Ubuhanuzi bwa V8, Abapasiteri ba Rumashana, ivugabutumwa...Ikiganiro na Mgr Rusengo w’Abangilikani i Kigali

Yanditswe na Cyprien Niyomwungeri
Kuya 18 Kanama 2019 saa 12:49
Yasuwe :
0 0

Musenyeri Rusengo Nathan Amooti w’imyaka 53, ni umwe mu bashumba b’itorero Angilikani mu Rwanda, by’umwihariko akaba ari umushumba wa Diyosezi ya Kigali, yahawe kuyobora nyuma y’imyaka umunani ayobora iya Cyangugu.

Amasaha arabarirwa ku ntoki ngo uyu mugabo ufite umugore n’abana batatu yerekanwe nka Musenyeri mushya wa Diyosezi Angilikani ya Kigali, mu birori bizaba kuri iki Cyumweru kuri Stade ya Kigali i Nyamirambo.

Ntabwo ari mushya cyane muri Diyosezi ya Kigali kuko ari ho yaherewe ubupasiteri mu 2002, akayikoramo imyaka 14 mu ishami ry’uburezi nyuma akaba umunyamabanga w’iyi diyosezi kugeza ubwo yagirwaga Umushumba wa Diyosezi ya Cyangugu mu 2012.

Mu kiganiro yagiranye na IGIHE, Musenyeri Rusengo wize iby’iyobokamana (Théologie) i Los Angeles-California muri Leta zunze Ubumwe za Amerika, yavuze byinshi ku buzima bwe n’izindi ngingo zireba amadini n’igihugu muri rusange

Ikiganiro na Musenyeri Rusengo

IGIHE:Mwatubwira urugendo rwanyu mu Iyobokamana?

Rusengo: Urugendo rwanjye mu iyobokamana rusa naho rungana n’ubuzima bwanjye. Ubuzima bwanjye bwose nsa n’uwabubayeho mu iyobokamana hahandi umuntu akura agatoranya icyo ashaka, nahise mo kuba umunyedini. Abantu bose banzi ndi umunyedini.

IGIHE: Inzira yanyu nk’umushumba w’itorero itangira ryari?

Rusengo: Nagiye nkora imirimo itandukanye, mu matorero atandukanye, ariko narobanuwe muri Diyoseze ya Kigali muri 2000, hanyuma muri 2002 mba umupasiteri wuzuye nyobora Paruwasi Gikondo, nyuma yaho banyimurira ku i Rebero kugira ngo ntangize Paruwasi yaho iyo bita Mango Tree.

Aho niho navuye njya kuba umushumba wa Diyosezi ya Cyangugu, ariko ubwo icyo gihe nabikoraga nkora no mu biro byacu bya Diyosezi.

IGIHE : Mu 2012 nibwo mwahawe kuyobora Diyosezi ya Cyangugu, mwayisanganye iyihe shusho?

Rusengo: Nk’uko u Rwanda rwari rumeze, mu 2012 Diyoseze ya Cyangugu yari ifite amaparuwasi 15 ariko muri ayo yose ayari afie insengero zubatse ni ane, ayandi yasengeraga mu mashuri, mu byumba by’inama yakodesheje cyangwe se muri za nsengero z’ibikorogoto zariho icyo gihe.

Ariko Imana yaje kudufasha, mpageze tubona undi muryango w’abanyamerika twakoranaga witwa ICM, turafatanya ndetse n’abanya-Cyangugu ubwabo turafatanya tugenda twubaka izo nsengero.

Ubu Diyosezi ya Cyangugu yari igeze mu maparuwasi 34, kandi yose afite insengero zubatse neza n’amatafari zikomeye. Wari umugisha ukomeye cyane.

Musenyeri Rusengo niwe ugiye kuyobora Diyosezi y'Abangilikani ya Kigali nyuma yo kuva mu ya Cyangugu yari amazemo imyaka umunani

IGIHE: Mu muhango wo gutanga inkoni y’ubushumba muri diyoseze ya Cyangugu, havuzwe ko watoranyijwe kuza i Kigali kuko ibikorwa byawe wakoze muri Diyoseze ya Cyangugu byivugira. Ni ibihe bikorwa usize i Cyangugu?

Rusengo: I Cyangugu yari Diyoseze yikwije kuko twaje kugira umugisha w’amacumbi (Guest Houses). Dufite Peace Guest House niyo ya mbere yatangiye muri Cyangugu cyangwa se muri Rusizi. Yari ifite ibyumba 20 icyo gihe, ubu ifite ibyumba 32. Ni hoteli nini ubungubu. Twaje kubaka n’indi ku Gisakura yitwa Bishop Time Center ifite ibyumba 15. Nta gihe kinini iramara itangiye.

Twari twujuje n’indi mu Bweyeye ifite ibyumba umunani. Ntabwo irarangira neza iracyakomeza ariko amazu yaruzuye ubu irakora.

Twagize umugisha w’amavuriro. Mont Cyangugu nagiyeyo ifunze, ariko twagiye tubona abandi bantu turakorana dushyiramo inzu y’ababyeyi nshya, dushyiramo Laboratwari nshya n’ibikoresho bishya, irafunguka tujya gufatanya na leta ubu irakora nta kibazo.

Hari n’indi twari kubaka yitwa Shagasha, ubu igeze ku rwego rwo gusakara. Ubwo uzansimbura nawe afite akazi gakomeye kugira ngo ikomeze igirire abanyarwanda akamaro.

Twubatse amashuri n’ibindi bintu bitandukanye ariko ibyo nabikoraga mfatanyje n’abakirisitu ba Cyangugu. Baritanze bikomeye, batanze amafaranga yabo menshi.

IGIHE: Mwumvise ko muhawe kuyobora Diyoseze ya Kigali mwanabayemo igihe kirekire, mwabyakiriye mute?

Rusengo: Byabaye ibyiyumviro bivanze. Icya mbere navuga ko byanejeje kugaruka muri Kigali. Aha niho nkomoka, Mama umbyara niho atuye, ageze mu myaka 97. Kuza hafi ye, nkamufasha mu myaka ye y’ubukure, urumva ko ari ibintu byiza.

Ku rundi ruhande nabaye nka wa mukobwa ngo nsige ibi nsange ibihe! Cyangugu ni diyoseze yihagije. Ntabwo byari bikingora niba ari umushinga, niba ari ibyo dushaka kugura, urumva ko bitari bikigoye. Aho niho mvuga ngo nsige ibi sange ibihe. Urwo ruhande rwaramvunnye.

IGIHE Mwaduha ishusho ya Diyoseze ya Kigali mugiye kuyobora?

Rusengo: Abanyakigali ntibanyumve nabi, ariko navuga ko Kigali ari diyoseze igowe. Bafite umuhamagaro wo kuva aho bari bakegera imbere. Reba ukuntu uyu mujyi uri kuzamuka, reba amazu ari hano hantu, ubwo rero diyoseze ntabwo yaguma aho iri nayo igomba kuzamuka kugira ngo igendane n’umujyi.

Birasaba imbaraga nyinshi, ubushobozi bwinshi. Niba waryamaga saa mbili ukaryama mu masaha akuze, bagakweta bagakomeza kugira ngo tugendane n’umujyi, tugendane n’igihugu.

Mgr Rusengo avuga ko icya mbere azibandaho muri Diyosezi ya Kigali ari ivugabutumwa no kubaka inzu y'amacumbi n'izindi serivisi

IGIHE: Ku mutima wawe ni iyihe mishinga ufitiye abanyamujyi?

Rusengo: Ndashaka kuvuga umushinga witwa Urban Evangelism [Ivugabutumwa mu mujyi]. Kigali imaze guhinduka bidasubirwaho. Biradusaba rero kwimura iyobokamana, tugere aho abantu bageze ubungubu kandi tugendane nawe mu iyobokamana kuko ntabwo amatwi yabo yasigaye hahandi. Tukamenya ngo ese umunya-Kigali w’ubu asigaye yumva ate?.

Niba twarasohokaga saa munani mu rusengero kirya gihe, ubu se nabwo twasohokaga saa munani cyangwa tujye saa sita kugira ngo tumworohereze? Ibyo nibyo tugomba kugenda tureba.

Kigali ni ahantu ubu utaza ngo ukore gusa uticaye ngo utekereze. Harasaba ubwenge kurusha imbaraga. Ni ahantu hasaba kwicara abantu bakajya inama. Ntabwo ari ikintu cyakorwa n’umuntu umwe.

IGIHE: Umuntu arebye muri Cyangugu mwibanze ku bikorwa remezo n’abo muri Diyosezi ya Kigali, babyitege?

Rusengo: Nkunda Ibyiza. Kimwe cyo ni Guest House yacu. Ndi umuvugabutumwa ku rundi ruhande hari abandi bavugabutumwa bava mu bihugu bitandukanye ku Isi, numva bakwiye kugira ahantu heza ho kurara. Ikindi tugira inama zacu, ubwo rero numva twagira ahantu dukura amafunguro.

Guest House yacu numva nzagerageza kuyiha ubuzima mu buryo bwose bushoboka.

Ikindi, ni ugushishikariza abantu gukorana n’amabanki cyane. Yaba ayo itorero risanzwe rikorana nayo kugira ngo dukorane nayo neza, dufatanye muri ibyo byose.

Ikindi kintu mpa agaciro cyane ni urusengero rugaragara rw’inyubako. Burya ivugabutumwa n’iterambere birafatanye. Iyo ubitandukanyije ugira ikintu cy’igihuhwe.

Insengero zacu zikwiriye guhinduka, zikaba insengero nziza, aho umunyamujyi aza akicara wamubwira akumva. Nkuko ureba Kigali irimo guhinduka, n’imyubakire yacu ikwiriye guhinduka, n’amaritari yacu agahinduka kugira ngo uyu munyarwanda urimo guhinduka, numubwira yumve neza.

IGIHE: Ni irihe somo mukuye I Cyangugu mwumva rizabafasha kuyobora diyosezI ya Kigali?

Rusengo: Ni uguha agaciro abantu. Buriya nta kintu ndabona gifite imbaraga nk’abantu abantu, ni abo kubahwa cyane cyane abongabo muri kumwe.

IGIHE: Ni iki usaba abakirisitu ba Kigali?

Rusengo: Ni ukwegerana. Ushoboye ikintu aze akitwereke, akitwigishe, tugendane. Abantu baratatanye cyane, abapasitori baratatanye cyane barasa nkaho ari ba nyamwigendaho. Twegeranye mu buryo bw’umwuka no mu bifatika tubishyire ku murongo, tuzabikora.

Mgr Rusengo yahawe ubupasiteri mu 2002 ahabwa ubusenyeri mu 2012

IGIHE Ni ibihe bihe byiza wishimira mu buzima bwawe?

Rusengo Ibihe byiza rero navuga mpura nabyo keshi ni kwa kundi iyo uri umupasitoro, ukagira itorero, ukubaka urusengero rwawe ukabona abantu baraje bararwuzuye. Ntabwo nakubwira ibihe byiza byo kubona abantu imbere yawe baje, umera nka wa mushumba ujya kuhira inka zakuka akabona zirimo kurisha.

IGIHE: Mu myaka 17 ishize uhawe ubupasitoro nyuma ukaza no kuba musenyeri ni ibihe bintu byakugoye?

Rusengo: Ni byinshi cayne. Kimwe ni iyo utumvikanye na bagenzi bawe kandi muri abakirisitu. Bisa nabi iyo mukorana ntimwumvikane. Ibyo nibyo bintu byangoye.

Ikindi cya kabiri ni iyo abandi bantu batakumenye. Ukaza gukorana n’abantu, ukaza ufite umunezero nk’uko nje muri diyoseze ,noneho abo uje usanga bakakwikanga. Ibyo rero nibyo bihe bibi nagiye ngira ariko bisimburwa n’ibihe byiza iyo abantu mumaze kumenyerana.

IGIHE: Isi igeze mu gihe cy’ikoranabuhanga, aho umuntu ashobora kuba ari hano akigisha ijambo ry’Imana cyangwa izindi nyigisho akoresheje ikoranabuhanga. Ubona gute umurimo w’Imana ujyanishijwe n’ikoranabuhanga?

Rusengo: Ntabwo dukwiye kwibagirwa Gadgets [ibikoresho by’ikoranabuhanga]. Guhuza cyane cyane urubyiruko tukabaha ubutumwa mu nzira mwumva. Twegere amaradiyo, twegere amateleviziyo kugira ngo atambutse ubu butumwa bwacu. Hari abandi bantu batajya gusenga muri iki gihe kubera ko amazu yabo ameze neza bakigumira mu nzu. Tuboherereze ubutumwa ku maradiyo na televiziyo. Turebe ukuntu ubutumwa bwagera kuri uwo muntu w’iki gihe.

IGIHE: Leta yashyizeho itegeko ryo kugira impamyabumenyi ku bayobozi b’amadini n’amatorero. Ntabwo mubona ko bizabangamira cya kintu bamwe bita umuhamagaro?

Rusengo: Iwacu aho nakuriye ntabwo twagiraga amavuriro, amavuriro agiye aza muri ino minsi. Abantu rero bagiye biyigisha kuvura ugasanga umuntu afashe urushinge arumanitse hariya, agacana munsi ngo rutajyaho umwanda hejuru, iminsi yashira ugasanga hajemo umurayi, abo bantu rero babitaga ba Rumashana.

Kuki umupasiteri agomba kuba Rumashana? Kimwe rero mu bintu nzakora, Pasitoro agomba kujya mu ishuri rya gipasitoro.

Iyo usoma ku muhanuzi Elisha yari ifite ishuri ry’abahanuzi biga guhanura, bakabigisha kumva ijwi ry’Imana. Niba abo bicyo gihe barahugurwaga, kuki uw’uyu munsi atahugurwa?.

Nibyo umuhamagaro ni ingenzi. Ni ngombwa ariko iyo umaze kumva Imana iguhamagaye ugafata umwanzuro wo kwitaba, sanga bagenzi bawe bitabye mbere baguhugure. Abapasitori, abavugabutumwa, abantu bakunda Imana, mumanuke tujye kwiga.

Ubwo rero uzakubwira ngo yigishijwe n’umwuka wera cyangwa yagize gute, oya. Ahubwo icyo nasaba leta, nibahe ibyangombwa amashuri y’iyobokamana abapasitoro bigishe.

IGIHE: Tujya tubona ku mbugankoranyambaga ukabona umuntu arahanuye ati ‘ugiye kubona V8, ugiye kubona umugore, ugiye kujya muri Amerika, zana dipolome nzisengere...Kiriya kintu mukivuga ho iki?

Rusengo: Njyewe ariko mbona turi mu gisekuru cyuzuyemo umururumba, abantu barashonje kuko abahanuzi b’iki gihe bahanura ibyo kurya, V8, kujya uri Amerika, ntawe njya numva bamuhanurira ngo aze i Cyangugu kundeba, bahanurira umuntu ngo najye muri Amerika. Iki kintu cyateye mu banyarwanda cyo guhunga mugenda muhunga u Rwanda, mwebwe abato mugenda mujya hehe? Ninde wababwiye ko ibiti by’ahandi byera bisuguti?.

Njyewe mbona ari umururumba abantu barashonje kandi ibyongibyo biterwa nuko abantu badashaka gukora, ngo bashyire hasi amaboko yabo dukore, dukoreshe imbaraga dutungwe n’ibyo twahinze. Ndababwira ngo nimuhave.

Iyo tubicyashye gutyo ariko ntidukuyeho ko Imana ivuga kandi iracyavuga n’abanyarwanda iracyaguna nabo, ahubwo ni ukureba ngo ivuga gute, ivugana na nde?.

IGIHE: Hari ikintu kijyanye n’ibiyobyabwenge n’ubusinzi mu rubyiruko. Wowe icyo kintu urakibona gute?

Rusengo: Iyo abantu bimuye Imana batangira gushaka ibindi bintu byakuzuramo. Kubera ko urubyiruko rw’iki gihe rwimuye Imana, ruranyoterwa.

Ubu rero ikintu nabwira urubyiruko nirwongere rwimike Imana. Hari ibintu bibiri bya ngombwa ku rubyiruko. Icya mbere, ni umuco dukuriyemo, umuco wacu, umuco w’abakurambere bacu, umuco w’ubunyanganyamugayo, wo guha undi muntu agaciro, wo kwirinda guhemuka, umuco wo kubaza abakuru ibyo tutumva.

Ikindi cya kabiri ni uguha Imana agaciro. Tugafata umwanya wo gusenga. Wahura n’ikibazo ugahangana nacyo uko kimeze, cyangwa ukajya kuyoboza abandi utekereza ko bagutanze, ariko ntugombe kwica ubuzima bwawe kubera cya kibazo.

IGIHE: Hari ikindi kibazo cy’inda zitateguwe mu bangavu, ubukene…Ni uruhe ruhare abanyamadini bafite mu guhangana n’ibyo bibazo?

Rusengo: Abanyamadini bafite uruhare runini cyane cyane cyane mu Rwanda rwa nyuma ya Jenoside. Ndabihera nko ku idini ryacu ariko n’andi madini yose bahanganye n’ingaruka za jenoside, ibibazo by’ubuvuzi no kuvurwa, ikibazo cy’ amashuri, ibi byose abanyamadini bahanganye nabo cyane ikibazo cy’ubumwe n’ubwiyunge, urazi ikibazo cyari mu magereza uko cyanganaga ugasanga abantu barimo barakaye, ariko wagiye wumva nk’imiryango Prison Fellowship n’abandi banyamadini bagiye bajya yo kuvuga ubutumwa.

Nubwo bimeze gutyo ariko ibibazo ntabwo bizashira kuko kimwe gishira ikindi kigeze ibagara tuzahora duhanganye nabyo. Ariko impamvu ibyo turi kubibona, ni uko hari ibyavuyeho, turi kubona ibiyobyabwenge kuko nta masasu ari kuvuga, turi kubona abangavu baterwa inda ariko mbere nta n’uwabaga abyitayeho.

IGIHE: Urebye aho u Rwanda rugeze mu myaka 25 ishize, abana bawe urabifuriza u Rwanda rumeze gute?

Rusengo: Abana banjye ndabifuriza u Rwanda rw’umunyarwanda. Niyo mpamvu nkunda cyane iyi gahunda ya Ndi Umunyarwanda. Numva nta munyarwanda ukwiye kurusha undi ubunyarwanda mu Rwanda.

IGIHE: Murakoze.

Rusengo: Murakoze namwe.

Musenyeri Rusengo avuga ko ubuhanuzi bwa V8 n'ibindi by'Isi bushingiye ku mururumba

Amafoto&Video: Mugwiza Olivier


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza