00:00:00 IGIHE NETWORK KN KINYARWANDA EN ENGLISH FR FRANCAIS

U Rwanda rwamaganye abarushinja gushyigikira M23, bakihunza umuzi w’ikibazo

Yanditswe na Iradukunda Serge
Kuya 21 Ukuboza 2022 saa 06:57
Yasuwe :

Guverinoma y’u Rwanda yamaganiye kure abakomeje kuyishinja gushyigikira umutwe wa M23 uhanganye n’ubutegetsi bwa Repubulika Iharanira Demokarasi ya Congo, ivuga ko ibiri gukorwa ari ugushakira umuti w’ikibazo aho kitari.

Ku mugoroba wo kuri uyu wa Kabiri tariki 21 Ukuboza 2022 nibwo Guverinoma yasohoye itangazo ivuga ko "gushinja u Rwanda gushyigikira umutwe wa M23 ni ukwibeshya no kwirengagiza impamvu nyamukuru ikomeje gutera amakimbirane mu burasirazuba bwa RDC n’ingaruka zayo ku bihugu by’ibituranyi birimo n’u Rwanda".

U Rwanda rutangaje ibi mu gihe ibihugu bitandukanye birimo Leta Zunze Ubumwe za Amerika ’u Bufaransa, bikomeje kurushinja kuba rushyigikiye M23, ivuga ko irwanira uburenganzira bw’abaturage bo mu burasirazuba bwa RDC bakomeje guhohoterwa.

Ni ibirego byongeye kumvikana nyuma y’aho uyu mutwe wubuye imirwano kuko amasezerano wagiye ugirana na Leta ya Repubulika Iharanira Demokarasi ya Congo atigeze yubahirizwa.

Iri tangazo ryashyizwe hanze n’u Rwanda rivuga ko "Ibi birego by’amahanga bimaze imyaka bibangamira imbaraga abayobozi b’akarere bari gushyira mu gushaka amahoro arambye muri RDC, by’umwihariko ibijyanye n’ibiganiro bya Nairobi na Luanda."

U Rwanda rwakomeje rugaragaza ko kimwe n’ibindi bihugu, rufite uburenganzira bwo kubungabunga ubusugire, imbibi zarwo ndetse n’abaturage bose, nubwo kenshi ibi byagiye birengwaho n’abasirikare ba Congo bafatanyije na FDLR kandi amahanga abireba ariko agahitamo guceceka.

Iri tangazo rikomeza rigira riti "Mu myaka yashize ubusugire bw’u Rwanda bwagiye buhonyorwa n’ingabo za RDC ndetse n’abarwanyi ba FDLR binyuze mu bikorwa birimo igitero cyagabwe mu Kinigi (agace k’ubukerarugendo kari mu majyaruguru) mu Ukwakira 2019, kigahitana abaturage 14 b’inzirakarengane."

"Hari kandi ibisasu byarashwe ku butaka bw’u Rwanda mu ntangiriro z’uyu mwaka, gushimuta abasirikare b’u Rwanda bikozwe n’abasirikare ba RDC ndetse mu Ugushyingo habayeho no kuvogera ikirere cy’u Rwanda bikozwe n’indege y’intambara ya Congo.”

Hari ibirenzwa ingohe

Kimwe mu bikorwa u Rwanda rwagaragaje nk’ibidahabwa agaciro n’amahanga ni ubufatanye bukomeje kwigaragaza hagati y’ingabo za RDC na FDLR, yiganjemo abagize uruhare muri Jenoside yakorewe Abatutsi.

U Rwanda ruvuga ko "Nta muntu n’umwe wigeze aryoza Guverinoma ya RDC kuba yarananiwe guhangana n’imitwe 130 yitwaje intwaro ikorera ku butaka bw’iki gihugu cyangwa ngo babazwe ibijyanye n’ibyaha bikomeje kwibasira abasivile bikozwe n’ingabo za RDC ku bufatanye n’indi mitwe irimo na FDLR, yasize ikoze Jenoside ariko ikaba ikomeje gukingirwa ikibaba na RDC."

Rwavuze ko "bibabaje kuba abayobozi ba RDC barahawe rugari ngo bakomeze gukwirakwiza imvugo zibiba urwango ku baturage b’iki gihugu bavuga Ikinyarwanda ndetse n’Abatutsi, nk’uko byagiye bigaragazwa na raporo za Loni, iz’imiryango yo mu karere na mpuzamahanga."

Kimwe mu byagakwiriye kuba bikorwa u Rwanda rwagaragaje harimo gushaka uko impunzi z’Abanye-Congo zirenga ibihumbi 80 zimaze imyaka irenga 20 ku butaka bwarwo zataha mu mahoro, aho kumara imyaka y’ubuzima bwazo mu nkambi.

Hari icyo rwavuze ku bwicanyi bwabereye i Kishishe

Kimwe mu bimaze iminsi bigarukwaho ni ubwicanyi bwabereye ahitwa Kishishe, Leta ya Kinshasa ikaza kubugereka kuri M23.

RDC ivuga ko M23 ariyo yishe abo baturage kuko ariyo imaze igihe ihagenzura, igasaba imiryango mpuzamahanga gufatira ibihano uwo mutwe.

M23 yo ivuga ko ingabo za Leta n’indi mitwe irimo PARECO, FLDR, Nyatura na Mai Mai aribo bagabye ibitero ku duce turimo Kishishe, birengangije amasezerano y’agahenge yari amaze iminsi ariho.

Imirwano imaze guhosha tariki 30 Ugushyingo, M23 ivuga ko yakoze igikorwa cyo gutaburura imibiri y’abaguye mu bitero, bikorwa hari abaturage n’abandi bayobozi b’inzego z’ibanze muri Kishishe.

Ngo basanze mu bishwe harimo abarwanyi b’iyo mitwe iri ku ruhande rwa Leta 20, ndetse n’abaturage umunani M23 ivuga ko bishwe n’amasusu yayobye.

Muri iri tangazo, u Rwanda rwavuze ko "kugerageza gukemura ibibazo bya RDC binyuze mu guhora guverinoma y’iki gihugu isubira mu binyoma bimwe bitazatanga igisubizo."

"Ubwicanyi bwa Kishishe, ikinyoma cya Guverinoma ya RDC cyageretswe kuri M23, cyakwirakwiriye hose, hadakozwe iperereza bigizwemo uruhare n’urwego rubifitiye ububasha nubwo hari ibimenyetso bigaragaza ko ibyabaye byari imirwano hagati ya M23 n’imitwe yitwaje intwaro ikorana n’Ingabo za RDC. Ibi ni ikimenyetso cy’uburyo akavuyo kari muri Congo gatizwa umurindi ndetse kakaba karahawe intebe mu myaka myinshi ishize."

U Rwanda rwagaragaje ko gukomeza kurushinja gushyigikira M23 bigaragaza ubushake buke amahanga afite mu gukemura ibibazo by’umutekano muke n’amakimbirane muri RDC haherewe mu mizi, ndetse no gukomeza kureberera abayobozi bagize uruhare mu kujenjekera iki kibazo.

Rwagaragaje kandi ko bitumvikana uburyo ingabo z’Umuryango w’Abibumbye zimaze imyaka 22 mu burasirazuba bwa RDC zananiwe gutanga umusaruro, mu gihe arenga miliyari 1$ azigendaho buri mwaka.

Perezida wa Repubulika Iharanira Demokarasi ya Congo, Félix Antoine Tshisekedi akomeje kumvikana mu mvugo zishinja u Rwanda gushyigikira M23, aha yaganiraga n’Umunyamabanga wa Leya ya Amerika ushinjwe Ubabanyi n’amahanga, Antony John Blinken
Yolande Makolo, Umuvugizi wa Guverioma y'u Rwanda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .