00:00:00 IGIHE NETWORK KN KINYARWANDA EN ENGLISH FR FRANCAIS

U Rwanda rwumviswe nabi igihe kirekire - Umuvugizi wa Guverinoma avuga ku kwakira Abimukira bo mu Bwongereza

Yanditswe na Akayezu Jean de Dieu
Kuya 3 June 2022 saa 10:43
Yasuwe :

Guverinoma y’u Rwanda yatangaje ko muri uku kwezi kwa Kamena 2022, Abimukira ba mbere bazaturuka mu Bwongereza bazaba bageze i Kigali bagahita bajyanwa aho bateguriwe.

Ni ibyatangajwe n’Umuvugizi wa Guverinoma, Yolande Makolo, wavuze ko bazatangira kugera mu Rwanda mu byumweru biri imbere.

Amasezerano agenga aba bimukira bagiye kugezwa i Kigali yasinyuwe ku wa 14 Mata 2022, hagati ya Leta y’u Rwanda n’iy’u Bwongereza.

Bazajya bazanwa mu Rwanda, ababishaka bahitemo gusubira mu bihugu byabo mu gihe abagaragaza ubushake bwo kurugumamo bafashwa kuhakomereza ubuzima.

Azamara imyaka itanu ariko ashobora kongerwa n’ubwo hadatangazwa umubare w’abimukira bazazanwa mu Rwanda ariko babarirwa mu bihumbi nk’uko byatangajwe n’impande zombi.

Umuvugizi wa Guverinoma y’u Rwanda, Yolande Makolo, yavuze ko u Rwanda rusanzwe rufite impunzi nyinshi zirimo iz’Abanye-Congo, Abarundi n’abandi baturuka mu bihugu byaba ibyo mu Karere ka Afurika y’Iburasirazuba no hirya no hino ku Isi.

Mu kiganiro na Royal FM yagize ati “Abanyarwanda benshi barabizi ko igihugu gicumbikiye impunzi nyinshi, zirenga ibihumbi 130 hari n’abahamaze imyaka irenga 25, Abanye-Congo bari hano kuva mu myaka ya 1990, dufite n’impunzi z’Abarundi za vuba aha kuva mu 2015. Bose baba mu Nkambi z’Impunzi n’ahandi.”

Makolo yavuze ko ibibazo by’impunzi n’abimukira muri Afurika bimaze igihe ariko hari igihe cyageze bigaragara ko bikomeje kuba umutwaro ukomeye kuri Afurika by’umwihariko abavaga kuri uyu mugabane bajya gushakira ibyo badafite i Burayi.

Mu 2017 nibwo Guverinoma y’u Rwanda yemeye gufasha mu gusubiza iwabo no kwakira bamwe mu bimukira baheze muri Libya, aho hari abagenda bahura n’akaga ko gucuruzwa mu bisa n’icyamunara.

Makolo avuga ko kwakira abimukira bo mu Bwongereza atari bishya kuko byatangiye icyo gihe ubwo Perezida Kagame yiyemezaga gufasha Afurika Yunze Ubumwe mu gushakira igisubizo abo bimukira babaga bari gukorerwa ibikorwa bigayitse muri izo nkambi zo muri Libya.

Yavuze ko aba baturage ba Afurika babaga bashaka ubuhunzi i Burayi bagiye bashyirwa muri izo nkambi zo muri Libya bagakorerwa iyicarubozo, abandi bakarohama mu Nyanjya ya Méditerranée.

Makolo yavuze ko aba bimukira bazanywe mu Rwanda, bagahabwa aho kuba, bakitabwaho, bakigishwa, bakagira imibereho myiza kandi ari ibintu bikomeje kuko no mu minsi ishize hari abandi 92 bagejejwe mu Rwanda.

Ati “Muri bo hari abagiye bafashwa koherezwa mu bihugu byifuje kubakira birimo Canada n’ahandi. Ibi byarakozwe kandi neza, twatanze umusanzu mu kurokora ubuzima bwabo ari nabyo biri ikibazo kuri bamwe.”

Yakomeje agira ati “Ibitavugwaho rumwe ni ukuntu Abanyafurika barimo kurohama mu Nyanjya ya Méditerranée, bashaka kujya i Burayi kureba amahirwe y’akazi n’indi mibereho. Ibi nibyo byagakwiye kuba bishengura abantu, nibyo bikwiye kuba bituma bagira ubushake bwo gushaka ibisubizo.”

Makolo yavuze ko hari byinshi n’abagerageje kwambuka iyo Nyanja baba batazi uko bazabaho bageze muri ibyo bihugu by’i Burayi ari naho usanga hari abagerayo bagakoreshwa ubucakara n’ibindi bikorwa birimo gucuruzwa.

Ati “Kuki tudashobora gushyiraho uburyo ayo mahirwe bajya gushaka muri biriya bihugu byo hakurya ya Méditerranée, bakayabona hano, atari mu Rwanda gusa ahubwo no mu bindi bihugu bya Afurika? Ku buryo Umunyafurika uba mu gihugu runaka ashobora kujya mu kindi gihugu ashaka, agakora akiteza imbere nta nkomyi.”

Yakomeje agira ati “Ibi nibyo Isoko Rusange rya Afurika ryashyiriweho, niyo mpamvu u Rwanda rwashyizeho uburyo bwo korohereza abashaka viza, gufungura ikirere cyarwo kugira ngo abantu bashake gukora urujya n’uruza nta nkomyi. Iyi niyo Afurika twifuza kubona.”

U Rwanda rwumviswe nabi kuva cyera

Kuva muri Mata 2022, ubwo byatangiraga kuvugwa ko u Rwanda rwagiranye amasezerano n’u Bwongereza ku kwakira abimukira bagiye bagera muri icyo gihugu mu buryo bunyuranyije n’amategeko, hari benshi batabyakiriye neza.

Abatarabyakiriye neza bagenda bagaragaza impamvu zitandukanye, gusa Guverinoma y’u Rwanda igatangaza ko impamvu nyamukuru yo kwakira aba bimukira ari ugukomeza gushaka ibisubizo by’iki kibazo gikomeje kuba umutwaro kuri Afurika n’Isi muri rusange.
Makolo yavuze ko ku bakomeje kwibaza ku masezerano y’u Bwongereza n’u Rwanda bakwiye gutekereza kuri ibyo bibazo byose bakumva ko u Rwanda rugamije gufasha mu gushaka ibisubizo.

Ati “Ni urugero rw’ibisubizo by’ibibazo byacu. Afurika ikunze gufatwa nk’isoko y’ibibazo ariko ntabwo dushobora kuba isoko y’ibisubizo? Kubera iki tutaba abashaka ibisubizo ku bibazo byugarije Isi? Kandi Abimukira ntabwo bakwiye kuba ikibazo ku Isi kuko bafite byinshi bagiramo uruhare, muzi amateka y’Isi, ibihugu bikize byubatswe n’Abimukira.”

Makolo yavuze ko hari benshi bumvise nabi amasezerano yo kwakira Abimukira bo mu Bwongereza, ariko u Rwanda ruzakomeza kubasobanurira ababishaka bakabasha kubyumva.

Ati “Twumviswe nabi, ni byiza. Icyo dukora ni ugusobanura kuri abo bashaka kumva ibyo tuvuga no kumva impamvu n’uburyo dukoramo ibintu. Duhora twiteguye kubasobanurira kandi mu myaka 30 ishize byakomeje kuba ingorabahizi gusobanura u Rwanda rushya.”

Yakomeje agira ati “Abenshi barabyumva ariko icy’ingenzi ni uko Abanyarwanda babyumva kandi nibo bubatse iki gihugu kandi twishimiye gusobanurira abantu. Abazabyumva ni byiza, abafite amatsiko cyangwa abashaka kumva, turi hano ngo tubasobanurire.”

Makolo yasobanuye ko kuri iki kibazo cy’Abimukira hari benshi bibaza ku bijyanye n’ubushobozi bwo kubitaho cyangwa ibindi byose bizakoreshwa kuri aba Bimukira ariko amasezerano abisobanura neza kuko u Bwongereza aribwo buzatanga byose bizakoreshwa kuri aba Bimukira.

Ashimangira ko u Rwanda narwo rubifitemo inyungu nyinshi kandi uretse kuba aba bantu bazaba bari mu Rwanda, ari amaboko n’imbaraga kuko harimo abafite ubumenyi bashobora kuzana mu gihugu ariko hari n’ibikorwaremezo bizabubakirwa kandi bigasigara ari iby’u Rwanda.

Ati “Ayo mafaranga azashyirwa mu iterambere ry’u Rwanda, ibyo Guverinoma iri gukora mu kuzamura ireme ry’uburezi, kubaka ibikorwaremezo, kuzamura ireme ry’amahugurwa muri rusange ku banyarwanda, ibyo bizashyigikirwa n’ayo mafaranga.”

Yakomeje agira ati “Ibyo rero bizagirira inyungu Abanyarwanda n’abo Bimukira. Kuko dushaka ko abaturage bacu babaho neza, bagira ibikorwaremezo byiza, amashuri meza, inyubako nziza n’ibindi.”

Ku ikubitiro, u Bwongereza bwahaye u Rwanda miliyoni 120£ azagirira akamaro izo mpunzi n’Abanyarwanda binyuze mu bikorwa by’uburezi mu mashuri yisumbuye, ay’imyuga n’andi mahugurwa mu masomo y’ubumenyingiro. Ibyo byiyongeraho ko bazafashwa kwiga kugera mu mashuri makuru na kaminuza.

Umuvugizi wa Guverinoma y'u Rwanda, Yolande Makolo, yatangaje ko u Rwanda ruhora rwiteguye gusobanurira abashaka kumva ibyo rukora n'uko rubikora

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .