Uganda-Rwanda: Inama ya Luanda yanzuye ko harekurwa abantu bafunzwe, indi ikazabera i Gatuna

Yanditswe na Philbert Girinema
Kuya 2 Gashyantare 2020 saa 06:22
Yasuwe :
0 0

Perezida Paul Kagame na Yoweri Museveni wa Uganda, bahuriye mu nama yiga ku bibazo biri hagati y’ibihugu byombi yatumijwe na Perezida wa Angola, João Lourenço ikitabirwa na Félix Tshisekedi wa RDC nk’abahuza.

Iyi nama yabaye kuri iki Cyumweru ni iya gatatu ihuje ibi bihugu bine yiga ku bibazo by’umutekano mu karere by’umwihariko ku bibazo by’umwuka mubi hagati y’u Rwanda na Uganda.

Iya mbere yabaye ku wa 12 Nyakanga 2019, indi iba kuwa 21 Kanama 2019 yanasinyiwemo amasezerano ya Luanda agamije guhosha umwuka mubi.

Imyanzuro itanu yafatiwemo igaruka ku kurekura abaturage ba buri gihugu bafunzwe ndetse no kubungabunga umutekano wabo mu gihe bari mu gihugu cy’igituranyi.

Umwanzuro wa mbere ugira uti "kurekura abaturage ba buri gihugu bafunzwe bagaragajwe ku rutonde rwahererekanyijwe ku bw’iyi mpamvu."

Uwa kabiri uvuga ko "Impande zombi zikwiye kwitandukanya n’ibikorwa byose bishobora gutanga ishusho yo gufasha, guha ubufasha bw’amikoro, imyitozo no kwinjira mu gihugu cy’igituranyi kw’imitwe igamije kugihungabanyiriza umutekano."

Ikindi ni uko impande zombi zikwiye gukomeza kurinda no kubaha uburenganzira bwa muntu bw’abaturage b’ikindi.

Umwanzuro wa kane uvuga ko Komite zashyizweho kugira ngo zige kuri iki kibazo, zakomeza ibikorwa zireba ibijyanye n’iyubahirizwa ry’iyi myanzuro.

Indi nama ihuriweho n’izi mpande uko ari enye, ni ukuvuga u Rwanda na Uganda n’abahuza izabera i Gatuna ku mupaka w’ibihugu byombi ku wa 21 Gashyantare 2020.

Hashize imyaka hafi itatu umubano hagati y’u Rwanda na Uganda ujemo agatotsi, bitewe n’ishimutwa ry’abanyarwanda muri iki gihugu cy’igituranyi, ibikorwa byacyo byo gushyigikira imitwe igamije guhungabanya u Rwanda no kubangamira ubucuruzi bwarwo.

Ubuhamya bwagiye gutangwa n’ababashije kuvayo busobanura ko Abanyarwanda bagize ibyago byo gutabwa muri yombi na Uganda, bakorewe iyicarubozo mu mabohero y’Urwego rw’Ubutasi mu gisirikare (CMI) kugeza ubwo bamwe bapfuye abandi bahinduka ibisenzegeri ku buryo ntacyo bakimarira.

Nubwo nta ntambwe ifatika Uganda iratera igamije gushakira umuti urambye iki kibazo, hari bimwe yakoze bica amarenga ko bishobora kuzagenda neza ariko bigikeneye ibibishyigikira, birimo nk’irekurwa ry’abanyarwanda icyenda bari bamaze igihe bafungiye muri iki gihugu n’abandi bajugunywe ku mipaka.

Mu ntangiriro z’uku kwezi Uganda yarekuye abanyarwanda icyenda mu magana y’abafungiye ku butaka bwayo, barimo abari bamaze imyaka igera kuri ibiri bafunzwe nta byaha bigaragara bashinjwa ahubwo bakorerwa iyicarubozo amanywa n’ijoro.

U Rwanda ruvuga ko hari abanyarwanda barenga 100 bagifunzwe ari nabo isaba ko barekurwa, ndetse iki gihugu kikanahagarika imikoranire n’imitwe igamije kuruhungabanyiriza umutekano irimo RNC ya Kayumba Nyamwasa.

Ubwo Perezida Kagame yageraga i Luanda mu biganiro
Abakuru b'ibihugu basabye ko u Rwanda na Uganda buri gihugu cyubahiriza uburenganzira bw'abaturage b'ikindi
Perezida wa Angola, João Lourenço (ibumoso) na Perezida Kagame ubwo bari bari mu biganiro
Imyanzuro itanu yafatiwe mu nama ya Luanda igaruka ku kurekura abaturage ba buri gihugu bafunzwe ndetse no kubungabunga umutekano wabo mu gihe bari mu gihugu cy’igituranyi.

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .