Uko Kizito yinjiwe n’umugambi w’icuraburindi wamugejeje ku iherezo ribi

Yanditswe na Musangwa Arthur
Kuya 22 Gashyantare 2020 saa 11:43
Yasuwe :
0 0

Umuhanzi Eminem [Marshall Bruce Mathers III] mu mpera za 2017 yasohoye umuzingo w’indirimbo 17 witwa “Revival” zirimo iyo yise ’Tragic Endings’, ivuga ku bibazo bijya bibaho mu miryango ku buryo umuntu yisanga mu nyanja y’ibibi akabura umwuka umufasha kuzanzamuka bikarangira agize “amaherezo ababaje”.

Ni kenshi iyo umuntu apfuye abantu birinda kuvuga ibitari byiza byaranze ubuzima bwe, haba hagize n’ubivuga bakamucyaha bati have wimukurikiza inkuru mbi. Si cyo kigamijwe muri iyi nkuru, kuko Kizito Mihigo ari umwe mu bantu bakoze ibikorwa byinshi byiza umuntu atarenza ingohe.

Magingo aya abakunze umuhanzi Kizito Mihigo akiri muzima, bibuka inganzo ye, ubutumwa bw’urukundo yaririmbye n’izindi nkuru nziza zisana imitima y’abashavuye.

Kuva yapfa yiyahuye, abantu benshi bagize gushidikanya ku cyateye urupfu rwe ndetse na mbere y’uko bigera aha, ubwo yafungwaga mu 2014, hari benshi bakomeje kurangwa no gushidikanya ku ifungwa rye bavuga bati umusivili w’umuhanzi ni iki kibi yakora cyatuma ahagurukirwa n’ubutabera agafungwa?

Amakenga yabo yashingiraga ku buryo Kizito ari umuntu wari warigaruriye imitima ya benshi ku mpamvu nyinshi. Yari umusore w’igikundiro mu bantu, bitari ukubera inganzo ye ahubwo n’uko Imana yamuremye. Ubajije benshi, wasanga abakobwa bamukundaga rwa rukundo inkumi ikunda umusore batagira ingano.

Ni umwe mu baririmbyi bake u Rwanda rwagize w’umuhanga, ubuhanga bwe bwanamwambukije imbibi, bumutereka hose, yarushije benshi icyubahiro kuko byonyine kuvuga ko yahimbye injyana y’indirimbo ikomeye mu gihugu nka ’Rwanda Nziza’, byatumaga benshi batafungura n’udushumi tw’inkweto ze.

Benshi twanyuzwe n’urwo ruhande rumwe ariko hari urundi rwari rwihishe tutamenye ari rwo benshi bakomeje kugiraho ugushidikanya kuva yafungwa no kugeza yiyahuye ejo bundi ku buryo muri iyi minsi y’urupfu rwe hanze aha hari igisa n’ukujijinganya bamwe bumva ko yishwe aho kwiyahura.

Uku kubunza imitima kwiyongera no ku kuba benshi batarigeze bemera impamvu zatumye afungwa nubwo we yemeye ibyaha akabisabira n’imbabazi.

Ndibuka umukecuru twahuriye muri bisi ku Kicukiro mu 2014 ku munsi Kizito yeretswe itangazamakuru. Yari yicaye mu ntebe y’inyuma tugana i Remera, maze araterura ati “koko uyu muziranenge muramuhora iki ko nta kibi yakora?” Ni kimwe n’abandi benshi bavugaga ko nta nabi Kizito yagirira u Rwanda cyangwa Perezida wa Repubulika wamufashije; ko ibivugwa bibi kuri we ari ibinyoma na “munyangire y’abanyarwanda”.

Kizito mu nyanja ya Opozisiyo

Kuva mu myaka ishize, Opozisiyo y’u Rwanda [abatavuga rumwe n’ubutegetsi] imaze igihe iri gushaka abakiri bato yakwifashisha mu gutera ingabo mu bitugu umugambi wayo ariko ikitsa cyane ku barokotse Jenoside yakorewe Abatutsi.

Muri uko gushakira aho, niho bahereye banyuze muri Diane Rwigara kugira ngo abe ikirango cyabo, abe wa muntu uri ku ruhimbi rw’abarwanya ubutegetsi nubwo bitabahiriye dore ko umugambi we wo kwiyamamariza kuyobora u Rwanda wapfubye, ahanini bitewe n’uburiganya butemewe n’amategeko yifashishije harimo no gukoresha impapuro mbimbano ubwo yageragezaga kuzuza ibisabwa na komisiyo y’amatora.

Uyu muvuno opozisiyo yawuciye kuko uwo yari itegerejeho amaboko, Kizito Mihigo yari amaze gufungwa, icyari gikurikiyeho kwari ukureba uburyo u Rwanda rwashyirwaho igitutu binyuze mu bihugu bimwe no mu miryango mpuzamahanga kugira ngo afungurwe.

Amaze gukatirwa imyaka icumi, icyizere cyarayoyotse kuko batumvaga ko ashobora kuvamo mbere y’iriya myaka, babonye avuyemo batangira kurabya indimi kuko ibya Diane Rwigara byari bitangiye kunanirana.

Abatavuga rumwe n’ubutegetsi babonaga Kizito Mihigo nk’umucunguzi wabo cyane ko muri bo ingufu bashyiraga mu mitwe yitwaje intwaro zari zitangiye kuba imfabusa kubera impfu za hato na hato z’abarwanyi bayo. Muri make Kizito Mihigo bamubonagamo nka “Mesiya” cyangwa "Umucunguzi" wabo!

Ari muri Gereza, yagiranye ikiganiro rwihishwa n'abatavuga rumwe n'u Rwanda, avugamo amagambo benshi batamukekera apfobya Jenoside yakorewe Abatutsi

Imiterere y’umugambi w’icuraburindi wa Kizito

Umugambi mubisha watangiye gukirigita Kizito Mihigo mu myaka isaga icyenda ishize. Hagati ya 2011 na 2012, Kizito yari amaze kuba umuhanzi wigaruriye imitima ya benshi, usibye abakirisitu, cyane ahubwo abarokotse Jenoside kubera indirimbo zabahumurizaga mu bihe byo kwibuka.

Umuntu yavuga ko byakaze mu 2012 asa n’umaze kumera amababa, kubera kuririmba indirimbo za politiki n’izihimbaza Imana, nubwo yari amaze kwigarurira imitima ya benshi, yabonye ko hari igice kimwe cy’abanyarwanda cyari kitaramwiyumvamo neza.

Icyo ni icy’abatavuga rumwe na Leta, abahakana jenoside, ababaswe n’ingengabitekerezo ya jenoside bavuga ko habaye jenoside ebyiri n’abandi nk’abo. Aho niho yahereye akora indirimbo yari igamije kunezeza imitima yabo, ayita “Igisobanuro cy’urupfu”.

Ariko mbere y’aho yari amaze imyaka igera kuri itatu ari mu biganiro bya rwihishwa n’abatavuga rumwe na leta, aha yari yaratangiye guharura inzira imuganisha buhoro buhoro muri opozisiyo. Nyuma y’aho mu mugambi we hari gukurikiraho kwiyegereza imiryango mpuzamahanga n’ibihugu byose birwanya u Rwanda noneho akaba ya mpirimbanyi iganje, kizigenza mu batavuga rumwe na Leta, umwe utavugwaho ko yaba yaragize abo yica, ibyo yiba cyangwa abo yendereza.

Muri macye mu 2014 ubwo yasohoraga indirimbo "Igisobanuro cy’urupfu", yayifataga nk’intambwe ya nyuma mu rugendo yari yaratangiye rumuganisha ku kurwanya Leta hifashishijwe imbunda na dipolomasi, kuko amaboko yo yabonaga ko amaze kuyagwiza nyuma yo kwigarurira abarokotse Jenoside bari bamufite ku mutima mu buryo bumwe cyangwa ubundi, abapfobya Jenoside nabo yabakozagaho imitwe y’intoki, abakirisitu nabo abafasha guhimbaza Imana.

Hari umwe mu bari inshuti za Kizito z’akadasohoka utifuje ko amazina ye atangazwa ku mpamvu z’umutekano we wagaragaje ko Kizito yanateganyaga ko amaze kugera hanze y’igihugu, yari kuvuga mu buryo busesuye ko amaraso ye avanze [umuhutu n’umututsi] mu rwego rwo gukomeza kwagura abamushyigikiye.

Kuri opozisiyo yari iturufu ikomeye, umusore ukiri muto, ukunzwe na bose, bitandukanye n’uko ibintu bimeze ubu. Bamwe bagize uruhare muri Jenoside, abandi bari muri leta zabanje, abandi bahoze muri FPR gutyo gutyo; abo bantu rero guhuza byarabagoye.

Ibimenyetso simusiga!

Nyuma y’ukwiyahura kwa Kizito, ibimenyetso byinshi byatangiye kujya hanze bigaragaza uruhande rwe rutigeze rumenyekana mu mugambi we mubisha.

Igihamya cya mbere ni ikiganiro yagiranye rwihishwa na Ruhumuriza Mbonyumutwa kuri telefoni akiri muri gereza amezi ane mbere y’uko afungurwa ahawe imbabazi [muri Gicurasi 2018].

Uwo Mbonyumutwa wavuganaga na Kizito kuri telefoni abarizwa muri Jambo ASBL - ishyirahamwe rikorera mu Bubiligi rigizwe ahanini n’urubyiruko rukomoka ku babyeyi bagize uruhare muri jenoside - ryihaye inshingano zo guhakana Jenoside yakorewe Abatutsi.

Icyo kiganiro ni agace gato kazasohoka mu kiganiro mbarankuru cyiswe “Man of the year” cyateguwe mu buryo cyari kugaragaza Kizito nk’umuntu w’intwari.

Muri icyo kiganiro cyasakaye hanze Kizito aba abwira Ruhumuriza ati “U Rwanda bwo ubwarwo, rwabaye Gereza. Buri gihe iyo uzanye ingingo ivuga ku zindi nzirakarengane, abandi bantu bishwe na FPR; ako kanya ufatwa nk’umuntu upfobya Jenoside.”

“Mu 2014 ntabwo natawe muri yombi, ni nk’aho nashimuswe nkafungwa igihe kinini. Nabwiwe ko ngomba kwemera ibyaha. Baravuze ngo nutemera ibyaha barakwica.”

Kizito Mihigo muri icyo kiganiro yavugaga ko n’uwamusubirishamo iyo ndirimbo yayikora, kuko yanayikoze abizi neza ko leta y’u Rwanda itazayakira neza ariko ko bitashobokaga kumubuza kuyikora.

Ku rundi ruhande, impuhwe yagiriwe n’abarwanya ubutegetsi bw’u Rwanda zigaragaza neza ko bari mu mugambi mubisha ukomeye mu gihe yari kubasha kugera hanze y’u Rwanda.

Nka FDLR yatangaje ko iteganya kumuririra nk’“umusangirangendo akaba n’impirimbanyi ya demokarasi”.

Kumwita "umusangirangendo" bisobanuye ko Kizito Mihigo yari inkoramutima y’uriya mutwe, cyane ko ubwo yatabwaga muri yombi agana mu Burundi byaje gutahurwa n’inzego z’umutekano ko yarimo asanga imitwe y’iterabwoba ikorera mu Burundi no muri Congo.

Yari afitanye umubano ukomeye na Charles Onana udasiba gupfobya Jenoside

Charles Onana, ni umwanditsi urwanya ubutegetsi bw’u Rwanda unapfobya Jenoside yakorewe Abatutsi, ku wa 18 Gashyantare yashyize ku rukuta rwe rwa Facebook ubutumwa buvuga kuri Kizito Mihigo.

Muri iyo nyandiko Onana yavuze ko hari imishinga yateganyaga gukora afatanyije na Kizito Mihigo ndetse ko bohererezanyaga ubutumwa ubwo yari afunzwe.

Ati “Yabonaga ko ibyo nakoreraga igihugu cye ari ukuri, ndetse nanjye nemeraga ko intambara ye y’ukuri yari iboneye. Twari kure mu ntera ariko mu ntekerezo twari kumwe.”

Charles Onana ni umugabo ukomoka muri Cameroun ariko unafite ubwenegihugu bw’u Bufaransa. Ntacana uwaka na Guverinoma y’u Rwanda, ndetse inshuro nyinshi yakunze kumvikana ayishinja ibibi byose, birimo n’ibyo aherutse kwandika ko ariyo yishe Kizito Mihigo.

Yigeze kuvuga ko Jenoside yakorewe Abatutsi ari cyo kinyoma kinini cyakozwe muri Afurika mu kinyejana gishize. Mu minsi ishize nabwo yumvikanye kuri radiyo y’Abafaransa ahakana Jenoside, ku buryo byageze aho abanyarwanda baba mu Bufaransa batangira urugendo rwo kumurikirana mu nkiko ku bwo gupfobya Jenoside.

Kizito Mihigo yari afite ubutumwa bundi ku mutima yateganyaga kuzavuga mu ijwi riranguruye umunsi yari kuba atakibarizwa mu Rwanda yamaze kugera muri opozisiyo

Kizito Mihigo yababazwaga n’umuntu unenga “Interahamwe”

Umwe mu batavuga rumwe n’ubutegetsi bw’u Rwanda witwa Constance Mutimukeye ubarizwa mu Rugaga Nyarwanda Ruharanira Igihango cy’Amahoro mu Rwanda ’RANP-Abaryankuna’ rupfobya Jenoside yakorewe Abatutsi, yavuze uburyo hari imikoranire yari afitanye na Kizito.

Mu butumwa bwe avugamo uburyo nta gihe kinini yari amaze aziranye na Kizito Mihigo, ariko ko batangiye kuvugana ubwo yavaga muri gereza.

Ati “Nyuma y’aho asohokeye muri gereza, hashize amezi menshi yanyandikiye ku rubuga nkoranyambaga yifuza ko twaganira. Twavuganye bwa mbere tariki ya 29 Kanama 2019, yambwiye aya magambo (yari mu rurimi rw’Igifaransa).”

“Uko bagutuka kuri Twitter bakubwira ngo uri Interahamwe birambabaza. Hashize igihe kirekire nkurikira ibyo wandika, nagira ngo nkubwire ko “la memoire pour toutes les victimes est un sujet qui me tient à coeur – Kwibuka bose ni ibintu mfite ku mutima, ni ukumbabarira ubu ndi mu Rwanda sinshobora kubafasha, ariko mukomeze ibyo bikorwa.”

Uyu mugore avuga ko Kizito yongeye kumwandikira tariki ya 24 Nzeri 2019 amubwira ati “iri yicwa ry’Abanyarwanda rihoraho rirambabaza cyane…nabuze icyo nkora”.

Yavuze ko bari baremeranyije ko ibyo azajya amwandikira, azajya abisiba buri gihe, ndetse nyuma y’aya matariki nabwo ngo bakomeje kuzajya bavugana.

Ngo yongeye kumwandikira ubwo yamwohererezaga inyandiko ivuga ngo “uko bimeze kose, simpakana ko Abahutu bishwe haba mu Rwanda cyangwa muri Repubulika Iharanira Demokarasi ya Congo, ariko dushyize mu gaciro, tuvuge ko ubutabera butagishobotse kuri bo”.

Icyo gihe ngo Kizito Mihigo yahise yihutira kumubwira ngo “Ibi bintu simbyemeye na gato, na ziriya nzirakarangane zigomba gukorerwa ubutabera, tugomba kubiharanira. Twakomeje kubiganiraho, twungurana igitekerezo ku cyo umuntu yasubiza kuri iyi ngingo.

Muri iyi nyandiko ya Mutimukeye avugamo uburyo ngo Kizito yamubwiye “ukuntu inshuti ze zimwe z’Abahutu baba i Burayi” bamubwiye uburyo yavuye muri gereza akabicaho, “akibagirwa abahutu”.

Ati “Tuvuganye ku byo abantu bamuvugagaho ngo “yasohotse muri gereza areka ibitekerezo bye”, yansubije ko “Gereza idahindura igitekerezo cy’umuntu. Ko ibyo yatekerezaga mbere ya gereza ari byo agitekereza.”

Uwo mugambi ngo bari bariyemeje kuwutangira mu ntangiriro za 2020 ariko igihe kigeze Kizito amusaba kuba abihagaritse. Ati “Nyuma y’aho rimwe na rimwe yambazaga amakuru yanjye, afite icyizere ko mu minsi yari imbere twari kuzavugana afite ubwisanzure.”

Usibye aba, benshi mu barwanya ubutegetsi bw’u Rwanda bifashishije imbuga nkoranyambaga bavuga ku mishinga bari bafitanye na Kizito Mihigo , bigaragaza ukuntu inzira ye yayibonaga mu barwanya Leta cyane.

Nta kabuza ko uburemere bwo gusubira icyaha bwatumye agwa mu kwiheba ndetse no gutakaza icyizere yari yarubakiyeho imishinga ye y’icuraburindi, ku buryo bikekwa ko byaba ari byo byamuteye gufata umwanzuro wo kwiyahura.

Byonyine kuba inzego z’umutekano zari zigiye kumusubiza muri gereza, agafungwa imyaka itandatu yari asigaje hakiyongeraho n’indi y’ibyaha bibiri harimo icya ruswa no gushaka gusohoka igihugu akajya kwifatanya n’abakirwanya, byagombaga gutuma muri we adatekana na mba.

Ikindi ni uko ibi bimenyetso byose biri kujya hanze nyuma y’urupfu rwe, bishoboka ko inzego z’umutekano zari kubigeraho nk’uko zageze ku bya mbere, nk’umuntu wabeshye rubanda ko yahindutse yagombaga guterwa ipfunwe n’ibikorwa bye ndetse no gutahurwa kwabyo.

Ni zo ngaruka zo gutatira igihango, kuko twagiye tubona benshi batahiriwe n’ubuzima kubera amakosa nk’aya yo gushaka guhungabanya igihugu ku mpamvu zifitanye isano no kugira inyota yo gufata ubutegetsi, biyibagije ko umutekano w’u Rwanda n’ubusugire bwarwo birinzwe bikomeye.

Mu muhango wo gushyingura Kizito Mihigo wabaye kuri uyu wa Gatandatu tariki 22 Gashyantare, nyina umubyara yagize ati “Mumurekure nanjye namurekuye.”

Indi nkuru wasoma: Ibimenyetso bikomeye bishinja Kizito Mihigo kugambanira Perezida Kagame [Yanditswe mu 2014 ubwo Kizito Mihigo yatabwaga muri yombi ku nshuro ya mbere]

Benshi ntibigeze bemera ibyaha Kizito yashinjwe nawe akaza kwiyemerera bitewe n'uko bari bazi uruhande rumwe rwe gusa
FDLR yasohoye itangazo ritumira abarwanashyaka bayo mu gikorwa cyo kunamira Kizito Mihigo bigaragaza uburyo abatavuga rumwe n'u Rwanda bamubonaga nk'umucunguzi wabo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .