00:00:00 IGIHE NETWORK KN KINYARWANDA EN ENGLISH FR FRANCAIS

Uko Inshuti z’Umuryango zabaye umusingi wo kugarura abana mu mashuri ku bwinshi

Yanditswe na Idukunda Kayihura Emma Sabine
Kuya 28 Ukuboza 2022 saa 11:00
Yasuwe :

Urwego rw’Abakorerabushake rwitwa Inshuti z’Umuryango(IZU), rukomeje gutanga umusanzu mu gukemura ibibazo bibangamira umwana, harimo no gusubiza ku ishuri abari bararivuyemo.

Ikigo cy’Igihugu gishinzwe imikurire no kurengera umwana (NCDA) kigaragaza ko ubwo icyorezo cya COVID-19 cyatumaga amashuri afungwa, nyuma yafunguwe abana benshi ntibasubire ku ishuri bitewe n’ibibazo birimo ubukene kuko imiryango yabo yari yaratakaje akazi.

Umuyobozi Ushinzwe Ibikorwa byo Kurengera Umwana mu Muryango muri NCDA, Monique Mukamana, avuga ko Inshuti z’Umuryango zagize uruhare rukomeye mu gusubiza abana ku ishuri, cyane cyane mu bihe bya COVID-19.

Ati ‘‘Inshuti z’Umuryango rero zabigizemo uruhare zikamenya umwana utiga n’impamvu atiga.’’

Mukamana avuga ko Inshuti z’Umuryango zaganirizaga ababyeyi b’umwana utiga, zigatanga amakuru no mu zindi nzego kugira ngo zifatanye uwo mwana asubizwe ku ishuri.

Uwinshuti Angelique ni Inshuti y’Umuryango mu Mudugudu wa Giheka wo mu Murenge wa Kinyinya mu Karere ka Gasabo. Yavuze ko babigiramo uruhare runini kugira ngo abana basubizwe mu ishuri.

Ati ‘‘Nkitangira kuba Inshuti y’Umuryango hari abana benshi bari bari mu muhanda, hari abana batigaga kubera ubushobozi buke bw’ingo z’iwabo, bwa mbere na mbere hari icyiciro twajyanye cy’abana 60.’’

Munyampeta Aloys uhagarariye Inshuti z’Umuryango mu Kagari ka Kagugu ko mu Murenge wa Kinyinya ati ‘‘Aho twamenye umwana wavuye mu ishuri turagenda tukamuganiriza.’’

Munyampeta avuga ko banaganiriza ibigo by’amashuri abo bana bigagaho bakabasubizayo ndetse bakabakurikirana kugira kugira ngo batongera kuva mu ishuri.

Umunyamabanga Nshingwabikorwa w’Umurenge wa Kinyinya, Havuguziga Charles yavuze ko Inshuti z’Umuryango zagize uruhare mu gusubiza abana ku ishuri muri uwo Murenge.

Ati“Inshuti z’Umuryango ziradufasha mu gusubiza abana mu mashuri ndetse n’iwabo aho baturuka bazanywe mu mijyi mu mirimo yo mu rugo.’’

Umuhuzabikorwa mu Muryango Wita ku Burenganzira bwa Muntu (CLADHO) akaba n’Umugenzuzi w’Uburenganzira bw’Umwana ku rwego rw’igihugu, Evariste Murwanashyaka, yavuze ko Inshuti z’Umuryango zitanga umusanzu ukomeye mu gusubiza abana mu ishuri.

Ati ‘‘Hari abana baba baravuye mu ishuri bakajya mu birombe cyangwa bakajya gukora indi mirimo ivunanye, rero Inshuti z’Umuryango nizo zigira uruhare mu gukora urutonde rw’abo bana.’’

Ibarura rya Minisiteri y’Uburezi ryo mu mpera za Gashyantare 2021 ryagaragaje ko mu mashuri y’incuke, abagera kuri 4% batasubiye mu mashuri mu gihe mu mashuri abanza ari 5% batasubiyeyo.

Mu Murenge wa Kinyinya, mu mwaka wa 2020/2021 abana 82 basubijwe mu ishuri, abandi 44 barisubizwamo mu gihembwe cya mbere cy’umwaka wa 2021/2022 bigizwemo uruhare n’Inshuti z’Umuryango.

Ishami ry’Umuryango w’Abibumbye ryita ku Bana (Unicef), rivuga ko buri umwana, aho yaba ari hose cyangwa ibibazo yaba afite, afite uburenganzira bwo guhabwa uburezi kandi bufite ireme.

Inshuti z’umuryango ni urwego rwashyizweho na Minisiteri y’Uburinganire n’Iterambere ry’Umuryango ifatanyije n’Ikigo cy’Igihugu Gishinzwe Imikurire no Kurengera Umwana (NCDA) mu mwaka wa 2016, maze ruhabwa inshingano zo kurengera umwana no kugaragaza ibibazo bibangamiye imibereho ye, kugira ngo bikemuke bityo umwana abeho neza kandi atekanye.

Inshuti z'Umuryango zikomeje gufasha mu gukemura ibibazo bibangamiye umwana, harimo no kubasubiza mu ishuri

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .