Uko ubuhinzi bwahinduye imibereho ya Ntawumenyumunsi bukamwinjiriza ibihumbi 500Frw ku kwezi

Yanditswe na Hakizimana Jean Paul
Kuya 18 Gicurasi 2020 saa 11:45
Yasuwe :
0 0

Ntawumenyumunsi Speraton, ni umugabo wubatse uri mu kigero cy’imyaka 50 utuye mu Murenge wa Karenge mu Karere ka Rwamagana. Amaze imyaka 20 akora ubuhinzi bw’ikawa n’urutoki kuri hegitari icumi, aho kuri ubu yongeyemo amatunda, ibinyomoro n’inanasi ku buryo mu kwezi yinjiza ibihumbi 500 by’amafaranga y’u Rwanda akura muri ubu buhinzi bwose.

Ni umugabo wabanje gukubitika kubera ubuzima bubi aho yakoze akazi gatandukanye ariko rimwe na rimwe ntigahaze ibyifuzo bye. Mu 2000 ngo yafashe icyemezo agura ubutaka atangira kubuhingaho buhoro buhoro ageze aho yiyegurira uyu mwuga ngo kuko yasanze uri mu yateza umuntu imbere cyane mu gihe wawukoze neza.

Ati “Icyo gihe nabanje kugura imirima ngenda nyegeranya bitewe n’abajyanama bangiraga inama ko ejo hazaza ubuhinzi bwazangirira akamaro, nahereye ku buhinzi bw’ikawa nyuma mpinga n’urutoki mbona biri kugenda neza njya mu Murenge wa Mugesera mpingayo inanasi nkomeza gutera imbere ngera no ku binyomoro, avoka n’amatunda.”

Ntawumenyumunsi avuga ko buri gihingwa ahinga acyitaho cyane akagiha umwanya ku buryo kimwinjiriza amafaranga.

Ati “Nk’urutoki ni rwo runyinjiriza amafaranga menshi ndukuramo nibura ibihumbi 300 mu kwezi, ngiye mu mibare ku bihingwa byose mu kwezi nibura nkuramo ibihumbi 500 Frw byaba byagenze neza nkanayarenza.”

Ntawumenyumunsi avuga ko akoresha abakozi 30 bakurikirana ibikorwa bye akabatangirira ubwisungane mu kwivuza nabo bakamufasha gukurikirana imirima ye nk’urutoki, gusarura amatunda, inanasi, ibinyomoro n’ibindi bihingwa mu gihe byeze.

Yatangiye gukora ubushakashatsi bwo kuvanga ikawa n’insina

Bimenyerewe ko ubundi ikawa ihingwa ukwayo n’urutoki rugahingwa ukwarwo, ariko Ntawumenyumunsi yatangiye gukora ubushakashatsi bw’uburyo wavanga ikawa n’insina byose bikaguhera rimwe umusaruro mwiza nta na kimwe kidindiye.

Avuga ko ubu bushakashatsi yatangiye kubukora nyuma yo kubona mu rutoki hagenda hasigaramo intera nini hagati y’insina n’iyindi akigira inama yo guteramo ikawa.

Ati “Ubundi uko bucya bukira niko umuntu agomba gutekereza uko abyaza umusaruro igihe, rero buriya iyo ikawa hejuru zifite igicucu cy’amakoma urutoki rurera rukamererwa neza cyane kandi nazo zikera ku buryo uzibona ukabona zirashishe cyane, nabitangiye ari ubushakashatsi ariko naje gusanga bishoboka cyane.”

Abo baturanye abafasha iki?

Uyu mugabo avuga ko kimwe mu bintu afasha abaturage harimo kubaha imbuto ku buntu, kubaha akazi ndetse no kubaha ubujyanama bwatuma nabo biteza imbere.

Ati “Abari mu cyiciro cya mbere cy’ubudehe nibo nibandaho cyane mbaha akazi nibura nyakabyizi nkamwishyura amafaranga 1000 nkanagira abazamu nkura muri ba bakozi nibura buri umwe muhemba ibihumbi 30 nkanabishyurira mitiweli ku buntu, mbafasha kwiteza imbere bagura ihene, inkoko n’ibindi bikorwa bibateza imbere.”

Ntawumenyumunsi avuga ko mu Rwanda hari ibihe byiza bijyanye n’ubuhinzi ku buryo buri wese ufite ubutaka yegereye abashinzwe ubuhinzi akabaganiriza bamugira inama y’icyo yahinga kandi kikamugirira akamaro.

Kugeza ubu uyu mugabo afite ibiti by’ikawa ibihumbi icumi agahinga amatunda kuri hegitari ebyiri ahandi akahahinga urutoki, inanasi n’ibinyomoro, intego ni ugukomeza kwagura ubuhinzi bwe kugeza ubwo buzamwinjiriza miliyoni imwe ku kwezi.

Ahinga amatunda ku buso bungana na hegitari ebyiri
Amatunda ari mu byo atangiye guhinga vuba ariko nayo yatangiye kumwinjiriza amafaranga menshi
Ibitoki yahinganye n'ikawa usanga ari binini cyane kandi n'ikawa ntacyo yabaye

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .