U Rwanda rwatanze inyandiko nshya zisaba guta muri yombi abakekwaho Jenoside

Yanditswe na Ishimwe Israel
Kuya 12 Ukuboza 2020 saa 11:50
Yasuwe :
0 0

Mu 2020, Ubushinjacyaha bw’u Rwanda bwatanze inyandiko nshya zisaba guta muri yombi abantu bakekwaho ibyaha bya Jenoside yakorewe Abatutsi bakomeje kwishahisha mu mahanga.

Ubushinjacyaha bw’u Rwanda bumaze gutanga inyandiko 1145 zisaba guta muri yombi abakekwaho uruhare muri Jenoside mu bihugu 33 byo hirya no hino ku Isi, ndetse umubare munini uri muri Afurika.

Umuvugizi w’Ubushinjacyaha, Faustin Nkusi, yabwiye Ikinyamakuru The East African ko gushakisha abakekwaho Jenoside byakomeje kuba ingorabahizi ahanini bishingiye ku bahindura amazina cyangwa bakabeshya ko bapfuye.

Ati “Bamwe mu bakurikiranywe bishyuye televiziyo na radio ngo zitangaze ko bapfuye kugira ngo ibihugu barimo bihagarike kubakurikirana. Abandi bahinduye imyirondoro yabo, ubu babayeho batuje mu buzima bwihishe.’’

Imyaka isaga 26 irashize Jenoside yakorewe Abatutsi igahitana abarenga miliyoni ibaye, ariko hari ibihugu bigicumbikiye abayigizemo uruhare. Inyandiko zatanzwe mu gusaba guverinoma zo ku Isi gufata no kugeza imbere y’ubutabera abakekwaho Jenoside bari ku butaka bwazo kuko hari aho byagiye bigaragara ko nta bushake bwa politiki buhari.

Nkusi yavuze ko abashinjacyaha bagorwa no kubona abakekwa kuko inyandiko zisaba ko batabwa muri yombi hari igihe zitakirwa n’ibihugu bibacumbikiye.

Yakomeje ati “Dukomeza gutanga amakuru ajyanye n’inyandiko mpuzamahanga zisaba itabwa muri yombi no gukusanya ibimenyetso byinshi. Dukeneye gukorana na Guverinoma ku Isi hose ariko ntibiri ku rwego tubyifuzaho.’’

“Nta yandi mahitamo dufite usibye gutegereza. Jenoside ni icyaha kidasaza, tuzakomeza kugira uruhare rwacu kandi twizeye ko ubutabera buzatangwa.’’

Umubare w’inyandiko zisaba gutabwa muri yombi ku bihishe muri Repubulika Iharanira Demokarasi ya Congo wageze kuri 408, uvuye kuri 372 muri Kamena 2019.

Izatanzwe muri Uganda ni 277 zavuye kuri 260 muri Kamena 2019; Malawi ni 63; Tanzania ni 52 na Kenya yahawe 35.

Ku Mugabane w’u Burayi, inyandiko zohererejwe u Bufaransa zageze kuri 48 zivuye kuri 42, mu gihe u Bubiligi bwahawe inyandiko 40 zivuye kuri 39.

Leta Zunze Ubumwe za Amerika zahawe inyandiko zisaba itabwa muri yombi ry’abakekwaho Jenoside 23, u Buholandi 18, Canada 14 n’u Bwongereza bwahawe eshanu.

Ibihugu icyenda bimaze kuburanisha 23 bakekwaho uruhare muri Jenoside, naho abamaze koherezwa mu Rwanda ni abantu 24 nabo bamaze koherezwa n’ibihugu icyenda; bigaragaza umubare muto w’abakurikiranywe.

Umunyamategeko w’Umuryango Uharanira Inyungu z’Abacitse ku Icumu rya Jenoside yakorewe Abatutsi, IBUKA, Ndabirora Kalinda Jean Damascène, yavuze ko umubare w’abamaze kuburanishwa n’ibihugu byo hanze udashimishije.

Ati “Mu kwerekana ko bikora, ibihugu bimwe byo ku Mugabane w’u Burayi bwaburanishije bamwe ariko bahabwa ibihano byoroheje ugereranyije n’ibyaha bikomeye bakoze.’’

Yavuze ko ibihugu byose bifite inshingano zo kurwanya Jenoside no kudaha ubuhungiro abakekwaho kuyigiramo uruhare.

Ku wa Mbere w’iki cyumweru, Depite mu Nteko Ishinga Amategeko y’u Bwongereza, Stuart Polak, yasabye Guverinoma y’igihugu cye kugeza imbere y’ubutabera batanu bakekwaho uruhare muri Jenoside bakidegembya, kandi bigakorwa mbere y’uko mu Rwanda habera inama y’Abakuru b’Ibihugu bo mu Muryango w’Ibihugu bikoresha Icyongereza ‘Commonwealth’, CHOGM, izahabera mu Cyumweru cya tariki ya 21 Kamena 2021.

Muri Gicurasi 2020, Kabuga Félicien yafatiwe mu Mujyi wa Paris mu Bufaransa nyuma y’imyaka aca mu rihumye abamushakisha, aho yihishaga akoresha umwirondoro w’umuhimbano.

Indi nkuru wasoma: U Bwongereza bwasabwe kugeza imbere y’ubutabera abakekwaho Jenoside mbere ya CHOGM izabera i Kigali

Umuvugizi w'Ubushinjacyaha, Faustin Nkusi, yavuze ko gushakisha abakekwaho Jenoside bikiri ingorabahizi kubera abahindura amazina cyangwa bakabeshya ko bapfuye

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .