Uko ibikorwa bya Umubyeyi Aimée Laetitia byahinduye ubuzima bw’abatuye i Kirehe

Yanditswe na Twarabanye Venuste
Kuya 18 Kanama 2020 saa 12:36
Yasuwe :
0 0

Umubyeyi Aimée Laetitia ni umwe mu rubyiruko rw’indashyikirwa rwashimiwe na Madamu Jeannette Kagame mu 2017, kubera ibisubizo yashatse bigamije iterambere ry’abatishoboye aho avuka mu Kagari ka Ruhanga, Umurenge wa Kigina, mu Karere ka Kirehe.

Umubyeyi yize ibyerekeye gukora amashanyarazi mu Rwunge rw’Amashuri Indangaburezi mu Karere ka Ruhango, yarangijemo mu 2010.

Kubera ubushobozi buke, ntabwo yahise akomeza Kaminuza, ahubwo yatangiye gukora ibiraka bitandukanye gusa agahura n’imbogamizi yo kudahabwa akazi kimwe n’abo banganyaga ubushobozi b’abagabo biturutse ku myumvire yari ikiri aho avuka.

Mu kiganiro na IGIHE, uyu mukobwa yavuze ko ibi byamubereye imbogamizi kuko wasangaga abo banganya ubumenyi bamugira ‘umuyede’ wabo bumva ko afite imbaraga nkeya.

Iyi myumvire yatumye mu 2011 afata icyemezo cyo kureba icyo yakora kugira ngo abantu babone ubushobozi bwe. Icyo gihe nibwo umuriro w’amashanyarazi wari ukigera mu gace k’iwabo, yiyemeza kubwira abaturanyi kugura ibikoresho we akabashyirira umuriro mu nzu ku buntu (installation).

Umubyeyi ati “Kugira ngo babyumve byasabye ko mu mudugudu aho dutuye, hari abantu ntajyaga nca amafaranga nkababwira nti mugure ibikoresho mbashyiriremo umuriro kugira ngo abantu babone ko mbishoboye.”

“Inzu y’iwacu nyishyiramo umuriro, na papa bwa mbere yari afite ubwoba ngo ndabitwika. Yarambujije mucunga adahari ndabikora aje asanga inzu yose irabona, abantu batangira kungirira icyizere mbona n’akazi bitangira gutyo.”

Akomeza avuga ko ibi byatumye abari bafite ubushobozi bwo gukurura umuriro babikora bashishikaye, na we abantu batangira kumugirira icyizere kugeza ubwo abonye akazi ko gushyira amashanyarazi mu bigo by’amashuri bitandukanye, insengero, inzu z’abantu, Poste de santé n’Imirenge Sacco.

Uko yahuje abagore batishoboye batangira kuboha ibirago

Bivuye kuri icyo cyizere no kumenyekana, mu 2012 Umubyeyi yaje kubona akazi ko kwigisha ibyerekeye amashanyarazi mu Ishuri ry’Imyuga n’Ubumenyingiro rya Kirehe [Kirehe TVET School].

Mu gihe yigishaga yabaga atekereza ku cyo yakora kugira ngo atange umusanzu ugaragara aho atuye. Mu mpera za 2016 yaje kubona ko mu Murenge wa Nyamugari hari abagore batishoboye benshi, abegeranya mu cyo yise ‘urubohero’.

Gahunda ye kwari ukubahuriza hamwe mu Midugudu bakareba icyo bakora kibabyarira inyungu. Batangiye ari abagore batanu na we ajyamo batangira baboha ibirago, nk’imwe mu mirimo bashoboraga gutangiriraho bakoresheje igishoro gito.

Umubyeyi yavuze ko yaje gutungurwa n’ukuntu bavuye kuri batanu bagera kuri 75 mu minsi mike bahita bigabanyamo amatsinda arimo agikora n’ubu. Ibyo byatumye iyo gahunda ayijyana no mu Murenge w’iwabo wa Kigina atangira abahuriza iwabo mu rugo kuko hari imbuga ngari.

Nyuma y’ukwezi kumwe bagiye kugurisha ibirago bari bamaze kuboha bakuramo 90 000 Frw. Abo bagore bahuraga isaha imwe buri mugoroba kuva ku wa Mbere kugeza ku wa Gatanu.

Umugore umwe yashoboraga kuboha ibirago bine cyangwa bitanu mu kwezi, kwashira bakagurisha. Kimwe cyaguraga hagati ya 2000 Frw na 4000 Frw.

Muri ayo matsinda haziyemo kuganira ku gutegura indyo yuzuye, gutunga no kwita ku karima k’igikoni n’ibindi ku buryo wasangaga buri cyumweru gifite insanganyamatsiko y’icyo bagomba kwibandaho.

Amatsinda yarakomeye, amafaranga yavuye mu kuboha ibirago agira igice cy’ubwizigame no kugurizanya, andi ashyirwa mu bikorwa by’ubuhinzi batangira kwatisha ibishanga bahinga imboga n’imbuto.

Koroza ingurube abari mu matsinda

Mu gihe Umubyeyi yigishaga kuri TVET ya Kirehe yakoraga n’ibiraka bitandukanye mu by’amashanyarazi akifashisha n’abanyeshuri yigishaga bigatuma nabo bagira ubumenyi bwo mu kazi.

Yaje kubona ikiraka cyo gushyira amashanyarazi mu kigo cy’Ishuri bamuhemba ibihumbi 400 Frw ahita aguraho ingurube 13 aziha bamwe mu bari muri ya matsinda kubera icyizere bari bamaze kugirana hagati yabo.

Ntabwo byahagarariye kuri izo ngurube 13 ahubwo ngo uko abonye amafaranga yaguraga izindi akazoroza abanyamuryango b’amatsinda. Uwahawe ingurube yagombaga kubyara kabiri bakagabana ibyana hanyuma akoroza abandi babiri agasubiza yayindi yahawe.

Umubyeyi ati “Uko nabigenzaga twajyaga mu itsinda bitewe n’izo nabonye [ingurube] niba nabonye eshanu tugatoranya abantu bababaye cyane twaba duhaye icyororo.”

Uko igihembo cyamufunguriye amarembo

Mu Ukuboza 2017, nibwo Umubyeyi yatoranyijwe mu rubyiruko n’imiryango 10, bashimiwe n’Umuyobozi w’Ikirenga wa Imbuto Foundation, Madamu Jeannette Kagame, kubera ibikorwa by’indashyikirwa.

Icyo gihe Madamu Jeannette Kagame yasabye abashimiwe gukomeza inzira batangiye kuko nta mupaka uhari wababuza gukomeza ibyo biyemeje.

Igihembo yahawe avuga ko cyamufunguriye amayira kuko byatumye ahura n’abantu batandukanye; mu nama, ingendoshuri n’amahugurwa yagiye yitabira nyuma y’icyo gihembo.

Ati “Nyuma yaho nagiye no muri Kenya nkora urugendoshuri, nsura abandi bantu bafite n’indi miryango bagiye bashinga.”

Nyuma yo kubona ibihembo ngo yagumye mu burezi ariko atekereza no gushinga umuryango wita ku Iterambere ry’abari n’abategarugori witwa ‘Umubyeyi Initiative.

Ati “Numvaga nshaka gukora ku kibazo cy’uburinganire kubera ko nanjye byankozeho kubona umuntu afite ubushobozi ntakintu abura ariko bakamubona nk’aho amugaye. Hari abo mu muryango wanjye bumvaga ko ndiho nanira iwacu kubera ko nakoze ikintu nshaka, bashingiye ko ndi umukobwa.”

Mu 2018, Umubyeyi yatangiye gukora amatsinda y’abakobwa babyariye iwabo kugira ngo bagire aho bahurira bagaruke mu buzima busanzwe kuko bari bafite ibibazo bitandukanye mu miryango yabo byatewe no kuba barabyariye iwabo.

Yatangiye gahunda y’umwaka ihurije hamwe abakobwa 130 agira n’amahirwe baza gufashwa n’Akarere ka Kirehe basubizwa mu ishuri biga imyuga, basubira mu buzima busanzwe.

Aho niho igitekerezo cyabaye ndakuka ashinga Umuryango Nyarwanda utari Uwa Leta ufite intego yo kuzamura imibereho myiza y’abari n’abategarugori no kurwanya ihohoterwa ribakorerwa yise ‘Umubyeyi Initiative’. Wabonye ubuzima gatozi muri Gicurasi 2020.

Abo bakobwa babyariye iwabo bahabwa ubufasha mu by’amategeko ndetse hakabaho no kubahuza n’ababyeyi bakongera kunga ubumwe. Abagera ku 100 bahawe inkoko muri gahunda yiswe ‘Igi ry’umwana’ mu rwego rwo kugira ngo bite ku bana babo barwanya imirire mibi.

Mu cyerekezo cye arateganya ko ibikorwa by’uwo muryango byo kwita ku bakobwa babyariye iwabo byagera mu Ntara yose y’Iburasirazuba. Biteganyijwe ko mu matsinda bahuriramo bazigiramo ubuzima bw’imyororokere, kwizigamira, imyuga itandukanye, ubujyanama ku ihungabana ku barifite no gufasha abafite ibibazo by’amategeko.

Ababyeyi bahuzwa n'abakobwa babo bakaganirizwa
Abakobwa bahurizwa mu matsinda baboneramo ibyo bakeneye
Abayobozi batandukanye bitabira ibikorwa byo guhuza ababyeyi n'abakobwa babo babyariye iwabo
Ibikorwa bya Umubyeyi Initiative bigiye kugera mu Ntara yose y'Iburasirazuba
Imikino irimo umupira w'amaguru ni kimwe mu bikorwa bifasha abakobwa babyariye iwabo kongera kugaruka mu buzima busanzwe
Mu matsinda bakoreramo n'ibikorwa by'iterambere birimo ubucuruzi
Mu 2017, Umubyeyi yahawe igihembo na Madamu Jeannette Kagame nk'umwe mu rubyiruko rw'indashyikirwa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .