Ubuhamya bukomeye bw’umugore wa Depite Ndahiro bwashavuje abamushyinguye (Video)

Yanditswe na Akayezu Jean de Dieu
Kuya 4 Ugushyingo 2019 saa 08:33
Yasuwe :
0 0

Umugore wa Rtd Capt Ndahiro Logan wari Umudepite mu Nteko Ishinga Amategeko y’u Rwanda, bwagarutse ku bihe banyuranyemo n’inyigisho nyinshi yamukuyeho mu gihe cyose bamaranye ashima Imana yabafashije kuzuza amasezerano bari bafitanye.

Depite Ndahiro Logan wari uherutse kwitaba Imana, yashyinguwe mu cyubahiro kuri iki Cyumweru tariki 3 Ugushyingo 2019. Mu muhango waranzwe no kugaruka ku bwitange n’ubutwari bwamuranze mu buzima bwe yaba ku muryango no ku gihugu muri rusange mu kazi yagiye ashingwa.

Abitabiriye umuhango wo kumusezera barimo abo mu muryango we, abagize Inteko Ishinga Amategeko bakoranaga, Abayobozi mu nzego za leta na Minisitiri muri Perezidansi, Uwizeye Judith, ari nawe wasomye ubutumwa bwa Perezida Kagame bwo kwihanganisha umuryango wa nyakwigendera.

Muri uyu muhango, umugore wa Ndahiro Logan, Kansanga Marie Odette, yashimye Imana yamuhaye umugabo, bagasezerana kubana akaramata kugeza batandukanyijwe n’urupfu.

Kasanga warwaje Ndahiro kuva ku munsi wa mbere, yavuze ko mu rugendo rwabo rw’ubuzima, Imana yamuhereyemo ibyiza byinshi birimo n’urubyaro ariko ko mu bibi harimo na Cancer yamuhitanye.

Ati “Reka manze nshime Imana yampaye umugabo singwe ku ziko, kandi ntimupfushe mbere ngo mbe ruhanga rubi ntarashyingirwa, namukuyeho inyigisho nyinshi kuko twasezeranye kubana mu byiza no mu bibi kugeza dupfuye cyangwa urupfu rudutandukanyije none murabireba rwadutandukanyije.”

Yakomeje avuga ko abishimira Imana yabahaye urubyaro ikabaha kubana neza cyane ikabaha n’umugisha wo kuzuza amasezerano bagiranye imbere y’Imana.

Akomeza agira ati “Ikibi Imana yampanye nawe ni aka kaginga ka cancer, iyi cancer yamugiriye nabi cyane, iramugerageza ku buryo nakunze gusoma Yobi nkavuga nti ese hari umuntu ujya arusha Bibiliya kuvuga ukuri? Wenda ni uko byari bindiho ariko njye ntekereza dushobora kugeragezwa kurenza aha Yobu.”

Turi kumwe kugeza ku munsi wa nyuma

Kansanga yifashishije Ijambo ry’Imana riboneka mu gitabo cya Matayo 25:31 asaba abashakanye kujya bita ku bo bashakanye kuko nta kintu na kimwe Imana ishobora kuzabahembere kiruta kuba hafi y’abo bashakanye mu gihe bari mu byago.

Yavuze ko Ndahiro yarwaye bikomeye, akababara, ku buryo yageze aho atekereza ko hari ubwo bazamuta mu bitaro kuko yabonaga abandi barwaye cancer ababo babata.

Kansanga yavuze kandi ko isezerano we n’abana bari barahaye Ndahiro kandi bakomeje kuririnda rikajya rimwubakamo imbaraga ari uko bahoraga bamubwira ko bari kumwe muri ibi byose.

Ati “Ndahiro yabanje kwibwira ko natwe tuzananirwa, cancer kuri benshi ntabwo ikira, umunsi umwe ndamubwira nti ‘turi kumwe kugeza ku munsi wa nyuma’, tumaze kumubwira gutyo, yagize imbaraga nyinshi.”

Ijambo rya nyuma

Ndahiro kandi yari umuntu wiyeguriye Imana ndetse mbere yo gushyingiranywa na Kansanga, yabaye umunyeshuri we wa Gatigisimu kuko uyu mugore yari umukatejisiti.

Yashimangiye ko Ndahiro yakundaga Imana, agakunda gusenga kandi n’ubwo yageragaho akiheba byageraga nyuma agahindukirira Imana akizera ugutabara kwayo.

Kansanga yavuze ko mu minsi itatu ya nyuma mbere yo kujya muri Coma, yari yarabuze umwuka wo kuvuga, ariko agasaba isosi yashakaga yarangiza asaba ko basenga.

Ati “Iminsi itatu mbere ya coma, atabashaga kugira icyo avuga anywa isupu arambwira ati dusenge, dusoma ‘Umubwiriza [Ahavuga ngo byose ni ubusa, ikiruta ni ukwihambira ku Mana], aratobora aravuga kandi atavugaga, ati ‘Ndabona Imana Mungu mu ijuru yegeranye na Kiliziya’, kuva ubwo kugeza ubu ni ayo magambo yavuze”.

Yakomeje agira ati “Nkibwira ko yabonekewe, yabanje kugira intambara mbere ariko ageze aho abona ageze ahegereye Imana. Imana imuhe iruhuko ridashira.”

Kansanga kandi yashimiye abantu bose bakomeje kuba hafi y’uyu muryango mu buryo butandukanye barimo Umuryango wabo, abo bakoranye n’ubuyobozi bw’igihugu.

Ndahiro na Kansanga bashakanye mu 1995, babyaranye abana barindwi barimo abakobwa babiri n’abahungu batanu [gusa umuhungu umwe yitabye Imana]. Asize umugore n’abana batandatu.

Kansanga Marie Odette, yashimye Imana yamuhaye umugabo, bagasezerana kubana akaramata kugeza batandukanyijwe n’urupfu
Kansanga n'abana be ubwo bavugiraga amasengesho Ndahiro mbere y'uko ashyingurwa
Bamusezeyeho bwa nyuma mu muhango bamuvuze ibigwi ku buryo yari umuntu uharanira kugera ku cyo yiyemeje
Abana ba Ndahiro bavuze ko bagiye kusa ikivi yari yaratangiye

Amafoto: Niyonzima Moise


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .