Uburobyi bwongeye gufungurwa mu biyaga 20 nyuma y’amezi abiri buhagaritswe

Yanditswe na IGIHE
Kuya 2 Kamena 2020 saa 11:25
Yasuwe :
0 0

Minisiteri y’Ubuhinzi n’Ubworozi (Minagri), yatangaje ko ibiyaga 20 kuri 22 byari bimaze amezi abiri bifunze hirya no hino mu gihugu byongeye gufungurwa, ibikorwa by’uburobyi bikaba byasubukuwe.

Ibiyaga bya Rwampanga na Cyambwe byo muri Zone y’uburobyi ya Nasho, byo byakomeje gufungwa kubera ingamba zo kwirinda icyorezo cya Coronavirus.

Umuyobozi ushinzwe ibijyanye n’ubworozi bw’amafi n’uburobyi muri Minisiteri y’ubuhinzi n’ubworozi, Mukasekuru Mathilde, yavuze ko kuba ibiyaga byari bimaze igihe bifunze byari muri gahunda yo kongera umusaruro w’amafi hakurikijwe igihe yororokera mu biyaga byo mu Burasirazuba no mu Majyaruguru, ndetse n’ikiyaga kimwe cya Karago cyo mu ntara y’Iburengerazuba

Ati “Byatanze umusaruro mwiza. Urugero nkurikije nk’aho ndi gukorera mu Ntara y’Amajyaruguru, ho by’umwihariko twari twarateyemo isambaza zivuye mu kiyaga cya Kivu, mu burobyi bwaraye bukozwe muri iri joro byagaragaye ko umusaruro umeze neza, wiyongereye kandi n’isambaza zabayemo zimeze neza zariyongereye na zo”.

Kuri ubu mu Rwanda haboneka toni zigera ku bihumbi 35. Intego yari ukugera kuri toni ibihumbi 65, ariko ntabwo byagezweho kubera imbogamizi zitandukanye zirimo uburobyi bukorwa n’abashimuta bakoresheje imitego itemewe, ndetse n’abarobera mu bigobe amafi yororokeramo.

Mukasekuru avuga ko hari ingamba bafite zizatuma amafi yiyongera ku buryo mu 2024 u Rwanda ruzaba rugeze ku musaruro wa toni ibihumbi 124 ku mwaka.

Ati “Turimo guteganya kongera guteramo amafi kugira ngo twongere umusaruro, mu bworozi naho hari kuvugururwa ibyuzi no guteramo amafi no gufasha aborozi kugabura ndetse no gushishikariza ba rwiyemezamirimo kororera muri kareremba”.

Yakomeje avuga ko kugera ku ntego ya toni ibihumbi 124 ku mwaka bizoroha kubera ko hari byinshi byakozwe birimo gutanga umusaruro, birimo amaturagiro y’amafi ari mu gihugu, inganda z’ibiryo by’amafi eshatu ndetse no kongera amafi mu biyaga by’Iburasirazuba.

Imirimo y’uburobyi yasubukuwe ariko irakorwa hirindwa Coronavirus, aho ku myaro hari kandagira ukarabe, kwambara agapfukamunwa ni itegeko ndetse abarobyi bahawe amabwiriza yo kugabanya abagenda mu bwato mu kubahiriza intera hagati yabo.

U Rwanda rufite intego yo kugera ku musaruro w'amafi ungana na toni ibihumbi 124 ku mwaka mu 2024

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .