Reem Jamil Bushara w’imyaka 26 y’amavuko, uyu munsi amaze amezi atatu mu Nkambi y’Agateganyo ya Gashora [Gashora Emergency Transit Mechanism], aho ategereje kubona igihugu cyo mu Burengerazuba bw’Isi kimuha ubuhungiro akabasha gukabya inzozi.

Uyu mukobwa ugaragara nk’ukiri muto mu maso, avuga ko akaga katangiye ataranavuka kubera ko icyo gihe ari bwo umuryango we wavanywe mu byawo n’intambara ugahungira muri Libya uturutse muri Sudani.

Aho muri Libya ni ho Reem Jamil yavukiye, ni ukuvuga ko n’ubwo iwabo bakomoka muri Sudani, we atigeze agera mu gihugu cye kubera ko yavukiye mu buhungiro. Muri Libya ni ho ababyeyi be bapfiriye ahita atangira kubaho mu buzima bubi bw’intambara n’amakimbirane y’urudaca.

Reem Jamil, kuri ubu ni umwe mu bacumbikiwe i Gashora, yamaze gushyira umutima hamwe, ubuzima bwe bwarahindutse. Ubu araryama agasinzira, nta masasu cyangwa ibindi bihagarika umutima we bimuri hejuru.

Mu kiganiro kigufi yagiranye na IGIHE, ubwo yamusangaga muri Gashora ETM yagize ati “Navuye muri Libya kubera intambara, ubuzima mu Rwanda ni bwiza, ndumva meze neza ugereranyije n’uko nari meze muri Libya.”

“Kubera ko hano hari ubwisanzure, nta muntu ukubwira nabi […] sinabona uko mbisobanura ariko hano ni heza.”

Muri rusange kuva mu 2019, Gashora ETM, imaze kunyuramo abimukira n’abasaba ubuhunzi 1055, muri bo abagera 628 bamaze kubona ibihugu bibakira mu gihe abandi 457 bayicumbikiwemo.

Gusa inkuru ya Reem Jamil Bushara itandukanye ho gato n’abandi bacumbikiwe muri iyi nkambi kubera ko we yavuye muri Libya kubera ibibazo by’intambara mu gihe abandi bo bavanywe muri za gereza zaho, aho babaga bamaze igihe bakorerwa iyicarubozo, bagurishwa bucakara n’ibindi bikorwa bigayitse.

–  Ubuzima bwarahindutse i Gashora

Ku wa 10 Nzeri 2019 ni bwo Guverinoma y’u Rwanda, Umuryango w’Ubumwe bwa Afurika (AU) na UNHCR byashyize umukono ku masezerano y’imyaka itatu, yo kwakira impunzi n’abimukira i Gashora mu Karere ka Bugesera.

Ni amasezerano yasinyiwe i Addis Ababa ku cyicaro cya AU nyuma y’ubushake Perezida Kagame yagaragaje bw’uko u Rwanda rwakwakira izi mpunzi z’Abanyafurika zageze muri Libya zishakisha uko zakwerekeza ku Mugabane w’u Burayi.

Ni Abanyafurika bagenda baturuka mu bihugu byinshi birimo umutekano muke, bakananiwa kwambuka Inyanja ya Méditerranée ngo bajye i Burayi nk’uko babyifuza, ahubwo bakisanga bafungiwe muri Libya.

Bahise bashyirirwaho inkambi bakirirwamo by’agateganyo mu Rwanda, mu gihe bategereje ko haboneka ibindi bihugu bibakira.

Guverinoma y’u Rwanda n’inzego zifatanya biheruka kongera aya masezerano yo kwakira izi mpunzi n’abimukira, binazamura umubare w’abashobora kwakirwa mu nkambi uva kuri 500 ugera kuri 700.

Iyo uganiriye n’abatujwe mu Nkambi ya Gashora, wumva bafite impamvu zitandukanye zatumye biyemeza guhaguruka iwabo bashaka kujya gushakira ubuzima ahandi.

Ntabwo byoroshye kubona ugufungurira umutima ngo akuganirize ndetse n’uwo muganiriye agusaba ko wamufata amajwi ariko ntukoreshe amashusho ye kuko aba atinya ko abo yasize iwabo bamenya uko abayeho n’aho aherereye.

Muri iyi nkambi ariko, abagezemo bashyira umutima hamwe, bakiruhutsa kubera ko baba baruhutse inkoni n’intsinga z’amashanyarazi, itotezwa, iyicarubozo n’imihangayiko bari bamazemo igihe muri gereza zo muri Libya.

Ni ahantu bagera bakabaho mu bwisanzure, bakabona ibyo kurya, bakabasha kwidagadura, abakeneye kwiga bakiga indimi zirimo Icyongereza, Igifaransa n’Ikinyarwanda ndetse abandi bakiga imyuga irimo gutwara imodoka, gutunganya imisatsi, kudoda imyenda, kwiga mudasobwa n’ibindi.

Icyapa kikwereka ko wageze mu Nkambi y'Agateganyo ya Gashora iherereye mu Karere ka Bugesera

Ukinjira muri iyi nkambi uhita ubona aho gukarabira. Isuku yahawe umwihariko

Ugezeyo uhasanga imodoka za UNHCR ari na yo ifatanya na Leta y'u Rwanda kwita umunsi ku munsi kuri izi mpunzi n'abasaba ubuhunzi

Aba baba bavuye hanze mu isoko cyangwa mu gasanteri ka Gashora kugura utuntu tumwe na tumwe

Abasore n'inkumi bashyiriweho ahantu ho guteza imbere impano zabo, aba barimo gukina VolleyBall

Aha ni ho banika imyenda, buri muntu imbere y'inzu ye haba hari aho afurira n'aho yanika imyenda

Amavomero yashyizwe ahantu henshi muri iyi nkambi, nta kibazo cy'amazi abayirimo bashobora kugira

Amagare ahari ku bwinshi muri iyi nkambi. Ubusanzwe mu Bugesera amagare ni ubuzima bw'abatuye aka gace

Igare ni kimwe mu bintu usanga abakiri bato muri iyi nkambi bakunze cyane

Imyidagaduro muri iyi Nkambi y'Agateganyo ya Gashora... Uyu yamenye ko yageze i Bugesera kandi igare ari igikoresho cy'ibanze mu buzima bw'abahatuye

Saa Sita zirageze, bari kwerekeza ahafatirwa amafunguro

Muri iyi nkambi harimo abafite abana bakiri bato, aba na bo bashyiriweho uburyo bwo kwiga

Bafite abashinzwe kubatekera. Isaha zo kurya [saa sita na nimugoroba] iyo zigeze bajya gufata ibyo kurya bagasubira aho barara

Ngiryo ifunguro bahabwa saa Sita. Riruzuye kandi riba ririho imboga n'imbuto

Barakataje mu kwiga kuboha imyenda y'imbeho bakoresheje ubudodo

Baba bafite akanyamuneza ku maso, bamwe bavuga ko ubuzima bwaje guhinduka

Ikijyanye n'ubukarabiro cyitaweho muri iyi nkambi, amazi meza n'isabune isukura intoki birahari... cyane ko Covid-19 itararangira

Bafite icyumba bigiramo mudasobwa

N'ubwo umubonye mu maso ubona asa n'ukuze ariko ntiyatanzwe ku ikoranabuhanga rigezweho, ajyana n'ibigezweho

Ni Ijumaa! Niba ugiyeyo ku wa Gatanu, uzasanga Abayisilamu bari gusenga

Usanga abasore bafite akanyamuneza ku maso, ubuzima bwarongeye buragaruka nyuma y'iminsi n'amajoro y'ububabare muri Libya

Uyu na we arimo kwiga gutwara imodoka, hanashyizweho n'uburyo bwo gukora ibizamini

Abakobwa na bo ntibatanzwe, barimo kwiga gutwara imodoka

Uyu yageze mu Nkambi y'Agateganyo ya Gashora aribaruka, muri rusange muri iyi nkambi hamaze kuvukiramo abana 14 nk'uko bitangazwa n'ubuyobozi bwayo

Inyubako z'amagorofa ni zo impunzi n'abimukira bavuye muri Libya babamo muri iyi nkambi

Iyi ni imwe mu nzu izi mpunzi n'abasaba ubuhungiro batujwemo i Gashora

Kuva mu 2019, Inkambi ya Gashora, imaze kunyuramo abimukira n’impunzi 1055. Abagera kuri 628 babonye ibihugu bibakira mu gihe abandi 457 bayicumbikiwemo

Amafoto: Mugwiza Olivier