Ubutaka bw’u Rwanda, ubucuruzi na Kenya, Jambojet…Ikiganiro na Ambasaderi Masozera (Video)

Yanditswe na Philbert Girinema
Kuya 20 Ugushyingo 2019 saa 02:37
Yasuwe :
0 0

U Rwanda na Kenya ni ibihugu bibiri bifitanye umubano ukomeye kandi umaze igihe ku buryo wagize uruhare runini mu iterambere ry’uyu munsi, aho intego ari ukugera kuri byinshi byisumbuyeho.

Mu myaka ya vuba, Kenya yabaye igihugu cyacumbikiye abanyarwanda benshi bari mu buhungiro nyuma yo kumeneshwa mu rwababyaye, yabaye kandi nk’intangiriro y’ishingwa ry’umuryango wa FPR Inkotanyi kuko benshi mu bawutangije ariho bari mu buhungiro.

Na nyuma ya Jenoside, Kenya yafashije u Rwanda gushakisha no guta muri yombi abayigizemo uruhare bari barahungiyeyo.

Ibikorwa bizwi cyane ni ‘Opération NAKI’ yakozwe i Nairobi muri Nyakanga 1997, yafatiwemo abahamijwe uruhare muri Jenoside barimo Jean Kambanda wabaye Minisitiri w’Intebe ; Pauline Nyiramasuhuko wari Minisitiri w’Umuryango ; Umunyamakuru Hassan Ngeze ; Col Gratien Kabiligi, Aloys Ntabakuze na Sylvain Nsabimana wabaye Perefe wa Butare.

Ni ibintu bigaragaza uburyo ibi bihugu byombi byagiranye umubano kuva kera na kare. Binashimangirwa n’imigenderanire irangwa hagati y’abakuru b’ibihugu muri iki gihe, aho Perezida Paul Kagame na mugenzi we Uhuru Kenyatta badasiba kugenderanirana ‘nk’abavandimwe’.

Ubwo Kenyatta aheruka mu Rwanda, yitabiriye Umwiherero w’abakuru b’igihugu wabereye i Gabiro anageze ijambo ku bayobozi bari bahari, anavuga ko agiye kuwutangiza mu gihugu cye.

Magingo aya, u Rwanda ruhagarariwe muri Kenya na Ambasaderi Dr. Richard Masozera, kuva mu mpera z’umwaka ushize wasimbuye Kimonyo James.

Dr. Richard Masozera agiye kumara umwaka ari Ambasaderi w'u Rwanda muri Kenya

Mu kiganiro na IGIHE, Ambasaderi Dr. Masozera yatangaje ko ibihugu byombi biri kuzamura imibereho y’abaturage binyuze mu biba byaremejwe hagendewe kuri gahunda z’abakuru b’ibihugu byombi.

Ati “Gahunda dushyize imbere ni izijyanye n’ubuhahirane, ubucuruzi, kongera imikoranire mu buhinzi, ikoranabuhanga, ubuzima. Muri izo ngeri zose hari byinshi byakorwa kugira ngo tuzamure imibanire hagati y ‘ibihugu byombi. Hari ibyo u Rwanda rwageza kuri Kenya, hari n’ibyo Kenya yageza ku Rwanda.”

Indi ngeri y’imikoranire ikomeye ni umutekano, yaba mu bijyanye n’ubutabera, Igisirikare na Polisi.

Ishusho y’ubucuruzi hagati y’u Rwanda na Kenya

Ubuhahirane bushingiye ku bucuruzi hagati y’ibihugu byombi ni urwego rumaze gushinga imizi. Mu Rwanda hari ibigo byinshi by’Abanya-Kenya bimaze kwigarura isoko nk’aho mu rwego rw’Amabanki hari nka Equity Bank, KCB, I&M Bank, CBA n’amaguriro akomeye nka Nakumatt n’ibindi.

Hari kandi kaminuza zikomeye zo muri Kenya zikorera mu Rwanda zirimo nka Mount Kenya na Jomo Kenyatta nazo zamaze gushinga imizi.

Sosiyete z’indege zo muri Kenya, Kenya Airways na Jambojet nazo ziri ku isoko ry’u Rwanda.

Mu 2014 habarurwaga sosiyete z’ubucuruzi zo muri Kenya zisaga 1300, naho ubu ishoramari ry’abanya-Kenya mu Rwanda rifite agaciro karenga miliyoni 418 z’amadolari ya Amerika.

Ku rundi ruhande, abanyarwanda nabo batangiye kwigarurira isoko rya Kenya buhoro buhoro uhereye kuri Banki ya Kigali, RwandAir, Entreprise Sina Gerard, Inyange Industries n’abandi.

Ambasaderi Masozera yavuze ko kugeza ubu ibigera mu Rwanda bivuye muri Kenya ari byinshi kurusha ibiva mu Rwanda bijyayo, ari naho asaba abanyarwanda gutinyuka.

Ati “Abo bacuruzi twabafasha niba hari n’inzitane bumva zibakumira kugira ngo bagere kuri iri soko neza. Ibyo ni ibintu byakwigwa kuko ku rwego rw’abayobozi bombi, amasezerano arahari, nta muntu mu nzego zishinzwe ishyirwa mu bikorwa wemerewe kuba yabisubiza inyuma.”

Yakomeje avuga ko hari ibicuruzwa bikorerwa mu Rwanda bimaze kwigarura isoko ryo muri Kenya, aho yatanze urugero rw’ibihumyo ariko ko hakenewe ko abacuruzi bongera imbaraga mu kumenyekanisha ibyo bakora.

Ati “Dufite ibihumyo bikunzwe muri Kenya, hari amaguriro ujyamo ugasangamo ibintu bituruka mu Rwanda. Ibicuruzwa bya Sina Gérard nk’urusenda, ubisanga mu maguriro akomeye. Hari icyayi cy’u Rwanda, unarebye ubwiza bwa fromage ziva mu Rwanda, hari benshi b’abanyamahanga bazikunda kandi bazishakisha. Hari imitobe y’Inyange n’ibindi.”

Sosiyete y’indege ya Jambojet yitezweho koroshya ingendo

Muri Nzeri Ikigo cy’Igihugu gishinzwe indege za gisivili, RCAA, cyahaye uburenganzira Sosiyete y’Indege yo muri Kenya, Jambojet, bwo gutangira gukorera ingendo mu Rwanda.

Ambasaderi Dr. Masozera yavuze ko kuba yaratangiye gukora, bituma umubare w’indege ukomeje kwiyongera bigafasha mu buhahirane.

Ati ”Jambojet yatangiye gukora. Icyo bivuze ni uko hiyongereye sosiyete z’indege zikorera mu Rwanda, ni ukuvuga ko igiciro cy’ingendo z’indege kigabanuka, nabyo hari icyo bivuze ku bacuruzi, biraborohera kandi biba bihendutse. Bijyanye no koroshya ingendo z’abantu n’ibintu.“

Iyi sosiyete ishamikiye kuri Kenya Airways, yatangiye ibikorwa muri Mata 2014, aho ubu ifite uburenganzira bwo kugenda mu bihugu birimo u Burundi, Ibirwa bya Comores, Repubulika Iharanira Demokarasi ya Congo, Ethiopia, Madagascar, Ibirwa bya Mayotte, u Rwanda, Somalia, Sudani y’Epfo, Tanzania na Uganda.

Ambasaderi Dr Masozera yavuze ko imikorere ya Perezida Kagame na mugenzi we Uhuru Kenyatta ishingiye ku iterambere ry'abaturage mu ngeri zose

Ibijyanye n’ubutaka bw’u Rwanda bwagiye mu nkiko

Mu 1986 ubwo Kenya yayoborwaga na Perezida Daniel Arap Moi, yahaye u Rwanda ubutaka bungana na hegitare 12 (are 32), buherereye hafi y’cyambu cya Mombasa.

Nyuma y’aho umucuruzi w’Umunya-Kenya, Salad Awale, ukorera i Mombasa yaje gutangaza ko ari ubwe, ko afite n’ibyangombwa bimwemerera kubukoresha mu gihe cy’imyaka 99 yahawe na leta ya Kenya mu 1986.

Icyo kibazo cyageze mu Rukiko Rukuru muri Kenya maze umucamanza Anyara Emukule, afata umwanzuro ko ubutaka busubizwa Leta y’u Rwanda kuko ibyangombwa umucuruzi Awale avuga ko afite ari ibyiganano, nkuko byemejwe nyuma yo kugenzurwa na komisiyo ishinzwe ubutaka.

Urukiko rwavumbuye ko nta mukozi wa Minisiteri y’Ubutaka muri Kenya wigeze atanga ibyo byangombwa, maze buza gusubizwa u Rwanda.

Amb. Dr. Masozera yavuze ko ubu ikibazo cy’ubu butaka cyakemutse kuko hari amananiza yari yashyizwemo n’inzego z‘ibanze ariko ubu byarangiye hakurikiyeho kureba uko bwabyazwa umusaruro.

Ati “Dufite impapuro zabwo […] Ni ubutaka bwajyamo ibikorwa bihagije kugira ngo abacuruzi b’u Rwanda bashobore kubona aho bakorera cyane ku mwaro wa Mombasa kuko icyambu cya Mombasa gisigaye gikoreshwa cyane.”

Yavuze ko ubu butaka bushobora kwifashishwa ku buryo ibicuruzwa bijya cyangwa biva mu Rwanda bidatinda ku cyambu cyangwa se byaba na ngombwa hakaba hakodeshwa.

Muri Kenya magingo aya habarirwa abanyarwanda barenga ibihumbi bitatu. Barimo umubare munini w’abanyeshuri, abakora ubucuruzi n’ikindi gice cy’abanyarwanda bamaze imyaka myinshi mu Burengerazuba bwa Kenya biyumvaga nk’abanya-Kenya.

U Rwanda na Kenya bihuriye mu Muryango wa Afurika y’Iburasirazuba, no mu muhora wa ruguru w’uwo muryango aho abaturage b’ibihugu bya Kenya, Uganda n’u Rwanda bemerewe kugendererana hakoreshejwe indangamuntu.

Ambasaderi Dr Masozera yatangaje ko hakiri icyuho mu byo u Rwanda rwohereza muri Kenya, ari nayo mpamvu abacuruzi basabwa kwagura ibikorwa byabo

Amafoto na Video: Philbert Girinema


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza