Uko Dr Iyamuremye yashinjwe kuba icyitso, anabwirwa ko atayobora kuko ari umukwe wa Sindikubwabo

Yanditswe na Bukuru JC
Kuya 12 Ukuboza 2020 saa 03:48
Yasuwe :
0 0

Perezida wa Sena, Dr Iyamuremye Augustin, yavuze ku muyobozi bakoranaga mbere ya Jenoside yakorewe Abatutsi mu 1994 wamushinje kuba icyitso cy’Inkotanyi n’uko hari abamwibasiye amaze kugirwa minisitiri bashingiye ku kuba ari umukwe Sindikubwabo Théodore wavuze ijambo ryakongeje inzangano n’ubwicanyi mu Majyepfo.

Dr Iyamuremye amaze igihe mu nzego z’ubuyobozi mu Rwanda. Agisoza amashuri ye, yagiye mu mirimo isaba gufata ibyemezo mu nzego zitandukanye.

Yagize ati “Iyo uyoboye abantu n’iyo baba 10, ibyemezo ufata bishobora kugira impinduka ku buzima bwabo, ubw’imiryango yabo no kugera ku gihugu.’’

Mu kiganiro cyihariye yagiranye na One Nation Radio ya Diaspora Nyarwanda, Dr Iyamuremye yagarutse ku rugendo rwe muri politiki.

Ati “Nisanze muri politiki mu gihe bansabaga kuba Perefe mu 1990, icyo gihe FPR yari yarashoje urugamba rwo kwibohora. Nayoboraga Ikaragiro ry’amata i Nyanza, meze neza, uruganda rwunguka.’’

Icyo gihe uwari Umunyamabanga Mukuru muri Minisiteri y’Ubutegetsi bw’Igihugu iri ku Kacyiru yari yarigishije muri Kaminuza, ni we wamuhamagaye, na we ajyayo ayoboza.

Ati “Yanterefonnye ambwira ati ‘ejo uzitabe’, uzitwaze umubare w’amata mwafashe asa nk’utebya. Minisitiri yarambwiye ati ‘Inama y’Abaminisitiri iraterana, ushobora kuba Perefe.’ Sinabajije aho nzaba Perefe, nabyumvise kuri radio.’’

Dr Iyamuremye yagizwe Perefe wa Gitarama, ni Perefegitura yatangiye mu 1959, kuko ubundi isanzwe ari Teritwari ya Nyanza.

Ati “Gitarama hari abantu bajijutse, byasabaga kubitondera. Nahasanze abantu baho bangira inama dushobora kuhaba. N’ubu ni abantu bakerebutse.’’

-  I Gitarama hatangiriye opozosiyo yo kurwanya Habyarimana

Muri Perefegitura ya Gitarama niho hatangiriye imyigaragambyo yo kwamagana ubutegetsi bwa Habyarimana Juvénal, bwari bwatangiye kubiba amacakubiri mu bantu.

Dr Iyamuremye avuga ati “Niho abatavuga rumwe na Leta ku butegetsi bwa Habyarimana batangiriye, na we yarahatinyaga cyane ku buryo bahanshyira kwari ukungerageza kuko ntibyagaragaraga ko umuntu azahashobora.’’

Avuga ko mu gihe cye nka Perefe wa Gitarama yafashijwe no kwiyegereza abantu baho ndetse ‘numvikanye n’abantu baho.’

Nubwo muri Gitarama hari abantu bafite ibitekerezo by’ubuhezanguni ariko ntibyakaze nk’i Kigali, Bugesera na Ngororero, ahishwe abantu.

Ati “Hari abagerageje kuzana ubwicanyi bavuye mu Bugesera turabakumira. Twajyaga ku mupaka wa Gitarama n’izo ntara bihana imbibi, ushatse gutera amahane, tukabwira abasirikare bakamufata.’’

Nk’umuyobozi avuga ko ariwe waberaga abaturage icyitegererezo mu byo bakora kuko iyo “atabyishyiragamo n’abaturage batabyirohamo.’’

Yakomeje ati “Ubuyobozi igihe cyose iyo bugiye gukora ibintu bibi ntibubinyuza ahantu hazwi, binyura mu gikari, bugakoresha izindi nzego. Iyo bagutahuye ko utabikora bashobora kugukuraho cyangwa bakakwica. Imana nagize ni uko abatabona ibintu kimwe n’ubutegetsi babaye benshi. Icyo gihe muri Gitarama nibwo hatangiriye imyigaragambyo, ikomereza muri Kigali, yaje no kuvamo ishyirwaho rya Guverinoma ihuriweho n’amashyaka menshi.’’

-  Hari uwamubwiye ko FPR ashyigikiye ‘itazafata ubutegetsi’

Mu 1993, Pascal Simbikangwa wari umusirikare ukomeye yabwiye Dr Iyamuremye ko FPR itazafata igihugu.

Ati “Yandegaga ko ndi icyitso cy’Inkotanyi, nta bindi nkora ndetse n’amafaranga atangwa muri serivisi nyobora nyaha Inkotanyi. Ati ‘ibyo ukora byose ubutegetsi bwanyu’, ntibuzabaho.’’

Simbikangwa wari umusirikare ufite ipeti rya Kapiteni mu ngabo zarindaga Perezida Habyarimana, yakatiwe n’urukiko rwo mu Bufaransa gufungwa imyaka 25 ahamijwe uruhare muri Jenoside.

Dr Iyamuremye yari mu batangabuhamya i Paris ndetse ayo magambo yayasubiyemo mu rubanza.

Ati “Aburana yabwiye ubucamanza ko atifuza kuba mu mwanya ndimo ubu, abantu bose baraseka. Yumvaga aho ari mu rubanza ameze neza kundusha, nkaho njye mfunze aho ndi.’’

-  Yavuze ku bavumaga Habyarimana, ubu bamwita umwana mwiza

Dr Iyamuremye yavuze ko hari abarwanya Leta y’u Rwanda bari mu mahanga ariko ibyo banenga bikwiye kugira icyo bishingiraho.

Uyu musaza w’imyaka 74 yamaze imyaka icyenda aba mu mahanga, aho yagiye kwiga afite imyaka 20.

Ati “Kuko twari abasore, ibitekerezo byacu ntibyahuraga n’ibiri mu gihugu, n’ayo macakubiri hari aho abantu bahuraga nayo ariko n’ibyiza tukabijyamo. Ni bya bindi bavuga ngo utabusya abwita ubumera, kugira ngo umenye ibibazo ugomba kuba ubirimo, abantu bakagendera ku bitari amabwire.’’

Yanenze ababaye mu gihugu barwanya politiki mbi ariko bakaba barahinduye imvugo.

Ati “Hari benshi bajyaga mu muhanda bakavuga bati ‘Habyarimana turamwamaganye, abantu bakaraswa ariko bakagaruka ntibagire ubwoba. Byari bigeze aho utagira ubwoba, n’ubu hari abantu twabanye muri icyo gihe ariko ibyo barwanyaga, ukabona babigarutseho. Abantu bakoraga politiki, bagatinyuka bakavuga ko Habyarimana napfa impundu zizavuga, ariko ubu bakavuga ko yari umwana mwiza.’’

Dr Iyamuremye yashimangiye ko we ibyo yavuze bikandikwa muri raporo na n’ubu yabisubiramo ndetse n’uwagerageza kubiba urwango atabyemera.

-  Umunyamakuru yabajije Dr Iyamuremye niba atari agakingirizo muri Guverinoma

Mu 1994, Guverinoma y’Ubumwe ishyizweho, Dr Iyamuremye wari mu ishyaka rya PSD yagizwe Minisitiri w’Ubuhinzi (Nyakanga 1994-1998).

Avuga ko kuri uyu mwanya yabanje gushidikanywaho kuko ari umukwe wa Sindikubwabo Théodore wabaye Perezida wayoboye igihe gito; kitageze no ku minsi 100.

Sindikubwabo ku wa 19 Mata 1994 yasuye Perefegitura ya Butare yari yarasigaye inyuma mu bijyanye no kwica Abatutsi. Icyo gihe yavuze ijambo rutwitsi ryahise ritangiza ubwicanyi nyuma y’umunsi umwe ahavuye, bukoranwa ubukana budasanzwe n’imipaka ihuza u Rwanda n’amahanga irafungwa ngo hatagira utoroka.

Yagize ati “Ba ntibindeba na nyirandabizi nimubahige ntibabacike.”

Dr Iyamuremye ati “Hari abavugaga bati ‘uriya ntashobora kuba Minisitiri kuko sebukwe yabaye Perezida’. Hakozwe n’iperereza bareba bati ‘buriya ntiyamufashije, ntiyari minisitiri we rwihishwa, basanga sibyo’.’’

Yavuze ku munyamakuru wo muri L’Humanité mu 1996, wamubajije iby’amoko, amubaza niba atarashyizweho nk’agakingirizo.

Namusubije nti “Ikindaje ishinga ni Abanyarwanda, abashonje, abavuye mu byabo, abapfushije, abari hanze mu nkambi batazi icyo bazira. Ndi hano ngo mbe umutangabuhamya w’ibyabaye kuko nari mbirimo. Nishimiye ko ndi muri Guverinoma y’ubumwe.’’

“Kugeza ubu nta minisitiri muri abo bivugwa ko bafashe ubutegetsi, wari waza muri minisiteri nyobora ngo icyemezo nafashe agihindure cyangwa ambuze kugifata. Icyo kinyamakuru ndacyagifite, icyo gisubizo n’ubu ni cyo natanga, ntewe ishema kuba narabaye muri iyi guverinoma.’’

Dr Iyamuremye Augustin ni Perezida wa Sena y’u Rwanda. Yagizwe senateri ku wa 20 Nzeri 2019, avanywe ku mwanya w’Umuyobozi w’Urwego rw’Igihugu Ngishwanama rw’Inararibonye.

Yakoze inshingano zitandukanye ku butegetsi bwa Habyarimana Juvénal, Sindikubwaho Théodore, Pasteur Bizimungu na Perezida Paul Kagame.

Mu 1977-1984 yari Umuyobozi wa Laboratwari ya Kaminuza y’u Rwanda, mu Ukuboza 1990-1992 aba Perefe wa Gitarama; kuva muri Kamena 1992- Mata 1994 yari Umuyobozi w’Ibiro by’Iperereza mu gihugu, muri Nyakanga 1994-1998 aba Minisitiri w’Ubuhinzi, kuva mu 1998-Nyakanga 1999 aba Minisitiri w’Itangazamakuru, kuva muri Nyakanga 1999-Werurwe 2000 aba Minisitiri w’Ububanyi n’Amahanga naho kuva mu 2001-2003 yari Depite mu Nteko Ishinga Amategeko, kuva mu 2003 kugeza 2011 yari Senateri, anahagarariye u Rwanda mu Nteko Ishinga Amategeko ya Afurika. Yanayoboye Urwego rw’Igihugu rushinzwe Intwari, Imidali n’Impeta by’Ishimwe.

Perezida wa Sena, Dr Iyamuremye Augustin, yasobanuye uko yashinjwe kuba icyitso ndetse bamwe babanza gushidikanya ko azayobora minisiteri yahawe kuko ari umukwe wa Sindikubwabo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .