Ubuhamya bw’aborozi bumviye inama za leta, umukamo wabo ukikuba kabiri

Yanditswe na Hakizimana Jean Paul
Kuya 16 Ukuboza 2020 saa 09:39
Yasuwe :
0 0

Aborozi bo mu Karere ka Kayonza mu Murenge wa Murundi, baratangaza ko nyuma yo kumvira gahunda za leta zirimo korora inka zibaha umukamo, gutera ubwatsi no kubuhunika mu gihe cy’izuba byabafashije kongera umukamo none bakaba bakataje mu bikorwa by’iterambere.

Ibi babigaragaje nyuma y’igihe kinini muri uyu murenge havugwa umukamo utajyanye n’inka zihabarizwa, aho hari izisaga 25 000 ariko ugasanga umukamo ari muke, bamwe bakavuga ko hari aborora inka bakurikiye ubwinshi bwazo ariko ntizitange umukamo uhagije.

Bamwe mu borozi bamaze kumva gahunda za leta bakorora inka nke zibaha umukamo uhagije babwiye IGIHE ko kuri ubu umukamo babonaga wikubye inshuro nyinshi.

Rutagarama Rachid wororera mu Murenge wa Murundi mu Kagari ka Buhabwa yagize ati “Kuri njyewe nta nubwo nagemuraga amata nk’abandi ariko ubu ndayagemura, mu gihe cy’imvura nakamaga litiro nka 20 nkayanywera mu rugo n’abaturanyi. Kubera kumvira gahunda za leta zo korora inka zitanga umukamo no gutera ubwatsi bwiza ubu ejo bundi mu zuba nagemuraga litilo 40.”

Yakomeje avuga ko kuva aho atangiye kwita ku nka ze bya kinyamwuga kuri ubu amaze kwigurira imodoka yo kugendamo ndetse ngo abana be biga neza nta bibazo byo kubura amafaranga y’ishuri.

Gasasira Thomas we yavuze ko mbere hari imikorere mibi itanoze muri koperative bituma bamwe bagenda biguru ntege, amata bakayagurisha ku ruhande, kuko hari ubwo bayagemuraga ukwezi kwashira bakababwira ko yapfuye cyangwa abashoramari ntibabishyure bakabambura.

Ati “Ubu byarakemutse njyemura litilo 40 nyamara mbere ntibyari byoroshye kugemura na litilo 10, iyo njyemuye litilo 40 mba mfite 8000 Frw ku munsi wakuba n’ukwezi ugasanga ndinjiza ibihumbi 240 Frw kandi ni amata ya mu gitondo gusa mba nagemuye, ayo mafaranga amfasha mu kurihirira abana banjye nkanatunga urugo neza.”

Yakomeje avuga ko kimwe mu byamufashije kugera kuri uyu mukamo harimo kuba yarumviye inama agirwa na leta zo gutera ubwatsi bwiza, korora inka nke ariko zitanga umusaruro kurusha korora nyinshi zidakamwa no kwihuza n’abandi muri koperative akabasha kugemura amata ye ahantu hizewe bamwishyura neza.

Umuyobozi wa Koperative MUFCOS ibarizwamo aborozi bo mu Murenge wa Murundi, Sebudandi Stephano, yavuze ko muri rusange amata bagemuraga yavuye kuri litilo 3000 akagera kuri litilo 8000 nyuma yaho bavugururiye ubuyobozi bwa koperative ndetse n’aborozi bakumvira inama bagirwaga.

Ati “Icya mbere habayeho gahunda yo kwishyura aborozi mu minsi 15 akaba yabonye amafaranga, icya kabiri twazamuye umubare w’amafaranga dutanga kuri litilo, icyo gihe amafaranga batangaga yari 180 Frw none ubu ni 200 Frw, dutangiye guhemba kabiri mu kwezi, tukanagirana amasezerano n’Inyange aborozi batangiye kugira icyizere kuko amata yacu nitwe twayijyaniraga ku Inyange.”

-  Hari ababeshya aborozi ko amata yabo yapfuye bagamije kuyabiba

Sebudandi yakomeje avuga ko kimwe mu bibazo bikigaragara mu bucuruzi bw’amata harimo ba rwiyemezamirimo babeshya aborozi ko amata batanze yapfuye bikanaca intege aborozi.

Yavuze ko mbere bagikorana n’ababaguriraga amata iki kibazo cyakundaga kubabaho bikanatuma bamwe mu borozi bahitamo kwigurishiriza amata ku baturage kuruta kuyazana muri koperative.

Yavuze ko kuri ubu aborozi batangiye guhindura imyumvire aho amata bayabonamo amafaranga, ngo bafite icyizere ko mu mezi make ari imbere bazava kuri litiro 8000 bakagera kuri litiro 12 000.

Kuri ubu koperative ya MUFCOS imaze kwigurira imodoka ya miliyoni 20 Frw ndetse ifite na gahunda yo kugura indi ya miliyoni 66 Frw, bashoboye kwigurira ibicuba nta mworozi ukigemura amata mu ijerekani, banaguze aho kubika amata hafite agaciro ka miliyoni 17 Frw.

Bimwe mu byo umunyamuryango yungukiye muri iyi koperative harimo, icyizere cy’umukamo we, bahabwa imiti y’inka zabo, bahabwa inguzanyo y’ingoboka yamufasha mu bibazo bitunguranye, abanyamuryango bose batangirwa ubwisungane mu kwivuza.

Umurenge wa Murundi ubarizwamo inzuri 1502 zibarizwamo inka zisaga 25 000 aba borozi bakaba bakangurirwa korora inka zitanga umukamo kuruta korora nyinshi zitabaha umusaruro.

Aborozi barishimira bimwe mu bikorwa bamaze kugura birimo n'imashini ibika amata yabo neza mbere yo kuyagemura
Imodoka ikura amata mu Murenge wa Murundi ikayageza ku Inyange
Perezida wa Koperative y'Aborozi bo mu Murenge wa Murundi, Sebudandi Stephano, yavuze ko leta ibafasha mu gutuma babona umukamo mwiza
Aborozi barishimira ko umukamo wabo wikubye inshuro nyinshi kubera kumvira leta
Nubwo benshi batangiye korora inka zitanga umukamo ngo hari n'abandi bacyorora inka nyinshi zitabaha umusaruro

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .