U Rwanda rwasinyanye na Tunisie amasezerano yo gufungurirana ikirere

Yanditswe na IGIHE
Kuya 10 Gashyantare 2020 saa 05:11
Yasuwe :
0 0

U Rwanda na Tunisie byasinyanye amasezerano yo gufungurirana ikirere, azatuma sosiyete z’ubwikorezi bwo mu kirere z’ibihugu byombi zibikoreramo ingendo.

Aya masezerano yasinyiwe mu nama ya 33 isanzwe y’Umuryango wa Afurika yunze Ubumwe (AU), yaberaga i Addis Ababa muri Ethiopia kuri iki Cyumweru.

Minisitiri w’Ububanyi n’amahanga n’ubutwererane, Dr Vincent Biruta n’Umunyamabanga wa Leta muri Minisiteri y’Ububanyi n’Amahanga ya Tunisie, Sabri Bachtobji, nibo basinye amasezerano yo gufungurirana ikirere hagati y’ibihugu byombi.

Aya masezerano asinywe akurikira ayo u Rwanda na Somalia byasinyanye kuwa Gatanu w’icyumweru gishize, akaba yaruzuzaga ay’ijana mu bijyanye no gufungurirana ikirere rushyizeho umukono hamwe n’ibindi bihugu.

Icyo gihe Minisitiri w’Ibikorwa remezo, Amb. Gatete Claver yavuze ko bigaragaza ko u Rwanda rukomeje gutera intambwe mu koroshya ingendo z’indege muri Afurika no guharurira amayira isoko rusange ry’uyu mugabane.

Yakomeje ati “Iki gikorwa gikurikiye ibindi byinshi, uretse isoko rusange rya Afurika, Perezida wacu yijeje ko u Rwanda rurimo kureba uko rwavanaho ikiguzi cya visa ku bihugu bigize Umuryango wa Afurika Yunze Ubumwe, ibihugu bigize Commonwealth na Francophonie. Ibi ni ukugira ngo habeho ubucuruzi bwisanzuye, ingendo z’abantu n’ibintu no gusangira ikirere bigerweho.”

Bitewe n’aya masezerano, RwandAir ishobora gutangiza ingendo muri Tunisie n’ahandi u Rwanda rufite aya masezerano, kimwe n’uko sosiyete y’ubwikorezi bwo mu kirere ya Tunisie yabikora bikarushaho koroshya ingendo z’abaturage n’ubucuruzi.

Minisitiri Biruta na Sabri Bachtobji wa Tunisie basinya amasezerano yo gufungurirana ikirere
Minisitiri Biruta na Sabri Bachtobji wa Tunisie nyuma yo gusinya amasezerano yo gufungurirana ikirere

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .