Ibikorwa by’indashyikirwa: Uko abajyanama b’ubuzima b’i Kayonza bakemuye ikibazo cy’imirire mibi

Yanditswe na Hakizimana Jean Paul
Kuya 23 Mutarama 2021 saa 10:49
Yasuwe :
0 0

Abajyanama b’Ubuzima bo mu Karere ka Kayonza mu Murenge wa Kabale, bavuga ko baranduye imirire mibi yakundaga kugaragara mu bana bo muri uyu Murenge, nyuma yaho batangiye korora inkoko zitanga amagi, bakayifashisha mu kugaburira abana bafite iki kibazo.

Kugeza ubu aba bajyanama b’ubuzima borora inkoko 2 500 zitanga amagi 2 300 buri munsi. Muri aya magi, amwe barayagurisha andi bakayaha imiryango ifite abana bafite ibibazo by’imirire mibi.

Kugeza ubu, muri uyu Murenge habarurwa abana babiri gusa bafite ikibazo cy’imirire mibi, mu gihe mbere habarurwaga abana 15, iyi mibare ikaba yarahindutse nyuma y’uko imiryango y’aba bana itangiye guhabwa amagi n’abajyanama b’ubuzima ndetse bakanabigisha guteka indyo yuzuye.

Ngabonziza Alphonse utuye mu Mudugudu wa Kiburara mu Kagari ka Cyarubare, yavuze ko koperative yabo ifite uruhare runini mu kurwanya imirire mibi mu bana bo muri uyu Murenge.

Ati “Inaha iyo habonetse amagi bituma abaturage bo muri aka gace bayabonera hafi ku buryo abana babo batagira ikibazo cy’imirire mibi, imiryango yacu nayo ibona ayo magi ku buryo iwacu mu rugo nta bibazo by’imirire mibi bihagaragara.”

Ngabonziza yakomeje avuga ko uretse guha amagi abaturage, iyi koperative inabafitiye umumaro munini ngo kuko ibatangira amafaranga yo kwizigamira mu Kigega ‘Ejo heza’ ndetse ikanabishyurira ubwisungane mu kwivuza ku bantu batanu kuri buri munyamuryango.

Ati “Hari abantu benshi bataratanga amafaranga ya Ejo heza ariko nka njye kuva iyi gahunda yaza buri mwaka koperative intangira umusanzu wose, urumva ko mfite icyizere cy’ubuzima buri mbere kuko nizigamira.”

Nyirajyambere Clementine utuye mu Mudugudu wa Kabeza nawe yavuze ko iyi koperative imufitiye umumaro munini cyane kuko imufasha mu kumurindira abana be imirire mibi.

Ati “Mfite umuryango w’abana batandatu, nibura amagi tuyarya kabiri mu cyumweru kandi aba avuye muri koperative, ubu aho nkenereye amagi nyabona hafi kandi ku giciro gito ugereranyije na mbere.”

Umuyobozi wa Koperative Duterimbere mu Buzima y’abajyanama b’ubuzima mu Murenge wa Kabale, Dukuzumuremyi Fulgence, yavuze ko batangiye iyi koperative mu mwaka wa 2012 bagura imyaka bakayigurisha, nyuma baza guhitamo korora inkoko kugira ngo barwanye imirire mibi muri uyu Murenge.

Ati “Muri 2014 twakoze urugendoshuri mu Karere ka Gicumbi dusanga ni umushinga mwiza natwe turaza dutangira kuwukora. Amagi tubona adufasha kuzahura imirire mibi y’abana bo muri uyu Murenge kuko amagi duha abana abongerera intungamubiri. Nibura mu nkoko 2 500 ku munsi tubona amagi 2 300, amwe tukayagurisha andi tukayaha ababyeyi bafite abana bagize ikibazo cy’imirire mibi.”

Yakomeje avuga ko ku banyamuryango b’iyi koperative bishyurirwa ubwisungane mu kwivuza ku bantu batanu kuri buri munyamuryango, ibi bikaba bituma buri mwaka hishyurwa miliyoni zirenga 2.7 Frw, bakanishyurirwa amafaranga y’ubwizigame bw’igihe kirekire bwa Ejo heza, aho buri mwaka bishyura miliyoni 3.5 Frw ahwanye n’abanyamuryango bose ba koperative.

Uyu muyobozi yakomeje avuga ko kuri ubu bafite intego yo koroza abaturage inkoko zizajya zibaha amagi, ibi bakazabikora bagamije gutuma abaturage bagira imibereho myiza.

Umuyobozi w’Akarere ka Kayonza Wungirije Ushinzwe Imibereho myiza y’Abaturage, Harerimana Jean Damascene, avuga ko ubundi abajyanama b’ubuzima umurimo wabo w’ibanze ari ugufasha abaturage muri gahunda z’ubuzima.

Yongeyeho ko mu Karere ayoboye bafite koperative 15 zibarizwamo abanyamuryango barenga 1700, yongeraho ko kuba abajyanama b’ubuzima bagira uruhare mu gucyemura ikibazo cy’ubuzima ari urugero rwiza.

Ati “Ni urugero rwiza ku bandi baturage baba baturanye kuko babareberaho. Ikindi kandi iyo umuntu arimo gutanga isomo afite ingero zifatika biramworohera, rero kuba bafite ibikorwa runaka bakora, bituma banigisha abaturage babahera ingero ku byo bakora.”

Koperative Duterimbere mu Buzima igizwe n’abanyamuryango 198 bose basanzwe ari abajyanama b’ubuzima muri uyu Murenge, barimo abagabo 72 n’abagore 126. Kuri ubu ifite inkoko 2 500 aho buri munsi itanga amagi 2 300.

Umuyobozi wa Koperative Duterimbere mu Buzima y’abajyanama b’ubuzima mu Murenge wa Kabale, Dukuzumuremyi Fulgence, avuga ko koperative yabo igira uruhare mu gucyemura ikibazo cy'imirire mibi irangwa aho batuye
Iyi koperative irateganya koroza abaturage inkoko mu rwego rwo kubafasha kwiteza imbere

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .