Ubucakura bwa Mukwege ni nk’ubwa Jussie Smollett

Yanditswe na Musangwa Arthur
Kuya 7 Nzeri 2020 saa 05:52
Yasuwe :
0 0

Kera habayeho koko! Ejo bundi aha ku wa 29 Mutarama umwaka ushize, Isi yacitse igikuba ubwo Jussie Smollett wamenyekanye cyane muri filime y’uruhererekane yakunzwe ya ‘Empire’, yajyaga kuri Polisi avuga ko ahagana saa munani z’urukerera, yasagariwe n’abagabo babiri bakamwiba ndetse bakamukubita.

Buri wese umuzi n’utamuzi yaramwihanganishije, uyu nawe yakira ubwo butumwa bumufata mu mugongo agira ati “urukundo n’ubufasha mwanyeretse bivuze byinshi kuri njye ku buryo ntabona uko mbivuga. Ndi gukorana n’inzego zibishinzwe kandi dufite ibimenyetso 100% kuri buri ngingo”.

Kera kabaye, nyuma y’iminsi 20, ubucakura bwa Jussie bwaje kujya hanze. Polisi yo mu mujyi wa Chicago yavuze ko uyu musore yahimbye amakuru yose agamije ‘kuvugwa cyane’ ndetse no kongererwa umushahara ahembwa muri ‘Empire’ kuko ayo bamuhaga ‘atari ayishimiye’.

Byaje kurangira nabi kuko uyu musore yafunzwe, anirukanwa muri filime yamweretse Isi, na twa duke yaganyiraga tuyoyokera mu maso ye.

Icyashenguye benshi kurushaho, ni uburyo Jussie yakoresheje ibihe Amerika yarimo by’ubwiyongere bw’irondaruhu ryari rikomeje kuzamuka, agashaka kubihuza n’inyungu ze bwite nk’umwirabura, agamije kugirirwa impuhwe no kurushaho kuvugwa cyane.

Iki kintu cyo gushakira inyungu mu byago by’abandi kimaze kuba icyorezo, kuko na hano hirya muri Congo Kinshasa, umuganga Dr. Denis Mukwege yabibonyemo amahirwe, ndetse amwe akomeye yo kurwanira.

Byafashe intera ejo bundi mu kwezi gushize, ubwo Umunyamabanga Mukuru Ushinzwe Uburenganzira bwa Muntu, Michelle Bachelet, yasabaga ko hakorwa iperereza ku birego byavugaga ko ubuzima bwa Mukwege buri mu kaga.

Mukwege yahawe igihembo cy’amahoro muri 2018, ashimirwa uruhare rwe mu gufasha abagore n’abakobwa bafashwe ku ngufu mu burasirazuba bwa Congo Kinshasa, dore ko intambara zihamaze imyaka zitumye benshi mu b’igitsinagore banyura muri ubwo bubabare.

Igitangaje kurushaho, ni uko Mukwege ashinja u Rwanda, by’umwihariko, Gen. James Kabarebe, kuba inyuma y’uwo mugambi wo kumugera amajanja.

Nyamara abakurikiranira ibintu hafi, bahamya ko Mukwege yatewe ubwoba n’ubushake bw’u Rwanda na Congo Kinshasa bwo kurwanya imitwe amagana yitwaje intwaro ikorera aho mu Burasirazuba bwa Congo Kinshasa, ibintu byamubuza umugati kuko muri ayo makimbirane n’intambara, ari ho Dr.Mukwege akura ubwamamare bwe, bityo bidakwiye guhagarara n’ubwo bibangamira abandi.

Uyu mugambi kandi Mukwege awubonamo ikibazo kuko we n’imiryango mpuzamahanga n’itegamiye kuri leta ibeshejweho n’impunzi zirimo n’urubyiruko rw’u Rwanda aho muri Congo Kinshasa, bahomba bikomeye izo mpunzi ziramutse zitashye, igihugu kikagira umutuzo ukwiye.

Biteye isoni kumva ko hari abaronkera ku barashweho n’abafashwe ku ngufu, gusa mu Isi y’ubu biragenda bimenyerwa.

Aka wa mugani w’ibisa bijyana, iyi myitwarire ya Mukwege ntaho itaniye n’iya Jussie Smollett, ntibyagakwiye no kugira uwo bitangaza igihe azasarura ikimwaro no gutamara nk’uko byagendekeye Jussie.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .