Ubuhamya bw’abahoze ari abasirikare bakuru muri FDLR bari i Mutobo (Video)

Yanditswe na Emma-Marie Umurerwa
Kuya 20 Mutarama 2019 saa 12:30
Yasuwe :
0 0

Abahoze mu mutwe w’iterabwoba wa FDLR mu mashyamba yo muri Repubulika Iharanira Demokarasi ya Congo, bavuga ko bahoranaga inzozi zo gutaha mu Rwanda barwana bagafata igihugu.

Mu banyarwanda basaga 500 bahoze muri FDLR bacyuwe mu mpera z’umwaka wa 2018, bamwe muri bo bahoze mu buyobozi bw’uyu mutwe, dore ko muri iki cyiciro harimo abafite ipeti rya majoro barindwi n’abandi bari bafite amapeti yo hejuru ku buryo bazi neza imigabo n’imigambi by’uyu mutwe.

Major Nkundabose Sébastien, wari ushinzwe kwigisha abasirikare muri FDLR, ubu ni ‘doyen’ mu Kigo cya Mutobo. Avuga ko yacyuwe mu Rwanda nyuma y’imyaka ibiri afungiye muri gereza ya Gisirikare ya Équateur.

Ati “Twamaze imyaka 24 yose turi inyeshyamba tudahembwa dutegereje ko hazabaho ubwumvikane bwa FDLR na Leta hanyuma tugataha tugasaranganya ubutegetsi, ubundi twahoranaga inzozi zo gutaha tugafata igihugu ku ngufu none twazanwe mu Rwanda ku ngufu bamwe batanabishaka. Abatekereza kuzataha barwana nababwira ko babireka intambara ntabwo yubaka ahubwo irasenya.”

Ashima uburyo bagejejwe mu Rwanda bakakirwa neza. Ati “Twageze mu Rwanda batwakira neza mu gihe twebwe tutifuza ko ariho batuzana kuko twumva tuzicwa”.

Ndagijimana Balthazar, mu 1994 yari afite imyaka 19, akaba ari nabwo yagiye mu gisirikare. Yagarutse mu Rwanda afite ubumuga bw’ubuhumyi ubwo yari ku rugamba ngo arwanira gutahuka mu Rwanda.

Ati “FDRL ngo yafata igihugu mbona byaba ari inzozi. Mpereye kuri Gen. Rwarakabije ataha n’ibikoresho twari dufite n’ubwinshi bwacu, ingufu twari dufite n’abitwa ba Mahoro n’abandi benshi byagiye bisenyuka, uyu munsi rero mbona ari inzozi kuvuga ko baza bagafata igihugu.”

Kabarindwi Joseph nawe yahoze ari umurwanyi, yemeza ko gutaha kwa FDLR irwana ari nko kwikirigita igaseka.

Ati “Ku ruhande rwanjye mbona bidashoboka. Nayibayemo imyaka 24 ndayizi bihagije. Bariganirira kuko ntiwaba udafite ibikoresho, udafite ingabo ngo uvuge ngo uzafata igihugu.”

Ndayambaje Deo w’imyaka 57 y’amavuko, akomoka mu Karere ka Nyamasheke. Muri FDLR yari afite ipeti rya lieutenant akaba yari n’umuyobozi w’inkambi ya Kanyabayonga.

Avuga ko kuba baratinze mu mashyamba yo muri Congo byaterwaga no kutagira amakuru ahagije ku gihugu ngo kuko babwirwaga ko u Rwanda rutuwe n’abanyamahanga gusa.

Ati “Amakuru yatugeragaho yacaga abantu benshi intege. Baravugaga ngo umuntu utashye baramwica, uwo batishe bakamufunga, hari n’andi makuru ku bagiye bagira amahirwe yo kuvugana n’imiryango yabo. Barababwiraga ngo ntuzatahe isambu yawe barayigurishije, baragukatiye n’ibindi”.

Abahoze ari abarwanyi mu mitwe yitwaje intwaro by’umwihariko ikorera mu mashyamba ya Congo, bamara amezi atatu bigishwa amateka, amasomo y’uburere mboneragihugu na gahunda za Leta, kwihangira imirimo n’andi masomo azabafasha gusubira mu buzima busanzwe.

Iyo basezerewe kandi buri wese agenerwa 180 Frw mu byiciro bibiri, ku ikubitiro babaha ibihumbi 60 Frw, iyo hashize igihe gito bageze iwabo bamaze kumenya icyo bakora babagenera andi ibihumbi 120 FRW.

Abafite ubumuga butandukanye bubakirwa inzu zo kubamo hari n’abagenerwa inkunga y’amafaranga ya buri kwezi bitewe n’ubumuga bafite.

Bishimira uko bakiriwe mu Kigo cya Mutobo
Kabarindwi Joseph yemeza ko gutaha kwa FDLR igafata igihugu ari inzozi idateze gukabya
Major Nkundabose Sébastien wari ushinzwe kwigisha abasirikare muri FDLR, ubu ni ‘doyen’ mu Kigo cya Mutobo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza