Uduce umunani tubitse amateka yo Kwibohora tugiye gutunganywa mu mushingwa wa miliyari 4 Frw

Yanditswe na Rabbi Malo Umucunguzi
Kuya 4 Nyakanga 2020 saa 04:22
Yasuwe :
0 0

Umuyobozi Mukuru Ushinzwe Ubukerarugendo mu Kigo cy’Igihugu cy’Iterambere, RDB, Belise Kariza, yavuze ko uduce umunani tubitse amateka yo kubohora igihugu tugiye gutunganywa, ku buryo tuzatanga umusanzu mu bukerarugendo bwo mu gihugu na mpuzamahanga.

Yabitangaje ubwo kuri uyu wa Gatandatu, mu Karere ka Nyagatare hizihirizwaga ku nshuro ya 26 umunsi wo kwibohora, hatahwa n’ibikorwa bitandukanye byubatswe ku bufatanye n’ingabo z’u Rwanda.

Yavuze ko mu 2018, RDB ku bufatanye na Minisiteri y’Ingabo hatangije umushinga w’ubukerarugendo bukorerwa mu nzira z’urugamba rwo kubohora igihugu, rwabaye ku wa 1 Ukwakira 1990 - 4 Nyakanga 1994.

Yavuze ko kuzirikana aya mateka ari ikintu gishyizwe imbere, kizarushaho kumenyekanisha amateka y’urugamba rwo kubohora igihugu, no gusigasira amateka y’urugamba rwa RPA, kongerera imbaraga ubukerarugendo bw’imbere mu gihugu, kwigisha abakiri bato no kongera inyungu ubukerarugendo butanga ku gihugu no ku baturage bafashije Inkotanyi ku rugamba.

Muri urwo rugendo, ku bufatanye bw’inzego zitandukanye, site 44 zo mu turere dutandatu mu gihugu zamaze kwemezwa na RDF nk’ahantu hakwifashishwa mu bukerarugendo bw’urugamba rwo kubohora igihugu. Kuri utwo duce ngo haje no gutangwa ubujyanama ko hongerwaho agace ka Nkana, hafi ya Kagitumba.

Kariza yavuze ko mu 2019, hagamijwe guteza imbere ubwo bukerarugendo, RDB yifashishije impuguke zo gukora inyigo ku duce tw’ubukerarugendo, haza kugaragazwa uduce umunani twihariye mu mateka yo kubohora igihugu, ku buryo twanozwamo ahantu habereye ubukerarugendo. Utwo ni Kagitumba, Shonga, Mulindi, Mukarange, Musanze, Urugano, Sende na Gikoba.

Yakomeje ati “Ishoramari muri uyu mushinga ribarirwa muri miliyari 4 Frw, harimo igishushanyo cya gihanga, kugura ubutaka, kubaka no kumenyekanisha ibikorwa, ukazakorwa mu byiciro bitatu guhera mu 2020-2024.”

Mu cyiciro cya mbere cy’umushinga hazatunganywa ibice birimo Gikoba, Shonga na Mulindi, kizuzura mu 2021. Muri uyu mwaka ku bufatanye na RDF, ngo hahuguwe abantu bazajya bafasha abahasura barimo abahoze mu ngabo n’abazobereye mu gutembereza ba mukerarugendo.

Muri ubwo buryo, hatangijwe uburyo bw’ikoranabuhanga bufasha mu gusakaza amakuru akumbuza abantu gusura aho hantu, amakuru akagaragara ahantu hose ku Isi, harimo ahantu hasurwa, amateka yaho n’uburyo bwo gusaba kuhasura, aho kurara n’ibindi.

Mu buryo bwo urushaho gutunganya ibyo bice, hazaba hari ingoro ndangamateka ya Gikoba, izaba iri munsi y’ubutaka ndetse n’ibice bizaba bigaragara hejuru, kandi byakozwe n’Abanyarwanda.

Iyo nzu ndangamateka ya Gikoba muri Nyagatare izaba ari iya gatatu igaruka ku mateka y’urugamba rwo kubohora igihugu, inyuma y’iyo ku Mulindi n’iyo mu ngoro y’Inteko Ishinga Amategeko.

Munsi y’ubutaka hazaba hanarimo ubuhamya butandukanye bwafashwe mu buryo bw’amashusho, habe n’ahantu hashobora kugurirwa ibintu bitandukanye by’urwibutso.

Imiterere yayo mo imbere izaba ishingiye ku miterere y’indaki zo hambere. Hazaba harimo ibimenyetso by’abasirikare baguye ku rugamba hakoreshejwe amazina yabo, ku rundi ruhande habe ibikoresho bya gisirikare birimo imyambaro, intwaro, ibikapu n’ibindi.

Hazaba kandi harimo ahantu hashobora kureberwa amashusho, hashobora kwakira abantu basaga 50, hashobora kureberwa ubuhamya ku bantu bari mu matsinda.

Umuyobozi Mukuru muri RDB ushinzwe ubukerarugendo, Belise Kariza

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .