00:00:00 IGIHE NETWORK KN KINYARWANDA EN ENGLISH FR FRANCAIS

Gutegura ubukwe kurusha urugo mu bishobora gutiza umurindi gatanya mu Rwanda

Yanditswe na Kanamugire Emmanuel
Kuya 11 Mutarama 2023 saa 07:14
Yasuwe :

Ishyingirwa ni umuhango ugenwa n’umuco cyangwa amategeko y’igihugu runaka, ugahuza umugabo n’umugore ariko buri wese akagira uburenganzira n’inshingano.

Bitewe n’umuco w’ahantu cyangwa imyemerere, igisobanuro cy’ubukwe kigenda gitandukana ndetse hamwe bifatwa nk’umuziro gukora imibonano mpuzabitsina mu gihe umuntu atarashyingirwa.

Ku isi hose cyane cyane mu bihugu bivuga ko bifite demokarasi iteye imbere abagore n’abagabo bahawe uburenganzira bungana mu by’urushako ndetse hashyirwaho amategeko yemera gatanya mu gihe bibaye ngombwa.

Gatanya mu bashakanye ni ikibazo kigaragara hirya no hino ku isi. Imibare y’Urwego rwa Leta Zunze Ubumwe za Amerika rushinzwe iby’ibarura mu 2021, igaragaza ko 50% by’ingo z’abashyingiranywe ari bo babanaga ikaba yaragabanutseho 2% ugereranyije n’uko byari bimeze mu 2011.

Ku ruhande rw’u Rwanda, ingingo ya 18 y’Itegeko Nshinga ivuga ko umuryango ari wo shingiro kamere ry’imbaga y’Abanyarwanda, nyamara bigaragara ko gatanya zigira uruhare mu kuwusubiza inyuma.

Raporo y’Ibikorwa by’Ubucamanza ya 2021-2022, igaragaza ko ikibazo cyiganje kuruta ibindi mu manza mbonezamubano ari ugutandukana burundu kw’abashakanye aho imanza 3322 ari zo zakiriwe. Mu bashakanye batandukana, 80% ni ababa batarengeje imyaka 15 babana ariko hari n’abatandukana bamaranye igihe gito cyane.

Impamvu zishingirwaho hasabwa gatanya zirimo ko umwe mu bashakanye aba ashinjwa ubusambanyi, guta urugo mu gihe cy’amezi 12 akurikirana, gukatirwa igihano cy’icyaha gisebeje no kwanga gutanga ibitunga urugo.

Hari na none guhoza ku nkenke uwo bashakanye, kumukorera ihohoterwa rishingiye ku gitsina, kumara nibura imyaka ibiri batabana nk’abashakanye ku bushake bwabo no kutabana mu gihe cy’amezi 12 uhereye igihe cy’ishyingirwa nta mpamvu zihari zifite ishingiro.

Izi mpamvu ni zo ushaka gatanya ashyikiriza umucamanza akanaziherekeresha ibimenyetso bifatika, na we [umucamanza] akabiheraho afata icyemezo cyo gusesa amasezerano y’ubushyingirwe n’ibindi bikurikiraho.

Ubukwe burarangira, hagatangira urugendo rurerure rwo kubana

Impuguke mu bijyanye n’imibanire y’abantu, Hubert Sugira Hategekimana, yabwiye IGIHE ko mu bituma ingo nyinshi zisenyuka mu Rwanda harimo ko abantu bashyira imbaraga mu gutegura ubukwe (ibirori) bakibagirwa gutegura urugo nyamara ari rwo ruramba.

Ati “Kuri ubu uko bikorwa, iyo umuntu agiye gukora ubukwe abwira umwe mu nshuti ze agahita akora urubuga rwa Whatsapp bakaba batangiye gutumira abantu ngo baze ku rubuga, byose bigakorwa mu rwego rwo gutegura umunsi mukuru.”

“Ibyo bigaragaza ko duha agaciro umunsi mukuru ariko ntiduhangayikishwe n’uko abo bantu bazubaka.Ni yo mpamvu usanga abantu bashwanye nta n’umwaka ushize babana.”

N’umwana afatwa ukuboko akigishwa kugenda

Sugira yashimangiye ko ibyo gutegura urugo rushya bikwiye guturuka mu miryango y’abagiye kurushinga na bo ubwabo bakabigiramo uruhare. Nubwo hari n’izindi nzego zigerageza kubafasha binyuze mu nyigisho zitangwa, kutaziha agaciro bituma abazitabira batagira icyo bakuramo ahubwo bakabifata nk’umuhango.

Ati “Amadini amwe n’amwe arabigerageza ariko abagiye gushakana ubwabo ni bo bakwiye kubikora. Iyo nganira n’abantu mbabwira ko kuba wujuje imyaka yo gushaka bitavuze ko uzashobora kubaka. Hari ibintu dukwiye kureka, kwibwira ngo ningera mu rugo nzamenya icyo gukora.”

“Ntabwo ari ko bigenda. Njya nkunda gutanga urugero ku mwana. Kugenda kwe ni ibintu karemano ariko arabyigishwa, agafatwa akaboko. No kubaka urugo bisaba kubyiga kuko hari ibintu byinshi utazamenya nutabisobanukirwa kandi ukabyigishwa n’abantu babifitiye ubumenyi.”

Yanavuze ko hari indi migirire y’abitegura urugo rushya ituma rutaramba nko gufata imyenda y’amabanki kugira ngo bakore ubukwe bw’igitangaza rimwe na rimwe burenze ubushobozi bwabo kuko “sosiyete agaciro tugashyira mu munsi mukuru.”

Sugira yavuze ko urukundo atari rwo rwonyine rwubaka ahubwo bisaba ko abantu baba bafite icyerekezo kimwe cy’ubuzima.

Ati “Hubaka icyemezo ufitanye n’umuntu; kuba mugiye ahantu hamwe; ni yo mpamvu ingo nyinshi zisenyuka ni uko baba bubakiye kuri icyo kintu cy’urukundo gusa.”

Undi musesenguzi kuri iyi ngingo, yavuze ko urugo ari umushinga ugomba kwigwa neza kimwe n’indi yose ibyara inyungu btyo ko iyo habayeho kujenjeka rusenyuka rugikubita.

Imyiteguro yarwo ntigomba kurangirira ku bikoresho gusa ahubwo ikwiye gukora no ku myitwarire ya ba nyirarwo irimo kwirinda kwifuza ibirenze ubushobozi bwabo kuko bibakururira mu migirire izatuma rujegera rugikubita.

Ukwivanga kw’imiryango y’abashakanye ni ikindi kintu gishobora gutera gatanya iyo hatagize igikorwa mu maguru mashya nk’uko yakomeje bisobanura.

Ikindi yagaragaje ni uko agakungu kagira uruhare mu gusenya ingo iyo umwe mu bashakanye agize abo yitaho basa n’abamuyobora mu byemezo afatira urugo atabyumvikanyeho na mugenzi we cyangwa akagatakarizamo umutungo wagombye kugirira bombi akamaro.

Bitangira buhoro buhoro

Kuba hari imihango ibanziriza ubukwe nyirizina isigaye iba ababyeyi batabizi bishobora kuba ikindi cyuho cyo kubaka nabi.

Uyu musesenguzi yagize ati "Hamwe n’iterambere hari byinshi bigenda bihinduka. Umusore atera ivi ababyeyi batabizi akazabereka umukobwa ari nk’itangazo bisa nk’aho ari dosiye y’umuntu ku giti cye. Hari ubwo umusore abikorana na bagenzi be, agatera ivi bagafata amashusho bagashyira ku mbuga nkoranyambaga. Ibyo nta na kimwe kirimo cyo kubaka."

Irari ry’umutungo

Mu zindi mpamvu zishyirwa mu majwi nk’izitera gatanya mu Rwanda harimo kuba hari abajya mu rushako bararikiye imitungo bamara kugera mu rugo bagatangira inzira zo gusaba gatanya.

Sugira ati “Icyo kibazo kirahari. Abantu bose ntabwo baba bafite umugambi umwe. Nzi abantu nka batatu bapangiye; kubera ko afite ibintu byinshi, ni umucuruzi umukobwa akamubwira ko amukunda bamara kubana hashira umwaka akamubwira ati ‘sinkigukunda, ndasaba gatanya. Iyo mutandukanye muri ubwo buryo mugabana umutungo mukanganya, 50% kuri 50%, iyo mwasezeranye ivangamutungo.”

Kuri iyi ngingo Guverinoma y’u Rwanda yatangiye urugendo rwo kuvugurura Itegeko ryerekeye abantu n’umuryango, imicungire y’umutungo w’abashyingiranywe, impano n’izungura.

Imbaraga zisenya zihishe mu mibonano mpuzabitsina ikorwa mbere y’urushako

Hubert Sugira Hategekimana asobanura imibonano mpuzabitsina nk’igikorwa kirema ubumwe mu bayikoranye bityo ko iyo batandukanye buri wese aba asa n’usigaranye igice cy’ubuzima bwa mugenzi we.

Ati "Ntabwo uryamana n’umuntu ngo ahaguruke agende gusa. Ava mu mashuka akagutwara nawe ukamusigarana, ibyo siyanse yarabigaragaje. Iyo rero uryamana n’abantu benshi ugira ibintu ubasigira. Ku basore, uko uryamanye n’umuntu ni ko umusigamo imbaraga zakagombye kuzakubakira ubuzima. Impamvu mu rushako ari byiza ni uko uwo murgore atava mu buzima bwawe. Ibyo umuhaye arabigumana.”

Yongeraho ko imibonano mpuzabitsina ituma umuntu aba umwe n’umugabo cyangwa umugore we bityo ko uko aryamana n’abantu benshi bituma atakaza ubushobozi bwo kuba umwe n’undi bazaryamana.

Ati "Ni nka ‘post it’, iyo uyomoye ahantu ukayikuraho, iyo wongeye kuyomeka ihita igwa. Nawe iyo uhuye n’umuntu ukaba umwe na we, wahura n’undi ukaba umwe na we ugenda utakaza ubushobozi ku buryo iyo ugeze ku wa nyuma mugomba kubana bibagora kuba umwe. Ntituvuze ko ibibazo byinshi biri mu ngo biterwa no kuba umugabo cyangwa umugore atanyurwa n’imibonano mpuzabitsina kubera ko agereranya n’ibindi yanyuzemo."

Impuguke mu by'imibanire y'abantu, Hubert Sugira Hategekimana

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .