00:00:00 IGIHE NETWORK KN KINYARWANDA EN ENGLISH FR FRANCAIS

Ubushinjacyaha bwatesheje agaciro iby’ishimutwa rya Rusesabagina n’uko yafungiwe ahatazwi

Yanditswe na Rabbi Malo Umucunguzi
Kuya 27 Ugushyingo 2020 saa 12:52
Yasuwe :
0 0

Ubushinjacyaha bwagaragaje ko Paul Rusesabagina ukurikiranyweho ibyaha birimo iterabwoba yakomeza gufungwa by’agateganyo, mu gihe we asaba kurekurwa kubera impamvu zirimo uburwayi.

Kuri uyu wa Gatanu nibwo Paul Rusesabagina yitabye Urukiko rwisumbuye rwa Nyarugenge, ajuririra icyemezo cyo kongererwa igihe cyo gufungwa by’agateganyo, cyafashwe n’Urukiko rw’Ibanze rwa Kicukiro ku wa 23 Ukwakira.

Rusesabagina ahawe umwanya ngo asobanure impamvu atishimiye icyemezo yafatiwe, yahaye umwanya Me Gatera Gashabana umwunganira ngo abisobanurire Urukiko.

Me Gashabana yavuze ko basanze umucamanza atarubahirije itegeko rigena inshingano ze, kuko nubwo icyemezo cyafashwe mbere cyo kumufunga, ntabwo cyari cyemewe, kandi ngo ni cyo Umushinjacyaha yasabye ko cyongerwa.

Yavuze ko umucamanza yari afite inshingano zo gusuzuma ko igihe cy’ifungwa n’ubundi burenganzira by’uregwa byaba byarubahirijwe mu gihe cy’iperereza.

Me Gashabana yavuze ko mu gihe cy’iperereza, basanze uburenganzira bwa Rusesabagina butarubahirijwe mu gihe cy’ifatwa n’ifungwa, ahanini mu guhamagazwa k’ukekwaho icyaha.

Ubundi ngo umuntu ukekwaho ibyaha ahabwa urwandiko rumutumira, rumuhamagaza cyangwa rutegeka ko azanwa ku gahato. Me Gashabana yavuze ko Rusesabagina we nta rwandiko na rumwe muri izo yahawe, ahubwo ngo hagati ya tariki 27 - 31 Kanama yarashimuswe, afungirwa ahantu hatazwi.

Ibyo ngo byari bihagije ngo umucamanza wa mbere arekure Rusesabagina, ariko ngo ntibyakozwe.

Ubushinjacyaha ngo ntibwabashije kugaragaza aho Rusesabagina yari ari muri ayo matariki. Ikindi ngo ntiyigeze amenyeshwa icyo yafatiwe, n’uburenganzira bwe bwo kunganirwa n’ubwunganizi yihiteyemo.

Ni ibintu ngo umucamanza wa mbere yagombaga gusuzuma, agakora igikorwa iyo umuntu yafashwe binyuranyije n’amategeko.

Ku wa 31 Kanama 2020 saa saba, ngo nibwo yagejejwe ku mugenzacyaha, akoreshwa inyandikomvugo, nayo ngo ayikoreshwa atunganiwe, kandi ngo mbere y’ibazwa aba agomba kubazwa niba afite umwunganira, ariko ntibyakozwe.

Me Gashabana yanagaragaje indi ngingo iteganya inshingano z’abagenzacyaha, zirimo gukusanya ibimenyetso bishinja n’ibishinjura. Nyamara ngo mu gusoma, basanze iperereza ryaribanze gusa ku bimenyetso bishinja, ibintu yavuze ko bidahagije ngo hagaragazwe impamvu zikomeye umucamanza yagombaga kugenderaho afata icyemezo.

Mu bindi bimenyetso ngo ni amashusho, ibiganiro muri telefoni n’inyandiko Rusesabagina yafatanywe, ariko ngo nta kimenyetso na kimwe kimushinjura.

Indi mpamvu ngo ni uko Rusesabagina afite uburwayi burimo unuvuduko w’amaraso, aho mbere yakurikiranwaga n’ibitaro byitiriwe St Luc mu Bubiligi. Yavuze ko mu Rwanda hari abaganga bashobora kukwitaho, ariko ngo ntabwo ari mu bihe byoroshye kwitabwaho, ku buryo yari akwiye gufungurwa by’agateganyo, akavurwa n’umuganga yihitiyemo, ariko ngo ntibyashoboka ari muri gereza.

Yavuze ko ubwo babonanaga yabonaga atameze neza, ku buryo Rusesabagina akwiye kurekurwa agakurikiranwa ari hanze, cyane ko no muri gereza harimo ikibazo cya Covid-19, kinatuma badashobora gusurwa.

Yatanze urugero kuri Hissène Habré wahoze ari Perezida wa Tchad, ubwo iki cyorezo cyakomeraga yabaye arekuwe by’agateganyo, bikorwa mu buryo bw’ubutabazi, ari nabyo basaba kuri Rusesabagina.

Yasabye Urukiko kwakira ubujurire bwabo, rukemeza ko bufite ishingiro, maze rugatesha agaciro icyemezo cy’Urukiko rw’Ibanze rwa Kicukiro.

Yongeye kuvuga ko atari Umunyarwanda

Rusesabagina yongeye kuvuga ko ubwo yavaga mu Rwanda, yatanze ibyangombwa byose by’ubunyarwanda, aba umuntu utagira ubwenegihugu, nyuma aza kwakirwa n’u Bubiligi bwamuhaye ubwenegihugu.

Yavuze ko ahubwo ari mu Rwanda mu buryo bunyuranyije n’amategeko kuko we ari Umubiligi, ndetse ko yabisobanuye inshuro zirenga eshatu.

Yongeyeho ko yazanywe mu Rwanda ashimuswe, kuko atigeze ahabwa urwandiko rumuhamagara mu Rwanda.

Umushinjacyaha yavuze ko bishoboka ko Me Gatera Gashabana atabonye umwanya wo gusoma dosiye y’uwo yunganira, kuko Rusesabagina yafashwe ku wa 28 Kanama 2020, ahita afungirwa muri kasho ya Polisi ya Remera.

Byongeye, ngo ku munsi yafatiweho yamenyeshejwe ibyo aregwa, nk’uko bigaragara ku nyandikomvugo yakoresheje afatwa, kandi ibyaha byose aregwa byanditseho.

Ati "Turasanga iyi mpamvu Me Gashabana yagaragaje, nta shingiro ifite. Kwemeza ko Rusesabagina yafungiwe ahantu hatazwi ni ukwemeza ibintu adafitiye gihamya."

Yavuze ko kuvuga ko Rusesabagina yashimuswe atari byo, ndetse ngo yafunzwe ku wa 28 Kanama aho kuba ku wa 27 Kanama, anafungirwa ahantu hemewe.

Byongeye, ngo mu itangazamakuru yivugiye ko yizanye mu Rwanda, nta muntu n’umwe washimuse Paul Rusesabagina. Yakomeje ati" Yarizanye, ageze mu Rwanda yahise afatwa amenyeshwa ibyo aregwa."

Ubushinjacyaha bwanavuze ko impamvu yo kutunganirwa mu bugenzacyaha nayo nta shingiro ifite, kuko mu ibazwa ryo ku wa 31 Kanama, Rusesabagina yemeye gusubiza ibyo abazwa.

Mu ibazwa ryo ku wa 4 Nzeri ngo yavuze ko afite abunganizi babiri yihitiyemo, ku buryo kuvuga ko atunganiwe, nta shingiro bifite.

Ku bijyanye n’ibimenyetso, Umushinjacyaha yavuze ko icyagendeweho bajya gusaba ko Rusesabagina afungwa atari ibimenyetso, ahubwo ari impamvu zikomeye, bityo ibimenyetso bimushinjura byazarebwaho mu rubanza mu mizi.

Ku bijyanye n’uburwayi, Umushinjacyaha yavuze ko nta shingiro iyo mpamvu ifite, ndetse ikibazo cy’uburwayi bwa Rusesabagina cyafashweho icyemezo mu rukiko rw’Ibanze no mu rwisumbuye mu bujurire, ku buryo cyaguma uko kiri, agakomeza gufungwa.

Yashimangiye ko Rusesabagina ameze neza muri gereza kuko yitabwaho, kuko abasha guhagarara mu rukiko.

Yanatesheje agaciro uburyo Me Gashabana yavuze ko Rusesabagina yarekurwa ku mpamvu z’ubutabazi, avuga ko mu rukiko atari muri Croix Rouge cyangwa HCR, kuko ikirebwaho kigomba kuba ibimenyetso.

Yanagaragaje ko Rusesabagina yatawe muri yombi ku mpapuro mpuzamahanga zo guta muri yombi ukekwaho icyaha, zoherejwe mu Bubiligi, ndetse ngo yanabajijwe n’inzego z’ubutabera muri icyo gihugu anasakwa iwe mu rugo mu Bubiligi.

Ati "Ikigaragaza Me Gatera Gashabana afite amakuru make kuri dosiye, ariko nakomeza kuganira na Rusesabagina wenda azabimubwira byose."

Inyandiko zose zakozwe muri urwo rugendo ngo ziri muri dosiye.

Ubushinjacyaha bwavuze ko nta kimenyetso na kimwe Rusesabagina yigeze agaragaza cyerekana ko atari umunyarwanda, bityo gukomeza kubyitwaza ntacyo byamufasha.

Bwashimangiye ko ahubwo Urukiko rudakwiye kwakira ubujurire bwa Rusesabagina kuko butatanzwe igihe giteganywa n’amategeko.

Mu gihe ngo ubujurire ariko bwaba bwakiriwe, Urukiko ngo rukwiye kwemeza ko Rusesabagina akomeza gufungwa urubanza rugatangira kuburanishwa mu mizi, kuko ku wa 16 Ugushyingo rwaregewe Urukiko Rukuru, mu rugereko ruburanisha ibyaha mpuzamahanga n’ibyaha ndengamipaka.

Mu kwanzura, Me Gashabana yavuze ko yabonye umwanya uhagije wo gusoma dosiye, ahubwo afite ibimenyetso byinshi bitagaragara mu buryo Rusesabagina yageze mu Rwanda, ndetse mu minsi ya mbere akaba yarabajijwe atunganiwe, kugeza ku wa 31 Kanama.

Yavuze ko nubwo ntacyo banenga mu buryo Rusesabagina afunzwemo, hari ibyo bakeneye bijyanye n’ubuzima bwe.

Umucamanza amaze kumva impande zombi, yemeje ko umwanzuro w’urukiko uzasomwa ku wa 2 Ukuboza 2020, saa munani.

Kuva ku munsi wa mbere yagera mu rukiko, yashimangiye ko atari Umunyarwanda, ko ari Umubiligi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .