Ubuzima bw’impunzi n’abimukira mu nkambi y’agateganyo ya Gashora (Amafoto & Video)

Yanditswe na Rabbi Malo Umucunguzi
Kuya 24 Ukwakira 2019 saa 12:21
Yasuwe :
0 0

Mu mpera za Nzeri uyu mwaka nibwo itsinda ry’impunzi n’abashaka ubuhungiro 66 baturutse muri Libya bageze mu Rwanda, muri uku kwezi hiyongeraho abandi 123, bose bajyanwa mu nkambi y’agateganyo ya Gashora iri mu Karere ka Bugesera.

Nyuma y’ibyumweru bine izi mpunzi zigeze mu nkambi yashyizweho na Guverinoma y’u Rwanda, Ishami ry’Umuryango w’Abibumbye ryita ku Mpunzi, UNHCR, n’Umuryango wa Afurika yunze ubumwe (AU), twasuye abayicumbikiwemo, urugendo rwahuriranye n’urw’abayobozi barimo intumwa z’ibihugu bya Afurika muri AU.

Kuri uyu wa Gatatu nyuma ya saa sita byari ibihe nk’ibindi mu buzima bw’inkambi, impunzi n’abimukira bayicumbikiwemo bakinaga Volleyball, abandi bicaye mu biziga baganira, cyane ko abenshi bahuriza ku rurimi rw’Icyarabu kuko bakomoka mu bihugu bigize ihembe rya Afurika.

Ubuyobozi bwa UNHCR buvuga ko muri iyi nkambi irimo impunzi n’abimukira 189 bavuye muri Libya, barimo 21 bakomoka muri Somalia, 153 baturuka muri Eritrea, 10 baturuka muri Sudani na batanu bo muri Ethiopia. Muri aba harimo abana 79 batari kumwe n’ababyeyi babo.

Bose bari mu nzira bashaka kujya i Burayi banyuze iy’ibusamo, ariko ntibahirwa n’urugendo bahera muri Libya.

Dr Zaka Byabacwezi ukora mu muryango African Humanitarian Action (AHA) ucunga ivuriro ry’iyi nkambi, avuga ko ubwo izi mpunzi zakirwaga, harebwe ikibazo buri wese afite, basuzumwa indwara zandura n’izitandura.

Ati “Tumaze kumenya uko bahagaze, nk’abari bafite ikibazo cy’umunaniro ukabije, ibibazo by’uruhu, twabazanye hano mu ivuriro, nk’abantu babiri bagize ikibazo gikomeye cy’agahinda gakabije tubohereza ku muganga w’inzobere.”

“Ariko abandi babaga bafite ibibazo bito nko kutabasha gusinzira neza, umunaniro ukabije, ariko byabaga ari ibintu byohereje. Ibibazo babaga bafite ni nk’iby’ubuhumekero ariko bidakanganye, ibibazo by’uruhu kubera ko babaga bakoresha mazi mabi, ariko kuba bagera hano bikomeje kugabanyuka.”

Muri Libya byari ukubara ubukeye

Muri Libya, ngo abantu benshi usanga barahinduye inzu zabo za kasho zifungirwamo abimukira, bagakoreshwa ibyo babonye byose, ugasanga nta n’ubutegetsi buhari ngo bugira icyo bubaza.

Umwe mu bimukira uturuka muri Eritrea yagize ati “N’abahungu bato bashoboraga kuza aho badufungiye bagakora ibyo bashatse byose, bashaka bakagufata bakagutwara na UNHCR ntacyo yavuga.”

“Hari bashiki bacu n’abavandimwe bacu babuze muri ubwo buryo, hari abagera kuri 60 bagurishijwe kandi bari mu nkambi, bakagurishwa nk’ibicuruzwa. Baragurishijwe ariko ubu ntituzi iyo bari.”

Ibyo byose ngo byagiye bituma agahinda n’ubuzima bwo muri Libya birushaho gusharira, byose bikiyongera ku gufatwa ku ngufu.

Yakomeje ati “Nk’aha umuntu apfuye ni ikintu kibi kuri wowe, ariko kuri njye ni ibisanzwe kuko muri Libya kuri twe byari ibisanzwe nk’uko wafata ifunguro rya mu gitondo cyangwa irya saa sita. Ubu turatuje.”

“Gufatwa ku ngufu…njye nagize amahirwe ntibyangeraho ariko n’abahungu bafashwe ku ngufu. Ababikoraga benshi ni abanya-Libya ariko harimo n’abantu bakorera nko muri Tchad. Wasangaga abakobwa bahuritse, ugasanga niba baje bakabura nk’umukobwa, niba hari umuhungu muto ni uwo batwaraga. Hari abakobwa benshi batwaye inda muri ubwo buryo, bagasambanywa kandi mu buryo bwa kinyamaswa.”

Mu nkambi ya Gashora harimo abakobwa n’abagore bafashwe ku ngufu, ubu bakomeje gufashwa kwakira ibyababayeho, ngo bakire ibyo bikomere.

Bageze i Kigali bariruhukije

Bamwe mu bemeye kuvugana na IGIHE, bahuriza ku kuba ubwo babarurwaga ku ikubitiro, barabwirwaga ko bajyanwe muri Niger kuko nayo yafunguye inkambi nk’iri i Gashora, ariko ku munota wa nyuma babwirwa ko igihugu cyamaze kwitegura ari u Rwanda.

Gusa bishimiye kuba mu Rwanda kuko hari ikirere cyiza, gitandukanye no muri Niger haba ibihe by’ubutayu nko muri Libya. Gusa icy’ingenzi ngo kwari ugucika iyicarubozo n’intambara byo muri Libya.

Abdul wavanywe muri Libya, we akomoka muri Somalia. Avuga ko iwabo nta kazi yagiraga, abayeho nabi, ageze aho yiyemeza kujya gushakira ubuzima i Burayi.

Ati “Nta kindi cyemezo nari nsigaranye uretse kuva muri Somalia. Hari intambara y’amoko, ugasanga hagenda habaho kwihorera abaturage bamwe bica abandi, niba umwe mu bagize ubwoko bwanjye yishwe, mba ngomba kwihorera. Ibyo byatumye mva muri Somalia,”

Ngo yashatse guca muri Libya kuko ho babwirwaga ko haboneka uburyo bwo kwambuka Mediterranee bidasabye ibyangombwa byemewe. Gusa kugerayo ntibyari byoroshye, kuko Abdul yabanje guca muri Yemen, atunguka muri Sudani, ari naho bavuye binjira muri Libya mu 2016.

Ni urugendo ngo rwabafashe amezi hafi abiri. Muri Libya yahuriyeyo n’ibibazo uruhuri, we na bagenzi be bahindurwa imbohe, bashyirwa muri kasho rusange zabaye imbarutso y’ibikorwa bibi bakorewe.

Ati “Ibibazo twari dufite muri Libya ntabwo ari ibintu navuga mu itangazamakuru.”

Gusa muri ubwo buzima bugoye, we n’umukunzi we baje kubyarirayo umwana, ubu bari kumwe mu nkambi i Gashora. Uyu mwana ngo yavukiye i Tripoli, mu kigo gicungwa na UNHCR.

Mugenzi we wo muri Eritrea we avuga ko yatabawe amaze imyaka itatu mu kigo bari bafungiwemo muri Libya. Avuga ko bageze mu Rwanda yumvise nibura ko atagipfuye nka bagenzi be.

Ati “Icya mbere numvise nibura ko ubuzima bwanjye bugiye gukomeza kubaho, ubwo nari muri Libya nahoraga niteguye gupfa, narara nkumva ntari buramuke, nta cyizere na gike nagiraga. Ubu ariko ngerageza gutekereza nk’umuntu, ubu ndishimye kuko nubwo kuba mbasha kubona urumuri nka gutya, mbishimira Imana kuko birampagije.”

Indoto ni ugukomeza i Burayi

Uyu musore ukomoka muri Eritrea avuga ko nubwo yakiriwe mu Rwanda, inzozi ari ugukomeza urugendo.

Ati “Twifuza ko batwimurira ahandi. Wenda bizafata igihe, ariko ni cyo cyifuzo kandi twifuza igisubizo kirambye. Gusa na mbere yaho turashimira Guverinoma y’u Rwanda kuko kuba tubasha kubona urumuri nka gutya ni ibintu bikomeye, turashimira Guverinoma y’u Rwanda kuba yaremeye kutwakira, ariko ikwiye no kutuvuganira kugira ngo ikibazo gikemuke.”

Ni kimwe na Abdul wo muri Somalia, uvuga ko akeneye gukomeza urugendo rwe rutabashije gushobokera muri Libya.

Ati “Icya mbere ntabwo mpagijwe no kuguma mu Rwanda, icya kabiri ntabwo nshobora gusubira muri Somalia kubera ibibazo biriyo, icya gatatu nifuza igihugu kitari icyo muri Afurika, ni ukuvuga kitari Somalia, Libya cyangwa mu Rwanda. Inzozi zanjye zari ukuba mu kindi gihugu kitari u Rwanda, niyo mpamvu ntahagijwe no kuba ndi aha hantu.”

Icyo cyifuzo kandi bagisangiye n’undi musore na we ukomoka muri Eritrea, wemeye kuganira na IGIHE, ariko ntiyifuze ko amazina ye atangazwa.

Ati “Imana ishimwe kuko tugeze hano mu Rwanda tuvuye muri Libya, twumvise ko tubonye amahoro, aha ntabwo ari nko muri Libya, ibintu bimeze neza, abantu batwakiriye neza, Abanyarwanda ni beza cyane. Icyo dusaba Perezida w’u Rwanda na UNHCR ni ukudufasha kugera ku nzozi zacu.”

“Kubera ko igihugu cyacu nta mutekano urimo, nagiye muri Libya kugira ngo ndebe ko nabasha kugera i Burayi. Nifuzaga kujya mu Burayi. Ariko tugeze muri Libya, sinabasha gusobanura uko byari bimeze kuko twakorerwaga iyicarubozo ndetse abantu bamwe bagurishwa, bamwe bakagerageza kwambuka inyanja bakarohama, bamwe barapfuye. Byari bikomeye, ariko ubu ndashima Imana kuko ndi hano. Gusa nifuza kujya mu Burayi kuko twaje mu Rwanda ngo badufashe kwambuka ngo tujye i Burayi.”

Uburyo bwo kubitaho burakomeje

Umuvugizi wa UNHCR mu Rwanda, Elise Villechalane, avuga ko ubwo izi mpunzi n’abimukira bageraga mu nkambi, uretse aho kuba hatekanye, zari zikeneye n’ubufasha mu bijyanye n’ubuzima bwo mu mutwe kuko zahuye n’ibibazo bikomeye birimo gufatwa nabi no guhohoterwa bikomeye.

Ati “Bakeneye ubufasha mu bijyanye n’ubuzima bwo mu mutwe n’ubujyanama, kugira ngo babashe gukira ibibazo byose barimo guhura nabyo. Hano mu Rwanda barimo kwerekwa ko batekanye, bahabwa ubujyanama, ndetse hari n’ibindi mu rugendo rwo gukira, kuko bagira n’ibindi bikorwa mu nkambi.”

“Kugira ibintu bibahugiza, kwiyungura ubumenyi, ni bimwe mu bizabafasha gusubiza ubuzima bwabo ku murongo, ari nayo mpamvu hano tugira ibibuga by’umupira w’amaguru, Volleyball, turifuza no kubashyiriraho ikigo cy’urubyiruko, dushaka kubaha amasomo y’indimi no kubaha amahugurwa kugira ngo batangire kugira uruhare mu bikorwa byubaka ubuzima bwabo. Ni ibikorwa by’ingenzi cyane.”

Uretse imikino, bafite icyumba bashobora kureberamo amakuru kuri televiziyo, ndetse gahunda ihari ni ukubaka muri iyi nkambi icyumba kibamo za mudasobwa rusange.

Ati “Gukoresha internet bifungura amahirwe menshi nko mu itumanaho, kwiga, kumenya ibirimo kubera ahandi kuko bamaze igihe kinini badakoresha nk’imbuga zinyuranye. Uru rugendo rwo gukira ruzafata igihe ariko niyo mpamvu dufite n’abahanga mu bijyanye n’imitekerereze.”

Ambasaderi wa Siera Leone muri AU, Patrick Kapuwa akaba na Visi Perezida w’akanama ka AU gashinzwe impunzi n’ibikorwa by’ubutabazi, yavuze ko n’ibindi bihugu bikwiye kwakira izi mpunzi zikomeje guhera muri Libya, aho UNHCR ivuga ko habarurwayo abasaga 3000.

Ati “Ibyo twabonye hano uyu munsi birashishikariza buri gihugu kigize AU kumva ko ibyakozwe hano n’abandi babishobora, kandi ni ibivugwa n’abagenerwabikorwa ubwabo, ko ubu bameze neza kurusha aho bari bari.”

Bashobora kujyanwa mu bihugu barota

Umuyobozi wa UNHCR mu Karere ka Afurika y’Iburasirazuba n’Ibiyaga bigari, Clementine Nkweta Salami, yashimye Guverinoma y’u Rwanda yemeye kwakira izi mpunzi z’abanyafurika, zigahabwa ibyangombwa byose nkenerwa mu gihe hagishwakishwa igisubizo kirambye.

Ati “Turimo kuganira nabo ngo turebe igisubizo kibabereye, turimo kureba ku kubimurira ahandi, kubafasha gusubira iwabo ku babyifuza ndetse n’amahirwe guverinoma yabahaye arimo no kuba bashobora kuguma hano. Ndatekereza ko ari ngombwa, kuko abenshi muri bo baracyahungabanye, bakeneye kubanza gufashwa bagatuza, bagashwa mu bikorwa binyuranye bari hano, bagakira ihungabana bagize.”

“Bimwe mu bihugu byemeye inshingano yo kuba byagira abo byakira, bakaba bagira aho bimurira mu Burayi, ariko tuzakomeza kuganira n’abafatanyabikorwa ngo hongerwe abashobora kwakira izi mpunzi. Ntabwo ari ukuvuga ko uburyo bumwe bwaba bubereye abantu bose, turakomeza kuganira nabo, aho baturuka n’bibazo bihari, turebe niba bakwiriye kwimurirwa ahandi bikorweho.”

Salami yavuze ko bimwe mu bihugu byo mu Majyaruguru y’u Burayi birimo Suede, byagaragaje ubushake ko bishobora kwakira umubare muto w’impunzi.

Byitezwe ko mu kwezi gutaha u Rwanda ruzakira izindi mpunzi zisaga 120, ndetse birashoboka ko uyu mwaka uzajya kurangira rumaze kwakira impunzi zose uko ari 500 u Rwanda ruheruka kwemera kwakira binyuze mu masezerano na AU na UNHCR.

Umunyamabanga Uhoraho muri Minisiteri Ishinzwe Ibikorwa by’Ubutabazi, Kayumba Olivier, yavuze ko imyiteguro yo gukomeza kwakira izi mpunzi ikomeje.

Ati "Imyiteguro iragenda neza, ubwa mbere twakiriye abantu 66, ubwa kabiri twakira 123, ubwo hari abandi bari mu nzira, imyiteguro sinakubwira ko ejo biraba birangiye ariko nabonye abafundi benshi bari hano, muri make navuga ko biragenda neza, tuzabakira."

Kayumba avuga ko impunzi n’abimukira bakomeje guhabwa serivisi bakeneye zirimo ubuvuzi n’uburyo bwo kwidagadura, hari ibibuga byari bihasanzwe ndetse harimo guhangwa ibishya. Anavuga ko biga Ikinyarwanda n’Icyongereza, ku buryo "mu minsi ya vuba nibashobora kubona batangiye kuvuga neza Ikinyarwanda bashobora kuzajya bigira mu isoko bakanahaha bakitekera."

Volleyball ni umwe mu mikino yitabirwa cyane muri iyi nkambi
Mu kiruhuko usanga izi mpunzi n'abimukira bahuzwa n'imikino
Iyi nkambi ifite ivuriro ndetse rikomeje kwagurwa ngo ribashe gutanga serivisi nziza
Bamwe bafite amahirwe y'uko bashoboye kumenyesha imiryango yabo ko bageze mu Rwanda, abandi hakomeje gushakwa uburyo bwo kubahuza
Hubatswe inzu yihariye bafatiramo amafunguro bakanaharebera televiziyo
Abakeneye gukina umupira w'amaguru bahawe ikibuga, harimo no kubakwa ikindi
Bahawe uburyo bwo kwidagadura bubafasha kuva mu bihe bibi bari bamazemo igihe muri Libya
Uyu musore akomoka muri Eritrea ariko ahamya ko adashaka kuguma mu Rwanda cyangwa gusubira iwabo
Abagore n'abakobwa bavuga ko bahohotewe bikomeye ku buryo bagorwa no kuvuga ubuzima baciyemo
Abakozi b'inkambi baganira n'impunzi n'abimukira
Uyu munya-Eritrea avuga ko atifuza kuguma mu Rwanda kandi adashaka gusubira iwabo
Uyu munya-Eritrea ahamya ko yongeye kugira icyizere cy'ubuzima ageze mu Rwanda
Uyu mugabo yavuye muri Somalia agera muri Libya mu 2016, we n'umugore we bibarukirayo umwana muri uyu mwaka, mbere yo kwimurirwa mu Rwanda
Inzu zicumbikiwemo impunzi n'abimukira
Abayobozi ba UNCHR n'Umunyamabanga Uhoraho muri Minema, Kayumba Olivier basura iyi nkambi
Bamwe mu ntumwa z'ibihugu bya Afurika muri AU basuye inkambi ya Gashora
Umuyobozi wa UNHCR mu Rwanda, Ahmed Baba Fall yasabye ibihugu kugira uruhare mu kwita ku mibereho y'impunzi
Kayumba Olivier yavuze ko u Rwanda ruzakomeza kwita kuri izi mpunzi uko rushoboye
Abayobozi bitegereza uburyo bukoreshwa mu kuyungurura amazi ava mu Kiyaga cya Mirayi, akoreshwa mu nkambi
Mu ivuriro harimo ibitanda bishobora gucumbikirwaho abarwayi
Ivuriro ryo mu nkambi ririmo ibikoresho n'imiti by'ibanze
Ambasaderi w'u Rwanda muri Ethiopie akaba anaruhagarariye muri AU, Hope Tumukunde, yashishikarije ibihugu bya Afurika kugira uruhare mu gushakira umuti ibibazo byugarije Abanyafurika
Ambasaderi wa Siera Leone muri AU, Patrick Kapuwa, yavuze ko u Rwanda rwahaye urugero ibindi bihugu bya Afurika
Umuyobozi wa UNHCR mu Karere ka Afurika y’Iburasirazuba n’Ibiyaga bigari, Clementine Nkweta Salami, yavuze ko hakomeje ibiganiro hashakwa uko izi mpunzi n'abimukira bafashwa kujya mu bindi bihugu gukomerezayo ubuzima
Umuvugizi wa UNHCR mu Rwanda, Elise Villechalane, avuga ko ubwo izi mpunzi n’abimukira bageraga mu nkambi, uretse aho kuba hatekanye, zari zikeneye n’ubufasha mu bijyanye n’ubuzima bwo mu mutwe kuko zahuye n’ibibazo bikomeye birimo gufatwa nabi no guhohoterwa bikomeye

Amafoto: Niyonzima Moïse


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza