kijyanye n’imirire mibi, ikintu kijyanye na bwaki, ikintu kijyanye n’imirire mu bana bato […] ibyo nabyo tugomba kubishakira umuti wa vuba kandi birashoboka. Ibyangombwa birahari, twese, inzego zose, minisiteri zose, abanyarwanda bose tugomba kubikurikiranira hafi ndetse abatudindiza bigomba kubagiraho ingaruka.

Impinduka mu burezi

Ibintu turabivuga kenshi tukabishyiramo amikoro dufite, ariko umusaruro uvamo, yaba mu burezi abantu mu mashuri y’ibanze kuzamuka ukagera hejuru, uko bikorwa n’ibivamo, ibipimo byose ndetse ku buryo tugereranywa n’amahanga yacu; ibyacu biri hasi.

Ikibabaje ni uko biri hasi kandi mwe mukaba mwumva ko muri ibitangaza, bigomba gukosorwa vuba na bwangu. Guhera mu mashuri abanza, ayisumbuye [...] ntabwo ari inshingano za minisitiri, ni inshingano za buri wese. Umubyeyi ni umurezi, umuyobozi ni umurezi, abarerwa nabo bagashyiraho akabo.

15:00: Perezida Kagame atangiye kugeza ku banyarwanda ijambo risoza iyi nama y’Umushyikirano iri kuba ku nshuro ya 16. Ati “ Mu byo dukora byose, icyo bikomeza bigarukaho ni guhindura ubuzima bw’abanyarwanda, bw’igihugu kigatera imbere aribyo bita ‘transformation’ kandi irashoboka tumaze kubibona, ko bishoboka mu bikorwa, ikiba gisigaye ni ukuntu twakwihuta.

Gutera imbere nubwo bishoboka, urahita uragendera ku yihee ntabwe, urashaka kugenda buhoro ibyajyaga kugutwa umwaka bikagutwa itanu, ni byo wifuza? Byose biri mu guhitamo.

Iyo ni yo yari impamvu nasabye Minisitiri w’Intebe n’abandi bayobozi bari kumwe mukanya, biriya byo kurwanya ubukene mu baturage bacu, ubukene ngira ngo ejo hari uwabivuze ntabwo ari ibintu twari dukwiye kwemera.

Mu mwanya ushize hari ibintu Bamporiki yatubwiye, ubukene ntabwo ari ibintu dukwiye kubana nabyo, bikatubera umuturanyi, kubera ko hari abashobora kubwihanganira.

Ubukene ntaho bugeza umuntu, ngira ngo wenda no muri za nyigisho bigeze kuvuga, ngira ngo bashaka kuvuga ikindi.

Ari umukene ku mutima ari umukene ku mubiri byose ntaho bigeza umuntu. Iyo wambuye, iyo wishe, aho niho ubukire buba bubi, cyangwa iyo ubukoresheje nabi, ubwo ni bwo bukire bubi.

Gukira ku mubiri no ku mutima, mu idini ryacu ngira ngo aho niho tuzajya ahantu heza nyuma y’ubu buzima turimo. Ibyo dukora byose bituganisha ku iterambere, bifite uburyo bikorwa, iyo tutujuje ubwo buryo ntabwo tugera ku iterambere, biratinda.

Nabigaruye hano n’ubu ndabisubiramo kugira ngo abayobozi bari hano mu nzego z’ibanze, aho ariho hose babyumve ko iyi nshingano iremereye kandi ifite uko ikorwa, ikidutenguha ni uko ibyo bikorwa bidahwitse utamenya neza aho byabaye , uwabigizemo uruhare, ndetse ngo umumenyere igihe afatirwe ibyemezo,

Iyo byajemo ibikorwa bibi biradutinza …cyane cyane iyo abayobozi bireba ntibarebe abo bayobora.

- Guverineri wa Banki Nkuru y’Igihugu, John Rwangombwa, yavuze ko habayemo amakosa, amafaranga yari agenewe abatishoboye aho kugira ngo bayahabwe ngo ibateze imbere bayahabwa nk’inguzanyo ya banki.

Yavuze ko Sacco yari ikwiye kuba nk’umuyoboro abakene baherwamo amafaranga abagenewe, gusa uizeza ko ibibazo bigiye gukosorwa.

Perezida Kagame yagize ati “Ni ikibazo cyo gukosora imikorere mibi aho iri hose…ni imikorere mibi igomba gukosorwa yaba hanze n’ahandi”. Minisitiri w’Intebe yagise amusubiza ati “ imikorere mibi tuzayikosora ahantu hose hashoboka.”

- Minisitiri w’Ubutegetsi bw’Igihugu, Prof Shyaka Anastase, yavuze ko amafaranga ya VUP atari aya Sacco kuko yo ifite imari shingiro yayo naho VUP ikaba amafaranga yandi leta yashyizeho agamije kuzamura imibereho y’abaturage y’abakene.

Ati “Byabaye ibigenwa n’uko Sacco ibyumva asa n’aho abaye amafaranga asanzwe ajya mu bucuruzi.”

Yavuze ko VUP itangira yakoreraga mu mirenge 120, uwo mwaka abanyarwanda basaga ibihumbi 150 bari bahawe aya mafaranga. Uyu mwaka n’ushize ikorera mu mirenge irenga 250 ariko abayigannye bari munsi y’ibihumbi 30.

- Minisitiri w’Intebe, Dr Edouard Ngirente, yavuze ko mu biganiro byatanzwe ejo, abayobozi mu bisubizo byabo byagaragaye ko habayemo ukudahuza, no kudakorana kw’inzego.

Yavuze ko kuva mu 2010, uburyo amafaranga VUP yatanzwe bitandukanye n’uko bwari bwemejwe, byatangiye inyungu ari 2%, amafaranga atangwa na Minisiteri y’Ubutegetsi bw’Igihugu ku bakene.

Yakomeje avuga ko nyuma byinjiye mu Umurenge Sacco bihindura isura kuko ya mafaranga yari agenewe gufasha abakene yatangiye gutangwa nk’inguzanyo isanzwe inyura mu buryo bw’imikorere y’amabanki ku nyungu ya 11%.

Ati “Ndemera ko hari ibitaragenze neza”.

- Perezida Kagame yagize ati “Ndibuka hagati ya VUP na Sacco ariko byombi bibereyeho mu buryo bwo gushakisha uko twarwanya ubukene mu baturage tukazamura amikoro yabo kandi yacu y’igihugu. Hari n’izindi porogaramu nyinshi ziriho mu nzego zitandukanye.

Twahoze tuganira mbabwira ko iyo twahuye n’uko n’ejo bundi nahuye n’urubyiruko iteka havuka ibibazo muri ayo mahuriro tuba twahuriyemo, abaza ibyo leta ikora […] ikibazo ni ukuvuga ngo leta iyo igiye gushyiraho ingamba nk’izi, iba yazishyiriyeho gukemura ikibazo […] Ariko ngira ngo ejo niba mwarakurikiye nkuko twese twakurikiye, ibiganiro uko byagenze, byerekanaga ko inzego za leta ntitubyumva kimwe, ziravuga ibintu bitandukanye ku kibazo kimwe twafatiye ingamba.

Icyatumye nsaba Minisitiri w’Intebe n’aba bayobozi bandi, bitari ugutanga ibisobanuro gusa, ni ukugira ngo bigire ibyo tuvanamo byo kugira ngo ibyo twafatiye ingamba ntabwo abayobozi ibintu bigira aho bigera ngo umuntu abihindure ibyo, ni porogaramu ya leta.”

Perezida Kagame yavuze ko bidakwiye ko gahunda ya leta umuntu ayihindura iye.

14:30: Perezida Kagame asabye ko Minisitiri w’Intebe, Dr Edouard Ngirente; Minisitiri w’Ubutegetsi bw’Igihugu, Prof Shyaka Anastase; Minisitiri w’Imari n’Igenamigambi, Dr Uzziel Ndagijimana na Guverineri wa Banki Nkuru y’Igihugu, John Rwangombwa batanga ibisobanuro ku kibazo cy’inguzanyo ya VUP cyagaragajwe ejo.

14:20: Minisitiri Uzziel Ndagijimana yavuze ko mu 2032 abanyarwanda bageze mu za bukuru bazaba bikubuye kabiri.

Bityo gahunda yo kwizigamira izafasha abanyarwanda kubona pansiyo ihoraho, kubona icumbi no kuriha amafaranga y’ishuri ndetse no kuba yakoresha ubwizigamire nk’ingwate ku nguzanyo.

Yavuze ko inyigo yakozwe mu gihe cy’umwaka umwe yerekanye ko iyi gahunda izaba igeze ku bantu barenga ibihumbi 200, ndetse mu gihe cy’umwaka ubwizigame buzaba bugeze kuri miliyari zirenga 14 Frw.

Gufungura konti muri Ejo Heza bikorerwa kuri telefoni. Umuntu akanda *506# ku mirongo ya MTN, Tigo na Airtel.

14:00: Nyuma y’ikiganiro cya mbere kivuga ku “Kuzirikana amateka ya Jenoside, tubumbatira indangagaciro zacu”, hakurikiyeho ikiganiro cya kabiri ku ruhare rwo kuzigama mu iterambere ry’igihugu.

Kiri gutangwa na Minisitiri w’Imari n’Igenamigambi, Dr Uzziel Ndagijimana.

Ibintu byo gukomera kurusha inshingano si iby’i Rwanda-Bamporiki

-  Ngera ahantu nkasanga Meya yari nyakubahwa, agahita anyimukira nkaba nyakubahwa. Guverineri yaba aje umusangiza w’amagambo agahita ansimbuka akaba nyakubahwa. Abanyarwanda turacyari mu kintu kitari ik’i Rwanda. Dutoranya umuyobozi tukamufasha mu nshingano. Ibintu byo gukomera kurusha inshingano si iby’i Rwanda.

-  Mu bukwe umuntu bamuha intebe kubera umwanya arimo yaba atakiwurimo akabura aho yicara. No mu tubari utuma umuntu wakira ukiri mu mwanya akagenda atanumvise icyo umutumye, wagaruka utakiri mu nshingano ukabura ukwakira. Iki kintu kirakomeye kandi ntabwo ari mu nzego nkuru no mu baturage bo hasi bubaha umuntu kurusha inshingano.

Perezida Kagame n’abandi bayobozi batandukanye baha amashyi Bamporiki Edouard nyuma y’ikiganiro yari amaze gutanga

13:20: Mu bibazo byabajijwe harimo ikijyanye n’icy’abagabo batera indaba abana bato. Minisitiri w’Uburinganire n’Iterambere ry’Umuryango, Solina Nyirahabimana, yasubije ko amategeko muri iki gihe ateganya ibihano bikarishye ahubwo ikibazo kigaragarira mu kuba abana basambanyijwe badakunze kuvuga ababasambanyije.

Yavuze ko akenshi imiryango ibizamo, ‘ikajya mu kunga no guhishira […] yanabasha no kubivuga, bikavugwa byaratinze ku buryo abakurikirana ibyaha babura ibimenyetso’.

Amafoto y’abayobozi batandukanye kuri uyu munsi wa kabiri

- Umuyobozi Mukuru wungirije wa Imbuto Foundation, Umutesi Gerardine, nk’umwe mu barokotse Jenoside, yavuze ko kurokoka byari igitangaza, nta wari ubyiteze. Yashimye ‘ingabo zaturokoye ziyobowe na Perezida Paul Kagame. Nta gahunda iruta iyo’.

Yakomeje avuga ko nyuma yo kubohorwa, icyihutirwaga cyari uguharanira kubaho.

Umutesi yavuze ko Umuryango IBUKA watumye babasha gutinyuka, ababyeyi benshi bari barafashwe ku ngufu AVEGA igiyeho bakorerwa ubuvugizi.

Urubyiruko rwo rwari rumaze kurokoka rwashinze AERG. Ati “Tumaze gufashwa kwiga twateguye icyo natwe twaha abanyarwnada binyuze muri AERG/GAERG week twitura abagiraneza barokoye bakitandukanya n’ikibi n’abamugaye baturoko. Tumaze gutanga inka 30”.

Uhereye ibumoso: Umushakashatsi muri Aegis Trust, Shenge Sandra; Umunyamabanga Nshingwabikorwa wa Komisiyo y’Igihugu yo kurwanya Jenoside, Dr Bizimana Jean Damascène; Umuyobozi Mukuru wungirije wa Imbuto Foundation,Umutesi Geraldine n’ Umuyobozi w’Itorero ry’Igihugu, Bamporiki Edouard
Umunyamabanga Nshingwabikorwa wa Komisiyo y’Igihugu yo kurwanya Jenoside, Dr Bizimana Jean Damascène ari kumwe n'Umuyobozi Mukuru wungirije wa Imbuto Foundation,Umutesi Geraldine
Umuyobozi Mukuru wungirije wa Imbuto Foundation, Umutesi Gérardine
Umuyobozi w’Itorero ry’Igihugu, Bamporiki Edouard
Umunyamabanga Nshingwabikorwa wa Komisiyo y’Igihugu yo kurwanya Jenoside, Dr Bizimana Jean Damascène
Umushakashatsi muri Aegis Trust, Shenge Sandra

- Bamporiki Edouard uyobora Itorero ry’Igihugu yabwiye abari muri iki cyumba ko abakurambere bari bafite ikintu gikomeye kijyanye no kudahemukira igihugu.

Ati “Baravugaga bati mu maraso yanjye niba harimo kugambanira u Rwanda, amaraso yanjye ameneke uyu munsi mbere y’uko ndugambanira.”

Yakomeje avuga ko nyuma abazungu baje, abanyarwanda bakabarwanya ariko ‘ibyago twagize ni uko abantu babanje kutwitondera no kubanza kutwigaho cyane […] intekerezo yo gukunda u Rwanda no kwigira yari yabananiye, bazana iby’iwabo’.

Bamporiki yavuze ko intege nke zigihari mu mibereho y’abanyarwanda ari ukutamenya ibyabo. Ati “Intege nke zikirimo ndabizeza ko tuzazirangiza ni uko abantu bavuga ngo [u Rwanda] barugire nka Paradizo. Kandi ntushobora gusa n’ikintu tutazi.”

- Dr Bizimana yabwiye abateraniye muri iyi nama ko amateka yerekana ko Jenoside ikimara guhagarikwa, ikibazo gikomeye cyari uko u Rwanda rwari rwasenyutse burundu.

Yavuze ko Jenoside igihagarikwa, ku ya 17 Nyakanga 1994, FPR Inkotanyi yasohoye itangazo isaba imitwe yose ya politiki itarayijanditsemo kwihuza bagafatanya mu kubaka u Rwanda.

Yakomeje avuga ko Guverinoma y’ubumwe yagiyeho tariki 19 Nyakanga 1994, ndetse icyo gihe nta tegeko ryo guhana Jenoside ryari rihari. Byabaye ikibazo kuko icyo cyaha kitari gukurikiranwa kitarashyirwa mu gitabo cy’amategeko ahana.

Mu 1996 nibwo iryo tegeko ryagiyeho hanyuma mu 1997 imanza za mbere aba aribwo zitangira. Uwo mwaka warangiye hamaze gucibwa imanza 330. Hagati ya 1998 na 2002, imanza ibihumbi 8363 nizo zari zimaze gucibwa.

Aha ni ho haje guturuka igitekerezo cya Gacaca yamaze imyaka icumi. Izi nkiko zafashije kugarura ubumwe bw’abanyarwanda.

Perezida Kagame na Madamu Jeannette Kagame ubwo bitabiriye umunsi wa kabiri w'Inama y'Igihugu y'Umushyikirano

11:50: Ikiganiro cya mbere cy’uyu munsi kiratangiye. Kiri gutangwa n’Umunyamabanga Nshingwabikorwa wa Komisiyo y’Igihugu yo kurwanya Jenoside, Dr Bizimana Jean Damascène; Umuyobozi w’Itorero ry’Igihugu, Bamporiki Edouard n’Umuyobozi Mukuru wungirije wa Imbuto Foundation,Umutesi Geraldine.

Kiyobowe n’Umushakashatsi muri Aegis Trust, Shenge Sandra. Iki kiganiro gifite insanganyamatsiko igira iti “Kuzirikana amateka ya Jenoside tubumbatira indangagaciro zacu”

11:40: Perezida Kagame amaze kugera muri Kigali Convention Centre ahakomereje ibiganiro by’umunsi wa kabiri ari nawo wa nyuma w’Inama y’Igihugu y’Umushyikirano iri kuba ku nshuro ya 16.

Umuyobozi Mukuru Wungirije ushinzwe ibikorwa muri RDB, Emmanuel Hategeka, aganira na Safari Innocent wigeze kuba Umunyamabanga Uhoraho muri Minisiteri y’Ubucuruzi n’Inganda
Minisitiri w’Ibikorwaremezo, Amb. Claver Gatete aganira n’Umuyobozi wa Banki ya Kigali (BK), Dr Diane Karusisi
Komiseri mukuru w'Ikigo cy'Igihugu cy'imisoro n'amahoro, Pascal Bizimana Ruganintwali (wambaye amadarubindi)
Minisitiri w’Ubutegetsi bw’Igihugu, Prof. Shyaka Anastase aganira na Perezida wa Sena, Bernard Makuza
Perezida wa Komisiyo y'Igihugu y'Uburenganzira bwa Muntu Nirere Madeleine, aganira na Guverineri wungirije wa Banki y’Igihugu, Dr. Monique Nsanzabaganwa
Umuyobozi w’ Ikigo cy’Igihugu gishinzwe Ikoranabuhanga mu Itumanaho n’Isakazabumenyi (RISA), Muhizi Bagame Innocent, aganira na Minisitiri w’Ikoranabuhanga no guhanga udushya, Paula Ingabire
Minisitiri w’Ingabo, Gen. Maj. Albert Murasira ari kumwe n’Umunyamabanga wa Leta muri Minisiteri y'Ubuzima ushinzwe ubuzima rusange n'ubuvuzi bw'ibanze, Dr Patrick Ndimubanzi
Perezida wa Sena, Bernard Makuza aganira na Minisitiri w’Ububanyi n’Amahanga, Dr Sezibera Richard
Umushumba wa Diyosezi Gatolika ya Byumba, Servelien Nzakamwita, aganira na Minisitiri w’Intebe, Dr Edouard Ngirente, mbere y’uko ibiganiro by’umunsi wa kabiri bitangira
Umuyobozi w'Ikigo cy'Igihugu cy'Iterambere, Clare Akamanzi, ubwo yageraga mu cyumba cya KCC kiri kuberamo iyi nama ya 16
Perezida wa Sena, Bernard Makuza aganira n’Umujyanama wa Perezida mu by’umutekano, Gen James Kabarebe
Minisitiri w’Intebe, Dr Edouard Ngirente aganira na Perezida w’Urukiko rw’Ikirenga, Prof. Sam Rugege na Minisitiri muri Perezidanse, Uwizeye Judith
Uwahoze ari Ambasaderi w’u Rwanda muri Kenya, James Kimonyo aganira na Ambasaderi w’u Rwanda muri Zimbabwe, James Musoni
Abantu barenga ibihumbi 2000 bitabiriye Umushyikirano ku nshuro ya 16

Umunsi wa mbere w’Inama y’Igihugu y’Umushyikirano wasojwe abawitabiriye bemeranije ko hakenewe ingamba nshya zo kongera uruhare rw’abaturage muri gahunda z’iterambere, buri rwego rukuzuza inshingano zarwo, kandi hakongerwa ubufatanye hagati ya Guverinoma, abikorera ku giti cyabo n’abaturage mu kwihutisha ishyirwa mu bikorwa rya gahunda yo guteza imbere ibikorerwa mu Rwanda, “Made in Rwanda”.

Amafoto: Niyonzima Moise


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza