Uko inkwavu Sr Mukangabire yaguze 2000 FRW zagaruye abana mu ishuri

Yanditswe na Hakizimana Jean Paul
Kuya 19 Nzeri 2019 saa 03:52
Yasuwe :
0 0

Ikibazo cy’abana bata ishuri ni kimwe mu bihangayikishije cyane nubwo hari ingamba zitandukanye zagiye zifatwa ariko ntizikirandure burundu, kuko ibipimo byerekana ko nibura muri buri karere ababarirwa mu magana baritaye.

Zimwe mu mpamvu zisembura iki kibazo ni ubukene mu miryango, guteshuka ku nshingano kw’ababyeyi, rimwe na rimwe no kunanirana kw’abana.

Dufashe urugero mu Karere ka Ngoma, mu Ntara y’Iburasirazuba, abana 497 bataye ishuri barimo 301 bo mu mashuri abanza, aho bamwe bahisemo kujya gukora akazi ko mu rugo abandi bakayoboka ibishanga bakajya kurinda umuceri.

Soeur Mukangabire Felecie, umubikira w’imyaka 29 ubarizwa mu muryango w’ababikira bisunze bikiramariya ajya gusuhuza Elizabeti mutagatifu, yanze kurebera iki kibazo kimunga ahazaza h’u Rwanda, yiyemeza guhangana na cyo yifashishije inkwavu.

Sr Mukangabire umaze imyaka ine ari umurezi ku rwunge rw’amashuri rwa Bare, ruherereye mu Murenge wa Mutenderi mu Karere ka Ngoma, yatangije uburyo bwo gukundisha abana ishuri no kugarura abarivuyemo yifashishije inkwavu ebyiri yaguze 2000 Frw, ubu abana 84 bamaze korozwa izo nkwavu ari nako benshi bagarutse mu ishuri.

Akigera muri iki kigo cya GS Bare mu 2016, yasanze benshi mu bana bahiga basibagurika abandi bakava mu ishuri kubera ubukene. Abana baburaga ibikoresho by’ishuri, imyambaro n’ibindi bagahitamo kuva mu ishuri.

IGIHE yasuye uyu mubikira wanashimiwe na Minisiteri y’uburezi ikamuha inka kubera iki gikorwa cy’indashyikirwa, avuga ko yahisemo koroza abana inkwavu kuko zororoka vuba kandi zikorozwa na benshi.

Sr Mukangabire avuga ko mu 2018 yaguze inkwavu ebyiri amafaranga 2000, arazorora zirabyara ubundi atangira kugenda areba abana b’imfubyi n’abafite imiryango itabitaho bishobora gutuma bareka ishuri atangira kuboroza, mu bo yorozaga harimo abiga mu mashuri abanza n’abiga mu mashuri yisumbuye.

Ati “Narebaga wa mwana ubayeho mu buzima butari bwiza bishobora no gutuma areka ishuri nkamubwira nti ngiye kukoroza urukwavu ruzagufasha kubona ibikoresho by’ishuri n’ibindi nkenerwa, nirubyara uzibuke mugenzi wawe nawe umworoze.”

Avuga ko mu ntego enye zatumye yoroza aba bana inkwavu harimo; kurwanya ubukene bakabona ibikoresho by’ishuri bitabavunnye, gufasha abana kurya inyama batazihashye, kwita ku bidukikije izo nkwavu zikazajya zibaha ifumbire ndetse no gukuzamo abana umuco w’urukundo wo korozanya kuko umwe uruhawe iyo rubyaye yoroza mugenzi we.

Sr Mukangabire avuga ko kuri ubu byatanze umusaruro cyane aho hari abana benshi bari barataye ishuri bagaruwe n’urwo rukwavu kuko uwo aruhaye mu mezi abiri ruba rwabyaye rugatangira kumuha inyungu.

Ati “Dufite abana benshi bari barataye ishuri bagarutse, abenshi wasangaga bava mu ishuri kubera kutabona ibikoresho by’ishuri birimo amakaye, imyambaro, amafaranga yo kurya ku ishuri ku biga mu mashuri yisumbuye bagiye bagaruka, ndabona biri kugenda neza kandi twifuza ko byagera mu bana bose, ubu abana 84 nibo tumaze koroza.”

Aborojwe inkwavu batangiye kubona umusaruro

Nishimwe Diane wiga mu wa gatanu avuga ko kutagira imyenda y’ishuri n’inkweto zo kwigana byari bigiye kuzatuma areka ishuri ariko ngo aho yaherewe urukwavu ubu ibintu bimeze neza.

Ati “Iwacu ntabwo twishoboye akenshi nabonaga kwigana imyenda idasa n’iy’abandi bimbangamiye nuko bampa urukwavu rubyara umunani noroza mugenzi wanjye umwe izindi zirindwi ndazigurisha nguramo igitambaro ubu kiri ku mutayeri ari kundodera imyenda y’ishuri, nirwongera kubyara nanone nzagurisha mbone inkweto.”

Iyamumpaye Samuel w’imyaka 12 y’amavuko avuga ko mbere atarahabwa urukwavu yakundaga kwiga gake cyane ngo akenshi yakundaga kujya gushaka imibereho mu isoko.

Ati “Mbere nigaga rimwe na rimwe kubera ubukene akenshi nabaga nagiye gutwaza abantu ibitoki n’indi myaka tukabijyana mu isoko bakaduha amafaranga ariko kuva aho bampereye urukwavu sindongera kujyayo kuko rwatangiye kunteza imbere”.

Uyu mwana avuga ko bwa mbere rwabyaye abana umunani agurishamo batanu aguramo amakaye n’inkweto izindi nkwavu zikaba zigihari.

Hirwa Jules we avuga ko aho yaherewe urukwavu byatumye asigaye ataha kare ndetse ngo anava mu rugo amaze gukora imirimo imwe n’imwe irimo kurwahirira no gukora isuku aho ruba.

Bamwe mu babyeyi b’aba bana bashima iki gikorwa cyatumye abana bamenya kwiharika, aho kuri ubu abenshi bazihawe usanga niyo bazigurishije amafaranga bahita bashaka ikintu kibafitiye umumaro baguramo.

Mukantwari Clemance avuga ko guha abana inkwavu byatumye barushaho gukunda ishuri.

Ati “Ni byiza cyane kuboroza, mbere wasangaga umwana ajya ku ishuri umwinginga none ubu nutarahabwa urukwavu asigaye yizindura ngo nihagira uwo bari bworoze uwo munsi na we ababonekemo. Ikindi ababyeyi benshi nta bushobozi baba bafite koroza umwana we rero uba umufashije.”

Akomeza avuga ko abana benshi bagarutse mu ishuri kubera iyi gahunda yo kuboroza inkwavu kuko bayungukiraho cyane.

Inka yahawe na minisitiri w’uburezi yamuteye imbaraga

Mu ntangiriro z’uku kwezi nibwo Minisiteri y’Uburezi ifatanyije n’abafatanyabikorwa bayo yahembye zimwe mu ndashyikirwa mu burezi inashimira abagaragaje udushya. Sr Mukangabire, ni umwe muri abo kuko yahawe inka.

Ati “Igihembo nahawe na minisitiri nacyakiriye neza cyane kuko cyaje ntakiteze gusa cyanyongereye imbaraga zo gukora umurimo wanjye n’urukundo rwinshi nkanashishikariza n’abandi barezi gukomeza kubikora babikunze banashakisha udushya twatuma abana turera barushaho gukunda ishuri.”

Umuyobozi w’Urwunge rw’Amashuri rwa Bare, Uwimana Dativa, avuga ko nyuma yaho Sr Mukangabire, atangirirje iki gikorwa benshi mu bana bataga ishuri bagabanutse mu buryo bugaragara.

Ati “Benshi mu bana bataga ishuri wasangaga biterwa no kujya gushaka imibereho bitewe nuko iwabo baba bakennye. Mu bana 26 bari barataye ishuri mu ntangiriro z’uyu mwaka abagera kuri 14 barigarutsemo abandi 12 turacyabashakisha kandi turi kubakurikirana na bo ngo bagaruke.”

Mu ntangiriro z’uyu mwaka mu Ntara y’Iburasirazuba habaruwe abana 15 519 bataye ishuri, ubuyobozi bwakoze ubukangurambaga burigaruramo abagera ku 13 196 hasigara 2 323 harimo bamwe abashinzwe uburezi bavuga ko badafitiye amakuru yaho bagiye.

Inkwavu zatumye abana 14 bagaruka mu ishuri ku rwunge rw'amashuri rwa Bare
Kuri ubu Sr Mukangabire amaze koroza abana 84 intego ye ni ukoroza ikigo cyose
Uyu munyeshuri yari agiye kuva mu ishuri kubera imibereho mibi ariko aho aherewe urukwavu rukabyara abasha kwigurira icyo akeneye cyose

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza