Ubuhamya ku myitwarire ya Rusesabagina muri Hotel des Mille Collines muri Jenoside

Yanditswe na Bukuru JC
Kuya 4 Nzeri 2020 saa 01:42
Yasuwe :
0 0

Paul Rusesabagina aheruka gutabwa muri yombi n’Urwego rw’Igihugu rw’Ubugenzacyaha, RIB. Ni inkuru yatunguranye ndetse igarukwaho mu bitangazamakuru bitandukanye mu mfuruka zose z’Isi.

Impamvu y’ubwamamare bwa Rusesabagina ishingiye kuri filime Hotel Rwanda yamukinweho mu 2004, yamugaragaje nk’intwari yarokoye Abatutsi basaga 1200 bari bahungiye muri Hotel des Mille Collines, mu gihe ubuhamya bw’abaharokokeye bugaragaza ko yuzuyemo amakabyankuru.

Rusesabagina yatangiye kuyobora Hotel des Mille Collines ku wa 16 Mata 1994, nyuma y’icyumweru Jenoside itangiye. Bivugwa ko yahise yigwizaho ububasha bwose, akakira cyangwa akirukana uwo ashatse.

Amacumbi ngo yayahaye abantu be ba hafi n’abandi bashoboraga kwishyura, abatabishoboye akabasohora, anarenga ku busabe bwa Perezida wa Sabena Hotels yacunganga iyo hotel, wari wasabye ko yakira impunzi zose atazishyuje. Ni icyemezo cyari cyafashwe ku wa 18 Gicurasi 1994.

Paul Rusesabagina yaje kwiyunga mu barwanya Leta y’u Rwanda, anatangira gutera inkunga imitwe igamije kuruhungabanyiriza umutekano.

Uyu mugabo w’imyaka 66 yafashwe akurikiranyweho ibyaha by’iterabwoba, bishingiye ahanini ku mutwe wa FLN wubakiye ku mpuzamashyaka MRCD yari akuriye, byagabwe mu nkengero z’ishyamba rya Nyungwe mu 2018.

Komisiyo y’Igihugu yo Kurwanya Jenoside, CNLG, ivuga ko ibikubiye muri filime yakinwe kuri Rusesabagina ari ibinyoma kuko nta ruhare na ruto yagize mu kurokora Abatutsi bari bahungiye muri Hotel des Mille Collines.

Yifashishije ubuhamya bw’abantu batandukanye bahungiye muri Hotel des Mille Collines mu gihe cya Jenoside bagaruka ku myitwarire ya Rusesabagina ihabanye n’ukuri kw’ibyabaye.

Rusesabagina ashinjwa gukorana na Guverinoma yateguye ikanashyira mu bikorwa umugambi wa Jenoside. Yatangaga amakuru y’iperereza yifashishijwe mu guhiga no kwica urubozo Abatutsi kuva FPR Inkotanyi itangije urugamba rwo kubohora igihugu.

Mu buhamya bw’abarokokeye Jenoside muri Hotel des Mille Collines bagaragaza ko bitumvikana uburyo uwiswe intwari mu kurokora Abatutsi yaje guhinduka umuhakanyi wa Jenoside yakorewe Abatutsi.

Musonera Abias ni umwe mu bazi neza Rusesabagina kuko yamusanze muri hoteli, yatangiye gukoramo mu 1978 ari umutekinisiye.

Yagize ati ‘‘Nzi neza Rusesabagina kuko twakoranye igihe kirekire kandi tuva mu gace kamwe ka Kabagari i Gitwe.’’

Avuga ko Rusesabagina yinjiye muri Hotel des Mille Collines akora kuri reception. Uyu mwanya yawukomerejeho muri Akagera Hotel aza kubona amahirwe yo kujya kwiga muri Kenya.

Yakomeje ati “Mu 1992, Rusesabagina yagizwe Umuyobozi (Manager) muri Hotel des Diplomates, yagiraga abakiliya bake kubera umutekano muke wariho mu gihugu muri icyo gihe. Niho yagumye kugeza muri Jenoside ubwo Guverinoma yayiteguye yakoreshaga hotel nk’icyicaro cyayo.’’

Musonera avuga ko ubwo Guverinoma yanzuraga kwimukira i Gitarama, Rusesabagina yahisemo kujyana na bo ariko anyura muri Hotel des Mille Collines kunywa lisansi nk’uko yari asanzwe abigenza.

Ati ‘‘Yarahansanze meze nk’uwashobewe.’’

Akihagera ngo yasanze Umuholandi Cornelius Bik wayoboraga Hotel des Mille Collines yarahavuye, hoteli nta muntu ifite uyiyobora.

Akomeza ati ‘‘Yashakaga ko mfata ubuyobozi ariko kuko nari Umututsi nari nzi ko bishobora kunzanira ibibazo bikomeye muri icyo gihe. Umuryango wanjye niho wari wihishe kandi nari nizeye ko bafite umutekano. Sinashakaga gufata inshingano zashoboraga kongera kubashyira mu kaga.’’

Musonera yageze muri hotel ku wa 11 Mata 1994. Cornelius Bik ni we wamwoherereje imodoka n’umurinzi wamugejeje we n’umuryango we muri Hotel des Mille Collines.

Ati “Sinzi niba yarabikoze kuko yashakaga serivisi zanjye, kuko nakoraga ibijyanye no gutunganya amashanyarazi n’amazi, cyangwa niba yarabikoze ashaka kundokora. Niba njye n’umuryango wanjye tukiri bazima ni ukubera we [Bik]. Umwana wanjye wa kabiri yavukiye muri hotel.’’

Ubwo Rusesabagina yafataga ubuyobozi mu gihe cy’inzibacyuho, yahawe amabwiriza ko atagomba kwishyuza abantu ibyo kurya n’icumbi.

Ati “Ndabizi kuko nari nabonye inyandiko [Fax] yohererejwe n’icyicaro cya SABENA mu Bubiligi. Ntiyumvaga inama yahawe ndetse yatangiye kwishyuza izo serivisi.’’

Muri icyo gihe, umukire washirirwaga n’amafaranga yatangaga imodoka n’inzu zabo, ndetse benshi biyemeza kuzishyura nyuma ya Jenoside.

Yavuze ko imodoka Rusesabagina yaguze ubwo yageraga mu Bubiligi yazikuye mu mafaranga yakuye mu mpunzi zari muri hotel n’amafaranga yakuye muri Hotel des Diplomates nyuma ya Jenoside.

Undi mutangabuhamya mu bahungiye muri Hotel des Mille Collines ni Vuningoma Alexis wayoboraga igikoni.

Avuga ko bakihagera bahabwaga amafunguro n’icumbi ku buntu, ariko Rusesabagina ahageze birahinduka.

Ati “Rusesabagina akihagera yatubwiye gutangira kwishyuza ibiryo, amacumbi n’izindi serivisi. Hari inshuti ze n’abandi bantu be ba hafi bahabwaga ibintu byose ku buntu. Yaduhaga urutonde rw’abantu tugomba guha byose ku buntu n’abo tugomba kwishyuza.’’

Mu buhamya bwe, avuga ko ababaga badafite amafaranga bakurwaga mu macumbi, bakajya kuryama muri restaurant no ku rubaraza rwa hoteli, ahari harahinduwe aho kurara.

Ati “Hari igihe umwe mu banyamakuru wari muri hotel witwa Thomas Kamilindi, yagerageje kuvugana n’ibitangazamakuru by’i Burayi no muri Amerika abisobanurira ubuzima bwari muri hotel no mu gihugu. Yumvikanye kuri VOA cyangwa BBC. Sinibuka neza. RTLM yarabimenye bituma abanyamakuru bari bahari bahura n’ibibazo. Bashinjaga Rusesabagina gukorana n’impunzi z’Abatutsi zari muri hotel. Byatumye akura telefoni zose ku murongo, asigazaho iyo mu biro bye gusa yakoreshaga avugana n’uwo ashaka.’’

Mbabazi Placide we yasinye na Rusesabagina amasezerano yo kumwishyura umutekano yacungiwe ari muri hotel kuko yabuze amahitamo kandi atifuza gusubizwa aho yari avuye.

Ati “Nasinyanye na Paul Rusesabagina amasezerano y’umwenda w’iminsi yose nagombaga kumara muri hotel ndetse nishyuye umutekano wa 80,000 FRW. Nta yandi mahitamo nari mfite kuko badusabaga kwishyura.’’

-  Hari abo Rusesabagina yitambitse ko bahungira mu mahanga

Mu gihe cya Jenoside, Abatutsi bahungiye muri Hotel des Mille Collines bari bafite amahirwe yo kujya hanze mu gihe habonetse uwishingira ko azabakira nibagerayo.

Abenshi mu babigerageje ntibahiriwe kuko Rusesabagina nk’uwari ikiraro gihuza impande zombi, yitambitse imigambi yabo.

Uwantege Jacqueline na we warokokeye Jenoside muri Hotel des Mille Collines yashimangiye ko ubuyobozi bwa Rusesabagina bwatumye ubuzima bugorana.

Ati “Ubuzima bwaragoranye ubwo Paul Rusesabagina yahageraga kuko yadusabaga kuzuza inyandiko zerekana uko tuzishyura hotel nyuma ya Jenoside.’’

Muri icyo gihe yatangiye kwishyuza amafunguro, ndetse uwabaga adafite ayo kwishyura ibishyimbo n’umuceri ntiyaryaga.

Yakomeje ati “Twashoboraga kwishyura 500 Frw ku mafunguro, ariko tukananirwa gutanga ay’icumbi. Yadusabaga kuzuza inyandiko, tugatanga gihamya ko tuzishyura hotel nyuma. Muri icyo gihe twatanze inzu zacu, nubwo twari tuzi neza ko zasenywe n’abakoraga Jenoside.’’

Mu byo yibuka harimo igihe yangiwe kwitaba telefoni yashoboraga kumuha amahirwe yo gufashwa.

Ati “Twagiye kumureba [Rusesabagina] tumusaba ko yatwemerera gukoresha telefoni. Twashakaga guhamagara umuntu wari i Burayi wari witeguye kutwitaho kuko twari twabwiwe ko uzabona umufasha azafashwa kugenda. Rusesabagina yaraduhakaniye, mu gihe icyo cyari gihamya, cyari amahirwe ya nyuma.’’

Mugabo Justin we mu buhamya bwe avuga ko Rusesabagina atigeze amuha ubufasha ubwo aribwo bwose kuva ageze kuri hoteli, aho yafashijwe n’umuturanyi we wamuvanye aho yari atuye mu Nyakabanda.

Yakomeje ati “Nkihagera nakiriwe n’inshuti zanjye zari zihari, zirimo Mugiraneza Samuel Alias Savimbi, Nyamaswa Eugène Alias Nzovu na Rutaganda Théophile. Twabanaga mu cyumba kimwe cya 115. Nta gikorwa cy’ubumuntu nigeze mbona kuri Rusesabagina cyangwa ngo akoreshe inama yo kuganirirwamo ibibazo bijyanye n’umutekano n’imibereho yacu muri rusange.’’

Avuga ko yahuye na Rusesabagina bwa mbere ubwo yashakaga kohereza Fax ku muvandimwe we wabaga mu Bufaransa.

Ati “Nashakaga kumenyesha umuvandimwe wanjye ko nkiriho kugira ngo anyoherereze ibaruwa ivuga ko azanyitaho. Nashaka kujya hanze y’igihugu kuko ibintu byarushagaho kuzamba. Naramwishyuye na Fax iroherezwa.’’

Mugabo avuga ko mu gihe yamaze muri hotel nta muntu n’umwe wari witaye ku gushaka igisubizo cy’ibibazo bahuraga nabyo.

Ati “Rusesabagina ntakwiye kuvuga ko hari icyo yakoze mu guharanira umutekano w’abari muri hotel. Navuga ko abari muri hotel bumvaga ko ari bazima mu gihe gusa babaga babyutse buri gitondo bakumva baracyahumeka. Byari bigoye kumenya niba uri muzima cyangwa wapfuye. Twongeye kugaruka ib’umuntu ubwo twageraga i Kabuga, ahagenzurwaga na RPF.’’

Abari bahunguye muri Hotel des Mille Collines barokowe n’ingabo za RPF Inkotanyi ku wa 30 Gicurasi 1994, bajyanwa i Kabuga mu Mujyi wa Kigali.

Rusesabagina aregwa ibyaha birimo iterabwoba, gutwika, ubushimusi n’ubwicanyi, byakorewe abaturage b’inzirakarengane, b’Abanyarwanda mu duce dutandukanye tw’u Rwanda turimo Nyabimata mu Karere ka Nyaruguru muri Kamena 2018 no muri Nyungwe mu Karere ka Nyamagabe mu Ukuboza 2018.

Rusesabagina Paul uheruka gutabwa muri yombi yamenyekanye cyane nyuma ya filime yamukinweho, Hotel Rwanda, yamugaragaje nk’intwari yarokoye Abatutsi basaga 1200 bari bahungiye muri Hotel des Mille Collines

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .