Uganda mu icengezamatwara ryo gushinja u Rwanda gukwiza imbunda i Kampala

Yanditswe na Musangwa Arthur
Kuya 25 Ugushyingo 2020 saa 05:21
Yasuwe :
0 0

Ibinyamakuru bitandukanye bikorera Urwego rushinzwe Ubutasi mu Gisirikare cya Uganda, CMI, byakwije inkuru ivuga ko imbunda ziherutse gufatirwa muri Kenya, zifite aho zihuriye n’u Rwanda aho ngo rwashakaga kuzikwiza i Kampala.

Tariki ya 19 Ugushyingo, nibwo havuzwe ko hari imbunda zafatiwe mu modoka zari ziri kuva muri Kenya zerekeza i Kampala, iyo nkuru ikimara kujya hanze, ibinyamakuru bitandukanye byo muri Uganda bigenzurwa na CMI byakwije ko ari imbunda zari zigiye kwinjizwa muri Uganda n’u Rwanda mu buryo bwa magendu kugira ngo “zigire uruhare mu guhungabanya umutekano”.

Ibi binyamakuru byatwereye u Rwanda uruhare mu mvururu ziri kuba muri iki gihugu zishingiye ku matora. Ni mu gihe hari ibimenyetso bigaragaza ko izo mbunda zafashwe na Polisi ya Kenya, zari iza Polisi ya Uganda

Abasesenguzi bagaragaza ko ibyo bishingiye ku kuba icyekerekezo izo mbunda zari zijyanywemo ari Uganda ndetse n’ibinyamakuru byo muri Kenya byanditse bwa mbere ko zafatiwe muri Kenya zigana i Kampala nta hantu na hamwe byavuze isano zifitanye n’u Rwanda.

Tariki ya 19 Ugushyingo, ikinyamakuru Kenyans cyanditse ko amakamyo atanu yari agiye muri Uganda yafashwe n’inzego z’umutekano muri Kenya nyuma yo kumenya ko atwaye imizigo iteye inkeke ku mutekano.

Polisi yo muri Kenya yatangaje ko abiri muri ayo makamyo, yafatiwe ku kiraro cya Webuye kiri ahantu hari urugendo rw’isaha imwe kugira ngo ugere ku mupaka wa Malaba utandukanya Kenya na Uganda.

Andi makamyo abiri yo yafatiwe i Nairobi mu gihe indi yo yahagarikiwe ahitwa Bungoma. Inyandiko zamurikiwe Polisi ya Kenya zigaragaza ko izo modoka zari zivuye i Mombasa zigana i Kampala. Nta kintu na kimwe cyigeze kigaragazwa zigifatwa cyerekana ko hari aho zihuriye n’u Rwanda.

Umwe mu bakurikiranira hafi ibijyanye n’umutekano wo mu karere, yabwiye Virunga Post dukesha iyi nkuru ati “Mu bigaragara, abantu ba Museveni nibo bari batwaye izo mbunda zo kwifashisha mu kwica Abanya-Uganda, bigamije no kubotsa igitutu bababuza gutora abandi bakandida”.

Hashize iminsi muri Uganda hari imvururu zikomeye zaturutse ku kuba Robert Kyagulanyi uzwi nka Bobi Wine, umwe mu bakandida bari kwiyamamariza umwanya w’Umukuru w’Igihugu, yarafunzwe.

Benshi mu biganjemo urubyiruko biraye mu muhanda, barigaragambya ijoro n’amanywa bituma haduka imvururu zaguyemo abarenga 30 mu gihe abandi barenga 500 bo batawe muri yombi n’inzego z’umutekano.

Muri icyo gihe, abashinzwe umutekano bahanganye n’abaturage, ku mbuga nkoranyambaga hakwiriye amashusho ya benshi mu bashinzwe umutekano batambaye impuzankano z’abashinzwe umutekano bafite imbunda, bari kugenda rwagati mu muhanda barasa mu kirere.

Ibinyamakuru bitandukanye byo muri Uganda byatangaje ko kugira ngo izo mbunda zifatwe, byaturutse ku makuru inzego z’umutekano za Uganda zahaye iza Kenya nazo zikihutira kuburizamo ko ayo makamyo yinjira i Kampala.

Gusa ubwo aya makuru yari amaze kujya hanze, nta kintu na kimwe abashinzwe umutekano muri Kenya bigeze batangaza ku kuba hari amakuru baba bahawe na bagenzi babo bo muri Uganda.

Ikindi ni uko kandi ibi binyamakuru byashinje u Rwanda ko hari abantu bo mu nzego z’umutekano zarwo bari guhembera imvururu muri Uganda gusa ntibyigeze bibitangira ibimenyetso.

Byavuze ko Urwego rushinzwe Iperereza mu Gisirikare cy’u Rwanda, rukorana n’abantu batandukanye muri Uganda kugira ngo rukwirakwizeyo izi ntwaro, hanyuma zifashishwe mu kurwanya Guverinoma.

Ikindi kandi ni uko ngo Ambasaderi Joseph Rutabana uherutse guhabwa inshingano zo guhagararira u Rwanda muri Uganda, ariwe ukuriye ibi bikorwa.

Umwe mu bashinzwe umutekano utigeze utangazwa amazina yagize ati “Ibi byose ni ibinyoma, nta kimenyetso na kimwe gishimangira ibivugwa. Ibi binyoma bimaze igihe bishinja u Rwanda ko rushyigikiye intambara muri Uganda”.

Yakomeje avuga ko kuba Uganda ishinja u Rwanda gushyigikira abashaka guhungabanya umutekano mu gihugu, ari ukuyobya uburari kuko bizwi neza ko ahubwo ubutegetsi bwa Museveni buri inyuma y’imitwe ya RNC ya Kayumba Nyamwasa, FDLR, RUD-Urunana n’indi ishaka guhungabanya umutekano w’u Rwanda.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .