00:00:00 IGIHE NETWORK KN KINYARWANDA EN ENGLISH FR FRANCAIS

U Rwanda rwungutse undi muyoboro munini uzakira amashanyarazi y’Urugomero rwa Rusumo

Yanditswe na IGIHE
Kuya 8 Mutarama 2023 saa 10:47
Yasuwe :

Mu gihe imirimo yo kubaka Urugomero rwa Rusumo irimbanyije ni na ko imyiteguro y’uburyo amashanyarazi ruzatanga azagezwa mu muyoboro rusange agakwirakwizwa mu gihugu ikomeje.

Sosiyete y’u Rwanda Ishinzwe Ingufu (REG) yatangaje ko kuri uyu wa Gatandatu, tariki ya 7 Mutarama 2023, umuyoboro mushya uzakira amashanyarazi y’uru ruganda ukayageza mu wa rusange wuzuye ndetse ushyirwamo umuriro.

Uyu muyoboro munini (high voltage) ureshya n’ibilometero 117 uturuka ku Rusumo ukanyura kuri Sitasiyo ya Bugesera izifashishwa mu guha amashanyarazi Ikibuga cy’Indege cya Bugesera ugakomereza kuri Sitasiyo ya Shango iherereye mu Karere ka Gasabo. Umushinga wo kuwubaka ukaba waratwaye miliyoni zisaga 21 z’amadolari ya Amerika.

Uyu muyoboro uje wiyongera ku yindi igera ku bilometero 973.14 isanzwe mu Rwanda ivana amashanyarazi ku nganda z’amashanyarazi zigera kuri 49 ziri mu Rwanda. Wubatswe na sosiyete ebyiri ari zo “Sterling and Wilson Pvt. Ltd.” na “ELECTROMONTAJ SA.”

Urugomero rwa Rusumo ruri hafi kuzura ruzatanga amashanyarazi angana na megawati 80 zizasarangwa mu bihugu biruhuriyeho ari byo Tanzania, u Burundi n’u Rwanda.

Uko u Rwanda rurimo kwitegura kwakira aya mashanyarazi, ni na ko n’u Burundi na Tanzania na byo birimo kubaka iyi miyoboro, ku buryo ubwo ruzaba rwuzuye, ibi bihugu na byo bizabasha kwakira amashanyarazi ruzatanga.
Nk’uko bigaragara ku rubuga rwa REG, ubu amashanyarazi aboneka mu Rwanda angana na megawati 276 aturuka ku nganda zitandukanye zirimo ingomero z’amazi, izikoresha gaz methane na nyiramugengeri n’iz’imirasire y’izuba.

Bivuze ko uru rugomero rwa Rusumo nirwuzura, u Rwanda ruzaba ruteye intambwe mu kongera amashanyarazi yarwo ho megawati zigera kuri 26.7.

Uretse urugomero rwa Rusumo kandi Uruganda rwa gaz methane rwa Shema Power Lake Kivu ruri i Rubavu narwo byitezwe ko ruzuzura mu gihe cya vuba narwo rugatangira gutanga amashanyarazi.

Imibare igaragaza ko ubu mu Rwanda ingo zirenga miliyoni ebyiri zifite amashanyarazi, yaba afatiye ku muyoboro rusange ndetse n’atawufatiyeho.

Byitezwe ko bitarenze umwaka utaha wa 2024, nta rugo mu Rwanda ruzaba rudafite amashanyarazi.

U Rwanda rwungutse undi muyoboro munini uzakira amashanyarazi y’Urugomero rwa Rusumo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .