Uko u Bubiligi bwifashishije “Twitter” mu kumenyesha u Rwanda ko rwahagaritse imikoranire mu bya gisirikare

Yanditswe na Philbert Girinema
Kuya 11 Ugushyingo 2020 saa 07:30
Yasuwe :
0 0

Imyaka ya 2010 kugera mu 2013, ni imwe mu ikomeye u Rwanda rwanyuzemo mu bijyanye na dipolomasi n’imibanire mpuzamahanga kuva mu 1994. Nko mu 2012 ni wo mwaka rwakubitanye n’ibizazane, rutereranwa n’abantu benshi barufashaga by’umwihariko ku itariki nk’iyi ubwo u Bubiligi bwakoraga ibitamenyerewe mu mibanire mpuzamahanga, bukarumenyesha ko buruhagarikiye inkunga ariko bigakorwa hifashishijwe Twitter.

Inkomoko ya byose ni Uburasirazuba bwa Congo bumaze imyaka myinshi bwarabaye izingiro ry’ibibazo bitandukanye u Rwanda rwahuye nabyo. Intambara z’urudaca zimaze igihe muri Kivu y’Amajyaruguru n’iy’Amajyepfo zateye ibibazo byinshi ku bihugu bitandukanye by’ibituranyi by’umwihariko u Rwanda.

Intandaro ishingiye ku mateka y’izo Ntara zituwe n’igice cy’abaturage b’abanye-Congo bavuga Ikinyarwanda bagezeyo kera no mu gihe cy’Ubukoloni.

Soma: Imvano y’umubare munini w’abavuga Ikinyarwanda batuye mu Burasirazuba bwa RDC

Mu 2012, itsinda ry’impuguke za Loni zashyize hanze raporo ku kibazo cy’umutekano muke, hagarukwa by’umwihariko ku bibazo byatewe n’umutwe wa M23 wari warashoje intambaro.

Iyo raporo yakozwe ikuriwe n’impuguke ya Loni yitwa Steven Hege. Uyu mugabo yari yahawe inshingano zo gusuzuma ishyirwa mu bikorwa ry’ibyemezo byari byarafashwe n’Umuryango w’Abibumbye mu 2003 byo kubuza igurwa ry’intwaro no gufasha imitwe ya gisirikare ikorera muri Congo.

Yasohotse izi mpuguke zishinja u Rwanda gufasha M23, gusa rwihutira kwamagana ibyari bikubiyemo aho icyo gihe uwari Minisitiri w’Ububanyi n’Amahanga, Louise Mushikiwabo, yagiranye ikiganiro n’abanyamakuru ku kibazo cy’umutekano muke muri RDC akavuga ko u Rwanda nta ruhare rubifitemo, anagaragaza amakosa 10 yari muri iyo raporo.

Icyo gihe yavuze ko ikibazo cy’umutekano muke ugaragara mu Burasirazuba bwa RDC kirimo inyungu z’ibihugu byinshi n’Umuryango Mpuzamahanga ukaba ubitiza umurindi, aho kugira ngo ubikemure. Ati ”Umuryango Mpuzamahanga ubifitemo amacenga menshi cyane nta bushake bwo kurangiza kiriya kibazo buhari."

Soma: U Rwanda rwagaragaje amakosa 10 Loni irubeshyera muri raporo irushinja gufasha M23

Didier Reynders wari Minisitiri w'Ububanyi n'Amahanga w'u Bubiligi yanditse kuri Twitter amenyesha u Rwanda ko imikoranire igihugu cye cyari gifitanye narwo mu bya gisirikare yahagaritswe

Raporo yamenyekaniye kuri Twitter bwa mbere

Tariki ya 25 Gicurasi 2012 nibwo bwa mbere iyi raporo yavuzwe mu itangazamakuru na mbere y’uko ishyikirizwa Loni. Umunyamakuru wa BBC News, Gabriel Gatehouse, niwe watangaje ibikubiyemo abinyujije kuri Twitter aho yavuze ko “mu makimbirane yo mu Burasirazuba bwa Congo; abantu ibihumbi 70 bavuye mu byabo” akomeza yibaza ati “u Rwanda rwaba rubirimo? Niba rubirimo, ku kihe kigero? Ndacyacukumbura”.

Mu cyumweru cyakurikiyeho, yanditse ubundi butumwa ashimangira ko u Rwanda rufasha imitwe ihungabanya umutekano mu Burasirazuba bwa Congo, atangaza ko ari inkuru akesha Loni.

Ku itariki ya 12 Kamena 2012, Hege n’itsinda rye bagiye New York mu Ishami ry’Inama y’Umuryango w’Abibumbye rishinzwe Amahoro ku Isi kugira ngo batange amakuru ku bizaba bigize raporo yabo, harimo n’ibyo bakuye mu biganiro bagiriye mu karere. Muri iyo nama, yari yitabiriwe n’abahagarariye Ambasade y’u Rwanda muri Loni, nta na hamwe impuguke za Loni zigeze zivuga ko zifite ibirego k’u Rwanda.

Ku itariki ya 13 Kamena 2012, izo mpuguke zagiranye ikiganiro na Komite y’Umuryango w’Abibumbye Ishinzwe ibihano kuri Congo. Muri iyo nama, nibwo bwa mbere, Hege n’itsinda rye bavuze ko hari n’amakuru bakuye muri Congo ku nkunga u Rwanda ruha M23.

Ibihugu bikomeye byashingiye kuri raporo ya Hege bikoresha inzira zitandukanye zirimo na dipolomasi maze bifatira u Rwanda ibihano binasaba ibindi kubigenza bityo.

Raporo yakozwe n’Inteko Ishinga Amategeko y’u Rwanda mu 2013 ku karengane gakorerwa u Rwanda hashingiwe ku mutekano muke muri RDC igaragaza ko “Igitangaje n’uko ibyo bihugu byihutiye gufata ibyemezo mu gihe raporo yari ikiri iy’agateganyo, kandi itaremezwa n’Inama y’Umuryango w’Abibumbye Ishinzwe Amahoro ku Isi”.

Ikomeza ivuga ko gushingira kuri raporo itari yemezwa ari “ikosa rikomeye mu mategeko no mu mikoranire y’ibihugu” dore ko u Rwanda rwafatiwe ibihano mu gihe rutari rwakanashyikirijwe raporo irimo ibyo rushinjwa.

Ibyo bihano rwafatiwe birimo no guhagarikirwa inkunga n’ibihugu nk’u Bwongereza, u Buholandi, u Budage, Suède, Umuryango w’Ubumwe bw’u Burayi n’ibindi. Mu masezerano u Rwanda rwari rwarasinyanye nabyo, harimo ko mu gihe inkunga igiye guhagarikwa, kubera impungenge cyangwa se indi mpamvu, rugomba kubanza kubimenyeshwa, gusa icyo gihe ntibyakozwe.

Nka Leta Zunze Ubumwe za Amerika zahagarikiye u Rwanda inkunga yari igenewe ishuri rya gisirikare rya Nyakinama. Mu itangazo ryo ku wa 21 Nyakanga 2012, Amerika yavuze ko ihagaritse inkunga ya 200.000$ yageneraga Ingabo z’u Rwanda, ko ari icyemezo gifashwe bitewe n’inkunga u Rwanda rutera imitwe yitwaje intwaro ikorera mu Burasirazuba bwa Congo.

U Bubiligi bwahagaritse imikoranire rubitangariza kuri Twitter

Umunsi nk’uyu mu 2012, Uwigeze kuba Minisitiri w’Ububanyi n’Amahanga w’u Bubiligi, Didier Reynders, yanditse kuri Twitter amagambo make, atangaza ko igihugu cye cyahagaritse ubufatanye cyari gifitanye n’u Rwanda mu bya gisirikare arushinja gushyigikira M23.

Nyuma yaho yabwiye itangazamakuru ko u Bubiligi budashobora gufatanya n’u Rwanda mu bya gisirikare ngo butoze abantu bagamije guhungabanya umutekano.

Raporo y’Inteko Ishinga Amategeko y’u Rwanda yo mu 2013 kuri raporo zikorwa ku bibazo by’umutekano muke muri RDC bigatwerererwa u Rwanda igira iti “Ubusanzwe mu mikoranire hagati y’ibihugu, ntabwo ihagarikwa ry’amasezerano y’ubutwererane areba ibihugu bibiri rigomba kumenyekanishwa na Minisitiri, ku giti cye, kandi akoresheje ubu buryo.”

“Biragaragara ko Minisitiri Didier Reynders akomeje kugaragaza urwango afitiye u Rwanda, kuko nubwo igihugu cye kitahagaritse inkunga giha u Rwanda mu bikorwa by’iterambere, ntibimubuza gutsimbarara ku cyemezo cyo guhagarika inkunga zose zigenerwa u Rwanda hakoreshejwe ubufatanye bw’amahanga”.

Ayo masezerano y’imikoranire mu bya gisirikare hagati y’u Rwanda n’u Bubiligi yari yarasinywe mu 2004, arimo ko iki gihugu kizajya gifasha u Rwanda mu guhugura abasirikare, mu bushakashatsi ndetse no mu nzego z’ubuzima.

Ni yo yatumye abasirikare babiri b’u Bubiligi boherezwa mu Rwanda muri Gicurasi uwo mwaka bamara amezi abiri batanga ubufasha mu by’ubuvuzi mu bitaro bya Gisirikare i Kanombe.

U Bubiligi bwahise bukuraho ibikorwa byose bwateganyaga gukorana n’u Rwanda muri iyo ngeri, harimo nk’amahugurwa yagombaga gutangirwa mu Bubiligi mu 2012 mu rwego rw’ubuzima, ndetse na gahunda z’ibyagombaga gukorwa mu 2013 nazo zirasubikwa.

Mbere y’uko Reynders yandika buriya butumwa, tariki ya 26 Kanama 2012 yari yakiriwe na Perezida Paul Kagame mu biro bye bagirana ibiganiro byamaze amasaha arenga abiri. Yari yanakiriwe kandi n’abandi bayobozi bakuru b’u Rwanda barimo Minisitiri w’Ububanyi n’Amahanga n’Ubutwererane, bose bamusobanurira ibinyoma bishinjwa u Rwanda.

Nyuma yaho tariki ya 12 Nzeri 2012, yatangarije Komisiyo z’Ububanyi n’Amahanga z’Inteko Ishinga Amategeko y’igihugu cye, imitwe yombi, ko yemera nta gushidikanya ko u Rwanda rufite uruhare mu ntambara yaberaga mu Burasirazuba bwa Congo kandi asaba Guverinoma y’u Rwanda kwamagana M23 ku buryo bweruye no gukora ibishoboka kugira ngo intambara ihagarare.

Didier Reynders ubwo yahuriraga na Kabila wayoboraga RDC mu biganiro byabereye i Lubumbashi byiga ku kibazo cy'umutekano muke mu karere

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .