00:00:00 IGIHE NETWORK KN KINYARWANDA EN ENGLISH FR FRANCAIS

U Rwanda rwungutse inyubako itunganyirizwamo imbuto n’imboga byoherezwa mu mahanga

Yanditswe na Uwabeza Hussein
Kuya 13 September 2022 saa 11:47
Yasuwe :

Ikigo Garden Fresh, Ltd gisanzwe cyohereza ibikomoka ku buhinzi byo mu Rwanda hanze cyungutse inyubako nshya itunganyirizwamo umusaruro ukomoka ku buhinzi mbere yo kujyanwa ku masoko mpuzamahanga.

Iyi nyubako yubatswe mu cyanya cyahariwe inganda i Masoro ku buso bwa metero kare 600, ifite ubushobozi bwo kwakira hagati ya toni 25 na 30 ikaba yaratwaye asaga hafi miliyoni 1$.

Iyi nyubako yafunguwe ku mugaragaro na Ambasaderi w’u Buholandi mu Rwanda, Matthijs Wolters.

Faustin Mbundu uyobora Garden Fresh, Ltd, avuga ko iyi nyubako ije gufasha abohereza ibikomoka ku buhinzi hanze cyane cyane imbuto n’imboga.

Ati “umusaruro uva mu bahinzi urimo kwiyongera […] kugeza ubu inzu nk’iyi itunganyirizwamo ibikomoka ku buhinzi byoherezwa mu mahanga iri ku rwego mpuzamahanga yari imwe gusa ya NAEB, kandi leta n’abandi bafatanyabikorwa barimo gukora uko bashoboye ngo batwagurire isoko. Kugira ngo ubuziranenge bw’ibyoherezwa mu mahanga bukomeze kuba nta makemwa rero hakenewe inzu ziri ku rwego mpuzamahanga nk’izi.”

Iyi nyubako yubatswe ku nkunga ya Ambasade y’u Buholandi ibinyujije mu mushinga wa HortInvest. Byitezwe ko izafasha kongera ingano y’ibikomoka ku buhinzi byoherezwa hanze kuko itazakorerwamo gusa na Garden Fresh, Ltd, ahubwo ko n’abandi bohereza ibikomoka ku buhinzi mu mahanga bashobora kuyifashisha.

GB Banjara uhagarariye umushinga HortInvest avuga ko uretse gutera inkunga ibikorwa nk’ibi ngo banafatanya n’abahinzi, bakabigisha gukora ubuhinzi bwa kijyambere kugira ngo umusaruro uboneka ube ufite ubuziranenge buri ku rwego mpuzamahanga.

Avuga ko ibyoherezwa mu mahanga nko mu Burayi na Aziya biba bikwiye kwitabwaho cyane cyane ku buryo bifunze. Ati “ntabwo wakohereza hanze ibintu bidafunze neza.”

Banjara avuga ko ahanini bo icyo bakora aba ari ugutanga urugero kugira ngo n’abandi barebereho hanyuma bavugurure imikorere haba mu buhinzi ndetse no mu buryo umusaruro ugezwa ku masoko.

Nirere Sylvie uhagarariye umuryango utegamiye kuri Leta idh mu Rwanda avuga ko kugira ububiko nk’ubu bifasha mu gutuma umusaruro uvuye mu murima ugera ku isoko ugifite umwimerere ku buryo uhaza ibyifuzo by’umuguzi.

Ubuhinzi ni umwe mu mirimo yinjiriza igihugu amadevize cyane ko mu mwaka ushize wa 2021/2022, u Rwanda rwinjije miliyari zirenga 640Frw avuye mu byoherejwe mu mahanga bikomoka ku buhinzi.

Kuva muri Nyakanga 2021 kugeza muri Kamena 2022, ibikomoka ku buhinzi byoherejwe mu mahanga byinjije 640,952,297 y’amadolari, ni ukuvuga miliyari zirenga 640Frw. Ni inyongera ya 45% ugereranyije n’ayinjiye mu 2020/2021 aho hari hinjiye 444,862,192 y’amadolari.

Ugereranyije n’umwaka wa 2020/2021, imboga n’imbuto zifite uruhare rwa 6.7% by’ayinjijwe yose n’ibikomoka ku buhinzi n’ubworozi. Ayinjijwe n’imboga yiyongereyeho 63% naho ayinjijwe n’imbuto yiyongereyeho 87%.

Ambasaderi w’u Buholandi mu Rwanda, Matthijs Wolters afungura ku mugaragaro iyi nzu itunganyirizwamo imbuto n’imboga byoherezwa mu mahanga
Iyi nzu izajya ikorerwamo imirimo yo gutunganyirizwamo imboga n'imbuto byoherezwa mu mahanga
Ibikomoka ku buhinzi byoherezwa mu mahanga bikomeje kwiyongera
Faustin Mbundu uyobora Garden Fresh, Ltd, avuga ko iyi nyubako ije gufasha abohereza ibikomoka ku buhinzi hanze cyane cyane imbuto n’imboga
Hafashwe ifoto y'urwibutso nyuma yo gufungura iyi nzu

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .