Uganda yabuze ibisobanuro ku irengero rya Sendegeya n’urupfu rwa Mageza

Yanditswe na Musangwa Arthur
Kuya 18 Gashyantare 2020 saa 04:08
Yasuwe :
0 0

Mu gihe Uganda yafataga umwanzuro wo kurekura Abanyarwanda babiri bamaze igihe bafungiweyo binyuranyije n’amategeko, niko ku rundi ruhande intumwa zayo zabazwaga imbere y’urukiko, irengero ry’umunyarwanda Theogene Sendegeya waburiye mu bitaro bivura indwara zo mu mutwe bya Butabika.

Kuri uyu wa Mbere nibwo byatangajwe ko Uganda yahagaritse ibirego ku banyarwanda babiri, Fidèle Nzabonimpa na Selemani Kabayija, bashinjwaga ibyaha byo gutunga imbunda binyuranyije n’amategeko. Nyuma byaje kwemezwa ko kuri uyu wa Kabiri, Uganda yabarekuye bose hamwe ari Abanyarwanda 13.

Nyuma y’igihe u Rwanda ruvuga ko abaturage barwo bafungwa ku maherere iyo bageze muri Uganda, kuri uyu wa Mbere Guverinoma ya Uganda n’Igisirikare bitabye Urukiko Rukuru, ngo basobanure impamvu bafashe Abanyarwanda babiri: Theogene Sendegeya na Emmanuel Mageza, bagafungwa mu gihe cy’amezi cumi na kumwe bataragezwa imbere y’urukiko ngo bamenyeshwe ibyo baregwa.

Umucamanza yahamagaje izi nzego zombi nyuma y’ubusabe bw’abanyamategeko babo, babwiye urukiko ko abo bunganira bamaze igihe bafunzwe binyuranyije n’amategeko kuva muri Werurwe 2019, nk’uko Daily Monitor yabitangaje.

Ubwo yari imbere y’urukiko rukuru, uwari uhagarariye ibiro by’Intumwa Nkuru ya Leta, Brian Musota, yavuze ko Sendegeya yatorotse ibitaro, kugeza ubu ngo ntawe uzi irengero rye.

Abo banyamategeko bayobowe na Eron Kiiza bavuze ko abakiliya babo bafashwe n’abakozi b’Urwego rwa Gisirikare rushinzwe Iperereza, CMI, bayobowe na Major Mushambo, bafatirwa i Mbarara babanza gufungirwa mu kigo cya gisirikare cya Makindye, mbere yo koherezwa ku cyicaro gikuru cya CMI i Kampala.

Musota yagaragarije urukiko inyandiko zivuga ko Sendegeya na Mageza batakiri muri kasho zabo, kuko bajyanwe mu bitaro bya Butabika kwivuza, ibitaro bivura indwara zo mu mutwe ariko ntibasobanure uko uburwayi bavurwaga bwafashe aba banyarwanda, mu gihe bikekwa ko ari ingaruka z’iyicarubozo bakorewe.

Izo nyandiko zasinyweho na Lt General Joseph Musanyufu, Umugaba wa UPDF, zivuga ko Mageza na Sendegeya bafatiwe mu gikorwa cy’umutekano gihuriweho bakekwaho uruhare mu bikorwa bihungabaya umutekano w’igihugu.

Zikomeza ziti “Yoherejwe mu bitaro bya Butabika ku wa 23 Kanama kwivuza. Yatorotse ibitaro ku wa 1 Nzeri 2019 kugeza ubu irengero rye ntabwo rizwi.”

Ku bijyanye na Emmanuel Mageza w’imyaka 50, Lt Gen Musanyufu avuga ko yafashwe muri ubwo buryo, akaza kohererezwa mu bitaro bya Butabika kwivuza, apfiramo ku wa 21 Mutarama 2020. Yanagaragarije urukiko ibaruwa yo ku wa 21 Ukwakira 2019 y’ibitaro bya Butabika bigaragaza ko byakiriye Mageza.

Ibaruwa yasinyweho na Dr Apio Irene Wengi yemeje ko Mageza bamwakiriye ku wa 23 Kanama 2019, afite uburwayi bwo mu mutwe. Gusa ubwo iyo baruwa yandikwaga, Mageza ngo yari akirimo kwitabwaho.

Raporo yakorewe isuzuma ry’umurambo ryakozwe na Dr Richard Ambayo rigaragaza ko Mageza yazize guhagarara kw’amaraso mu bwonko.

Nyuma urukiko rwanzuye ko umuryanago wa Mageza ushobora gukorana n’ibitaro bya Butabika kugira ngo babashe gutwara umurambo we. Guverinoma y’u Rwanda isaba Uganda kuyishyikiriza umurambo wa Mageza, kugira ngo ushyingurwe mu Rwanda mu cyubahiro no gusobanura byimbitse ibijyanye n’urupfu rwe.

Mu nama yahuje intumwaz’u Rwanda na Uganda mu mpera z’icyumweru gishize, Umunyamabanga wa Leta muri Minisiteri y’Ububanyi n’amahanga, Nduhungirehe Olivier, yagaragaje ibintu birindwi u Rwanda rusaba Uganda, birimo gusobanura irengero ry’Abanyarwanda babiri, Sendegeya Theogene na Rwembo Mucyo boherejwe mu bitaro bya Butabika bavanwe muri CMI, nyuma bakaza kuburirwa irengero.

U Rwanda kandi rwasabye Uganda gufatira ibyemezo abasirikare bayo bakomeje gufatanya n’imitwe igamije guhungabanya umutekano w’u Rwanda, cyane cyane abakorana n’imitwe ya RNC na RUD-Urunana, barimo Umunyamabanga wa Leta Philemon Mateke, Brig Gen Abel Kandiho uyobora CMI, Brig Gen Fred Karara, Col CK Asiimwe, Maj Fred Mushambo, Col Kaka Bagyenda n’abandi.

Abanyarwanda batandukanye bagiye bajyanwa muri ibi bitaro kubera ihungabana batewe n'iyicarubozo rya CMI

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza