Ubuhamya bwa Makuza Bernard kuri Rusesabagina wamucyuriye ku kuba Umujyanama wa Agatha

Yanditswe na Ishimwe Alain
Kuya 1 Nzeri 2020 saa 12:26
Yasuwe :
0 0

Kuri uyu wa 31 Kanama nibwo Urwego rw’Igihugu rushinzwe Ubugenzacyaha, RIB, rwatangaje ko rwataye muri yombi Paul Rusesabagina, nyuma y’igihe ashyiriweho impapuro mpuzamahanga zisaba ko afatwa kubera ibyaha bitandukanye akurikiranyweho, birimo n’iby’iterabwoba.

Uyu mugabo ukurikiranyweho kuyobora umutwe n’ihuriro ry’imitwe y’iterabwoba yitwara gisirikare igizwe n’abahezanguni, irimo MRCD na PDR-Ihumure, ikorera mu bice bitandukanye mu karere no mu mahanga, yeretswe itangazamakuru mu gitondo cyo kuri uyu wa Mbere.

Uretse ibi byaha, Rusesabagina yamenyekanye cyane muri Filimi ‘Hotel Rwanda’ yamukinweho nk’uwarokoye abantu 1268 muri Hôtel des Mille Collines mu 1994, ituma bamwe batangira kumuhundagazaho ibihembo kugeza kuri ‘Presidential Medal Award of Freedom’, yahawe na Perezida George W. Bush wa Amerika mu Ugushyingo 2005.

Ubutwari buvugwa kuri Rusesabagina muri iyi filimi ntaho buhuriye n’ubuhamya bw’abari barahungiye muri Mille Collines.

Mu kiganiro Makuza Bernard wabaye Minisitiri w’intebe w’u Rwanda na Perezida wa Sena, yahaye Radiyo Rwanda nk’umwe mu bazi neza Rusesabagina kuko yari yarahungiye muri Hoteli ya Mille Collines uyu mugabo yari yarabohoje mu gihe cya Jenoside yakorewe Abatutsi mu 1994, yatangiye avuga uko Rusesabagina yageze muri Hôtel des Mille Collines avuye mu ya Diplomates.

Yagize ati "Navuga ko uriya mugabo ari umuntu uhumurirwa cyane n’ahantu hari amafaranga, akaba ari nabwo buryo yaje muri Mille Collines kuko ubundi yari asanzwe muri Hotel des Diplomates, nyuma aza kubohoza Mille Collines kuko yambuye imfunguzo uwo bari barazisigiye.”

Makuza wabaye Umujyanama mu by’amategeko w’uwahoze ari Minisitiri w’Intebe Agathe Uwiringiyimana, we ubwe ngo yihuriye na Rusesabagina asa n’umucyurira kuri izi nshingano.

Ati "Nari nakubiswe navunaguritse, noneho ambona ntungutse, yari hariya binjirira [muri hotel] bita muri ’Lobby’, arandeba aravuga ati ’ndebera ba conseillers (abajyanama) ba Agata, ngo ‘aba bose n’abandi nibo baduteje ibi bibazo dufite ubungubu.”

Nyuma yo kugera muri iyi hotel, Rusesabagina ngo yatangiye gushyira ku nkeke abari barayihungiyemo abasaba amafaranga, akavuga ko utayabona amusohora akamuta hanze.

Ati “Yashyize ku nkeke rwose twebwe twari tuyirimo, navuga ku kigero cya hafi ya bose kuko yadushyiragaho inkeke atwishyuza amafaranga avuga ko abantu nibatishyura abajugunya hanze, kandi nk’uko mubizi icyo gihe Mille Collines yari ikikijwe na n’ingabo za FAR n’Interahamwe birirwa bajagata, binjira muri Mille Collines, ibyo ngibyo rero nkabibonamo n’ikintu cy’ubugome kuko muby’ukuri abantu bari mu kangaratete, bategereje ko bashobora no kwicwa umunota ku wundi.”

Yakomeje agira ati "Kuri we ntabwo yabifataga nk’ubuhungiro ahubwo yabifataga nk’uburyo agomba kubonamo amafaranaga kuko hari n’abayamuhaye, abari bayafite birumvikana, kuko abantu ntabwo bahungaga bafite amafaranga, ariko n’abatari bayafite bagiye bamusinyira impapuro, ziriya zo kwemera ko uzishyura [...] abantu bari muri ako kaga ukajya kubishyuza, kandi habaho n’icyaha cyo kudatabara umuntu uri mu kaga.”

Makuza avuga ko iri toteza rya Rusesabagina ryakomeje kugeza n’aho abakupira amazi, abantu bagatangira kunywa ayo muri piscine.

Ati “Iyo nkeke rero abantu bayibayemo, haza ibyo gukata amazi abantu bakanywa amazi ya piscine we ari gutekesha, akanywa ya yandi meza yo muri hoteli, abandi badashishikajwe cyane no kurya no kunywa, ahubwo bashobora kwicwa umunota ku wundi.”

Makuza avuga ko ikinyoma n’ubugome bidashobora kurangira gutyo gusa, kuko ugira umunsi umwe wo kubibazwa imbere y’ubutabera, ari nabyo bibaye kuri Rusesabagina.

Rusesabagina yavukiye i Murama ya Gitarama ku wa 15 Kamena 1954, ariko nyuma yagiye gutura i Bruxelles mu Bubiligi na Leta Zunze Ubumwe za Amerika.

Rusesabagina mu bikorwa byo hungabanya umutekano w’u Rwanda

Rusesabagina nyuma yo kugera hanze yaje kujya mu bikorwa bigambije guhungabanya umutekano w’u Rwanda, byanagarutsweho mu rubanza rwa Ingabire Victoire ko yagiranye ibiganiro na Habiyaremye Noël witandukanyije na FDLR, bagamije gushinga umutwe w’ingabo wundi bagamije gutera u Rwanda.

Rusesabagina waje gushinga ishyaka rya PDR/Ihumure rivuga ko rirwanya Leta, ngo yamusabye gushaka abasirikare bo muri FDLR kugira ngo abakangurire kwitandukanya nayo maze bagashinga ingabo z’umutwe wa PDR Ihumure.

Rusesabagina hamwe na PDR Ihumure ye (Party for Democracy in Rwanda- Ihumure), baje kwihuza na RRM (Rwandese Revolutionary Movement) yashinzwe na Nsabimana Callixte ‘Sankara’ na CNRD Ubwiyunge ya Gen Irategeka Wilson, bibyara ihuriro MRCD (Mouvement rwandais pour le Changement démocratique) ryayoborwaga na Paul Rusesabagina nka Perezida, Gen Irategeka aba Visi Perezida wa mbere naho Nsabimana Callixte aba Visi Perezida wa kabiri.

Bashinze umutwe w’ingabo uhuriweho bawita FLN, mu kugabana inshingano Nsabimana yahawe kuba umuvugizi.

Ubu MRCD na FLN bisa n’ibicitse umutwe, kuko mu bikorwa bimaze iminsi byo gushakisha abagamije guhungabanya umutekano w’u Rwanda, Nsabimana Callixte yatawe muri yombi ubu afungiwe mu Rwanda, Gen Irategeka bivugwa ko yaguye mu bitero by’ingabo za FARDC mu mashyamba ya Congo, none na Rusesabagina wari usigaye yafashwe.

Bernard Makuza avuga ko Rusesabagina yaranzwe no guhoza ku nkeke abari barahungiye muri Hôtel des Mille Collines

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .