Uko Akarere ka Huye kavugutiye umuti ibibazo by’ingutu byari bibangamiye imibereho myiza y’abagatuye

Yanditswe na Prudence Kwizera
Kuya 26 Ukuboza 2020 saa 07:52
Yasuwe :
0 0

Ubuyobozi bw’Akarere ka Huye buvuga ko mu myaka ibiri ishize bwashyize ingufu mu gukemura ibibazo bibangamiye imibereho myiza y’abagatuye kuko byari bihari byinshi kandi busanga biramutse bidakemutse nta terambere rirambye ryabasha kugerwaho.

Mu mwaka wa 2019 mu karere ka Huye hagaragajwe ibibazo by’ingutu bibangamiye imibereho myiza y’abaturage, birimo abagisembera, abatuye mu nzu zimeze nka nyakatsi, ingo zitagira ubwiherero, abana bafite ikibazo cy’imirire mibi, abangavu baterwa inda imburagihe n’ibindi.

Umuyobozi w’Akarere ka Huye, Sebutege Ange, mu kiganiro yagiranye n’Abanyamakuru ku wa 23 Ukuboza 2020 yavuze ko bagerageje gukemura ibyo bibazo ku rwego rushimishije kandi na bike bisigaye biri kuvugutirwa umuti.

Yavuze ko imiryango igera ku 725 irimo iyasemberaga n’iyabaga mu nzu zimeze nka nyakatsi yubakiwe, kuri ubu ikaba ifite aho kuba hameze neza.

Yemeza ko imiryango mike isigaye nayo izakomeza gufashwa kugira ngo ubuzima bw’abayigize bube bwiza.

Ati “Ni ibikorwa bikomeza byo gufasha buri Munyarwanda kugira ngo abeho neza. Ibibazo bike bisigaye byo kugira ngo ariya mazu yagiye yubakwa kera asanwe ndetse n’ahakigaragara ubwiherero butujuje ibisabwa nabwo bube bwavugururwa.”

Yashimiye abaturage n’abafatanyabikorwa bagize uruhare mu gufasha Akarere kubakira abatagira aho kuba.

Ati “Hari uruhare abagenerwabikorwa bagiye bagira muri iyi mihigo ndetse natwe tukabafasha kubaha akazi aho bishoboka. Ihuriro ry’abafatanyabikorwa, DJAF, mu mwaka washize hari inzu zirenga 50 bo ubwabo batanzeho isakaro n’inzugi kugira ngo zubakwe.”

Mu Ukwakira 2019 mu Karere ka Huye habarurwaga ingo 348 zitagira ubwiherero ariko zahise zifashwa kubwubaka. Hagaragaye kandi abaturage 38 barwaye amavunja nabo baravuzwa barakira.

Mu mwaka wa 2019 muri Huye habarurwaga abana b’abakobwa batarageza ku myaka y’ubukure 669 batewe inda imburagihe bibagiraho ingaruka zitandukanye.
Sebutege yavuze ko imibare y’abangavu baterwa inda imburagihe irimo kugabanyuka bishingiye ahanini ku guhagurukira ababasambanya.

Yavuze ko muri uyu mwaka wa 2020 batewe inda imburagihe ari 54 barimo 39 bamaze kubyara na 15 batwite.

Ikindi kibazo cyakunze kugaraga mu Karere ka Huye ni icy’abana bataye ishuri bajya mu mirimo ivunanye irimo gukora mu tubari, mu ngo n’ahandi.

Imibare igaragaza ko abanyeshuri benshi biga mu byiciro by’amashuri byakomorewe bamaze kugera kuri ishuri. Mu mashuri abanza hamaze kugerayo abangana na 98,3% naho mu mashuri yisumbuye abamaze gusubirayo bari ku kigereranyo cya 97,8% mu gihe mu mashuri y’imyuga ari 96%.

Sebutege ati “Hari impamvu zitandukanye zatumye bamwe batarasubirayo ariko ubu icyo turimo gukora ku bufatanye n’amashuri ni uko urutonde rw’abo bana bose batasubira mu ishuri rwamenyekanye, muri buri rugo tukamenya umwana utarasubira mu ishuri n’impamvu yabiteye.”

Yakomeje avuga ko hari bamwe bamaze kubona basanga bafite ikibazo cy’ubushobozi buke bwo kubona ibikoresho by’ishuri, ariko bari kubibashakira ku bufatanye n’abafatanyabikorwa.

Ibarura rusange riheruka ryerekanye ko mu Karere ka Huye hari abaturage bagera kuri 12% baba mu bukene bukabije n’abangana na 40% bari mu cyiciro cy’abakene.

Mu gukemura iki kibazo, abaturage basaga ibihumbi 21 bahawe inkunga y’ingoboka; naho abarenga ibihumbi 16 bahabwa akazi k’amaboko bakorera amafaranga. Mu mishinga y’ubudehe ikorerwa mu midugudu yose, abaturage basaga 1000 bagiye bahabwamo akazi.

Muri gahunda yo gufasha ababyeyi batwite, abasaga ibihumbi umunani bahawe inkunga hagamijwe kurwanya ikibazo cy’imirire mibi n’igwingira mu bana.
Mu kurwanya umwanda, abaturage begerejwe amazi meza ndetse ingo nyinshi zihabwa amashanyarazi kugira ngo abaturage babe ahasukuye kandi habona.

Kuri ubu abaturage bagerwaho n’amazi meza muri metero zitarenze 500 bangana na 75% naho ingo zifite amashanyarazi zingana na 48% zivuye kuri 24,6% yo mu mwaka wa 2016.

Imirenge wa Rwaniro na Kigoma itaragerwagamo n’amashanyarazi nayo yamaze kuyahabwa. Muri iyi gahunda, ingo 1500 zafashijwe kubona amashanyarazi akomoka ku ngufu z’imirasire y’izuba.

Mu mihigo bihaye wo guha amashanyarazi ingo ibihumbi bine muri uyu mwaka, izisaga ibihumbi bitatu zamaze kuyahabwa.

Abagize Komite Nyobozi y’Akarere ka Huye iri gusoza manda yayo ni Umuyobozi w’Akarere, Sebutege Ange; yungirijwe na Kamana André ushinzwe iterambere ry’ubukungu ndetse na Kankesha Annonciata ushinzwe imibereho myiza y’abaturage. Bose batangiye inshingano ku wa 29 Kamena 2018; bivuze ko bamaze ku buyobozi imyaka isaga ibiri.

Inkuru wasoma:Mu mibare: Ibibazo icumi by’ingutu bibangamiye abatuye mu Karere ka Huye

Umuyobozi wungirije ushinzwe imibereho myiza y'abaturage mu Karere ka Huye Kankesha Annonciata
Umuyobozi wungirije ushinzwe iterambere ry ubukungu mu Karere ka Huye Kamana Andr
Meya Sebutege yavuze ko bagerageje gukemura ibibazo by'abaturage nubwo hari ibitarakemuka

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .