00:00:00 IGIHE NETWORK KN KINYARWANDA EN ENGLISH FR FRANCAIS

Uganda yirukanye umwe mu bayobozi ba RNC, Gen Muhoozi aha gasopo Kayumba Nyamwasa

Yanditswe na IGIHE
Kuya 2 April 2022 saa 11:49
Yasuwe :

Lt Gen Muhoozi Kainerugaba yatangaje ko Uganda yirukanye umwe mu bayobozi bakuru ba RNC, aburira Kayumba Nyamwasa uyobora uyu mutwe ko ashatse yagenza make ibikorwa byo guhungabanya umutekano w’u Rwanda.

Mu gitondo cyo kuri uyu wa Gatandatu, Gen Muhoozi yaramutse yandika ubutumwa buburira Kayumba Nyamwasa ko icyo ashaka kuri nyirarume Perezida Paul Kagame azakibona.

Saa 7:22 yanditse ku rukuta rwe rwa Twitter ati “Jenerali Kayumba, ndagusabye gerageza kubaha Uganda. Dufitanye amahoro na Afande Kagame n’u Rwanda. Gerageza kubyubaha. Twaraye twohereje umuntu wawe.”

Mu butumwa bwa Muhoozi ntiyigeze avuga uwo muntu Uganda yoherereje Kayumba Nyamwasa. Bigeze saa 10:00 yanditse ubundi butumwa ashyiraho amafoto y’umuntu atavuze izina ari gusohoka mu Kibuga cy’Indege i Kampala.

Yanditse ati “Ntabwo nkunda gukora ibi bintu, ariko niba birokora ubuzima bw’abasirikare banjye, nzakora icyo aricyo cyose. Ndashimira CMI, iyobowe na Gen Maj Birungi ku gikorwa cyiza. Umwanzi w’u Rwanda na Uganda yafashwe yoherezwa aho yaturutse.”

Amakuru IGIHE ifite ni uko uwo muntu Gen Muhoozi yashyize kuri Twitter wirukanywe na Uganda ari Robert Mukombozi usanzwe ari umuhuzabikorwa wa RNC muri Australia.

Bivugwa ko yasubijwe aho yari aturutse ubwo yari akimara kugera i Kampala ku wa Gatanu. Ngo yabanje guhatwa ibibazo byinshi n’inzego z’umutekano za Uganda ubundi asohorwa mu gihugu.

Nyuma y’iminota 35 Gen Muhoozi yanditse ubundi butumwa avuga ko kurwanya Perezida Kagame ari ikosa rikomeye ryakozwe mu gihe gishize.

Ati “Kurwanya marume ni ikosa rikomeye ryakozwe mu gihe gishize. Nzi abamurwanyije bose mu gihe gishize ariko iteka iyo mbabajije impamvu, bambwira impamvu zidasobanutse.”

Gen Muhoozi amaze kuva mu Rwanda inshuro ebyiri muri uyu mwaka mu bikorwa bigamije kuzahura umubano hagati y’ibihugu byombi. Ntasiba kwiyama abantu bashaka gutoba umubano w’ibihugu byombi, akababwira ko nta hantu bazamenera.

Muri Gashyantare yavuze ko atazi icyo Kayumba Nyamwasa uyobora uyu mutwe w’iterabwoba yapfuye n’ubuyobozi bukuru bw’u Rwanda, gusa ko bidakwiriye gutuma akoresha Uganda muri byo.

Ati “Gen Kayumba na RNC, ntabwo nzi ikibazo ufitanye na FPR na RDF ariko ndakuburira, ntugerageze gukoresha igihugu cyanjye mu bikorwa byawe.”

Yakomeje agira ati “Ibi ntabwo ari ibitekerezo bijyanye na politiki. Ntabwo nshishikajwe na politiki. Ibikorwa bitemewe n’ibyaha bya RNC muri Uganda, mu gihe cyashize byatugejeje ku ntambara y’ubucucu. Abari babirimo bose, bazagaragara.”

Mu bibazo bitatu byari bibangamiye u Rwanda mu mubano warwo na Uganda, harimo kuba iki gihugu cyo mu Majyaruguru yarwo gihohotera Abanyarwanda, kikanashyigikira imitwe igamije kuruhungabanya ndetse kikanabangamira inyungu zarwo mu bucuruzi.

Perezida Kagame aherutse gutangaza ko urugendo rwa Gen Muhoozi rwatanze isura nshya mu mubano w’u Rwanda na Uganda ndetse ko nyuma yo gufungurwa k’umupaka, ubu n’ibindi bibazo byari bibangamiye u Rwanda biri gukemuka.

Ati “Umupaka twarawufunguye, muri Uganda nabo hari ibyo batangiye gukora bigaragara ko bavana za nzitizi mu nzira, bya bindi byatumye umupaka ufungwa. Turabikurikira, tubiganira nabo, ndibwira ko nabyo turi mu nzira nziza.”’

RNC imaze igihe yaragize Uganda akarima kayo ku buryo ari ho ikorera icengezamatwara ryayo rigamije gushaka abayoboke bajya mu mutwe wayo mu myitozo muri RDC ngo bazatere u Rwanda.

Ni na yo yari inyuma y’ibikorwa bimaze imyaka ine byo gushimuta Abanyarwanda baba muri Uganda, cyane ko yatungiraga agatoki Urwego rushinzwe Ubutasi mu Gisirikare, CMI.

Nta muyobozi n’umwe muri Uganda utazi imigambi mibisha ya RNC ku Rwanda dore ko na Perezida Museveni yandikiye mugenzi we w’u Rwanda amumenyesha ko yagiranye ibiganiro n’umutwe wa RNC.

Muri iyo baruwa yagiye hanze ku wa 19 Werurwe 2019, Museveni yemeye ko yagiranye ibiganiro na Mukankusi Charlotte ushinzwe dipolomasi mu mutwe wa RNC ndetse na Eugène Gasana wigeze kuba Ambasaderi w’u Rwanda muri Loni.

Muri iyi baruwa avuga ko Mukankusi yamubwiye ko yashakaga kujya kumureba kugira ngo amubwire intumbero ze zo kurwanya u Rwanda anasaba ubufasha Uganda.

Nyamwasa ukomeje kwihanangirizwa na Muhoozi niwe uyobora RNC. Ni nawe washinze ihuriro ry’imitwe ya politiki yise P5 ikorerea mu bice bya Uganda ndetse na Repubulika ya Demokarasi ya Congo bya Fizi na Uvira mu Ntara ya Kivu y’Amajyepfo.

P5 igizwe n’amashyaka arimo Amahoro People’s Congress (AMAHORO-PC), Forces démocratiques Unifées-Inkingi (FDU INKINGI), People’s Defence Pact-Imanzi (PDP-IMANZI), Party-Imberakuri (PS IMBERAKURI), RUD-Urunana NA Rwanda National Congress (RNC).

Ifitanye n’imikoranire n’umutwe wa FDLR ugizwe n’abavuye mu Rwanda bagize uruhare muri Jenoside yakorewe Abatutsi.

Gen Muhoozi yashyize hanze amafoto agaragaza Mukombozi uyobora RNC muri Australia asohotse muri Uganda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .