Uko umuhango wo Kwita Izina abana b’ingagi wagenze (Amafoto)

Yanditswe na Mukaneza M.Ange, Philbert Girinema
Kuya 7 Nzeri 2018 saa 10:06
Yasuwe :
0 0

Abanyarwanda n’abanyamahanga barimo; Graca Machel, Lauren wamamaye muri Arsenal FC, Olusegun Obasanjo wayoboye Nigeria n’abandi kuri uyu wa Gatanu bise amazina abana b’ingagi 23, mu muhango ngarukamwaka wabereye mu Karere ka Musanze ahazwi nko mu Kinigi.

Kwita Izina byabaga ku nshuro yawo ya 14, aho ingagi ziganjemo izavutse hagati ya Nyakanga 2017 na Kamena 2018, zahawe amazina.

UKO UYU MUHANGO WAGENZE UMUNOTA KU WUNDI

Abaturage ba Musanze bitabiriye umuhango wo kwita ingagi amazina ari benshi
Umuyobozi Mukuru wa RDB Clare Akamanzi yavuze ko u Rwanda rufite intego yo kwinjiza miliyoni 800 z'amadolari mu 2024
Minisitiri w'Intebe, Dr Ngirente avuga ko ishoramari mu bukerarugendo rikwiye kwiyongera

Minisitiri w’Intebe, Dr Edouard Ngirente, wahagarariye Perezida Kagame muri uyu muhango, mu ijambo rye yavuze ko Kwita Izina ingagi bishimangira intego Guverinoma y’u Rwanda yihaye yo kurushaho guha agaciro ibidukikije hagamijwe iterambere rirambye.

Ati “Izi ngagi nk’uko mwese mubizi, ku Isi yose, zisigaye gusa mu Rwanda no muri Pariki ziri mu bihugu bihana imbibi na Pariki y’Ibirunga. Ni umutungo w’agaciro kanini tugomba kwitwaho twese.”

Yakomeje agaragaza ko ingagi zigira uruhare runini mu kongera umusaruro u Rwanda rukura mu bukerarugendo, kandi inyungu ikaba igera ku baturiye za pariki bahabwa 10% anyuzwa mu gutera inkunga imishinga ibateza imbere.

-  Mu bindi byashyizwemo imbaraga mu kumenyekanisha ubukerarugendo bw’u Rwanda, Akamanzi yanakomoje kuri filime ya Rwanda: Royal Tour igaragaramo Perezida Kagame yerekana ibyiza bitatse u Rwanda, aho imaze kurebwa na miliyoni 73 hirya no hino ku Isi.

13:45: Akamanzi yavuze ko mu byumweru bibiri bya mbere Arsenal igiranye amasezerano y’ubufatanye n’u Rwanda, abashakisha amakuru ku Rwanda biyongereye.

Bitandukanye n’uko mbere bashakishaga amakuru ajyanye na Jenoside ubu bareba kuri Google ajyanye na Visit Rwanda, Amahoteli mu Rwanda n’ibindi bifitanye isano n’u Rwanda.

13:40: Umuyobozi w’Ikigo cy’Igihugu cy’Iterambere, RDB, yavuze ko u Rwanda rufite gahunda yo kuzamura umusaruro uturuka ku bukerarugendo ukagera kuri miliyoni 800 z’amadolari mu 2024.

Ibikorwa remezo bijyanye n’ubukerarugendo nabyo ni bimwe mu byo u Rwanda rushyize aho yatanze urugero ku kibuga cy’Indege cya Bugesera ndetse n’Ikompanyi ya RwandAir isigaye ikora ingendo mu byerekezo 25 harimo no mu Burayi. Yatangaje ko mu gihe cya vuba izaba ikora ingendo mu Bushinwa na Leta Zunze Ubumwe za Amerika.

13:20: Nyuma y’umuhango wo Kwita Ingagi amazina, ubu Itorero Mashirika niryo riri gusurutsa abitabiriye uyu muhango

Amazina yahawe ingagi

-  Hong Liang & Xinyu Zhang: Bise ingagi izina rya ‘Urugero’

-  Laureano Bisan Etamé-Mayer: Yise ingagi izina ‘Ikipe’


-  Ambasaderi wa Leta Zunze Ubumwe za Amerika mu Rwanda, Peter Vrooman: Yise umwana w’ingagi izina rya ‘Intarutwa’


-  Alexa Gray: Yise umwana w’ingagi izina rya ‘Kunesha’


-  Sheikh Dr. Abdulaziz Ali Bin Rashid Al Nuami: Yise umwana izina rya ‘NaYombi’


-  Samba Bathily: Yahaye ingagi izina rya ‘Ineza’


-  Dr. Noeline Raondry Rakotoarisa: Yahaye ingagi izina rya ‘Imbaga’


-  Michael Wale: Yahaye ingagi izina rya ‘Paradizo’


-  Thomas Krulis: Yahaye ingagi izina rya ‘Mahirwe’
-  Judith Kakuze: Yahaye ingagi izina rya ‘Indakemwa’

-  Dr. Olusegun Obasanjo: Yahaye ingagi izina rya ‘Aremu’. Ni izina rya kabiri rya Obasanjo, risobanura ngo buri mwana ni ingenzi mu muryango

-  Josette Sheeran yise ingagi izina rya ‘Umuryango’


-  Theo Kgosinkwe & Nhlanhla Nciza: Bahaye ingagi izina rya ‘Akeza’

Abahanzi bazwi nka Mafikizolo bise ingagi irina rya Akeza

-  Michael O’Brien-Onyeka: Yahaye ingagi izina rya ‘Umuseke’


- Adrian Gardiner: Yahaye ingagi izina rya ’Irebero’
-  Strive Masiyiwa: Yahaye ingagi izina rya ‘Ishusho’
-  Peter Riedel: Yahaye ingagi izina rya ‘Umusaruro’
-  Alexandra Virina Scott: Yahaye ingagi izina rya ‘Izahabu’


-  Rao Hongwei: Yahaye izina ry’Igishinwa risobanuye ’Uburumbuke’
-  Hugh Fernley-Whittingstall: Yahaye ingagi izina “Amatungo”
-  Jeannette Uwiragiye: Yahaye ingagi izina “Irebe”
-  Amadou Gallo Fall: Yahaye ingagi izina ‘Kwiyongera’
-  Graca Machel: Yahaye ingagi izina ‘Urugori’

11:35: Itsinda ry’abahanzi bakomeye ryo muri Afurika y’Epfo, Mafikizolo, rimaze gususurutsa abitabiriye uyu muhango. Hakurikiyeho umuhango nyir’izina wo Kwita Izina

Imbyino za Kinyarwanda zashimishije cyane abanyamahanga bari bitabiriye iki gikorwa

11:30: Umuyobozi ushinzwe iterambere ry’ubukerugendo muri RDB, Belyse Akaliza, niwe umaze gufata ijambo. Yashimiye abafatanyabikorwa batandukanye bateye inkunga iki gikorwa kugira ngo kigende neza.

Mu ijambo rye yavuze ko Ibarura rishya ryakozwe ryagaragaje ko ingagi zo mu Birunga zikomeje kwiyongera, zikaba zaravuye kuri 480 mu 2010 ubu zigeze kuri 604.

11:25: Guverineri w’Intara y’Amajyaruguru, Gatabazi JMV, atangiye aha ikaze abashyitsi bitabiriye uyu muhango. Yavuze ko inshingano z’Intara y’Amajyaruguru ari ugukomeza kubungabunga ibinyabuzima biri muri Pariki y’Ibirunga

Guverineri w'Intara y'Amajyaruguru, Gatabazi JMV, ubwo yahaga ikaze abitabiriye iki gikorwa

11:05: Minisitiri w’Intebe, Dr Edouard Ngirente, niwe mushyitsi mukuru muri uyu muhango. Amaze kugera mu Kinigi aho ibi birori bigiye kubera

Minisitiri w'Intebe, Dr Edouard Ngirente, ubwo yari ageze mu Kinigi; asuhiza Minisitiri Vincent Biruta nawe wari witabiriye uyu muhango
Umuyobozi w'Ikigo cy'Igihugu gishinzwe Iterambere, Clare Akamanzi, na Minisitiri w'Intebe, Dr Edouard Ngirente ubwo haririmbwaga indirimbo yubahiriza igihugu
Graca Machel wari Umugore wa Nelson Mandela ni umwe mu bitabiriye uyu muhango akanita izina ingagi

- Abayobozi batandukanye bitabiriye uyu muhango

Minisitiri w'Umuco na Siporo, Uwacu Julienne, ni umwe mu bayobozi bari bitabiriye

11:00: Umuyobozi Mukuru wa RDB, Clare Akamanzi ubwo yaganiraga n’abanyamakuru uyu muhango ufite igisobanuro gikomeye.

Ati “ Kwita izina ntibifite igisobanuro ku ngagi gusa, bifite igisobanuro ku iterambere ry’ubukungu n’imibereho myiza. Ikindi bifite icyo bisobanuye ku Rwanda n’abaturage bakomeza guhindura imibereho yabo kubera kubungabunga ibidukikije.”

“Iyo dufashe neza ibidukikije n’inyamaswa zacu, tubasha kubona ba mukerarugendo b’ingeri zose, iyo ubukerarugendo buteye imbere mu gihugu bitanga amahirwe y’akazi.”

“Uyu munsi dufite abantu barenga 9000 bakora mu bukeragendo, tubasha kwishyura imisoro ivuye mu bukerarugendo, tubasha kugera ku Isoko ry’ivunjisha.”

- Uko iki gikorwa cyagenze mu myaka ishize:

Tariki ya 5 Nzeli 2015 nabwo Umuhango wo Kwita Izina warabaye. Icyo gihe ingagi 22 nizo zahawe amazina.

Kanda hano urebe uko uwo muhango wagenze

Naho mu mwaka ushize ingagi 19 nizo zahawe amazina mu birori byabereye mu Kinigi mu Karere ka Musanze bikitabirwa na Perezida Kagame n’abashyitsi bakomeye baturutse mu bindi bihugu barimo umuherwe Howard G. Buffet; Umunyamideli ukomeye ku Isi, Veronika Vařeková ukomoka muri Czech; Umunya-Nigeria, Patience Ozokwor ukina filime; Sean Justin Penn wahoze ari umugabo wa Madonna; umuhanzi w’Umunyarwanda The Ben n’abandi.

Kanda hano urebe uko uwo muhango wagenze

- Abari buze Kwita Ingagi amazina bambaye imyambaro ya Kinyarwanda

Dr. Noeline Raondry Rakotoarisa ni umwe mu bise amazina ingagi
Akanyamuneza kari kose ku maso ya Alex Scott wari ugeze mu Rwanda ku nshuro ya mbere

10:25: Muri aka kanya abahanzi batandukanye barimo Riderman na Bruce Melodie nibo bari gususurutsa abitabiriye uyu muhango

Umuhanzi Riderman ubwo yasusurutsaga imbaga y'abitabiriye iki gikorwa
Indirimbo za Bruce Melody zirimo Ntundize n'izindi, zishimiwe cyane n'Abaturage b'i Musanze
Bruce Melody yashimishije abaturage b'i Musanze bari bitabiriye iki gikorwa

-  Laureano Bisan Etamé-Mayer: Uzwi nka Lauren, yabaye umukinnyi w’umupira w’amaguru ukomoka muri Cameroun. Nawe yamaze kugera mu Kinigi ahagiye kubera uyu muhango wo Kwita Izina

Lauren wahoze akina nka Myugariro wa Arsenal ubwo yageraga mu Kinigi ahabereye uyu muhango
Akanyamuneza kari kose ku maso ya Lauren

10:20: Umwongerezakazi, Alex Scoot, wabaye Kapiteni wa Arsenal y’Abagore ni umwe mu bari buze Kwita Izina ingagi. Nawe ari mu Kinigi ahari kubera uyu muhango.

Uyu mugore w’imyaka 34 muri iki gihe asigaye ari umusesenguzi w’umupira w’amaguru aho akora kuri Sky Sports. Ni umwe mu bubatse izina ariko yaratangiye bigoranye kuko mu myaka ya mbere yakoraga muri iyi kipe mu bashinzwe kumesa imyenda.

Alex Scott wabaye Kapiteni wa Arsenal y'Abagore ni umwe mu bitabiriye uyu muhango, yita n'ingagi izina

-  Ushinzwe ubucuruzi muri Arsenal, Vinai Venkatesham, abwiye IGIHE ko ari iby’agaciro kuba Arsenal nk’umufatanyabikorwa w’u Rwanda yitabiriye igikorwa, by’umwihariko Kwita Izina akaba ari igikorwa cya mbere kigaragaza ubufatanye n’u Rwanda.

Ngo impamvu iyi kipe yahisemo gufatanya n’u Rwanda, ari ukubera imbaraga rushyira mu guteza imbere ubukerarugendo no kubungabunga ibinyabuzima.

10:10: Muri uyu mwaka umwe mu bantu bari buze Kwita Amazina ni Igikomangoma cya Leta Zunze Ubumwe z’Abarabu, Sheikh Dr. Abdulaziz Ali Bin Rashid Al Nuami. Uyu azwi nka Sheikh w’ibidukikije, wiyeguriye ubukerarugendo no kwita ku bidukikije.

Barimo kandi Graca Machel, wabaye umugore wa Nelson Mandela nyuma y’uko umugabo we wa mbere Perezida wa Mozambique, Samora Machel yitabye Imana.

Abaturage bari bitabiriye ku bwinshi bitwaje amabendera y'igihugu
Mu Kinigi ahabera uyu muhango wo Kwita Izina hubatse inzu za Kinyarwanda
Hari abasaza bari gucuranga imyirongi
N'abacuranga inanga ya Kinyarwanda baba bari hafi y'abisi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza