Uko ubworoherane n’ubwuzuzanye byafashije imiryango yari ibanye mu makimbirane kwiteza imbere

Yanditswe na Thamimu Hakizimana
Kuya 17 Mutarama 2020 saa 10:55
Yasuwe :
0 0

Abahanga mu by’imibanire bavuga ko umuryango ubanye neza uzira amakimbirane, ari ishingiro kamere ry’igihugu kizima, isoko y’iterambere ry’ubuzima rusange n’ibanga nyaryo ryo gukunda no kubaha Imana.

Hari n’abagereranya urugo rwiza n’ijuru rito cyangwa paradizo dusoma muri Bibiliya n’ibindi bitabo nyobokamana, ariko nanone ntibatinye kuvuga ko urugo rubi rurutwa na gereza.

Amakimbirane mu miryango, ni imvano y’ubukene n’umurage mubi ku bana bazawuvukamo kuko uretse kwirukana umutuzo n’iterambere rusange, anatuma rimwe na rimwe abashakanye bicana, abavandimwe bakabana badasuhuzanya n’ibindi bibi.

Ingero ni nyinshi aho wumva umukecuru ngo yishe umusaza bamaranye imyaka myinshi, umugabo yishe umugore amucamo ibice cyangwa aramutaba ateraho imboga n’andi mahano ndengakamere.

Nta wakwirengagiza kandi gatanya zivuza ubuhuha hirya no hino mu gihugu. Imibare yerekana ko kugeza mu Ugushyingo 2018, hari hamaze gucibwa imanza za gatanya 1311, ni ubwikube bw’inshuro 19 ugereranyije n’umwaka wa 2017.

Imibare igaragaza ko mu 2016 ingo zatandukanye zari 21, mu 2017 ziba 69. Iyi mibare irerekana ko gatanya zatanzwe n’inkiko zikubye inshuro 62 bingana na 6,200% mu myaka itatu ishize.
Nubwo ikibazo cy’imiryango ibana mu makimbirane n’ingaruka zacyo biremereye igihugu, hari imwe mu miryango yari ruvumwa kubera kokamwa n’iki kibazo ariko ubu yahindutse icyitegererezo mu kugisohokamo gitwari ubu ikaba ibanye neza.

Nyiranizeyimana Marceline ufite abana barindwi wo mu Karere ka Kamonyi, yemeza ko ubworoherane, ubwuzuzanye no guhana agaciro hagati ye n’uwo bashakanye ari byo byatumye bakemura ikibazo cy’amakimbirane bari bafitanye.

Ati “Nigeze kugirana amakimbirane n’umugabo kuko nabyaraga abahungu bagapfa mbona ntazabasha kuba muri urwo rugo ntangira guhisha imitungo nkagira konti zanjye atazi, nkanaragiza amatungo atazi kubera kwiheba n’umugabo nawe aba uko”.

Avuga ko nyuma y’inyigisho yahawe n’umuryango Duhamic-Adri, binyuze muri gahunda yawo yitwa ‘Gals’, yigisha abantu iby’uburinganire n’uko bakwiye kubana, ubu yiyunze n’uwo bashakanye, bakaba babayeho neza ndetse n’abana bakaba biga batuje.

Nyiranizeyimana avuga ko gukemura aya makimbirane byababyariye imbuto kuko bakoreye hamwe, bahuza ubushobozi none ubu bamaze kugura ibibanza bitatu n’inzu eshatu by’agaciro karenga miliyoni 10 z’amafaranga y’u Rwanda.

Muhozi Djafari, utunze abagore babiri mu rugo rumwe, nawe yemeza ko ibiganiro n’ubwuzuzanye no kubahana hagati ye n’abo bashakanye, ari byo byatumye nta makimbirane arangwa mu rugo rwe.

Ati “Icya mbere gikemura amakimbirane ni ukwizerana, ibiganiro no kubahana. Nka njye mfite abagore babiri mu rugo rumwe ariko ntibari bagirana amakimbirane na rimwe kuko tugira igihe cyo kuganira hagati yacu n’abana, tugategura gahunda zacu neza nta kibazo kibayemo kubera kudahishanya.”

Ushinzwe Imicungire y’Imishinga muri Duhamic-Adri, Mukanzayisenga Vestine, ahamya ko uburyo bakoresha ari bwo bufasha ingo zibana mu makimbirane gukemura ibibazo zifitanye.

Ati “Gals ni uburyo dukoresha hakoresheje gushushanya, umuntu agashushanya icyerekezo, akareba aho ashobora kugera, akagenda yiha intego kugira ngo azagereyo kandi birabafasha kuko dufite inyigisho nyinshi zirimo iy’uburinganire, igiti cy’uburinganire n’inyigisho y’indoto ya Diamant n’izindi.”

Kuva uyu muryango watangira gukoresha gahunda ya Gals mu 2012, imiryango irenga ibihumbi 13 yari ifitanye amakimbirane imaze kwigishwa kandi hatanzwe umusaruro mwiza cyane.

Imwe mu miryango ibana mu makimbirane yemeza ko inyigisho yahawe zayifashije kwiyunga no gukemura amakimbirane yari ifitanye
Imiryango ifitanye amakimbirane yigishwa hakoreshejwe ibishushanyo
Muhozi Djafari utunze abagore babiri mu rugo rumwe
Nyiranizeyimana avuga ko ubworoherane n'ubwuzuzanye byatanze umusaruro mu rugo rwabo
Ushinzwe imicungire n’imishinga muri Duhamic-Adri, Mukanzayisenga Vestine, ahamya ko uburyo bakoresha bufasha ingo zibana mu makimbirane gukemura ibibazo zifitanye

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza