00:00:00 IGIHE NETWORK KN KINYARWANDA EN ENGLISH FR FRANCAIS

U Rwanda si njye njyenyine rwaremewe -Paul Kagame

Yanditswe na

Joseph Curio

Kuya 26 May 2013 saa 01:15
Yasuwe :

Repubulika Iharanira Demukarasi ya Congo, u Bufaransa, abatavuga rumwe n’ubutegetsi, imiyoborere, Urukiko Mpuzamahanga Mpanabyaha rw’i La Haye, kuguma cyangwa kuva mu ku bugetetsi kwa Perezida Kagame nyuma y’umwaka wa 2017 ndetse n’ibindi, ni bimwe mu byibanzweho mu kiganiro Perezida Kagame yagiranye n’umunyamakuru François Soudan w’Ikinyamakuru Jeune Afrique muri nimero yacyo ya ya 2732, yo kuwa 19 kugera kuwa 25 Gicurasi 2013, aho yavuze ko u Rwanda atariwe rwaremewe, ubwo yabazwaga ibyo kongera (...)

Repubulika Iharanira Demukarasi ya Congo, u Bufaransa, abatavuga rumwe n’ubutegetsi, imiyoborere, Urukiko Mpuzamahanga Mpanabyaha rw’i La Haye, kuguma cyangwa kuva mu ku bugetetsi kwa Perezida Kagame nyuma y’umwaka wa 2017 ndetse n’ibindi, ni bimwe mu byibanzweho mu kiganiro Perezida Kagame yagiranye n’umunyamakuru François Soudan w’Ikinyamakuru Jeune Afrique muri nimero yacyo ya ya 2732, yo kuwa 19 kugera kuwa 25 Gicurasi 2013, aho yavuze ko u Rwanda atariwe rwaremewe, ubwo yabazwaga ibyo kongera kwiyamamaza nyuma ya manda ya kabiri.

Hari igitabo Perezida Paul Kagame, kuri ubu ufite imyaka 55 y’amavuko, akangurira abashyitsi be gusoma. Nk’uko abyivugira kigaragaza ishusho nyayo y’igihugu ayobora. Rwanda Inc. Ni igitabo cyanditswe n’abagore babiri b’Abanyamerika kigaragaza ibyagezweho muri iki gihugu gito gituwe n’abaturage miliyoni 11 aho “Imiyoborere y’intangarugero”, ituruka ku “Muyobozi ufite icyerekezo”, yagejeje byinshi ku gihugu mu bukungu n’imiyobereho myiza nyuma yo gushegeshwa na Jenoside.

Bamwe wenda bafite ukundi babifata. Usibye kuba yishimirwa n’abaterankunga, ikanasingizwa na bamwe mu bashoramari b’Abanyamerika kenshi usanga bahuza imigendekere myiza y’ubucuruzi n’ibikorwa byiza, ivugwa cyane mu itangazamakuru biturutse kuri Bill Clinton na Tony Blair, inzira u Rwanda rwanyuzemo itangaza buri mushyitsi usuye by’umwihariko iki gihugu cy’imisozi igihumbi.

Ibirego bya Congo

Jeune Afrique: Amezi ashize yarabakomereye cyane kubera ibirego byo kwivanga mu bibazo by’umuturanyi wanyu Congo, ihagarikwa ry’inkunga z’amahanga, raporo z’imiryango itegamiye kuri Leta zibanenga n’ibindi. Ni irihe somo mwakuyemo dore ko inkubi y’umuyaga imaze koroha?

Paul Kagame: Mu by’ukuri ni bike cyane. Si ubwa mbere u Rwanda ruhura n’ibibazo by’abadasobanukirwa ibyo mu Burasirazuba bwa Congo. Nta nubwo ari ubwa mbere inkunga yahabwaga u Rwanda ihagarikwa kubera byo. Aha rero Abanyarwanda bakaba barabashije kumenya guhangana n’ibi bihe bikomeye. Naho ibihano muvuga byafashwe biherewe kuri raporo y’abitwa inzobere z’Umuryango w’Abibumbye, aho u Rwanda rutigeze rubimenyeshwa bakagendera ku binyoma n’ibirego by’abantu batazwi.

Ni byo koko hari aho ibibazo bya Congo bitureba mu rwego rw’uko ari igihugu gicumbikiye hafi imyaka 19 abitwaje intwaro n’abasirikare basize bahekuye u Rwanda muri Jenoside mu 1994, kandi kugeza n’ubu tuvugana batarashirwa ’’kurangiza ako kazi". Ariko ni inshingano za Guverinoma ya Congo n’Umuryango mpuzamahanga gukemura icyo kibazo. Aha rero bisa nk’aho bananiwe, bakizera ko u Rwanda rugomba kwishyura uko kunanirwa kwabo. Ntabwo ibyo tubyemera.

Jeune Afrique: Ni gute mwasobanura ko abantu bake cyane ari bo babizera iyo muhakana kugira uruhare muri Congo?

Paul Kagame: Kubera iki se bahisemo kutatwizera? Ni ryari buri muntu azemera ko ibibazo bya Congo ari ibibazo mu mizi yabyo by’Abanyekongo ubwabo? Ko bifitanye isano n’imiyoborere, ubwenegihugu n’imiterere y’icyo gihugu? Kubera iki abantu bake batwizera, nubwo buri wese azi ko Ingabo z’Umuryango w’Abibumbye, zakagombye gushyigikira kubaka igihugu, bigaragara ko ntacyo zikora? Kubera iki imyaka myinshi ishize isura y’u Rwanda ishingirwa ku kutita ku bimenyetso, ahubwo hakitwabwa ku matangazo ayobya uburari y’imiryango itegamiye kuri Leta agenewe abanyamakuru cyangwa gahunda yateguwe, by’ubunebwe bihora bisubirwamo n’ibitangazamakuru byo mu Burengerazuba bw’Isi?

Ubu ni ubukangurambaga burwanya u Rwanda. Twabibonye ubwo bageragezaga kuduhagarika ngo tudatorerwa kujya mu Kanama k’Umuryango w’Abibumbye gashinzwe umutekano ku Isi. Ubu bukangurambaga bwarananiwe, yego koko, ariko nta gushidikanya mfite; bwiteguye kongera kuduhemukira na none.

Mu by’ukuri, u Rwanda ni ikibazo kubera impamvu ebyiri. Iya mbere ni iy’imyumvire n’amateka. Umuryango w’Abibumbye nti washoboye gukumira cyangwa guhagarika Jenoside yakorewe Abatutsi, ikibi kuruta, ntiwanashoboye gukemura ingaruka zayo. Ubwo rero biyumvamo icyaha cyane. Kugira ngo bacyoroshye, u Rwanda rugomba buri gihe kugira icyo rwegekwaho. Ibi biragaragara, umwe agabanya uburemere bw’icyaha cye mu kwigahararaho.

Impamvu ya kabiri ikora ku isano hagati y’Afurika n’Isi. Na ho ku birebana n’amateka yabyo, u Rwanda ruyoboye urugamba rwo kubahisha no guhesha agaciro Afurika, Afurika yigenga, umugenga w’umuhamagaro n’imitungo byayo. Ibi ntabwo bishimisha buri wese, biragaragara; ’’Reka tubasubize ku murongo’’ ni ko bibwira.

Jeune Afrique:Ugendeye kuri ibyo, mwakiriye ibi birego nk’ibibashotora mwe ubwanyu ku giti cyanyu?

Paul Kagame: Abanyarwanda muri rusange babibona batyo. Ntabwo twishingira ibibazo by’abandi bantu, kandi abo barota kudusibanganya bagomba kumenya ko akarengane katwongerera imbaraga.

Jeune Afrique: Umutwe w’ingabo za Afurika 3,000 woherejwe bishyigikiwe n’Umuryango w’Abibumbye, kugira ngo urangize ibibazo by’inyeshyamba muri Congo. Ese ubu ni umuti nyawo? Amaherezo?

Paul Kagame: Ndumva ibi ntacyo bivuze ariko reka bagerageze. U Rwanda ntirubirwanya, nubwo namaze kumenya neza ko ntacyo bizakemura. Igisubizo kigomba kuba icya politiki kuko ikibazo ari politiki. Ni gute umutwe, ufite indege zitagira abapilote zigenzura byaba umuti wa guverinoma ifite imbaraga nke, ibikorwa remezo, inzego n’ubuyobozi bibabaje abaturage? Ntabwo ari igisubizo nta nubwo ari umuti. Birasekeje gusa!

Jeune Afrique: Muzemera ariko ko bigoye kwemera ko inyeshyamba za M23 zitari kumwe na mwe?

Paul Kagame: Bigoranye kuri bande ? Ku bantu birengagiza ukuri, bagatangaza raporo zibogamye aho kutwumva? M23 ntabwo ari ikibazo cyanjye, ni ikibazo cya Guverinoma ya Congo. Ariko kuki hari uku kwishyiramo M23? Hari indi mitwe y’inyeshyamba muri Congo, biragaraga ko ntawe uyitayeho.

Ihagarikwa ry’inkunga

Jeune Afrique: Ese ihagarikwa ry’inkunga y’amahanga ryabahungabanije?

Paul Kagame: Oya, ntabwo turi ibigwari. Tuzi neza ko kuboneka kw’inkunga biterwa n’ubushake bw’uyitanga cyangwa akayimana kubera impamvu we wenyine azi. Twarabyamaganye, kandi twagize icyo dukora. Kubiburanaho ntacyo bimaze.

Jeune Afrique: Ese izagaruka vuba?

Paul Kagame: Iri kuza gahoro gahoro. Inkunga turayishima, yego, cyane cyane ko tuzi uko tuyikwiye. Ariko kuyikoresha nk’igikoresho cya politiki ni byo twanga. Ibyo duharanira umunsi ku munsi ni ugushyiraho buhoro buhoro uburyo bwo kutwemerera kuyikoresha neza.

Jeune Afrique: Muri aka kanya, 40% by’ibyinjira mu gihugu ni ubufasha bw’amahanga umaze kwita "uburozi". Ni gute umuntu ashobora kwigenga muri ubu buryo?

Paul Kagame: Nibyo, ukwigenga ni inzira iza gahoro hahoro ikomeza. Ku ruhande rumwe, inkunga turayishimiye; ku rundi ruhande abayitanga ntibashaka ko tubaho ntayo dufite. Ni ukwivuguruza tugomba kuzanesha mu gukora cyane, kwiha inshingano no kumva neza inyungu zacu, ndetse n’intego zacu.

Icyo ugomba gusobanukirwa ni iki; nshyigikiye cyane igenzura ry’abaterankunga ku mikoreshereze yazo. Kugenzura ko habaye gusesagura cyangwa ruswa ni gito muri ibyo, kandi nizera ko u Rwanda ari intangarugero.

Dushobora kubara buri dolari dukoresha kandi turabikora. Ariko iyo abaterankunga batangiye kutwigisha no guhitiramo abaturage abo ababayobora bagomba kuba, cyangwa uko ahazaza hazaba hameze, haba hari ikibazo. Impamvu zateye ihagarikwa ry’inkunga ku Rwanda mu 2012 ntaho zihurira n’icyo inkunga yari igamije; ubukungu n’iterambere ry’imibereho.

Impampuro z’agaciro faranga

Jeune Afrique: Impapuro z’agaciro faranga, zashyizwe ku isoko mpuzamahanga muri Mata, ku ikubitiro zashatswe na benshi barenze abari bitezwe, n’ubwo ubukungu bwari bwifashe nabi. Ni gute mwasobanura iyi nsinzi.

Paul Kagame: Ugutorwa k’u Rwanda mu Kanama k’Umutekano k’Umuryango w’Abibumbye nk’umunyamuryango udahoraho, nubwo hari ukwiyamamaza gukomeye byabaye intsinzi ya mbere. Uku kwitabira birenze urugero, hamwe n’Agaciro Fund kazamuwe n’abaturage bacu ubwabo, yari intsinzi ya kabiri. Abashoramari bigenga n’ubukungu bw’Isi badufata uko turi: Igihugu kizewe, kiteguye gukora cyane, noneho ibyingezi mu rwego rw’amabanki. Ntabwo ari rusange hose.

Jeune Afrique: Ni “Umusaruro wa Kagame”, ni ko inshuti yanyu Tony Blair ivuga...

Paul Kagame: Niba hari "umusaruro wa Kagame", ni uko Abanyarwanda bizera Kagame. Kandi niba bamwizeye, ntabwo ari uko ari Kagame, ahubwo ni ibyo bafatanije kugeraho byahinduye ubuzima bwabo.

Ubucuruzi bwa FPR

Jeune Afrique: Ingufu zawe zishingiye ku ishyaka riganje, Rwandan Patriotic Front (RPF), rinagira uruhare runini mu bukungu kuko ingengo y’imari yaryo ingana amagana y’amamiliyoni y’amadolari. Ese birakwiye ko ishyaka ryivanga mu bikorwa bibyara inyungu?

Paul Kagame: Amatora aherutse muri Leta Zunze Ubumwe za Amerika yatwaye miliyari ebyiri z’amadolari ya Amerika $ 2 billion [1.5 billion Euros], yakusanijwe mu baterankunga bikorera. Abizera ko abantu baharanira inyungu bizera ko uwatsinze ari uwakusanije amafaranga menshi. Ibi birakwiye? Mu Burayi, amashyaka n’abakandida bagombera gusaba abaterakunga amafaranga, kugira ngo babashe kubaho. Ese ibi biri mu kuri? Ese muzi neza ko ubu buryo butagena inshingano cyangwa ukwishingikiriza bitandukanye n’umucyo na Demokarasi? Ikibazo cy’isano riri hagati y’amafaranga na politiki ntigishobora gusobanuka nk’ibitekerezo byoroheje, kandi amateka yacu, RPF, arihariye.

Kuva ku munsi wa mbere w’urugamba rwo kwibohora, duha agaciro ko ari ingenzi kwigira mu bukungu. Nta n’umwe, usibye Abanyarwanda barukunda bashobora kuvuga ngo bateye inkunga urugamba. Nyuma y’intambara, twari twiteguye kwigenera igihe cyo kwihaza, twari tuzi ko ububiko bwa Leta bwasahuwe kandi ko inkunga z’amahanga zitari guhita ziza ako kanya. Nko mu myaka ine, ni amafaranga RPF yari yarashyize hanze y’igihugu yakoreshejwe na Guverinoma y’u Rwanda kandi yafashije mu kwita ku barokotse Jenoside no gutumiza iby’ibanze: isukari, umunyu, isabune, lisansi n’ibindi.

Kuva mu myaka 15 ishize, intego y’aya mafaranga yarahindutse. Yashowe mu nzego nk’itumanaho n’ibikorwa remezo mu kureshya abikorera.

Jeune Afrique: Mukumira gute impaka mu masoko ya Leta hagati ya kompanyi zigengwa na RPF n’andi makompanyi?

Paul Kagame: Akenshi, RPF ishora imari mu bikorwa ubusanzwe bidashishikaje abikorera, ariko twizera ko ari iby’ingenzi. Ibisigaye, amakompanyi afitwe n’ishyaka yubahiriza amabwiriza nk’abandi: yishyura imisoro, akorerwa igenzura buri gihe kandi amasoko bapiganira akorwa mu mucyo. Niba atariko bimeze, u Rwanda ntabwo rwari gushyirwa ku mwanya wa kane muri Afurika ku rutonde rwa "Doing Business".

Kurandura ruswa

Jeune Afrique: Mwizera ko mwaranduye ruswa?

Paul Kagame: Mu buryo bwagutse, yego. Abanyarwanda benshi bubatse umuco wo kwiha inshingano byahinduye imyumvire yabo. Uburezi bwagize uruhare rw’ingenzi, ndetse n’ingamba zikakaye twafashe zo kurwanya iki kintu. Aho uri hose, umwanya wose urimo, kudahana ntabwo bibaho mu Rwanda. Muri uru rwego n’ahandi, ubuyobozi bugomba kuba intangarugero.

Ubwiyongere bw’abaturage

Jeune Afrique: Ikindi kibazo ni ubwiyongere bw’abaturage. Hamwe n’abaturage barenga 400 kuri Kilometero kare imwe, u Rwanda rurenda gupfukirana. Ese haba hari umuti?

Paul Kagame: Iki ni ikibazo kandi ni n’amahirwe akomeye. Niba, mu myaka 15, ubwiyongere bw’abaturage bacu bwaravuye ku 10% bukaba 3%, ntabwo twakoresheje agahato, mu by’ukuri katajya kagira icyo gatanga mu muco wacu, ahubwo ni ugukoresha uburezi no kubyumvisha abaturage. Ubutumwa buroroshye: tunga umuryango ungana n’umutungo wawe, byara abana wagaburira, wakwitaho, warihira uburezi. Hafi 70% by’Abanyarwanda bari munsi y’imyaka 30 (…). Niba hari igishoro kinini mu by’ubuzima, akazi n’uburezi, ibi si ibyago, ahubwo ni amahirwe.

Urukiko rwa Arusha

Jeune Afrique: Inshingano z’Urukiko Mpuzamahanga Mpanabyaha Rwashyiriweho u Rwanda ruri Arusha zizarangira vuba. Mubona mute uryo rukiko?

Paul Kagame: Nabi cyane, ndarunenga cyane. Atari nk’urwego gutya gusa, ahubwo kubera umusaruro warwo n’uruhare rwarwo. Numva ntafata umwanya munini mvuga kuri ibi.

Itaha ry’abatavuga rumwe n’ubutegetsi

Jeune Afrique: Amezi make ashize, ubwo mwari mu rugendo i Buruseli, wavuze ko abo mutavuga rumwe bashobora kugaruka mu Rwanda. Ese koko wizera ko Faustin Twagiramungu, Paul Rusesabagina, Emmanuel Habyarimana n’abandi bagufata nk’umunyagitugu, badashobora gushyikirizwa inkiko baramutse bageze i Kigali?

Paul Kagame: Mu by’ukuri narabivuze ko bashobora kugaruka kandi amabwiriza arahari abyemera. Ibisigaye birabareba n’ubucamanza bw’u Rwanda.

Jeune Afrique: Ni ukuvuga ko ubucamanza nibubabonaho amakosa, bazashinjwa nka Victoire Ingabire?

Paul Kagame: Yego rwose. Simbona uko bahabwa ubudahangarwa budasanzwe bwajenjekera ukudahana.

Jeune Afrique: Ese witeguye kumvikana na bo?

Paul Kagame: Kumvikana iki? Ibyo bashaka bikubiye mu ijambo rimwe gusa: Ubutegetsi. Ntabwo nzabaha, niba inzira zemewe n’amategeko zitubahirijwe ngo babubone, ntacyo kumvikana na bo gihari.

Ikurwaho ry’ubuhunzi

Jeune Afrique: Nka nyuma y’Ukwezi, nta buhunzi ku Munyarwanda buzongera kubaho mu mahanga, kubera ko Ishami ry’Umuryango w’Abibumbye ryita ku mpunzi (HCR) ryatangaje irangira ry’ubuhunzi. Bamwe muri bo, bashyigikiwe na Kinshasa ivuga ko nta mutekano n’uburenganzira bazagira mu Rwanda, barwanyije icyo cyemezo, mwe mubitekerezaho iki?

Paul Kagame: Ni gute Guverinoma ya Congo yiyemeza guca imanza ku birera mu Rwanda? Kubera iki iri kuvugira izo mpunzi z’Abanyarwanda? Kinshasa yakagombye kubanza gukubura irembo ryayo, kandi nizera ko bafite byinshi bahugiraho.

Ibisigaye, kurangira ku buhunzi ku Banyarwanda byerekana ko impamvu zatumye abantu bahunga zishaje. Ariko ntawe duhatira gutaha.

Urukiko Mpanabyaha

Jeune Afrique: Ntekereza ko kutishimira kwanyu Urukiko Mpuzamahanga Mpanabyaha bitahindutse?

Paul Kagame: Yego rwose. Uru Rukiko (ICC) ntabwo rutanga ubutabera, ahubwo ni nk’igikoresho gikorera inyungu z’abari hanze ya Afurika bifuza kugenzura Afurika.

Jeune Afrique: Ni ukuvuga wemeranywa na Perezida wa Kenya, Uhuru Kenyatta, usaba Umuryango w’Abibumbye kubuza ICC gukomeza kumukurikirana?

Paul Kagame: Nta gushidikanya. ICC yashatse gusunika amatora ya perezida, ariko ntiyabigeraho. Gutora byari demokarasi, yari inzira nyayo igana ku bwiyunge. Kumukurikirana ntacyo bikimaze.

Umubano w’u Rwanda n’u Bufaransa

Jeune Afrique: Kuva wasura bwa mbere u Bufaransa, muri Nzeri 2011, nta cyahindutse ku mubano w’ibihugu byombi. Ubutwererane bwarahungabanye. Kubera iki?

Paul Kagame: Amateka hagati y’u Rwanda n’u Bufaransa yagize ibintu byinshi bibi, kandi kuba gusa nta makuru avugwa ubu ahubwo ni yo inkuru nziza. Twafunguye ubutwererane na Paris, ariko ibyo ari byo byose, nahitamo ko nta kibaho aho kugira imbogamizi zidashira.

Jeune Afrique: Mwashyigikiye ko u Bufaransa mwivanga muri Mali. Ese yari ikimenyetso muhaye François Hollande?

Paul Kagame: Yari ikimenyetso cyo gushyigikira abaturage ba Mali. Ntabwo twashyigikiye u Bufaransa, bwahoze ari umukoloni gutya. Twashyigikiye igikorwa ubwacyo, kandi tuzanashyigikira igikorwa icyo ari cyo cyose gishobora kurinda ikibi Mali.

Kwiyamamaza nyuma ya manda ya kabiri

Jeune Afrique: Nk’uko Itegeko Nshinga mwiyemeje kubahiriza ribigena, manda yanyu ubu kandi ya nyuma izarangira mu 2017. Ariko na none, urebye ibinyamakuru bibashyigikiye, kwiyamamaza bisa n’ibirimo gukorwa kugira ngo ukomeze ube umukuru w’igihugu. Ese uzahindura ibitekerezo byawe?

Paul Kagame: Icya mbere: nta kintu navuze cyangwa nakoze kugeza ubu cyerekana ko njarajara aho mpagaze. Icya kabiri: ibiganiro mwumva ndabishyigikiye. Ariko kandi umuryango ugikinguye ngo ntange uruhare rwanjye uko bimeze ubu ugomba gufungwa, ni na cyo cyifuzo cyanjye cyangwa ugakingurwa.

Igitekerezo cyanjye mpuriraho n’Abanyarwanda ni uko impinduka ari ngombwa kubera ko ari kimwe mu mbaraga z’imiyoborere twahisemo. Ariko igomba kuzuza amabwiriza abiri: iterambere mu bice byose n’umutekano w’igihugu. Navuga yego cyangwa oya, ibi ni itegeko.

Jeune Afrique: Mu yandi magambo, ku bwawe inyungu z’u Rwanda nizibishaka uzongera wiyamamaze mu 2017?

Paul Kagame: Yaba njye, yaba undi muntu, nta wigeze agera kuri uyu mwanzuro. U Rwanda rwa none sinjye rwaremewe. Gusa mbwira Abanyarwanda nti ’Mubiganireho, mubitekerezeho, mugire ibyo mufata mwita ku nkingi eshatu mbifuriza ‘impinduka, iterambere n’umutekano.’’ Ahasigaye ni ahanyu kureba icyo bahuriyeho.

Jeune Afrique: Dufate ko ubaye umukandida nyuma ya manda yawe, uzi ibizavugwa: Kagame yagundiriye ubutegetsi, Kagame ni umunyamacenga?

Paul Kagame: (…) Kagame azikubira ubutegetsi n’ibindi. Ibyo byose ndabizi. Ni iki gishya kuri ibyo? Nasubiyemo inshuro nyinshi; ntabwo ubutegetsi bwo gutegeka bunshishikaje, imiryango itegamiye kuri Leta ihora isubiramo ibyo bintu kuva ku munsi wa mbere wa manda yanjye ya mbere. Mushaka ko ibyo bitwara iki Abanyarwanda?

Ibivugwa n’ibihugu byo mu Burengerazuba bw’Isi

Jeune Afrique: Wigeze ku vuga umunsi umwe ngo "Nta muntu wo mu Burengerazuba bw’Isi ufite uburenganzira cyangwa ikinyabupfura cyo kugira icyo andega cyangwa Abanyarwanda." Ese ibi ntabwo ari ugusuzugura?

Paul Kagame: Oya. Kandi ibyo mvuga bireba Afurika yose. Mu gihe Abo mu Burengerazuba bw’Isi basa n’abaducira imanza bashingiye ku mabwiriza n’inyungu byabo, mu gihe basa n’abadutegekesha igitugu ku byakagombye kuba ubushake bwacu, niba baha agaciro ko imibereho yabo ariyo yemewe, ibirego byabo nta shingiro bifite.

Fata kimwe muri byo, wenda mu ngirwaraporo nyinshi z’imiryango itegamiye kuri Leta, "Abanyarwanda ntabwo bisanzuye." Ariko ninde ubariza ikibazo Abanyarwanda? Transparency International na Gallup bo baciye mu kuri babikorera i Kigali. Igisubizo: 90% by’abasubije. Ese hari umuntu ushobora kwiringira inzego kandi hari igitugu? Aha ndahashidikanya. Ni gute umuntu yatsimbarara ko igihugu cya gatatu muri Afurika ku bipimo by’ubwisanzure mu bukungu mu kinyamakuru The Wall Street kandi ugasanga ari kimwe muri bike kuri uwo mugabane aho ubwiyongere bujyana n’igabanuka ry’ubukene –Abanyarwanda miliyoni n’igice bakuwe mu bukene mu myaka 6 ishize. Ese iki ni igihugu kitisanzuye?

Jeune Afrique: Uku kunenga ntabwo kubwirwa Abanyarwanda. Ahubwo ni wowe utungwa agatoki. Umukuru w’igihugu ni gake abivugaho cyangwa ibintu bikakaye.

Paul Kagame: Ibyo ntibimbuza kubaho, nta n’icyo bizahindura ku munsi wanjye wo gupfa. Niba mushaka no kubimenya, nijoro ndaryama ngasinzira neza.

Ni inkuru ya Jeune Afrique yashyizwe mu Kinyarwanda na Joseph Curio


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .