00:00:00 IGIHE NETWORK KN KINYARWANDA EN ENGLISH FR FRANCAIS

Uburangare mu gutanga isoko n’imodoka nke: Umuzi w’ibibazo byazonze gahunda yo gutwara abantu muri Kigali

Yanditswe na Akayezu Jean de Dieu
Kuya 29 June 2022 saa 05:26
Yasuwe :

Mu bihugu byateye imbere, urwego rwo gutwara abantu n’ibintu mu buryo rusange ni rumwe mu zihabwa umwihariko ndetse zikitabwaho kuko n’ubwo usanga umubare munini w’abaturage uba ufite ubushobozi bwo kwigurira imodoka ariko binafasha mu kwihutisha serivisi.

Uretse kwihutisha serivisi, gukoresha imodoka zitwara abantu mu buryo rusange bifasha mu kugabanya ibyuka byoherezwa mu kirere n’imodoka kuko nk’urugero rw’imodoka nini zizwi nka Yutong, imwe hano mu Mujyi wa Kigali itwara abantu 70 inshuro imwe.

Ni ukuvuga ko ubaze imodoka ijyamo abantu babiri bagiye mu kazi bisanzwe, ubwo hasabwa izisaga 30 kugira ngo abo bantu 70 babashe kujya mu kazi. Ibyuka byoherezwa mu kirere n’imodoka imwe bitandukanye cyane n’izo 30.

Muri rusange aho gutwara abantu mu buryo rusange byajemo ibibazo, serivisi ntabwo zakwihutishwa, umusaruro w’ibikorwa by’abatuye umujyi uba muke n’ibindi bibazo bituma abaturage badindira mu iterambere.

Umujyi wa Kigali ugiye kumara imyaka irenga 10, warananiwe kwigobotora ibibazo birimo iby’abaturage barara muri za gare bategereje imodoka, abatinda ku mirongo bategereje imodoka, ubuke bw’imodoka zitwara abagenzi, umuvundo mu masaha yo kujya no kuva ku kazi n’ibindi.

Ku rundi ruhande ariko ni ibibazo, bimaze igihe kirekire biganirirwaho ari nako harebwa uko byahabwa umurongo nk’uko byagarutsweho mu Nteko Rusange y’Umujyi wa Kigali kuri uyu wa Kabiri tariki 29 Kamena 2022.

Ni inteko yitabiriwe na Minisitiri w’Ubutegetsi bw’Igihugu, Gatabazi Jean Marie Vianney, Abadepite bahagarariye Umujyi wa Kigali mu Nteko Ishinga Amategeko, Abayobozi kuva ku rwego rw’Umudugudu, Abikorera, Sosiyete Sivile n’Abafatanyabikorwa mu iterambere.

Depite Barikana Eugène avuga ko ibibazo byazonze uru rwego rwo gutwara abantu mu buryo rusange, bizakemurwa ari uko inzego zose zibihagurukiye kubera ko bigira ingaruka kuri serivisi n’ubuzima rusange bw’abaturage.

Ati “Ni ikibazo ndetse nina cyo gituma serivisi zitagera ku 100% muri uyu Mujyi wa Kigali.”

Umuyobozi Wungirije Ushinzwe Imiturire n’Ibikorwaremezo, Dr Mpabwanamaguru Merard yavuze ko abashinzwe ibyo gutwara abantu muri Kigali nabo babona iki kibazo kandi batajya basinzira mu gihe cyose umuti urambye utaraboneka.

Ati “Yaba ari ubushakashatsi bwakozwe, ari ibyo tubona n’amaso, gutwara abantu mu buryo rusange mu Mujyi wa Kigali ntabwo bimeze neza ndetse n’ababishinzwe muri iyi minsi ntabwo bicaye ahubwo barimo gushakisha ibisubizo.”

Umuzi w’ibibazo…

Mu 2013, Umujyi wa Kigali n’Urwego Ngenzuramikorere binyuze muri Minisiteri y’Ibikorwaremezo, hatanzwe isoko ku bigo byifuzaga gutwara abantu n’ibintu mu Mujyi wa Kigali.

Icyo gihe ibigo byatsinze ni bitatu bya birimo icya KBS [Kigali Bus Services], RFTC [Rwanda Federation of Transport Cooperatives] ndetse na Royal Express.

Amasezerano ibyo bigo byahawe yavuguruwe nyuma y’imyaka itanu ya mbere uhereye nko mu 2014, bikaba ari byo byongeye guhabwa isoko mu cyiciro cya kabiri.

Icyo gihe [mu 2013] abatuye Umujyi wa Kigali banganaga na 11000,000 [miliyoni 1,1] mu gihe kuri ubu bageze kuri miliyoni 1,6.

Ni mu gihe imihanda yakoreshwaga uwo mwaka ugereranyije n’uyu munsi hiyongereyeho ibilometero 150.

Dr Mpabwanamaguru yavuze ko muri uwo mwaka wa 2013, ubwo hatangwaga isoko imodoka zagabanyutseho ku buryo ubu ngubu hasigaye 1/3. Ni ukuvuga ko nk’ikigo cyari gifite imodoka 30 mu muhanda ubwo cyahabwaga isoko mu 2013, ubu gisigaranye izitarenze 10.

Ati “Izo kompanyi hari imodoka zatangiranye nazo mu mihanda yari ihari mu Mujyi wa Kigali […] abaturage bariyongereye, imodoka zagabanyutseho ku buryo ubu mu mujyi hasigaye 1/3 cy’imodoka izo kompanyi zakoreshaga.”

Izo modoka zimwe zarashaje, izindi ba nyir’ibigo bazivana mu mihanda ku bushake ahanini bagendeye ku mpamvu bavuga ko zishingiye ku kubura amikoro bitewe n’ibihombo batewe na Covid-19.

Dr Mpabwanamaguru avuga ko ibyo bibazo byose byatumye inzego zihaguruka ku buryo mu bihe bya vuba umuti uzaba wabonetse kandi ari imodoka ziziyongera ndetse n’ibijyanye n’aho abantu bategera cyangwa banyura hakiyongera.

Ati “Ikibazo kirimo kirigwaho aho Minisiteri ifite ubwikorezi mu nshingano yahamagaye ababishinzwe yaba ari Umujyi wa Kigali, RURA ndetse n’ibigo bikora mu gutwara abantu mu buryo bwa rusange ku buryo icyo kibazo kirimo gushakirwa igisubizo.”

Yakomeje agira ati “Mu minsi ya vuba haraza kwiyongeramo imodoka zitwara abantu mu mihanda ndetse n’ibyerekezo zijyamo biraza kwiyongera mu Mujyi wa Kigali, nyuma y’uko icyo kibazo kibonewe igisubizo.”

Uburangare mu gutanga isoko…

Kuba ibigo bitatu aribyo byonyine bifite isoko ryo gutwara abagenzi muri Kigali, mu gihe imihanda n’ibyerekezo byiyongera buri munsi, ni ibintu bamwe bashimangira ko ari ikibazo gikomeye.

Babishingira ku kuba ibigo bitatu bidahagije kugira ngo bibe byabasha gutwara abagenzi bose bo muri Kigali.

Muri Gashyantare, Umunyamabanga Nshingwabikorwa w’Umuryango urengera abaguzi (ADECOR), Ndizeye Damien, yari yabwiye IGIHE ko abahawe isoko ryo gutwara abagenzi mu Mujyi wa Kigali ari bake kandi bituma nta yandi mahitamo aba ahari mu gihe serivisi zabaye mbi.

Ati “Abahawe isoko ryo gutwara abagenzi mu Mujyi wa Kigali kugeza ubu ni bake, ntibyumvikana ukuntu ‘Nyabugogo-Kimironko bayiha sosiyete imwe. Hagombye kuba ipiganwa rya ‘ligne’. “

Yakomeje agira ati “Niba ari Nyabugogo-Kimironko ikwiye guhabwa abantu barenze umwe kugira ngo bazatange serivisi zitandukanye umukiliya yishime. Guha isoko sosiyete imwe bituma umukiliya atagira amahitamo mu gihe yahawe serivisi mbi.”

Dr Mpabwanamaguru avuga ko habayeho uburangare mu gutanga isoko ndetse no kuba abahawe amasoko badatanga serivisi nziza. Ibintu avuga ko byose bigomba gukosorwa mu gihe cya vuba.

Ati “Iyo umuntu abirebye, usanga mu buryo binjiyemo habayeho icyo nakwita ko ari uburangare ku nzego zari zibishinzwe, yaba ari inzego z’ibanze n’inzego zimwe na zimwe zireberera ibyo gutwara abantu mu buryo rusange.”

Yakomeje agira ati “Ikindi kibazo cyabayeho ni icyo kwirara no kudatanga serivisi nziza kuri ibyo bigo byahawe isoko.”

Umuyobozi w’Ishami ry’Ubushakashatsi mu rwego rushinzwe Imiyoborere, RGB, Dr Félicien Usengumukiza avuga ko n’ubwo ibigo bitwara abagenzi ari bike ariko hari n’ibindi bibazo birimo ibihombo abafite ibi bigo bahura nabyo bityo agasanga leta ikwiye gushyiramo nkunganire.

Dr Usengumukiza yatanze urugero rw’ahantu atuye [mu Murenge wa Nyarugunga], ahari ahazwi nko ku Bademobe, aho imodoka zikatira zigaruka i Remera ariko ugasanga mu gitondo imodoka itangirira mu Kajagari hafi y’Ibitaro bya Kanombe.

Ati “Ni ukuvuga ko abaturage bo hepfo za Kibaya n’ahandi Kamashashi n’ahandi bibasaba gutega igare cyangwa moto kugira ngo bagere aho imodoka ya bus irabakura kandi ubundi imodoka yagakwiye gukomeza ikaza hino aho baturuka ku Bademobe.”

N’ubwo hari ibibazo birimo gutinda ku cyapa n’ibindi, mu 2017, RURA yari yatangaje ko hari harashyizweho gahunda y’uko buri minota itanu imodoka igomba kuba igeze ku cyapa mu masaha abagenzi baba ari benshi naho mu bihe bisanzwe ikaba 15.

Mu kuvugutira umuti ibi bibazo byo gutwara abantu mu buryo bwa rusange kandi Umujyi wa Kigali uherutse gutangaza ko hari inyigo izaba yashyizwe ahagaragara yo gukoresha imodoka zinyura mu kirere.

Kugeza ubu Sosiyete yo muri Amerika, Vuba Corporation, yamaze gusinyana amasezerano n’u Rwanda, azatuma izo modoka zigenda mu kirere nyuma yo kubaka ibikorwaremezo byazo.

Biteganyijwe ko hatagize igihindutse muri 2026 mu Mujyi wa Kigali hazaba hari utwo tumodoka turi hagati ya 2000 na 3000.

Ikibazo cyo gutwara abantu mu buryo bwa rusange muri Kigali gikomeje kugorana, mu masaha y'umugoroba haracyagaragara imirongo miremire y'abagenzi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .