Leta yashyize ku isoko imyanya 2000, ihatanirwa n’abarenga ibihumbi 250

Yanditswe na Niyitanga Jean Paul
Kuya 28 Ukwakira 2020 saa 01:32
Yasuwe :
0 0

Komisiyo y’Abakozi ba Leta n’Umurimo, yatangaje ko mu 2019/20 abantu 258.914 basabye akazi ka Leta ku myanya 2021, ibintu bigaragaza ko abashaka akazi bakomeje kuba benshi ugereranyije n’imyanya y’akazi ihari.

Ibi byatangajwe na Visi Perezida w’Inama y’Abakomiseri muri Komisiyo y’Igihugu ishinzwe Abakozi ba Leta, Kayijire Agnès, ku wa 26 Ukwakira, ubwo yagezaga ku bagize Inteko Ishinga Amategeko raporo y’ibikorwa bya Komisiyo y’Igihugu Ishinzwe Abakozi ba Leta by’umwaka wa 2019/2020.

Yavuze ko mu byo Komisiyo yasuzumye harimo uko inzego zitandukanye za Leta zashatse abakozi n’uko zabashyize mu myanya muri uwo mwaka wa 2019/2020.

Agaruka ku mibare y’imyanya y’imirimo yatangajwe n’abahataniye iyo myanya muri uwo mwaka, Kayijire yagize ati “Iyi raporo igaragaza ko mu mwaka wa 2019/2020, imyanya yatangajwe ko ikenewemo abakozi ari 2.021; abasabye akazi ni 258.914; abatoranyijwe kuri iyo myanya ni 149.835 bangana na 57.8% (by’abari bujuje ibisabwa) abitabiriye amapiganwa ni 52.187 bingana na 34.8% by’abatoranyijwe.”

Agaruka ku mibare y’abatsinze n’abashyizwe mu myanya, yagize ati “Abatsinze nibura n’amanota 70% ni 4.548 bangana na 8.7% by’abitabiriye amapiganwa, abakandida bashyizwe mu myanya bari 2.021 bangana na 44.4% by’abatsinze amapiganwa, muri bo abagore ni 682 bangana na 33.7%. Muri rusange abatsinda ni bake ugereranyije n’abakoze amapiganwa ari ku bagabo ari no ku bagore.”

Minisitiri w’Abakozi ba Leta n’Umurimo, Rwanyindo Kayirangwa Fanfan, yabwiye IGIHE ko nta kibazo kirimo kuba abantu benshi bagaragaza ubushake bwo gukorera leta.

Ati “Ndibaza ko ari uburenganzira bw’abantu bwo gushaka akazi, bafite ubwo burenganzira. Kuba hari abantu badafite akazi bakagashaka cyangwa kuba hari abari bagafite bagashaka guhindura, nta kibazo kirimo.”

“Na mbere ya COVID-19 byabagaho, ahubwo icyo umuntu yakwibaza ni ukuntu abo bantu bashobora gutoranywa ariko nabyo turi kubikora kuko abantu bazajya bakora ibizamini hakurikijwe ikoranabuhanga nk’uko basaba hakoreshejwe ikoranabuhanga, no gukora ibizamini bazajya bakorera kuri internet nk’uko basaba bakoresheje ikoranabuhanga."

Minisitiri Rwanyindo yavuze ko usibye mu Rwanda no mu bindi bihugu usanga abantu benshi basabye akazi ku mwanya umwe, ku buryo hari n’abajya kumenyekanisha ko badafite akazi.

Amanyanga mu ikorwa ry’ibizamini

Nubwo bimeze bityo ariko, iyi Komisiyo yagaragaje ko mu bizamini by’akazi ka Leta hari ahagaragara amakosa mu guhitamo abakora ibizamini, mu gukosora ibizamini by’akazi no mu gushyira abakozi mu myanya y’akazi ka Leta.

Mu bibazo byagaragajwe muri Raporo ya Komisiyo harimo abakandida barindwi bongerewe amanota mu gihe hari abakandida batandatu bagabanyirijwe amanota mu bizamini by’akazi. Ibi ngo byahaye amahirwe bamwe yo gushyirwa mu myanya y’akazi abandi bimwa ayo mahirwe kandi bari bayakwiriye.

Hari amakaye yakoreweho ibizamini yaburiwe irengero, hakaba n’amakaye y’ibizamini yagaragayeho imikono ibiri itandukanye, hakaba n’aho umukozi yashyizwe mu mwanya kandi ataratsinze amapiganwa.

Hari kandi n’abakandida umunani bemerewe gukora ikizamini kandi batagaragara ku rutonde rw’abemerewe gukora ibizamini.

Komisiyo kandi yagaragaje ko hari inzego zatangaje amanota y’ikizamini cyanditse ahabanye n’ari ku makaye abakandida bakoreyeho ibizamini.

Hari n’inzego eshanu zatangaje ibitandukanye n’ibyemejwe mu mbonerahamwe y’imirimo, hakaba n’inzego eshanu zatoranyije abakandida badafite impamyabumenyi isabwa ku myanya bapiganiraga.

Hanagaragajwe inzego eshatu zatoranyije abakandida badafite uburambe busabwa, hakaba n’urwego rwatoranyije umukandida uri ku rutonde rw’abatemerewe guhabwa akazi na Leta (Black list).

Ibi byose abagize inteko ishinga amategeko basabye ko ababigizemo uruhare bakurikiranwa bagakorwaho iperereza ku byaha nka ruswa, akarengane, ikimenyane n’ibindi bishingiye ku byakozwe mu gushaka no gushyira abakozi ba Leta mu myanya.

Visi Perezida wa Komisiyo y'abakozi ba Leta n'umurimo yagaragaje ko mu mwaka wa 2019/2020 hagaragaye umubare munini w'abasaba akazi ugereranyije n'imyanya yari ihari

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .