00:00:00 IGIHE NETWORK KN KINYARWANDA EN ENGLISH FR FRANCAIS

Uko gufata Rebero byatanze ihumure i Kigali muri Jenoside

Yanditswe na Rabbi Malo Umucunguzi
Kuya 13 April 2022 saa 10:30
Yasuwe :

Umusozi wa Rebero ni wo wabereyeho bwa mbere ibikorwa byo kwibuka Jenoside yakorewe Abatutsi mu 1994. Hari ku wa 7 Mata 1995.

Icyo gihe Paul Kagame wari Visi Perezida yavuze ko atazi impamvu abayobozi bahisemo uwo musozi, nubwo na we ngo yari kuwuhitamo kubera izindi mpamvu. Ubitse ubuhamya bukomeye mu mateka yashyize iherezo kuri Jenoside.

Uretse ubuhamya bw’abarokowe n’Inkotanyi zikabakura mu maboko y’Interahamwe mu bice bya Nyamirambo, Nyanza n’ibindi, ubuhamya bw’ibyabaye bugaragara muri filime ‘"The 600, The Soldier’s Story", noneho bivugwa n’abasirikare barwanaga urwo rugamba.

Ni filime igaragaza uburyo batayo ya gatatu y’ingabo zari iza FPR Inkotanyi yari mu ngoro y’Inteko Ishinga Amategeko icyo gihe yitwaga Conseil National de Développement (CND), yarokoye Abatutsi benshi kandi yararutwaga ubwinshi n’abasirikare ba leta ya Habyarimana.

Ni filime mbarankuru igaruka ku butwari bw’abasirikare 600 boherejwe mu Rwanda ngo barinde abanyapolitiki ba FPR Inkotanyi, biteguraga kujya muri Guverinoma y’inzibacyuho nk’uko byagengwaga n’amasezerano y’Amahoro ya Arusha.

Harimo ubuhamya bukomeye bw’abarokotse Jenoside yakorewe Abatutsi mu 1994, abasirikare bato n’abari bayoboye abandi mu rugamba rwo Kwibohora nka Rtd Gen Sam Kaka, Gen Maj Charles Karamba, Rtd Col Jacob Tumwine, Rtd Major David Rwabinumi n’abandi.

Ubwo abasirikare bari muri CND bari bahanganye n’ingabo za Habyarimana by’umwihariko zikaraswaho n’Ingabo zari muri Camp GP ku Kimihurura.

Baje guhabwa ubufasha na Alpha Company, yahagurutse i Byumba ku wa 8 Mata 1994, amasaha 48 indege ya Habyarimana ihanuwe. Byafashe iminsi itatu bagenda badahagaze, batarya.

Gen Kaka yagize ati "Twagombaga gutabara ingabo zacu muri Kigali kubera ko bari ku rugamba kandi umubare munini w’ingabo za leta wari i Kigali. Bashoboraga kubahuriraho iyo dutinda."

Akomeza ati "Byari bikomeye ariko byarashobotse, twarabikoze."

Alpha Company yageze i Kigali ku wa 11 Mata, maze abasirikare bari muri CND bagarura ihumure, kuva ubwo bumva ko nta cyabakura muri CND.

Ingabo zari muri CND zarwanye urugamba rukomeye muri Kigali

Bamaze kongera imbaraga bahawe amabwiriza yo gutera nabo ingabo za Habyarimana, bahereye ku kigo cya gisirikare cya Rebero.

Uyu musozi wariho imbunda zirasa kure, zari ziteye inkeke ingabo za RPA mu Mujyi wa Kigali kuko zashoboraga kurasa ahantu aho ariho hose.

Ikibazo gikomeye ngo kwari ukugerayo, kuko uvuye kuri CND kugera ku i Rebero harimo intera ndende kandi ingabo za Habyarimana zari hirya no hino.

Col Jacob Tumwine avuga ko aho hantu hari habi cyane.

Mu rugendo rugana ku i Rebero, abantu benshi bari bapfuye, abakobwa bafashwe ku ngufu n’ibindi.

Kugira ngo bahuze gufata Rebero n’ibikorwa byo gutabara abicwaga, abasirikare bagiye Rebero byasabye ko bagenda bicamo ibice, banagabana inshingano.

Ati "Kubera ko babaga bari hejuru yacu, baturasagaho. Ingabo zacu zafashe umwanzuro wo kudatera ibirindiro bya Rebero ziturutse imbere, byasabye kuzenguruka ngo zitere ziturutse inyuma. Byasabye kugenda ijoro, tubatera duturutse inyuma."

Aho urugamba rwarwanywe nk’amasaha abiri, ingabo za RPA ziba zirahafashe.

Gen Kaka ati "Twafashe Rebero, icyo gihe bahise bava no muri Camp Kigali kubera ko ntabwo bari kubasha kuhaguma mu gihe turi i Rebero."

Nyuma yo gufata uyu musozi, RPA yari ishize impungenge z’uko hari uwayigabaho ibitero aturutse mu mpinga y’umusozi, urugendo rukomereza ku kurokora abasivili.

Umwe mu basirikare yibuka ubwo yajyaga kurokora abakobwa i Nyanza, agasanga barabafashe ku ngufu ku buryo batabasha no kwigenza.

Imbogamizi ikomeye yanabaye kuba aba basirikare bararwaniraga kurokora abantu, ariko bakagera ku miryango yabo yamaze kwicwa, ku buryo byabasigiye ibikomere bitazapfa gukira.

Umwe ati "Umuryango wanjye wose wari i Nyanza, mpura n’umuntu wo mu muryango, tutaragera aho babiciraga ambwira ko umuryango wanjye wose ariho uri, ndagenda, tuhageze cyokora twabashije kurokora abari barimo, bari batemye abandi dusanga bapfuye, nasanzemo na mama wanjye ari hejuru y’imirambo."

"Icyo ni ikintu cyankomerekeje. Turagenda mfata mama wanjye, nari nambaye impuzankano, numva ariyo mpano ngomba kumuha [aceceka umwanya]. Ndayimwambika, bagenzi banjye baramfasha turacukura, barimo kuturasa, turamushyingura, ariko nyuma ni ikintu cyampaye amahoro kuba narashyinguye mama wanjye, kandi naramukundaga cyane, byaramfashije."

Inkotanyi zahise zibasha kurokora Abatutsi bari bihishe muri St Andre i Nyamirambo babajyana ku i Rebero, CND, Saint Paul, muri Stade Amahoro n’ahandi.

Ku wa 4 Nyakanga nibwo Umujyi wa Kigali wose wari ufashwe nk’umurwa w’ubutegetsi, ariko abantu benshi bari bapfuye ndetse mu bindi bice by’igihugu urugamba rwari rugikomeje.

Umujyi wari ufashwe ariko hari hakiri ibibazo byo gukemura, kuko hari inkomere nyinshi zikeneye kuvurwa, abenshi imitima yarahungabanye, ku buryo bitari umunsi w’ibyishimo ahubwo aribwo "ikiliyo cyari gitangiye."

Gen Kaka ati "Intego twari dufite yari uguhagarika jenoside kandi twarabikoze, twahagaritse Jenoside. Nubwo abantu benshi bapfuye, iyo tutabikora byari kuba agahomamunwa kuko nta wundi muntu wari kubidukorera."

Umusozi wa Rebero ni wo buri mwaka uberaho umuhango wo gusoza icyumweru cy’icyunamo, nubwo iminsi 100 yo Kwibuka yo iba igikomeza.

Ni ho hashyinguwe abanyapolitiki batari bashyigikiye umugambi wo gukora Jenoside barimo Landouard Ndasingwa wari umuyobozi w’ishyaka rya PL, Frédéric Nzamurambaho yari Perezida w’Ishyaka rya PSD akaba na Minisitiri w’ubuhinzi, Joseph Kavaruganda wari Perezida w’Urukiko rurinda Ubusugire bw’Itegeko Nshinga, André Kameya wari umunyamuryango wa PL akaba n’umunyamakuru, n’abandi.

Ku i Rebero hari urwibutso rw'abanyapolitiki batemeraga umugambi wa Jenoside

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .