U Rwanda rwiteguye gufatanya n’u Bwongereza mu kugeza mu butabera batanu bakekwaho Jenoside

Yanditswe na HABIMANA James
Kuya 24 Mata 2019 saa 05:01
Yasuwe :
0 0

Umushinjacyaha Mukuru w’u Rwanda Jean Bosco Mutangana yatangaje ko u Rwanda rwiteguye gufasha u Bwongereza kugira ngo bugeze mu butabera abanyarwanda batanu bahahungiye bakekwaho uruhare muri Jenoside yakorewe Abatutsi.

Imyaka 11 irashize icyemezo cyo kugeza mu butabera aba banyarwanda gisubitswe. Abo barimo Dr Vincent Bajinya, Célestin Ugirashebuja, Charles Munyaneza, Emmanuel Nteziryayo na Célèstin Mutabaruka.

U Rwanda muri Mutarama 2018 rwatanze izindi mpapuro zita muri yombi abo bagabo. Polisi y’u Bwongereza yasubukuye iperereza ku birego by’abo bagabo.

Umushinjacyaha Mukuru Mutangana yabwiye The Newtimes ko u Rwanda rwiteguye gutanga ubufasha bwose kugira ngo ubutabera butangwe.

Yagize ati “Ubu iki kibazo kiri mu maboko y’abacamanza b’u Bwongereza. Njye niteguye gufasha ubushake bwabo bwo kugeza mu butabera aba bantu bakekwaho Jenoside n’abandi bari ku butaka bwabo."

Yakomeje agira ati “Ubushinjacyaha bw’u Rwanda bwiyemeje kandi bwiteguye gufatanya n’ubutegetsi bw’u Bwongereza ku mahitamo bafite, ndatekereza ko iki gihugu kizi iki kibazo mu myaka irenga 10 ishize kuva aho iki kirego kigerejwe mu rukiko rwa Westminster no mu Rukiko Rukuru.”

Tariki 9 Mata uyu mwaka, Depite Andrew Mitchell yasabye Leta y’ u Bwongereza kuza imbere y’abagize Inteko Ishinga Amategeko gutanga ibisobanuro ku bijyanye n’aba bagabo batanu bakekwaho uruhare muri Jenoside.

Mu gihe cyatambutse Urukiko Rukuru rw’u Bwongereza rwatangaje ko aba bagabo baramutse bazanywe mu Rwanda hatizewe ko babona ubutabera bwiza.

Andrew Mitchell wanitabiriye ku nshuro ya 25 kwibuka Jenoside yakorewe Abatutsi, yabwiye abagize Inteko Ishinga Amategeko y’u Bwongereza ko bibabaje kuba icyo gihugu kigenda biguru ntege mu kuburanisha cyangwa kohereza abo bagabo.

Yagize ati “Ikibabaje ni uko hejuru y’ibimenyetso byose biri hano Polisi yavuze ko bizayitwara indi myaka 10 kugira ngo bikorwe. Roho z’abishwe muri Jenoside zikomeje gushaka ko zabona ubutabera ariko mu Bwongereza bakomeje gutinza ubutabera.”

Ben Wallace ukora mu biro bya Minisitiri w’Intebe w’u Bwongereza yavuze ko atemeranya na Mitchell ku kuvuga ko u Bwongereza butita ku kibazo cy’abo bantu batanu.

Yavuze ko nta byinshi yavuga kuri iki kibazo kuko Polisi ikiri mu iperereza.
U Rwanda rwakunze gusaba u Bwongereza ko aba bagabo bagezwa mu butabera niba kubazana mu Rwanda bidashoboka.

Ingingo mpuzamahanga ihana icyaha cya Jenoside yo mu 1948 ivuga ko ibihugu bigomba kohereza iwabo ababihungiyemo bakekwaho Jenoside cyangwa bikaba byababuranisha.

Umushinjacyaha Mukuru w'u Rwanda Jean Bosco Mutangana yavuze ko u Rwanda rwiteguye gufasha u Bwongereza kuburanisha abakekwaho Jenoside bahahungiye

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza